২. উপৱানত্থেৰঅপদানৱণ্ণনা

পদুমুত্তৰো নাম জিনোতিআদিকং আযস্মতো উপৱানত্থেৰস্স অপদানং. অযম্পাযস্মা পুৰিমবুদ্ধেসু কতাধিকাৰো তত্থ তত্থ ভৱে ৱিৱট্টূপনিস্সযানি পুঞ্ঞানি উপচিনন্তো পদুমুত্তৰস্স ভগৱতো কালে দলিদ্দকুলে নিব্বত্তিত্ৱা ৱিঞ্ঞুতং পত্তো ভগৱতি পৰিনিব্বুতে তস্স ধাতুং গহেত্ৱা মনুস্সদেৱনাগগৰুড়কুম্ভণ্ডযক্খগন্ধব্বেহি সত্তৰতনমযে সত্তযোজনিকে থূপে কতে তত্থ সুধোতং অত্তনো উত্তৰসাটকং ৱেড়গ্গে লগ্গেত্ৱা আবন্ধিত্ৱা ধজং কত্ৱা পূজং অকাসি. তং গহেত্ৱা অভিসম্মতকো নাম যক্খসেনাপতি দেৱেহি চেতিযপূজাৰক্খণত্থং ঠপিতো অদিস্সমানকাযো তং আকাসে ধাৰেন্তো চেতিযং তিক্খত্তুং পদক্খিণং অকাসি. সো তং দিস্ৱা ভিয্যোসোমত্তায পসন্নমানসো হুত্ৱা তেন পুঞ্ঞকম্মেন দেৱমনুস্সেসু সংসৰন্তো ইমস্মিং বুদ্ধুপ্পাদে সাৱত্থিযং ব্ৰাহ্মণকুলে নিব্বত্তিত্ৱা উপৱানোতি লদ্ধনামো ৱযপ্পত্তো জেতৱনপটিগ্গহণে বুদ্ধানুভাৱং দিস্ৱা পটিলদ্ধসদ্ধো পব্বজিত্ৱা ৱিপস্সনায কম্মং কৰোন্তো অৰহত্তং পত্ৱা ছড়ভিঞ্ঞো অহোসি. যদা ভগৱতো অফাসু অহোসি, তদা থেৰো উণ্হোদকং তথাৰূপং পানকঞ্চ ভেসজ্জং ভগৱতো উপনামেসি. তেনস্স সত্থুনো ৰোগো ৱূপসমি. তস্স ভগৱা অনুমোদনং অকাসি.

৫২. এৱং সো পত্তঅৰহত্তফলো অধিগতএতদগ্গট্ঠানো অত্তনো পুব্বকম্মং সৰিত্ৱা সোমনস্সৱসেন পুব্বচৰিতাপদানং পকাসেন্তো পদুমুত্তৰো নাম জিনোতিআদিমাহ. তত্থ সব্বেসং লোকিযলোকুত্তৰধম্মানং পাৰগূ পৰিযোসানং নিব্বানং গতো পত্তো পদুমুত্তৰো নাম জিনো জিতপঞ্চমাৰো ভগৱা অগ্গিক্খন্ধো ইৱ ছব্বণ্ণা বুদ্ধৰংসিযো জলিত্ৱা সব্বলোকং ধম্মপজ্জোতেন ওভাসেত্ৱা সম্বুদ্ধো সুট্ঠু বুদ্ধো অৱিজ্জানিদ্দূপগতায পজায সৱাসনায কিলেসনিদ্দায পটিবুদ্ধো ৱিকসিতনেত্তপঙ্কজো পৰিনিব্বুতো খন্ধপৰিনিব্বানেন নিব্বুতো অদস্সনং গতোতি সম্বন্ধো.

৫৭. জঙ্ঘাতি চেতিযকৰণকালে উপচিনিতব্বানং ইট্ঠকানং ঠপনত্থায, নিবন্ধিযমানসোপানপন্তি.

৮৮. সুধোতং ৰজকেনাহন্তি ৱত্থধোৱকেন পুৰিসেন সুট্ঠু ধোৱিতং সুৱিসুদ্ধকতং, উত্তৰেয্যপটং মম উত্তৰসাটকং অহং ৱেড়গ্গে লগ্গিত্ৱা ধজং কত্ৱা উক্খিপিং, অম্বৰে আকাসে উস্সাপেসিন্তি অত্থো. সেসং সুৱিঞ্ঞেয্যমেৱাতি.

উপৱানত্থেৰঅপদানৱণ্ণনা সমত্তা.