১০. খোমদাযকত্থেৰঅপদানৱণ্ণনা

নগৰে বন্ধুমতিযাতিআদিকং আযস্মতো খোমদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং কুলগেহে নিব্বত্তো ৱযপ্পত্তো সাসনে অভিপ্পসন্নো ৰতনত্তযমামকো ৱিপস্সিস্স ভগৱতো সন্তিকে ধম্মং সুত্ৱা পসন্নমানসো খোমদুস্সেন পূজং অকাসি. সো তদেৱ মূলং কত্ৱা যাৱজীৱং পুঞ্ঞানি কত্ৱা ততো দেৱলোকে নিব্বত্তো. ছসু দেৱেসু অপৰাপৰং দিব্বসুখং অনুভৱিত্ৱা ততো চৱিত্ৱা মনুস্সলোকে চক্কৱত্তিআদিঅনেকৱিধমনুস্সসম্পত্তিং অনুভৱিত্ৱা পৰিপাকগতে পুঞ্ঞসম্ভাৰে ইমস্মিং বুদ্ধুপ্পাদে কুলগেহে নিব্বত্তো ৱযপ্পত্তো সত্থু সন্তিকে ধম্মং সুত্ৱা পটিলদ্ধসদ্ধো পব্বজিত্ৱা ৱিপস্সনং ৱড্ঢেত্ৱা নচিৰস্সেৱ অৰহত্তং পাপুণি. কতপুঞ্ঞনামেন খোমদাযকত্থেৰোতি পাকটো.

১৮৪. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং দস্সেন্তো নগৰে বন্ধুমতিযাতিআদিমাহ. তত্থ বন্ধু ৱুচ্চতি ঞাতকো, তে বন্ধূ যস্মিং নগৰে অঞ্ঞমঞ্ঞং সঙ্ঘটিতা ৱসন্তি, তং নগৰং ‘‘বন্ধুমতী’’তি ৱুচ্চতি. ৰোপেমি বীজসম্পদন্তি দানসীলাদিপুঞ্ঞবীজসম্পত্তিং ৰোপেমি পট্ঠপেমীতি অত্থো.

খোমদাযকত্থেৰঅপদানৱণ্ণনা সমত্তা.

ততিযস্স সুভূতিৱগ্গস্স ৱণ্ণনা সমত্তা.

চতুভাণৱাৰৱণ্ণনা নিট্ঠিতা.