৭. পুলিনপূজকত্থেৰঅপদানৱণ্ণনা

ৱিপস্সিস্স ভগৱতোতিআদিকং আযস্মতো পুলিনপূজকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ৱিপস্সিস্স ভগৱতো কালে একস্মিং কুলে নিব্বত্তো সাসনে পসন্নচিত্তো চেতিযঙ্গণবোধিযঙ্গণেসু পুৰাণৱালুকং অপনেত্ৱা নৱং মুত্তাদলসদিসপণ্ডৰপুলিনং ওকিৰিত্ৱা মাড়কং অলঙ্কৰি. তেন কম্মেন সো দেৱলোকে নিব্বত্তো তত্থ দিব্বেহি ৰতনেহি ৱিজ্জোতমানে অনেকযোজনে কনকৱিমানে দিব্বসম্পত্তিং অনুভৱিত্ৱা ততো চুতো মনুস্সলোকে সত্তৰতনসম্পন্নো চক্কৱত্তী ৰাজা হুত্ৱা মনুস্সসম্পত্তিং অনুভৱিত্ৱা অপৰাপৰং সংসৰন্তো ইমস্মিং বুদ্ধুপ্পাদে ৱিভৱসম্পন্নে একস্মিং কুলে নিব্বত্তো সাসনে পসন্নো পব্বজিত্ৱা ৱিপস্সনং ৱড্ঢেত্ৱা অৰহত্তং পাপুণি. সো অত্তনো কতপুঞ্ঞনামসদিসেন নামেন পুলিনপূজকত্থেৰোতি পাকটো.

১৬৫. সো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং দস্সেন্তো ৱিপস্সিস্স ভগৱতোতিআদিমাহ. তত্থ ৱিৱিধং পস্সতীতি ৱিপস্সী, ৱিৱিচ্চ পস্সতীতি ৱা ৱিপস্সী, ৱিৱিধে অত্তত্থপৰত্থাদিভেদে অত্থে পস্সতীতি ৱা ৱিপস্সী, ৱিৱিধে ৱোহাৰপৰমত্থাদিভেদে পস্সতীতি ৱা ৱিপস্সী, তস্স ৱিপস্সিস্স বোধিযা পাদপুত্তমে উত্তমে বোধিৰুক্খমণ্ডলমাড়কে পুৰাণপুলিনং ৱালুকং ছড্ডেত্ৱা সুদ্ধং পণ্ডৰং পুলিনং আকিৰিং সন্থৰিং. সেসং সুৱিঞ্ঞেয্যমেৱাতি.

পুলিনপূজকত্থেৰঅপদানৱণ্ণনা সমত্তা.