১০. অনিচ্চতাকথাৱণ্ণনা

৬২৮. ইদানি অনিচ্চতাকথা নাম হোতি. তত্থ ‘‘অনিচ্চানং ৰূপাদীনং অনিচ্চতাপি ৰূপাদযো ৱিয পৰিনিপ্ফন্না’’তি যেসং লদ্ধি, সেয্যথাপি অন্ধকানং; তে সন্ধায পুচ্ছা সকৱাদিস্স, পটিঞ্ঞা ইতৰস্স. অথ নং ‘‘যদি তে ৰূপাদযো ৱিয অনিচ্চতা পৰিনিপ্ফন্না, তস্সাপি অঞ্ঞায পৰিনিপ্ফন্নায অনিচ্চতায ভৱিতব্ব’’ন্তি চোদেতুং তায অনিচ্চতাযাতিআদিমাহ. ইতৰো দ্ৱিন্নং অনিচ্চতায একতো অভাৱেন পটিক্খিপিত্ৱা পুন যস্মা সা অনিচ্চতা নিচ্চা ন হোতি, তেনেৱ অনিচ্চেন সদ্ধিং অন্তৰধাযতি, তস্মা পটিজানাতি. অথস্স সকৱাদী লেসোকাসং অদত্ৱা যা তেন দুতিযা অনিচ্চতা পটিঞ্ঞাতা, তাযপি ততো পৰাযপীতি পৰম্পৰৱসেন অনুপচ্ছেদদোসং আৰোপেন্তো তায তাযেৱাতিআদিমাহ. জৰা পৰিনিপ্ফন্নাতিআদি যস্মা উপ্পন্নস্স জৰামৰণতো অঞ্ঞা অনিচ্চতা নাম নত্থি, তস্মা অনিচ্চতাৱিভাগানুযুঞ্জনৱসেন ৱুত্তং. তত্ৰাপি পৰৱাদিনো পুৰিমনযেনেৱ পটিঞ্ঞা চ পটিক্খেপো চ ৱেদিতব্বো.

৬২৯. ৰূপং পৰিনিপ্ফন্নন্তিআদি যেসং সা অনিচ্চতা, তেহি সদ্ধিং সংসন্দনত্থং ৱুত্তং. তত্থ ‘‘যথা পৰিনিপ্ফন্নানং ৰূপাদীনং অনিচ্চতাজৰামৰণানি অত্থি, এৱং পৰিনিপ্ফন্নানং অনিচ্চতাদীনং তানি নত্থী’’তি মঞ্ঞমানো একন্তেন পটিক্খিপতিযেৱাতি.

অনিচ্চতাকথাৱণ্ণনা.

একাদসমো ৱগ্গো.