১০. জীৱিতিন্দ্ৰিযকথাৱণ্ণনা

৫৪০. ইদানি জীৱিতিন্দ্ৰিযকথা নাম হোতি. তত্থ যেসং জীৱিতিন্দ্ৰিযং নাম চিত্তৱিপ্পযুত্তো অৰূপধম্মো, তস্মা ৰূপজীৱিতিন্দ্ৰিযং নত্থীতি লদ্ধি, সেয্যথাপি পুব্বসেলিযানঞ্চেৱ সম্মিতিযানঞ্চ; তে সন্ধায পুচ্ছা সকৱাদিস্স, পটিঞ্ঞা ইতৰস্স. নত্থি ৰূপীনং ধম্মানং আযূতি পঞ্হে উপাদিন্নৰূপানম্পি তিণকট্ঠাদীনম্পি সন্তানৱসেন পৱত্তিমেৱ আযু ঠিতি যপনা যাপনা ইৰিযনা ৱত্তনা পালনাতি ইচ্ছতি, তস্মা পটিক্খিপতি. অত্থীতি পঞ্হেপি ইমিনা কাৰণেন পটিজানাতি. অত্থি অৰূপজীৱিতিন্দ্ৰিযন্তি পঞ্হে অৰূপধম্মানং চিত্তৱিপ্পযুত্তং জীৱিতিন্দ্ৰিযসন্তানং নাম অত্থীতি ইচ্ছতি, তস্মা পটিজানাতি.

৫৪১. ৰূপীনং ধম্মানং আযু অৰূপজীৱিতিন্দ্ৰিযন্তি পঞ্হে সত্তসন্তানে ৰূপিনো ৱা হোন্তু অৰূপিনো ৱা, সব্বেসং চিত্তৱিপ্পযুত্তং অৰূপজীৱিতিন্দ্ৰিযমেৱ ইচ্ছতি, তস্মা পটিজানাতি.

৫৪২. নিৰোধসমাপন্নপঞ্হেসুপি চিত্তৱিপ্পযুত্তং অৰূপজীৱিতমেৱ সন্ধায পটিক্খিপতি চ পটিজানাতি চ. সকৱাদী পন তং অসম্পটিচ্ছন্তো যং অৰূপপৱত্তে অসতি অত্থি, ৰূপেন তেন ভৱিতব্বন্তি চোদেতুং হঞ্চীতিআদিমাহ. সঙ্খাৰক্খন্ধপঞ্হে ফস্সাদিসঙ্খাৰক্খন্ধং সন্ধায পটিক্খিপতি, কাযকম্মাদিসঙ্খাৰক্খন্ধং সন্ধায পটিজানাতি. কাযৱিঞ্ঞত্তি ৱচীৱিঞ্ঞত্তি সম্মাৱাচা সম্মাকম্মন্তো জীৱিতিন্দ্ৰিযন্তি এৱমাদযোপি ধম্মা সঙ্খাৰক্খন্ধপৰিযাপন্নাতিস্স লদ্ধি. সকৱাদী পন তং অসম্পটিচ্ছন্তো যদি নিৰুদ্ধেপি অৰূপপৱত্তে সঙ্খাৰক্খন্ধো অত্থি, চতুন্নম্পি খন্ধানং অত্থিতা হোতূতি চোদেতুং অত্থি ৱেদনাক্খন্ধোতি আদিমাহ. ইতৰো অন্তোসমাপত্তিং সন্ধায পটিক্খিপতি, সমাপজ্জন্তস্স চ ৱুট্ঠহন্তস্স চ পুব্বাপৰভাগং সন্ধায পটিজানাতি.

৫৪৩. অসঞ্ঞসত্তৱাৰেপি এসেৱ নযো. তস্স হি লদ্ধিযা অসঞ্ঞসত্তানং পটিসন্ধিকালে চিত্তং উপ্পজ্জিত্ৱা নিৰুজ্ঝতি, তেন সহ চিত্তৱিপ্পযুত্তঅৰূপজীৱিতিন্দ্ৰিযং উপ্পজ্জিত্ৱা যাৱতাযুকং পৱত্ততি. তস্মা তেসং জীৱিতিন্দ্ৰিযং নত্থীতি পুট্ঠো পটিক্খিপতি, অত্থীতি পুট্ঠো পটিজানাতি. ৱেদনাক্খন্ধাদযোপি তেসং পৱত্তিৱসেন পটিক্খিপতি, চুতিপটিসন্ধিৱসেন পটিজানাতি. সকৱাদী পন তং অনিচ্ছন্তো ‘‘সচে তত্থ একক্খণেপি ৱেদনাদযো অত্থি, পঞ্চৱোকাৰভৱত্তং পাপুণাতী’’তি চোদেতুং পঞ্চৱোকাৰভৱোতি আহ. ইতৰো সুত্তৱিৰোধভযা পটিক্খিপতি.

৫৪৪-৫৪৫. একদেসং ভিজ্জতীতি পঞ্হে সম্পযুত্তং ভিজ্জতি, ৱিপ্পযুত্তং তিট্ঠতীতি তস্স লদ্ধি, তস্মা পটিজানাতি. দ্ৱে জীৱিতিন্দ্ৰিযানীতি পুচ্ছা পৰৱাদিস্স, পটিঞ্ঞা সকৱাদিস্স. ৰূপাৰূপৱসেন হি দ্ৱে জীৱিতিন্দ্ৰিযানি, তেহিযেৱ সত্তো জীৱতি, তেসং ভঙ্গেন মৰতীতি ৱুচ্চতি. চুতিক্খণস্মিঞ্হি দ্ৱেপি জীৱিতানি সহেৱ ভিজ্জন্তি.

জীৱিতিন্দ্ৰিযকথাৱণ্ণনা.