༡. པ་ཋ་མ་སི་ཀྑཱ་པ་དཾ

༡༠༦༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ག་བྦྷི་ནིཾ ཝུ་ཊྛཱ་པེ་ནྟི. སཱ པི་ཎྜཱ་ཡ ཙ་ར་ཏི. མ་ནུ་སྶཱ ཨེ་ཝ་མཱ་ཧཾ་སུ – ‘‘དེ་ཐཱ་ཡྻཱ་ཡ བྷི་ཀྑཾ, ག་རུ་བྷཱ་རཱ [ག་རུ་ག་བྦྷཱ (སྱཱ.)] ཨ་ཡྻཱ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ག་བྦྷི་ནིཾ ཝུ་ཊྛཱ་པེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ག་བྦྷི་ནིཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ག་བྦྷི་ནིཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ག་བྦྷི་ནིཾ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༠༦༨. ‘‘ཡཱ པ་ན བྷི་ཀྑུ་ནཱི ག་བྦྷི་ནིཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.

༡༠༦༩. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ག་བྦྷི་ནཱི ནཱ་མ ཨཱ་པ་ནྣ་ས་ཏྟཱ ཝུ་ཙྩ་ཏི. ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.

‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.

༡༠༧༠. ག་བྦྷི་ནི་ཡཱ ག་བྦྷི་ནི་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ག་བྦྷི་ནི་ཡཱ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ག་བྦྷི་ནི་ཡཱ ཨ་ག་བྦྷི་ནི་ས་ཉྙཱ ཝུ་ཊྛཱ་པེ་ཏི, ཨ་ནཱ་པ་ཏྟི. ཨ་ག་བྦྷི་ནི་ཡཱ ག་བྦྷི་ནི་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ག་བྦྷི་ནི་ཡཱ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ག་བྦྷི་ནི་ཡཱ ཨ་ག་བྦྷི་ནི་ས་ཉྙཱ, ཨ་ནཱ་པ་ཏྟི.

༡༠༧༡. ཨ་ནཱ་པ་ཏྟི ག་བྦྷི་ནིཾ ཨ་ག་བྦྷི་ནི་ས་ཉྙཱ ཝུ་ཊྛཱ་པེ་ཏི, ཨ་ག་བྦྷི་ནིཾ ཨ་ག་བྦྷི་ནི་ས་ཉྙཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

པ་ཋ་མ་སི་ཀྑཱ་པ་དཾ ནི་ཊྛི་ཏཾ.