৯. ধম্মট্ঠিততাকথাৱণ্ণনা

৬২৭. ইদানি ধম্মট্ঠিততাকথা নাম হোতি. তত্থ ‘‘ঠিতাৱ সা ধাতূ’’তি ৱচনং নিস্সায ‘‘পটিচ্চসমুপ্পাদসঙ্খাতা ধম্মট্ঠিততা নাম একা অত্থি, সা চ পৰিনিপ্ফন্না’’তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৱাদিস্স, পটিঞ্ঞা ইতৰস্স. অথ নং ‘‘যদি পৰিনিপ্ফন্নানং অৱিজ্জাদীনং অঞ্ঞা ধম্মট্ঠিততা নাম পৰিনিপ্ফন্না অত্থি, তাযপি চ তে ধম্মট্ঠিততায অঞ্ঞা ঠিততা পৰিনিপ্ফন্না আপজ্জতী’’তি চোদেতুং তায ঠিততাতিআদিমাহ. পৰৱাদী এৱৰূপায লদ্ধিযা অভাৱেন পটিক্খিপতি. দুতিযং পুট্ঠো অনন্তৰপচ্চযতঞ্চেৱ অঞ্ঞমঞ্ঞপচ্চযতঞ্চ সন্ধায পটিজানাতি. সেসং হেট্ঠা ৱুত্তনযত্তা উত্তানত্থমেৱাতি.

ধম্মট্ঠিততাকথাৱণ্ণনা.