৩. অনাসৱকথাৱণ্ণনা

৩৯১. ইদানি অনাসৱকথা নাম হোতি. তত্থ যে ধম্মা অনাসৱস্স অৰহতো, সব্বে তে অনাসৱাতি যেসং লদ্ধি, সেয্যথাপি এতৰহি উত্তৰাপথকানং; তে সন্ধায অৰহতোতি পুচ্ছা সকৱাদিস্স, পটিঞ্ঞা ইতৰস্স. অথ নং অনাসৱা নাম মগ্গাদযো, কিং তস্স তেযেৱ উপ্পজ্জন্তীতি চোদনত্থং মগ্গো ফলন্তিআদি আৰদ্ধং. চক্খু অনাসৱন্তি পুট্ঠো তস্স সাসৱত্তা পটিক্খিপতি. দুতিযং পুট্ঠো অনাসৱস্সেতন্তি পটিজানাতি.

৩৯২. চীৱৰপঞ্হে একোৱ ধম্মো অনাসৱো সাসৱো চ হোতীতি লক্খণৱিৰোধভযা পটিক্খিপতি. দুতিযং পুট্ঠো অনাসৱস্স হুত্ৱা সাসৱস্স হোতীতি পটিজানাতি. তঞ্ঞেৱ অনাসৱন্তি পঞ্হাদ্ৱযেপি এসেৱ নযো. সকৱাদী পন তঞ্ঞেৱাতি অনুঞ্ঞাতত্তা ‘‘মগ্গো অনাসৱো হুত্ৱা’’তিআদীহি চোদেতি. ইমিনা উপাযেন সব্বত্থ অত্থো ৱেদিতব্বোতি.

অনাসৱকথাৱণ্ণনা.