২. অন্তৰাভৱকথাৱণ্ণনা

৫০৫. ইদানি অন্তৰাভৱকথা নাম হোতি. তত্থ যেসং ‘‘অন্তৰা পৰিনিব্বাযী’’তি সুত্তপদং অযোনিসো গহেত্ৱা ‘‘অন্তৰাভৱো নাম অত্থি, যত্থ সত্তো দিব্বচক্খুকো ৱিয অদিব্বচক্খুকো, ইদ্ধিমা ৱিয অনিদ্ধিমা মাতাপিতিসমাগমঞ্চেৱ উতুসমযঞ্চ ওলোকযমানো সত্তাহং ৱা অতিৰেকসত্তাহং ৱা তিট্ঠতী’’তি লদ্ধি, সেয্যথাপি পুব্বসেলিযানঞ্চেৱ সম্মিতিযানঞ্চ; তে সন্ধায অত্থীতি পুচ্ছা সকৱাদিস্স, লদ্ধিযং ঠত্ৱা পটিঞ্ঞা ইতৰস্স. অথ নং যে চ ভগৱতা তযো ভৱা ৱুত্তা, তেসং ৱসেন চোদেতুং কামভৱোতিআদিমাহ. তত্ৰাযং অধিপ্পাযো – যদি তে অন্তৰাভৱো নাম কোচি ভৱো অত্থি, তেন কামভৱাদীনংযেৱ অঞ্ঞতৰেন ভৱিতব্বং পঞ্চৱোকাৰভৱাদিনা ৱিয, তেন তং পুচ্ছামি – ‘‘কিং তে অযং অন্তৰাভৱো নাম কামভৱো, উদাহু ৰূপভৱো অৰূপভৱো ৱা’’তি? ইতৰো তথা অনিচ্ছন্তো সব্বং পটিক্খিপতি. কামভৱস্স চাতিআদি যদি অন্তৰাভৱো নাম অত্থি, ইমেসং ভৱানং অন্তৰা দ্ৱিন্নং সীমানং সীমন্তৰিকা ৱিয ভৱেয্যাতি চোদেতুং আৰদ্ধং. পৰৱাদী পন তথা অনিচ্ছন্তো সব্বপঞ্হে পটিক্খিপতি কেৱলং লদ্ধিযা, ন সহধম্মেন. তেনেৱ নং সকৱাদী ‘নো ৱত ৰে’তি পটিসেধেতি.

৫০৬. পঞ্চমী সা যোনীতিআদীনিপি যথাপৰিচ্ছিন্নযোনিআদীসু সো সমোধানং ন গচ্ছতি, অথ তেন ততো ততো অতিৰেকেন ভৱিতব্বন্তি চোদেতুং ৱুত্তানি. অন্তৰাভৱূপগং কম্মন্তি যদি সোপি একো ভৱো, যথা কামভৱূপগাদীনি কম্মানি অত্থীতি সত্থাৰা ৱিভজিত্ৱা দস্সিতানি, এৱং তদুপগেনাপি কম্মেন ভৱিতব্বন্তি চোদনত্থং ৱুত্তং. যস্মা পন পৰসমযে অন্তৰাভৱূপগং নাম পাটিযেক্কং কম্মং নত্থি, যং যং ভৱং উপপজ্জিস্সতি, তদুপগেনেৱ কম্মেন অন্তৰাভৱে নিব্বত্ততীতি তেসং লদ্ধি, তস্মা ‘নহেৱ’ন্তি পটিক্খিত্তং. অত্থি অন্তৰাভৱূপগা সত্তাতি পুট্ঠোপি কামভৱূপগাযেৱ নাম তেতি লদ্ধিযা পটিক্খিপতি. জাযন্তীতিআদীনি পুট্ঠোপি তত্থ জাতিজৰামৰণানি চেৱ চুতিপটিসন্ধিপৰম্পৰঞ্চ অনিচ্ছন্তো পটিক্খিপতি. ৰূপাদিৱসেন পুট্ঠোপি যস্মা অন্তৰাভৱসত্তস্স অনিদস্সনং ৰূপং, ৱেদনাদযোপি অঞ্ঞেসং ৱিয ন ওড়াৰিকাতি তস্স লদ্ধি, তস্মা পটিক্খিপতি. ইমিনাৱ কাৰণেন পঞ্চৱোকাৰভৱভাৱেপি পটিক্খেপো ৱেদিতব্বো.

৫০৭. ইদানি কামভৱো ভৱো গতীতিআদি ভৱসংসন্দনং নাম হোতি. তত্ৰাযং অধিপ্পাযো – যদি তে অন্তৰাভৱো নাম কোচি ভৱো ভৱেয্য, যথা কামভৱাদীসু ভৱগতিআদিভেদো লব্ভতি, তথা তত্ৰাপি লব্ভেথ. যথা ৱা তত্থ ন লব্ভতি, তথা ইমেসুপি ন লব্ভেথ. সমানস্মিঞ্হি ভৱভাৱে এতেস্ৱেৱেস ৱিভাগো অত্থি, ন ইতৰস্মিন্তি কো এত্থ ৱিসেসহেতূতি. ইতৰো পুন লদ্ধিমত্তৱসেন তং তং পটিজানাতি চেৱ পটিক্খিপতি চ.

৫০৮. সব্বেসঞ্ঞেৱ সত্তানং অত্থি অন্তৰাভৱোতি পুট্ঠো যস্মা নিৰযূপগঅসঞ্ঞসত্তূপগঅৰূপূপগানং অন্তৰাভৱং ন ইচ্ছতি, তস্মা পটিক্খিপতি. তেনেৱ কাৰণেন পটিলোমে পটিজানাতি. আনন্তৰিযস্সাতিআদি যেসং সো অন্তৰাভৱং ন ইচ্ছতি, তে তাৱ ৱিভজিত্ৱা দস্সেতুং ৱুত্তং. তং সব্বং পাড়িঅনুসাৰেনেৱ ৱেদিতব্বং সদ্ধিং সুত্তসাধনেনাতি.

অন্তৰাভৱকথাৱণ্ণনা.