৫. মগ্গকথাৱণ্ণনা

৮৭২-৮৭৫. ইদানি মগ্গকথা নাম হোতি. তত্থ যেসং ‘‘পুব্বেৱ খো পনস্স কাযকম্মং ৱচীকম্মং আজীৱো সুপৰিসুদ্ধো হোতী’’তি (অ. নি. ৩.৪৩১) ইদঞ্চেৱ সুত্তং সম্মাৱাচাকম্মন্তাজীৱানঞ্চ চিত্তৱিপ্পযুত্ততং নিস্সায ‘‘নিপ্পৰিযাযেন পঞ্চঙ্গিকোৱ মগ্গো’’তি লদ্ধি, সেয্যথাপি মহিসাসকানং, তে সন্ধায পঞ্চঙ্গিকোতি পুচ্ছা সকৱাদিস্স, পটিঞ্ঞা ইতৰস্স. সম্মাৱাচা মগ্গঙ্গং, সা চ ন মগ্গোতিআদি পৰসমযৱসেন ৱুত্তং. পৰসমযস্মিঞ্হি সম্মাৱাচাদযো মগ্গঙ্গন্তি আগতা. ৰূপত্তা পন মগ্গো ন হোতীতি ৱণ্ণিতা. সম্মাদিট্ঠি মগ্গঙ্গন্তিআদি মগ্গঙ্গস্স অমগ্গতা নাম নত্থীতি দস্সনত্থং ৱুত্তং. পুব্বেৱ খো পনস্সাতি সুত্তে পৰিসুদ্ধসীলস্স মগ্গভাৱনা নাম হোতি, ন ইতৰস্সাতি আগমনিযপটিপদায ৱিসুদ্ধিভাৱদস্সনত্থং ‘‘কাযকম্মং ৱচীকম্মং আজীৱো সুপৰিসুদ্ধো হোতী’’তি ৱুত্তং, ন ইমেহি ৱিনা পঞ্চঙ্গিকভাৱদস্সনত্থং. তেনেৱাহ ‘‘এৱমস্সাযং অৰিযো অট্ঠঙ্গিকো মগ্গো ভাৱনাপাৰিপূৰিং গচ্ছতী’’তি. সকৱাদিনা আভতসুত্তং নীতত্থমেৱাতি.

মগ্গকথাৱণ্ণনা.