৬. ধূপদাযকত্থেৰঅপদানৱণ্ণনা

সিদ্ধত্থস্স ভগৱতোতিআদিকং আযস্মতো ধূপদাযকত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো সিদ্ধত্থস্স ভগৱতো কালে কুলগেহে নিব্বত্তো সিদ্ধত্থে ভগৱতি চিত্তং পসাদেত্ৱা তস্স ভগৱতো গন্ধকুটিযং চন্দনাগৰুকাড়ানুসাৰিআদিনা কতেহি অনেকেহি ধূপেহি ধূপপূজং অকাসি. সো তেন পুঞ্ঞেন দেৱেসু চ মনুস্সেসু চ উভযসম্পত্তিযো অনুভৱন্তো নিব্বত্তনিব্বত্তভৱে পূজনীযো হুত্ৱা ইমস্মিং বুদ্ধুপ্পাদে একস্মিং কুলগেহে নিব্বত্তো পুঞ্ঞসম্ভাৰানুভাৱেন সাসনে পব্বজিত্ৱা ৱিপস্সনং ৱড্ঢেত্ৱা অৰহত্তং পত্ৱা কতধূপপূজাপুঞ্ঞত্তা নামেন ধূপদাযকত্থেৰোতি সব্বত্থ পাকটো. সো পত্তঅৰহত্তফলো অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং দস্সেন্তো সিদ্ধত্থস্স ভগৱতোতিআদিমাহ. সিদ্ধো পৰিপুণ্ণো সব্বঞ্ঞুতঞ্ঞাণাদিগুণসঙ্খাতো অত্থো পযোজনং যস্স ভগৱতো সোযং সিদ্ধত্থো, তস্স সিদ্ধত্থস্স ভগৱতো ভগ্যাদিগুণৱন্তস্স লোকজেট্ঠস্স সকললোকুত্তমস্স তাদিনো ইট্ঠানিট্ঠেসু তাদিসস্স অচলসভাৱস্সাতি অত্থো. সেসং উত্তানত্থমেৱাতি.

ধূপদাযকত্থেৰঅপদানৱণ্ণনা সমত্তা.