১. সুভূতিত্থেৰঅপদানৱণ্ণনা

হিমৱন্তস্সাৱিদূৰেতিআদিকং আযস্মতো সুভূতিত্থেৰস্স অপদানং. অযম্পি পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো ইতো কপ্পসতসহস্সমত্থকে অনুপ্পন্নেযেৱ পদুমুত্তৰে ভগৱতি লোকনাথে হংসৱতীনগৰে অঞ্ঞতৰস্স ব্ৰাহ্মণমহাসালস্স একপুত্তকো হুত্ৱা নিব্বত্তি, তস্স নন্দমাণৱোতি নামং অকংসু. সো ৱযপ্পত্তো তযো ৱেদে উগ্গণ্হিত্ৱা তত্থ সাৰং অপস্সন্তো অত্তনো পৰিৱাৰভূতেহি চতুচত্তালীসায মাণৱসহস্সেহি সদ্ধিং পব্বতপাদে ইসিপব্বজ্জং পব্বজিত্ৱা অট্ঠ সমাপত্তিযো পঞ্চাভিঞ্ঞাযো চ নিব্বত্তেসি. অন্তেৱাসিকানম্পি কম্মট্ঠানং আচিক্খি. তেপি নচিৰস্সেৱ ঝানলাভিনো অহেসুং.

তেন চ সমযেন পদুমুত্তৰো ভগৱা লোকে উপ্পজ্জিত্ৱা হংসৱতীনগৰং উপনিস্সায ৱিহৰন্তো একদিৱসং পচ্চূসসমযে লোকং ৱোলোকেন্তো নন্দতাপসস্স অন্তেৱাসিকজটিলানং অৰহত্তূপনিস্সযং, নন্দতাপসস্স চ দ্ৱীহঙ্গেহি সমন্নাগতস্স সাৱকট্ঠানন্তৰস্স পত্থনং দিস্ৱা পাতোৱ সৰীৰপটিজগ্গনং কত্ৱা পুব্বণ্হসমযে পত্তচীৱৰমাদায অঞ্ঞং কঞ্চি অনামন্তেত্ৱা সীহো ৱিয একচৰো নন্দতাপসস্স অন্তেৱাসিকেসু ফলাফলত্থায গতেসু ‘‘বুদ্ধভাৱং মে জানাতূ’’তি পস্সন্তস্সেৱ নন্দতাপসস্স আকাসতো ওতৰিত্ৱা পথৱিযং পতিট্ঠাসি. নন্দতাপসো বুদ্ধানুভাৱঞ্চেৱ লক্খণপাৰিপূৰিঞ্চ দিস্ৱা লক্খণমন্তে সম্মসিত্ৱা ‘‘ইমেহি লক্খণেহি সমন্নাগতো নাম অগাৰং অজ্ঝাৱসন্তো ৰাজা হোতি চক্কৱত্তী, পব্বজন্তো লোকে ৱিৱটচ্ছেদো সব্বঞ্ঞূ বুদ্ধো হোতি, অযং পুৰিসাজানীযো নিস্সংসযং বুদ্ধো’’তি ঞত্ৱা পচ্চুগ্গমনং কত্ৱা পঞ্চপতিট্ঠিতেন ৱন্দিত্ৱা আসনং পঞ্ঞাপেত্ৱা অদাসি. নিসীদি ভগৱা পঞ্ঞত্তে আসনে. নন্দতাপসোপি অত্তনো অনুচ্ছৱিকং আসনং গহেত্ৱা একমন্তং নিসীদি. তস্মিং সমযে চতুচত্তালীসসহস্সজটিলা পণীতপণীতানি ওজৱন্তানি ফলাফলানি গহেত্ৱা আচৰিযস্স সন্তিকং সম্পত্তা বুদ্ধানঞ্চেৱ আচৰিযস্স চ নিসিন্নাকাৰং ওলোকেত্ৱা আহংসু – ‘‘আচৰিয, মযং ‘ইমস্মিং লোকে তুম্হেহি মহন্ততৰো নত্থী’তি ৱিচৰাম, অযং পন পুৰিসো তুম্হেহি মহন্ততৰো মঞ্ঞে’’তি. নন্দতাপসো – ‘‘তাতা, কিং ৱদেথ, তুম্হে সাসপেন সদ্ধিং অট্ঠসট্ঠিযোজনসতসহস্সুব্বেধং সিনেৰুং উপমেতুং ইচ্ছথ, সব্বঞ্ঞুবুদ্ধেন সদ্ধিং মা মং উপমিত্থা’’তি আহ. অথ তে তাপসা – ‘‘সচে অযং ওৰকো অভৱিস্স, ন অম্হাকং আচৰিযো এৱং উপমং আহৰেয্য. যাৱ মহাৱতাযং পুৰিসাজানীযো’’তি পাদেসু নিপতিত্ৱা সিৰসা ৱন্দিংসু. অথ তে আচৰিযো আহ – ‘‘তাতা, অম্হাকং বুদ্ধানং অনুচ্ছৱিকো দেয্যধম্মো নত্থি, ভগৱা চ ভিক্খাচাৰৱেলাযং ইধাগতো, তস্মা মযং যথাবলং দেয্যধম্মং দস্সাম, তুম্হেহি যং যং পণীতং ফলাফলং আভতং, তং তং আহৰথা’’তি আহৰাপেত্ৱা সহত্থেনেৱ ধোৱিত্ৱা সযং তথাগতস্স পত্তে পতিট্ঠাপেসি. সত্থাৰা ফলাফলে পটিগ্গহিতমত্তে দেৱতা দিব্বোজং পক্খিপিংসু. তাপসো উদকম্পি সযমেৱ পৰিস্সাৱেত্ৱা অদাসি. ততো ভোজনকিচ্চং নিট্ঠাপেত্ৱা নিসিন্নে সত্থৰি সব্বে অন্তেৱাসিকে পক্কোসিত্ৱা সত্থু সন্তিকে সাৰণীযং কথং কথেন্তো নিসীদি. সত্থা ‘‘ভিক্খুসঙ্ঘো আগচ্ছতূ’’তি চিন্তেসি. সত্থু চিত্তং ঞত্ৱা সতসহস্সমত্তা খীণাসৱা আগন্ত্ৱা সত্থাৰং ৱন্দিত্ৱা অট্ঠংসু.

অথ নন্দতাপসো অন্তেৱাসিকে আমন্তেসি – ‘‘তাতা, বুদ্ধানং নিসিন্নাসনম্পি নীচং, সমণসতসহস্সস্সপি আসনং নত্থি. তুম্হেহি অজ্জ উড়াৰং ভগৱতো ভিক্খুসঙ্ঘস্স চ সক্কাৰং কাতুং ৱট্টতি, পব্বতপাদতো ৱণ্ণগন্ধসম্পন্নানি পুপ্ফানি আহৰথা’’তি আহ. অচিন্তেয্যত্তা ইদ্ধিৱিসযস্স তে মুহুত্তেনেৱ ৱণ্ণগন্ধৰসসম্পন্নানি পুপ্ফানি আহৰিত্ৱা বুদ্ধানং যোজনপ্পমাণং পুপ্ফাসনং পঞ্ঞাপেসুং. অগ্গসাৱকানং তিগাৱুতং, সেসভিক্খূনং অড্ঢযোজনাদিভেদং, সঙ্ঘনৱকস্স উসভমত্তং পঞ্ঞাপেসুং. এৱং পঞ্ঞত্তেসু আসনেসু নন্দতাপসো তথাগতস্স পুৰতো অঞ্জলিং পগ্গয্হ ঠিতো, ‘‘ভন্তে, অম্হাকং দীঘৰত্তং হিতায সুখায ইমং পুপ্ফাসনং আৰুয্হ নিসীদথা’’তি আহ. নিসীদি ভগৱা পুপ্ফাসনে. এৱং নিসিন্নে সত্থৰি সত্থু আকাৰং ঞত্ৱা ভিক্খূ অত্তনো অত্তনো পত্তাসনে নিসীদিংসু. নন্দতাপসো মহন্তং পুপ্ফচ্ছত্তং গহেত্ৱা তথাগতস্স মত্থকে ধাৰেন্তো অট্ঠাসি. সত্থা ‘‘তাপসানং অযং সক্কাৰো মহপ্ফলো হোতূ’’তি নিৰোধসমাপত্তিং সমাপজ্জি. সত্থু সমাপন্নভাৱং ঞত্ৱা ভিক্খূপি সমাপত্তিং সমাপজ্জিংসু. তথাগতে সত্তাহং নিৰোধং সমাপজ্জিত্ৱা নিসিন্নে অন্তেৱাসিকা ভিক্খাচাৰকালে সম্পত্তে ৱনমূলফলাফলং পৰিভুঞ্জিত্ৱা সেসকালে বুদ্ধানং অঞ্জলিং পগ্গয্হ অট্ঠংসু. নন্দতাপসো পন ভিক্খাচাৰম্পি অগন্ত্ৱা পুপ্ফচ্ছত্তং ধাৰেন্তোযেৱ সত্তাহং পীতিসুখেনেৱ ৱীতিনামেসি.

সত্থা নিৰোধতো ৱুট্ঠায অৰণৱিহাৰিঅঙ্গেন দক্খিণেয্যঙ্গেন চাতি দ্ৱীহি অঙ্গেহি সমন্নাগতং একং সাৱকং ‘‘ইসিগণস্স পুপ্ফাসনানুমোদনং কৰোহী’’তি আণাপেসি. সো চক্কৱত্তিৰঞ্ঞো সন্তিকা পটিলদ্ধমহালাভো মহাযোধো ৱিয তুট্ঠমানসো অত্তনো ৱিসযে ঠত্ৱা তেপিটকং বুদ্ধৱচনং সম্মসিত্ৱা অনুমোদনমকাসি. তস্স দেসনাৱসানে সত্থা সযং ধম্মং দেসেসি. সত্থু দেসনাৱসানে সব্বেপি চতুচত্তালীসসহস্সতাপসা অৰহত্তং পাপুণিংসু. সত্থা – ‘‘এথ ভিক্খৱো’’তি হত্থং পসাৰেসি. তেসং তাৱদেৱ কেসমস্সূ অন্তৰধাযিংসু. অট্ঠ পৰিক্খাৰা সৰীৰে পটিমুক্কাৱ অহেসুং. তে সট্ঠিৱস্সিকত্থেৰা ৱিয সত্থাৰং পৰিৱাৰযিংসু. নন্দতাপসো পন ৱিক্খিত্তচিত্ততায ৱিসেসং নাধিগঞ্ছি. তস্স কিৰ অৰণৱিহাৰিত্থেৰস্স ধম্মং সোতুং আৰদ্ধকালতো পট্ঠায – ‘‘অহো ৱতাহম্পি অনাগতে একস্স বুদ্ধস্স সাসনে ইমিনা সাৱকেন লদ্ধগুণং লভেয্য’’ন্তি চিত্তং উদপাদি. সো তেন ৱিতক্কেন মগ্গফলপটিৱেধং কাতুং নাসক্খি. তথাগতং পন ৱন্দিত্ৱা অঞ্জলিং পগ্গয্হ সম্মুখে ঠিতো এৱমাহ – ‘‘ভন্তে, যেন ভিক্খুনা ইসিগণস্স পুপ্ফাসনানুমোদনা কতা, কো নামাযং তুম্হাকং সাসনে’’তি? ‘‘অৰণৱিহাৰিঅঙ্গেন চ দক্খিণেয্যঙ্গেন চ এতদগ্গট্ঠানং পত্তো এসো ভিক্খূ’’তি. ‘‘ভন্তে, য্ৱাযং মযা সত্তাহং পুপ্ফচ্ছত্তং ধাৰেন্তেন সক্কাৰো কতো, তেন অধিকাৰেন অঞ্ঞং সম্পত্তিং ন পত্থেমি, অনাগতে পন একস্স বুদ্ধস্স সাসনে অযং থেৰো ৱিয দ্ৱীহঙ্গেহি সমন্নাগতো সাৱকো ভৱেয্য’’ন্তি পত্থনং অকাসি.

সত্থা ‘‘সমিজ্ঝিস্সতি নু খো ইমস্স তাপসস্স পত্থনা’’তি অনাগতংসঞাণং পেসেত্ৱা ওলোকেন্তো কপ্পসতসহস্সং অতিক্কমিত্ৱা সমিজ্ঝনকভাৱং দিস্ৱা, ‘‘তাপস, ন তে অযং পত্থনা মোঘং ভৱিস্সতি, অনাগতে কপ্পসতসহস্সং অতিক্কমিত্ৱা গোতমো নাম বুদ্ধো উপ্পজ্জিস্সতি, তস্স সন্তিকে সমিজ্ঝিস্সতী’’তি ধম্মকথং কথেত্ৱা ভিক্খুসঙ্ঘপৰিৱুতো আকাসং পক্খন্দি. নন্দতাপসো যাৱ চক্খুপথং ন সমতিক্কমতি, তাৱ সত্থু ভিক্খুসঙ্ঘস্স চ অঞ্জলিং পগ্গহেত্ৱা অট্ঠাসি. সো অপৰভাগে কালেন কালং সত্থাৰং উপসঙ্কমিত্ৱা ধম্মং সুণিত্ৱা অপৰিহীনজ্ঝানোৱ কালং কত্ৱা ব্ৰহ্মলোকে নিব্বত্তো. ততো পন চুতো অপৰানিপি পঞ্চ জাতিসতানি পব্বজিত্ৱা আৰঞ্ঞকোৱ অহোসি, কস্সপসম্মাসম্বুদ্ধকালেপি পব্বজিত্ৱা আৰঞ্ঞকো হুত্ৱা গতপচ্চাগতৱত্তং পূৰেসি. এতং কিৰ ৱত্তং অপৰিপূৰেত্ৱা মহাসাৱকভাৱং পাপুণন্তা নাম নত্থি, গতপচ্চাগতৱত্তং পন আগমট্ঠকথাসু ৱুত্তনযেনেৱ ৱেদিতব্বং. সো ৱীসতিৱস্সসহস্সানি গতপচ্চাগতৱত্তং পূৰেত্ৱা কালং কত্ৱা তাৱতিংসদেৱলোকে নিব্বত্তি.

এৱং সো তাৱতিংসভৱনে অপৰাপৰং উপ্পজ্জনৱসেন দিব্বসম্পত্তিং অনুভৱিত্ৱা ততো চুতো মনুস্সলোকে অনেকসতক্খত্তুং চক্কৱত্তিৰাজা পদেসৰাজা চ হুত্ৱা উড়াৰং মনুস্সসম্পত্তিং অনুভৱিত্ৱা অম্হাকং ভগৱতো উপ্পন্নকালে সাৱত্থিযং সুমনসেট্ঠিস্স গেহে অনাথপিণ্ডিকস্স কনিট্ঠো হুত্ৱা নিব্বত্তি. সুভূতীতিস্স নামং অহোসি.

তেন চ সমযেন অম্হাকং ভগৱা লোকে উপ্পজ্জিত্ৱা পৱত্তিতৱৰধম্মচক্কো অনুপুব্বেন ৰাজগহং গন্ত্ৱা তত্থ ৱেড়ুৱনপটিগ্গহণাদিনা লোকানুগ্গহং কৰোন্তো ৰাজগহং উপনিস্সায সীতৱনে ৱিহাসি. তদা অনাথপিণ্ডিকো সেট্ঠি সাৱত্থিযং উট্ঠানকং ভণ্ডং গহেত্ৱা অত্তনো সহাযস্স ৰাজগহসেট্ঠিনো গেহং গন্ত্ৱা বুদ্ধুপ্পাদং সুত্ৱা সত্থাৰং সীতৱনে ৱিহৰন্তং উপসঙ্কমিত্ৱা পঠমদস্সনেনেৱ সোতাপত্তিফলে পতিট্ঠায সত্থাৰং সাৱত্থিং আগমনত্থায যাচিত্ৱা ততো পঞ্চচত্তালীসযোজনে মগ্গে যোজনে যোজনে সতসহস্সপৰিচ্চাগেন ৱিহাৰে পতিট্ঠাপেত্ৱা সাৱত্থিযং অট্ঠকৰীসপ্পমাণং জেতস্স কুমাৰস্স উয্যানভূমিং কোটিসন্থাৰেন কিণিত্ৱা তত্থ ভগৱতো ৱিহাৰং কাৰেত্ৱা অদাসি. ৱিহাৰমহদিৱসে অযং সুভূতিকুটুম্বিকো অনাথপিণ্ডিকসেট্ঠিনা সদ্ধিং গন্ত্ৱা ধম্মং সুণন্তো সদ্ধং পটিলভিত্ৱা পব্বজি. সো উপসম্পন্নো দ্ৱে মাতিকা পগুণা কত্ৱা কম্মট্ঠানং কথাপেত্ৱা অৰঞ্ঞে সমণধম্মং কৰোন্তো মেত্তাঝানং নিব্বত্তেত্ৱা তং পাদকং কত্ৱা ৱিপস্সনং ৱড্ঢেত্ৱা অৰহত্তং পাপুণি.

সো ধম্মং দেসেন্তো যস্মা সত্থাৰা দেসিতনিযামেন অনোদিস্সকং কত্ৱা দেসেতি, তস্মা অৰণৱিহাৰীনং অগ্গো নাম জাতো. যস্মা চ পিণ্ডায চৰন্তো ঘৰে ঘৰে মেত্তাঝানং সমাপজ্জিত্ৱা ৱুট্ঠায ভিক্খং পটিগ্গণ্হাতি ‘‘এৱং দাযকানং মহপ্ফলং ভৱিস্সতী’’তি, তস্মা দক্খিণেয্যানং অগ্গো নাম জাতো. তেন নং ভগৱা ‘‘এতদগ্গং, ভিক্খৱে, মম সাৱকানং ভিক্খূনং অৰণৱিহাৰীনং দক্খিণেয্যানঞ্চ যদিদং সুভূতী’’তি (অ. নি. ১.১৯৮, ২০১) দ্ৱযঙ্গসমন্নাগতে অগ্গট্ঠানে ঠপেসি. এৱমযং মহাথেৰো অত্তনা পূৰিতপাৰমীনং ফলস্স মত্থকং অৰহত্তং পত্ৱা লোকে অভিঞ্ঞাতো অভিলক্খিতো হুত্ৱা বহুজনহিতায জনপদচাৰিকং চৰন্তো অনুপুব্বেন ৰাজগহং অগমাসি.

ৰাজা বিম্বিসাৰো থেৰস্স আগমনং সুত্ৱা উপসঙ্কমিত্ৱা ৱন্দিত্ৱা ‘‘ইধেৱ, ভন্তে, ৱসথ, ৱসনট্ঠানং ৱো কৰিস্সামী’’তি ৱত্ৱা পক্কন্তো ৱিস্সৰি. থেৰো সেনাসনং অলভন্তো অব্ভোকাসে ৱীতিনামেসি. থেৰস্সানুভাৱেন দেৱো ন ৱস্সতি. মনুস্সা অৱুট্ঠিতায উপদ্দুতা ৰঞ্ঞো নিৱেসনদ্ৱাৰে উক্কুট্ঠিং অকংসু. ৰাজা ‘‘কেন নু খো কাৰণেন দেৱো ন ৱস্সতী’’তি ৱীমংসন্তো ‘‘থেৰস্স অব্ভোকাসৱাসেন মঞ্ঞে ন ৱস্সতী’’তি চিন্তেত্ৱা তস্স পণ্ণকুটিং কাৰাপেত্ৱা ‘‘ইমিস্সং, ভন্তে, পণ্ণকুটিযং ৱসথা’’তি ৱত্ৱা ৱন্দিত্ৱা পক্কামি. থেৰো কুটিং পৱিসিত্ৱা তিণসন্থাৰকে পল্লঙ্কেন নিসীদি. তদা দেৱো থোকং থোকং ফুসাযতি, ন সম্মাধাৰং অনুপৱেচ্ছতি. অথ থেৰো লোকস্স অৱুট্ঠিকভযং ৱিধমিতুকামো অত্তনো অজ্ঝত্তিকবাহিৰৱত্থুকস্স পৰিস্সযস্স অভাৱং পৱেদেন্তো ‘‘ছন্না মে কুটিকা’’তি (থেৰগা. ১) গাথমাহ. তস্সত্থো থেৰগাথাযং ৱুত্তোযেৱ.

কস্মা পনেতে মহাথেৰা অত্তনো গুণে পকাসেন্তীতি? ইমিনা দীঘেন অদ্ধুনা অনধিগতপুব্বং পৰমগম্ভীৰং অতিৱিয সন্তং পণীতং অত্তনা অধিগতলোকুত্তৰধম্মং পচ্চৱেক্খিত্ৱা পীতিৱেগসমুস্সাহিতউদানদীপনত্থং সাসনস্স নিয্যানিকভাৱৱিভাৱনত্থঞ্চ পৰমপ্পিচ্ছা অৰিযা অত্তনো গুণে পকাসেন্তি. যথা তং লোকনাথো বোধনেয্যানং অজ্ঝাসযৱসেন ‘‘দসবলসমন্নাগতো, ভিক্খৱে, তথাগতো চতুৱেসাৰজ্জৱিসাৰদো’’তিআদিনা (অ. নি. ১০.২১; ম. নি. ১. ১৪৮ অত্থতো সমানং) অত্তনো গুণে পকাসেতি. এৱমযং থেৰস্স অঞ্ঞাব্যাকৰণগাথাপি অহোসীতি.

১. এৱং সো পত্তঅৰহত্তফলো পত্তএতদগ্গট্ঠানো চ অত্তনো পুব্বকম্মং সৰিত্ৱা সোমনস্সজাতো পুব্বচৰিতাপদানং পকাসেন্তো হিমৱন্তস্সাৱিদূৰেতিআদিমাহ. তত্থ হিমৱন্তস্সাতি হিমালযপব্বতস্স অৱিদূৰে আসন্নে সমীপে পব্বতপাদে মনুস্সানং গমনাগমনসম্পন্নে সঞ্চৰণট্ঠানেতি অত্থো. নিসভো নাম পব্বতোতি পব্বতানং জেট্ঠত্তা নামেন নিসভো নাম সেলমযপব্বতো অহোসীতি সম্বন্ধো. অস্সমো সুকতো ময্হন্তি তত্থ পব্বতে ময্হং ৱসনত্থায অস্সমো অৰঞ্ঞাৱাসো সুট্ঠু কতো. কুটিৰত্তিট্ঠানদিৱাট্ঠানৱতিপৰিক্খেপাদিৱসেন সুন্দৰাকাৰেন কতোতি অত্থো. পণ্ণসালা সুমাপিতাতি পণ্ণেহি ছাদিতা সালা ময্হং নিৱাসনত্থায সুট্ঠু মাপিতা নিট্ঠাপিতাতি অত্থো.

২. কোসিযো নাম নামেনাতি মাতাপিতূহি কতনামধেয্যেন কোসিযো নাম. উগ্গতাপনো পাকটতপো ঘোৰতপো. একাকিযো অঞ্ঞেসং অভাৱা অহং এৱ একো. অদুতিযো দুতিযতাপসৰহিতো জটিলো জটাধাৰী তাপসো তদা তস্মিং কালে নিসভে পব্বতে ৱসামি ৱিহৰামীতি সম্বন্ধো.

৩. ফলং মূলঞ্চ পণ্ণঞ্চ, ন ভুঞ্জামি অহং তদাতি তদা তস্মিং নিসভপব্বতে ৱসনকালে তিণ্ডুকাদিফলং মুড়ালাদিমূলং, কাৰপণ্ণাদিপণ্ণঞ্চ ৰুক্খতো ওচিনিত্ৱা ন ভুঞ্জামীতি অত্থো. এৱং সতি কথং জীৱতীতি তং দস্সেন্তো পৱত্তংৱ সুপাতাহন্তি আহ. তত্থ পৱত্তং সযমেৱ জাতং সুপাতং অত্তনো ধম্মতায পতিতং পণ্ণাদিকং নিস্সায আহাৰং কত্ৱা অহং তাৱদে তস্মিং কালে জীৱামি জীৱিকং কপ্পেমীতি সম্বন্ধো. ‘‘পৱত্তপণ্ডুপণ্ণানী’’তি ৱা পাঠো, তস্স সযমেৱ পতিতানি পণ্ডুপণ্ণানি ৰুক্খপত্তানি উপনিস্সায জীৱামীতি অত্থো.

৪. নাহং কোপেমি আজীৱন্তি অহং জীৱিতং চজমানোপি পৰিচ্চাগং কুৰুমানোপি তণ্হাৱসেন ফলমূলাদিআহাৰপৰিযেসনায সম্মা আজীৱং ন কোপেমি ন নাসেমীতি সম্বন্ধো. আৰাধেমি সকং চিত্তন্তি সকং চিত্তং অত্তনো মনং অপ্পিচ্ছতায সন্তুট্ঠিযা চ আৰাধেমি পসাদেমি. ৱিৱজ্জেমি অনেসনন্তি ৱেজ্জকম্মদূতকম্মাদিৱসেন অনেসনং অযুত্তপৰিযেসনং ৱিৱজ্জেমি দূৰং কৰোমি.

৫. ৰাগূপসংহিতং চিত্তন্তি যদা যস্মিং কালে মম ৰাগেন সম্পযুত্তং চিত্তং উপ্পজ্জতি, তদা সযমেৱ অত্তনাযেৱ পচ্চৱেক্খামি ঞাণেন পটিৱেক্খিত্ৱা ৱিনোদেমি. একগ্গো তং দমেমহন্তি অহং একস্মিং কম্মট্ঠানাৰম্মণে অগ্গো সমাহিতো তং ৰাগচিত্তং দমেমি দমনং কৰোমি.

৬. ৰজ্জসে ৰজ্জনীযে চাতি ৰজ্জনীযে অল্লীযিতব্বে ৰূপাৰম্মণাদিৱত্থুস্মিং ৰজ্জসে অল্লীনো অসি ভৱসি. দুস্সনীযে চ দুস্সসেতি দূসিতব্বে দোসকৰণৱত্থুস্মিং দূসকো অসি. মুয্হসে মোহনীযে চাতি মোহিতব্বে মোহকৰণৱত্থুস্মিং মোয্হসি মূড়্হো অসি ভৱসি. তস্মা তুৱং ৱনা ৱনতো অৰঞ্ঞৱাসতো নিক্খমস্সু অপগচ্ছাহীতি এৱং অত্তানং দমেমীতি সম্বন্ধো.

২৪. তিম্বৰূসকৱণ্ণাভোতি সুৱণ্ণতিম্বৰূসকৱণ্ণাভো, জম্বোনদসুৱণ্ণৱণ্ণোতি অত্থো. সেসং সুৱিঞ্ঞেয্যমেৱাতি.

সুভূতিত্থেৰঅপদানৱণ্ণনা সমত্তা.