৮. উত্তিযত্থেৰঅপদানৱণ্ণনা

চন্দভাগানদীতীৰেতিআদিকং আযস্মতো উত্তিযত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে চন্দভাগানদিযং সুসুমাৰো হুত্ৱা নিব্বত্তো নদীতীৰং উপগতং ভগৱন্তং দিস্ৱা পসন্নচিত্তো পাৰং নেতুকামো তীৰসমীপেযেৱ নিপজ্জি. ভগৱা তস্স অনুকম্পায পিট্ঠিযং পাদে ঠপেসি. সো তুট্ঠো উদগ্গো পীতিৱেগেন মহুস্সাহো হুত্ৱা সোতং ছিন্দন্তো সীঘেন জৱেন ভগৱন্তং পৰতীৰং নেসি. ভগৱা তস্স চিত্তপ্পসাদং ঞত্ৱা ‘‘অযং ইতো চুতো দেৱলোকে নিব্বত্তিস্সতি, ততো পট্ঠায সুগতীসুযেৱ সংসৰন্তো ইতো চতুন্নৱুতিকপ্পে অমতং পাপুণিস্সতী’’তি ব্যাকৰিত্ৱা পক্কামি.

সো তথা সুগতীসুযেৱ সংসৰন্তো ইমস্মিং বুদ্ধুপ্পাদে সাৱত্থিযং অঞ্ঞতৰস্স ব্ৰাহ্মণস্স পুত্তো হুত্ৱা নিব্বত্তি, উত্তিযোতিস্স নামং অকংসু. সো ৱযপ্পত্তো ‘‘অমতং পৰিযেসিস্সামী’’তি পৰিব্বাজকো হুত্ৱা একদিৱসং ভগৱন্তং দিস্ৱা উপসঙ্কমিত্ৱা ৱন্দিত্ৱা ধম্মং সুত্ৱা পটিলদ্ধসদ্ধো হুত্ৱা সাসনে পব্বজিত্ৱা সীলদিট্ঠীনং অৱিসোধিতত্তা ৱিসেসং নিব্বত্তেতুং অসক্কোন্তো অঞ্ঞং ভিক্খুং ৱিসেসং নিব্বত্তেত্ৱা অঞ্ঞং ব্যাকৰোন্তং দিস্ৱা সত্থাৰং উপসঙ্কমিত্ৱা সঙ্খেপেন ওৱাদং যাচি. সত্থাপি তস্স, ‘‘তস্মাতিহ ত্ৱং, উত্তিয, আদিমেৱ ৱিসোধেহী’’তিআদিনা (সং. নি. ৫.৩৮২) সঙ্খেপেনেৱ ওৱাদং অদাসি. সো সত্থু ওৱাদে ঠত্ৱা ৱিপস্সনং আৰভি. তস্স আৰদ্ধৱিপস্সকস্স আবাধো উপ্পজ্জি. উপ্পন্নে আবাধে জাতসংৱেগো ৱীৰিযাৰম্ভৱত্থুং ঞত্ৱা ৱিপস্সনং ৱড্ঢেত্ৱা অৰহত্তং পাপুণি.

১৬৯. এৱং সো কতসম্ভাৰানুৰূপেন পত্তঅৰহত্তফলো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো চন্দভাগানদীতীৰেতিআদিমাহ. তত্থ চন্দভাগানদীতীৰেতি পৰিসুদ্ধপণ্ডৰপুলিনতলেহি চ পভাসম্পন্নপসন্নমধুৰোদকপৰিপুণ্ণতায চ চন্দপ্পভাকিৰণসস্সিৰীকাভা নদমানা সদ্দং কুৰুমানা গচ্ছতীতি চন্দভাগানদী, তস্সা চন্দভাগানদিযা তীৰে সুসুমাৰো অহোসিন্তি সম্বন্ধো. তত্থ সুসুমাৰোতি খুদ্দকমচ্ছগুম্বে খণ্ডাখণ্ডিকং কৰোন্তো মাৰেতীতি সুসুমাৰো, চণ্ডমচ্ছো কুম্ভীলোতি অত্থো. সভোজনপসুতোহন্তি অহং সভোজনে সকগোচৰে পসুতো ব্যাৱটো. নদীতিত্থং অগচ্ছহন্তি ভগৱতো আগমনকালে অহং নদীতিত্থং অগচ্ছিং পত্তোম্হি.

১৭০. সিদ্ধত্থো তম্হি সমযেতি তস্মিং মম তিত্থগমনকালে সিদ্ধত্থো ভগৱা অগ্গপুগ্গলো সব্বসত্তেসু জেট্ঠো সেট্ঠো সযম্ভূ সযমেৱ ভূতো জাতো বুদ্ধভূতো সো ভগৱা নদিং তৰিতুকামো নদীতীৰং উপাগমি.

১৭২. পেত্তিকং ৱিসযং ময্হন্তি ময্হং পিতুপিতামহাদীহি পৰম্পৰানীতং, যদিদং সম্পত্তসম্পত্তমহানুভাৱানং তৰণন্তি অত্থো.

১৭৩. মম উগ্গজ্জনং সুত্ৱাতি ময্হং উগ্গজ্জনং আৰাধনং সুত্ৱা মহামুনি ভগৱা অভিৰুহীতি সম্বন্ধো. সেসং উত্তানত্থমেৱাতি.

উত্তিযত্থেৰঅপদানৱণ্ণনা সমত্তা.