৮. পতিৰূপকথাৱণ্ণনা

৯১৫-৯১৬. ইদানি ৰাগপতিৰূপকথা নাম হোতি. তত্থ মেত্তাকৰুণামুদিতাযো সন্ধায ‘‘ন ৰাগো ৰাগপতিৰূপকো’’তি চ ইস্সামচ্ছৰিযকুক্কুচ্চানি সন্ধায ‘‘ন দোসো দোসপতিৰূপকো’’তি চ হসিতুপ্পাদং সন্ধায ‘‘ন মোহো মোহপতিৰূপকো’’তি চ দুম্মঙ্কূনং পুগ্গলানং নিগ্গহং পেসলানং ভিক্খূনং অনুগ্গহং পাপগৰহিতং কল্যাণপসংসং আযস্মতো পিলিন্দৱচ্ছস্স ৱসলৱাদং ভগৱতো খেড়াসকৱাদং মোঘপুৰিসৱাদঞ্চ সন্ধায ‘‘ন কিলেসো কিলেসপতিৰূপকো’’তি চ যেসং লদ্ধি, সেয্যথাপি অন্ধকানং; তে সন্ধায সব্বকথাসু পুচ্ছা সকৱাদিস্স, পটিঞ্ঞা ইতৰস্স. অথ নং যস্মা ফস্সাদিপতিৰূপকা নফস্সাদযো নাম নত্থি, তস্মা ৰাগাদিপতিৰূপকা নৰাগাদযোপি নত্থীতি চোদেতুং অত্থি ন ফস্সোতিআদিমাহ. ইতৰো তেসং অভাৱা পটিক্খিপতি. সেসং সব্বত্থ উত্তানত্থমেৱাতি.

পতিৰূপকথাৱণ্ণনা.