১০. গিহিসামীচিসুত্তৱণ্ণনা

৬০. দসমে গিহিসামীচিপটিপদন্তি গিহীনং অনুচ্ছৱিকং পটিপত্তিং. পচ্চুপট্ঠিতো হোতীতি অতিহৰিত্ৱা দাতুকামতায পতিউপট্ঠিতো হোতি উপগতো, ভিক্খুসঙ্ঘস্স চীৱৰং দেতীতি অত্থো.

উপট্ঠিতাতি উপট্ঠাযকো. তেসং দিৱা চ ৰত্তো চাতি যে এৱং চতূহি পচ্চযেহি উপট্ঠহন্তি, তেসং দিৱা চ ৰত্তিঞ্চ পৰিচ্চাগৱসেন চ অনুস্সৰণৱসেন চ সদা পুঞ্ঞং পৱড্ঢতি. সগ্গঞ্চ কমতিট্ঠানন্তি তাদিসো চ ভদ্দকং কম্মং কত্ৱা সগ্গট্ঠানং উপগচ্ছতি. ইমেসু চতূসুপি সুত্তেসু আগাৰিযপটিপদা কথিতা. সোতাপন্নসকদাগামীনম্পি ৱট্টতি.

পুঞ্ঞাভিসন্দৱগ্গো পঠমো.