৩. কামগুণকথাৱণ্ণনা

৫১০. ইদানি কামগুণকথা নাম হোতি. তত্থ সকসমযে তাৱ কামধাতূতি ৱত্থুকামাপি ৱুচ্চন্তি – কিলেসকামাপি কামভৱোপি. এতেসু হি ৱত্থুকামা কমনীযট্ঠেন কামা, সভাৱনিস্সত্তসুঞ্ঞতট্ঠেন ধাতূতি কামধাতু. কিলেসকামা কমনীযট্ঠেন চেৱ কমনট্ঠেন চ কামা, যথাৱুত্তেনেৱত্থেন ধাতূতি কামধাতু. কামভৱো কমনীযট্ঠেন কমনট্ঠেন ৱত্থুকামপৱত্তিদেসট্ঠেনাতি তীহি কাৰণেহি কামো, যথাৱুত্তেনেৱত্থেন ধাতূতি কামধাতু. পৰসমযে পন – ‘‘পঞ্চিমে, ভিক্খৱে, কামগুণা’’তি ৱচনমত্তং নিস্সায পঞ্চেৱ কামগুণা কামধাতূতি গহিতং. তস্মা যেসং অযং লদ্ধি, সেয্যথাপি এতৰহি পুব্বসেলিযানং; তে সন্ধায কামধাতুনানত্তং বোধেতুং পঞ্চেৱাতি পুচ্ছা সকৱাদিস্স, লদ্ধিৱসেন পটিঞ্ঞা ইতৰস্স. ননু অত্থীতিআদি কিলেসকামদস্সনত্থং ৱুত্তং. তত্থ তপ্পটিসংযুত্তোতি কামগুণপটিসংযুত্তো, কামগুণাৰম্মণোতি অত্থো. নো চ ৱত ৰে ৱত্তব্বে পঞ্চেৱাতি ইমেসু তপ্পটিসংযুত্তছন্দাদীসু সতি পঞ্চেৱ কামগুণা কামধাতূতি ন ৱত্তব্বং. এতেপি হি ছন্দাদযো কমনীযট্ঠেন কামা চ ধাতু চাতিপি কামধাতু. কমনট্ঠেন কামসঙ্খাতা ধাতূতিপি কামধাতূতি অত্থো.

মনুস্সানং চক্খুন্তিআদি ৱত্থুকামদস্সনত্থং ৱুত্তং. তত্থ পৰৱাদী ছন্নম্পি আযতনানং ৱত্থুকামভাৱেন নকামধাতুভাৱং পটিক্খিপিত্ৱা পুন মনোতি পুট্ঠো মহগ্গতলোকুত্তৰং সন্ধায নকামধাতুভাৱং পটিজানাতি. যস্মা পন সব্বোপি তেভূমকমনো কামধাতুযেৱ, তস্মা নং সকৱাদী সুত্তেন নিগ্গণ্হাতি.

৫১১. কামগুণা ভৱোতিআদি ভৱস্স কামধাতুভাৱদস্সনত্থং ৱুত্তং. যস্মা পন কামগুণমত্তে ভৱোতি ৱোহাৰো নত্থি, তস্মা পৰৱাদী নহেৱাতি পটিক্খিপতি. কামগুণূপগং কম্মন্তিআদি সব্বং কামগুণমত্তস্স নকামধাতুভাৱদস্সনত্থং ৱুত্তং. কামধাতুসঙ্খাতকামভৱূপগমেৱ হি কম্মং অত্থি, কামভৱূপগা এৱ চ সত্তা হোন্তি. তত্থ জাযন্তি জিযন্তি মিযন্তি চৱন্তি উপপজ্জন্তি, ন কামগুণেসূতি ইমিনা উপাযেন সব্বত্থ অত্থো ৱেদিতব্বোতি.

কামগুণকথাৱণ্ণনা.