১. ছগতিকথাৱণ্ণনা

৫০৩-৫০৪. ইদানি ছগতিকথা নাম হোতি. তত্থ অসুৰকাযেন সদ্ধিং ছগতিযোতি যেসং লদ্ধি, সেয্যথাপি অন্ধকানঞ্চেৱ উত্তৰাপথকানঞ্চ; তে সন্ধায পুচ্ছা সকৱাদিস্স, পটিঞ্ঞা ইতৰস্স. অথ নং সকৱাদী ‘‘পঞ্চ খো পনিমা, সাৰিপুত্ত, গতিযো’’তি (ম. নি. ১.১৫৩) লোমহংসনপৰিযাযে পৰিচ্ছিন্নানং গতীনং ৱসেন চোদেতুং ননু পঞ্চ গতিযোতিআদিমাহ. ইতৰো সুত্তৱিৰোধভযেন পটিজানাতি. কস্মা পন সকৱাদী ছ গতিযো ন সম্পটিচ্ছতি, ননু ‘‘চতূহাপাযেহি চ ৱিপ্পমুত্তো’’তি এত্থ অসুৰকাযোপি গহিতোতি. সচ্চং গহিতো, ন পনেসা গতি. কস্মা? ৱিসুং অভাৱতো. অসুৰকাযস্মিঞ্হি কালকঞ্চিকা অসুৰা পেতগতিযা সঙ্গহিতা, ৱেপচিত্তিপৰিসা দেৱগতিযা, অসুৰকাযোতি ৱিসুং একা গতি নাম নত্থি.

ইদানি এতমেৱ অত্থং দস্সেতুং ননু কালকঞ্চিকাতিআদি আৰদ্ধং. তত্থ সমানৱণ্ণাতি সদিসৰূপসণ্ঠানা বীভচ্ছা ৱিৰূপা দুদ্দস্সিকা. সমানভোগাতি সদিসমেথুনসমাচাৰা. সমানাহাৰাতি সদিসখেড়সিঙ্ঘাণিকপুব্বলোহিতাদিআহাৰা. সমানাযুকাতি সদিসআযুপৰিচ্ছেদা. আৱাহৱিৱাহন্তি কঞ্ঞাগহণঞ্চেৱ কঞ্ঞাদানঞ্চ. সুক্কপক্খে সমানৱণ্ণাতি সদিসৰূপসণ্ঠানা অভিৰূপা পাসাদিকা দস্সনীযা পভাসম্পন্না. সমানভোগাতি সদিসপঞ্চকআমগুণভোগা. সমানাহাৰাতি সদিসসুধাভোজনাদিআহাৰা. সেসং ৱুত্তনযমেৱ. ননু অত্থি অসুৰকাযোতি ইদং অসুৰকাযস্সেৱ সাধকং. তস্স পন ৱিসুং গতিপৰিচ্ছেদাভাৱেন ন গতিসাধকন্তি.

ছগতিকথাৱণ্ণনা.