༢. དུ་ཏི་ཡ་སི་ཀྑཱ་པ་དཾ

༡༠༧༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ པཱ་ཡ་ནྟིཾ ཝུ་ཊྛཱ་པེ་ནྟི. སཱ པི་ཎྜཱ་ཡ ཙ་ར་ཏི. མ་ནུ་སྶཱ ཨེ་ཝ་མཱ་ཧཾ་སུ – ‘‘དེ་ཐཱ་ཡྻཱ་ཡ བྷི་ཀྑཾ, ས་དུ་ཏི་ཡི་ཀཱ ཨ་ཡྻཱ’’ཏི. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ པཱ་ཡ་ནྟིཾ ཝུ་ཊྛཱ་པེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ པཱ་ཡ་ནྟིཾ ཝུ་ཊྛཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ པཱ་ཡ་ནྟིཾ ཝུ་ཊྛཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ པཱ་ཡ་ནྟིཾ ཝུ་ཊྛཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༠༧༣. ‘‘ཡཱ པ་ན བྷི་ཀྑུ་ནཱི པཱ་ཡ་ནྟིཾ ཝུ་ཊྛཱ་པེ་ཡྻ, པཱ་ཙི་ཏྟི་ཡ’’ནྟི.

༡༠༧༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

པཱ་ཡ་ནྟཱི ནཱ་མ མཱ་ཏཱ ཝཱ ཧོ་ཏི [ཧོ་ཏུ (ཀ.)] དྷཱ་ཏི [དྷཱ་ཏཱི (སཱི. སྱཱ.)] ཝཱ.

ཝུ་ཊྛཱ་པེ་ཡྻཱཏི ཨུ་པ་ས་མྤཱ་དེ་ཡྻ.

‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི དུ་ཀྐ་ཊཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི པཱ་ཙི་ཏྟི་ཡ་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.

༡༠༧༥. པཱ་ཡ་ནྟི་ཡཱ པཱ་ཡ་ནྟི་ས་ཉྙཱ ཝུ་ཊྛཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པཱ་ཡ་ནྟི་ཡཱ ཝེ་མ་ཏི་ཀཱ ཝུ་ཊྛཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. པཱ་ཡ་ནྟི་ཡཱ ཨ་པཱ་ཡ་ནྟི་ས་ཉྙཱ ཝུ་ཊྛཱ་པེ་ཏི, ཨ་ནཱ་པ་ཏྟི. ཨ་པཱ་ཡ་ནྟི་ཡཱ པཱ་ཡ་ནྟི་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་པཱ་ཡ་ནྟི་ཡཱ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་པཱ་ཡ་ནྟི་ཡཱ ཨ་པཱ་ཡ་ནྟི་ས་ཉྙཱ, ཨ་ནཱ་པ་ཏྟི.

༡༠༧༦. ཨ་ནཱ་པ་ཏྟི པཱ་ཡ་ནྟིཾ ཨ་པཱ་ཡ་ནྟི་ས་ཉྙཱ ཝུ་ཊྛཱ་པེ་ཏི, ཨ་པཱ་ཡ་ནྟིཾ ཨ་པཱ་ཡ་ནྟི་ས་ཉྙཱ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.