བྷི་ཀྑུ་ནཱི་ཝི་བྷ་ངྒོ
༡. པཱ་རཱ་ཛི་ཀ་ཀ་ཎྜཾ (བྷི་ཀྑུ་ནཱི་ཝི་བྷ་ངྒོ)
༡. པ་ཋ་མ་པཱ་རཱ་ཛི་ཀཾ
༦༥༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ ཝི་ཧཱ་རཾ ཀ་ཏྟུ་ཀཱ་མོ ཧོ་ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ཡོ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘‘ཨི་ཙྪཱ་མ་ཧཾ, ཨ་ཡྻེ, བྷི་ཀྑུ་ནི་ས་ངྒྷ་སྶ ཝི་ཧཱ་རཾ ཀཱ་ཏུཾ. དེ་ཐ མེ ན་ཝ་ཀ་མྨི་ཀཾ བྷི་ཀྑུ་ནི’’ནྟི. ཏེ་ན ཁོ པ་ན ས་མ་ཡེ་ན ཙ་ཏ་སྶོ བྷ་གི་ནི་ཡོ བྷི་ཀྑུ་ནཱི་སུ པ་བྦ་ཛི་ཏཱ ཧོ་ནྟི – ན་ནྡཱ, ན་ནྡ་ཝ་ཏཱི, སུ་ནྡ་རཱི་ན་ནྡཱ, ཐུ་ལླ་ན་ནྡཱ་ཏི. ཏཱ་སུ སུ་ནྡ་རཱི་ན་ནྡཱ བྷི་ཀྑུ་ནཱི ཏ་རུ་ཎ་པ་བྦ་ཛི་ཏཱ ཨ་བྷི་རཱུ་པཱ ཧོ་ཏི ད་སྶ་ནཱི་ཡཱ པཱ་སཱ་དི་ཀཱ པ་ཎྜི་ཏཱ བྱ་ཏྟཱ མེ་དྷཱ་ཝི་ནཱི ད་ཀྑཱ ཨ་ན་ལ་སཱ, ཏ་ཏྲུ་པཱ་ཡཱ་ཡ ཝཱི་མཾ་སཱ་ཡ ས་མ་ནྣཱ་ག་ཏཱ, ཨ་ལཾ ཀཱ་ཏུཾ ཨ་ལཾ སཾ་ཝི་དྷཱ་ཏུཾ. ཨ་ཐ ཁོ བྷི་ཀྑུ་ནི་ས་ངྒྷོ སུ་ནྡ་རཱི་ན་ནྡཾ བྷི་ཀྑུ་ནིཾ ས་མྨ་ནྣི་ཏྭཱ སཱ་ལ༹ྷ་སྶ མི་གཱ་ར་ན་ཏྟུ་ནོ ན་ཝ་ཀ་མྨི་ཀཾ ཨ་དཱ་སི. ཏེ་ན ཁོ པ་ན ས་མ་ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི སཱ་ལ༹ྷ་སྶ མི་གཱ་ར་ན་ཏྟུ་ནོ ནི་ཝེ་ས་ནཾ ཨ་བྷི་ཀྑ་ཎཾ ག་ཙྪ་ཏི – ‘‘ཝཱ་སིཾ དེ་ཐ, པ་ར་སུཾ [ཕ་ར་སུཾ (སྱཱ. ཀ.)] དེ་ཐ, ཀུ་ཋཱ་རིཾ [ཀུ་དྷཱ་རིཾ (ཀ.)] དེ་ཐ, ཀུ་དྡཱ་ལཾ དེ་ཐ, ནི་ཁཱ་ད་ནཾ དེ་ཐཱ’’ཏི. སཱ་ལ༹ྷོ་པི མི་གཱ་ར་ན་ཏྟཱ བྷི་ཀྑུ་ནུ་པ་སྶ་ཡཾ ཨ་བྷི་ཀྑ་ཎཾ ག་ཙྪ་ཏི ཀ་ཏཱ་ཀ་ཏཾ ཛཱ་ནི་ཏུཾ. ཏེ ཨ་བྷི་ཎྷ་ད་སྶ་ནེ་ན པ་ཊི་བ་དྡྷ་ཙི་ཏྟཱ ཨ་ཧེ་སུཾ.
ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ སུ་ནྡ་རཱི་ན་ནྡཾ བྷི་ཀྑུ་ནིཾ དཱུ་སེ་ཏུཾ ཨོ་ཀཱ་སཾ ཨ་ལ་བྷ་མཱ་ནོ ཨེ་ཏ་དེ་ཝ་ཏྠཱ་ཡ བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷ་ཏྟ་གྒེ ཨཱ་ས་ནཾ པ་ཉྙ་པེ་ནྟོ – ‘‘ཨེ་ཏྟ་ཀཱ བྷི་ཀྑུ་ནི་ཡོ ཨ་ཡྻཱ་ཡ སུ་ནྡ་རཱི་ན་ནྡཱ་ཡ ཝུ་ཌྜྷ་ཏ་རཱ’’ཏི ཨེ་ཀ་མ་ནྟཾ ཨཱ་ས་ནཾ པ་ཉྙ་པེ་སི ‘‘ཨེ་ཏྟ་ཀཱ ན་ཝ་ཀ་ཏ་རཱ’’ཏི – ཨེ་ཀ་མ་ནྟཾ ཨཱ་ས་ནཾ པ་ཉྙ་པེ་སི. པ་ཊི་ཙྪ་ནྣེ ཨོ་ཀཱ་སེ ནི་ཀཱུ་ཊེ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨཱ་ས་ནཾ པ་ཉྙ་པེ་སི, ཡ་ཐཱ ཐེ་རཱ བྷི་ཀྑུ་ནི་ཡོ ཛཱ་ནེ་ཡྻུཾ – ‘‘ན་ཝ་ཀཱ་ནཾ བྷི་ཀྑུ་ནཱི་ནཾ ས་ནྟི་ཀེ ནི་སི་ནྣཱ’’ཏི; ན་ཝ་ཀཱ་པི བྷི་ཀྑུ་ནི་ཡོ ཛཱ་ནེ་ཡྻུཾ – ‘‘ཐེ་རཱ་ནཾ བྷི་ཀྑུ་ནཱི་ནཾ ས་ནྟི་ཀེ ནི་སི་ནྣཱ’’ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ ཀཱ་ལཾ ཨཱ་རོ་ཙཱ་པེ་སི – ‘‘ཀཱ་ལོ, ཨ་ཡྻེ, ནི་ཊྛི་ཏཾ བྷ་ཏྟ’’ནྟི. སུ་ནྡ་རཱི་ན་ནྡཱ བྷི་ཀྑུ་ནཱི ས་ལླ་ཀྑེ་ཏྭཱ – ‘‘ན བ་ཧུ་ཀ་ཏོ སཱ་ལ༹ྷོ མི་གཱ་ར་ན་ཏྟཱ བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སི; མཾ སོ དཱུ་སེ་ཏུ་ཀཱ་མོ. ས་ཙཱ་ཧཾ ག་མི་སྶཱ་མི ཝི་སྶ་རོ མེ བྷ་ཝི་སྶ་ཏཱི’’ཏི, ཨ་ནྟེ་ཝཱ་སི་ནིཾ བྷི་ཀྑུ་ནིཾ ཨཱ་ཎཱ་པེ་སི – ‘‘ག་ཙྪ མེ པི་ཎྜ་པཱ་ཏཾ ནཱི་ཧ་ར. ཡོ ཙེ མཾ པུ་ཙྪ་ཏི, ‘གི་ལཱ་ནཱ’ཏི པ་ཊི་ཝེ་དེ་ཧཱི’’ཏི. ‘‘ཨེ་ཝཾ, ཨ་ཡྻེ’’ཏི ཁོ སཱ བྷི་ཀྑུ་ནཱི སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ པ་ཙྩ་སྶོ་སི.
ཏེ་ན ཁོ པ་ན ས་མ་ཡེ་ན སཱ་ལ༹ྷོ མི་གཱ་ར་ན་ཏྟཱ བ་ཧི་དྭཱ་ར་ཀོ་ཊྛ་ཀེ ཋི་ཏོ ཧོ་ཏི སུ་ནྡ་རཱི་ན་ནྡཾ བྷི་ཀྑུ་ནིཾ པ་ཊི་པུ་ཙྪ་ནྟོ – ‘‘ཀ་ཧཾ, ཨ་ཡྻེ, ཨ་ཡྻཱ སུ་ནྡ་རཱི་ན་ནྡཱ? ཀ་ཧཾ, ཨ་ཡྻེ, ཨ་ཡྻཱ སུ་ནྡ་རཱི་ན་ནྡཱ’’ཏི? ཨེ་ཝཾ ཝུ་ཏྟེ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ནྟེ་ཝཱ་སི་ནཱི བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ ཨེ་ཏ་ད་ཝོ་ཙ – ‘‘གི་ལཱ་ནཱ་ཝུ་སོ; པི་ཎྜ་པཱ་ཏཾ ནཱི་ཧ་རི་སྶཱ་མཱི’’ཏི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ – ‘‘ཡ་མྤཱ་ཧཾ ཨ་ཏྠཱ་ཡ [ཡཾ་པཱ་ཧཾ (སྱཱ.)] བྷི་ཀྑུ་ནི་ས་ངྒྷ་སྶ བྷ་ཏྟཾ ཨ་ཀཱ་སིཾ ཨ་ཡྻཱ་ཡ སུ་ནྡ་རཱི་ན་ནྡཱ་ཡ ཀཱ་ར་ཎཱ’’ཏི མ་ནུ་སྶེ ཨཱ་ཎཱ་པེ་ཏྭཱ – ‘‘བྷི་ཀྑུ་ནི་ས་ངྒྷཾ བྷ་ཏྟེ་ན པ་རི་ཝི་ས་ཐཱ’’ཏི ཝ་ཏྭཱ ཡེ་ན བྷི་ཀྑུ་ནུ་པ་སྶ་ཡོ ཏེ་ནུ་པ་ས་ངྐ་མི. ཏེ་ན ཁོ པ་ན ས་མ་ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི བ་ཧཱ་རཱ་མ་ཀོ་ཊྛ་ཀེ ཋི་ཏཱ ཧོ་ཏི སཱ་ལ༹ྷཾ མི་གཱ་ར་ན་ཏྟཱ་རཾ པ་ཏི་མཱ་ནེ་ནྟཱི. ཨ་དྡ་སཱ ཁོ སུ་ནྡ་རཱི་ན་ནྡཱ བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ དཱུ་ར་ཏོ་ཝ ཨཱ་ག་ཙྪ་ནྟཾ. དི་སྭཱ་ན ཨུ་པ་སྶ་ཡཾ པ་ཝི་སི་ཏྭཱ ས་སཱི་སཾ པཱ་རུ་པི་ཏྭཱ མ་ཉྩ་ཀེ ནི་པ་ཛྫི. ཨ་ཐ ཁོ སཱ་ལ༹ྷོ མི་གཱ་ར་ན་ཏྟཱ ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ སུ་ནྡ་རཱི་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཀིཾ ཏེ, ཨ་ཡྻེ, ཨ་ཕཱ་སུ, ཀི་སྶ ནི་པ་ནྣཱ་སཱི’’ཏི? ‘‘ཨེ་ཝ་ཉྷེ་ཏཾ, ཨཱ་ཝུ་སོ, ཧོ་ཏི ཡཱ ཨ་ནི་ཙྪ་ནྟཾ ཨི་ཙྪ་ཏཱི’’ཏི. ‘‘ཀྱཱ་ཧཾ ཏཾ, ཨ་ཡྻེ, ན ཨི་ཙྪི་སྶཱ་མི? ཨ་པི ཙཱ་ཧཾ ཨོ་ཀཱ་སཾ ན ལ་བྷཱ་མི ཏཾ དཱུ་སེ་ཏུ’’ནྟི. ཨ་ཝ་སྶུ་ཏོ ཨ་ཝ་སྶུ་ཏཱ་ཡ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཀཱ་ཡ་སཾ་ས་གྒཾ ས་མཱ་པ་ཛྫི.
ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི ཛ་རཱ་དུ་བྦ་ལཱ ཙ་ར་ཎ་གི་ལཱ་ནཱ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ཝི་དཱུ་རེ ནི་པ་ནྣཱ ཧོ་ཏི. ཨ་དྡ་སཱ ཁོ སཱ བྷི་ཀྑུ་ནཱི སཱ་ལ༹ྷཾ མི་གཱ་ར་ན་ཏྟཱ་རཾ ཨ་ཝ་སྶུ་ཏཾ ཨ་ཝ་སྶུ་ཏཱ་ཡ སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཀཱ་ཡ་སཾ་ས་གྒཾ ས་མཱ་པ་ཛྫ་ནྟཾ. དི་སྭཱ་ན ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ ཨ་ཡྻཱ སུ་ནྡ་རཱི་ན་ནྡཱ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི! ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ ས་ནྟུ་ཊྛཱ ལ་ཛྫི་ནི་ཡོ ཀུ་ཀྐུ་ཙྩི་ཀཱ སི་ཀྑཱ་ཀཱ་མཱ ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ སུ་ནྡ་རཱི་ན་ནྡཱ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡེ ཏེ བྷི་ཀྑཱུ ཨ་པྤི་ཙྪཱ ས་ནྟུ་ཊྛཱ ལ་ཛྫི་ནོ ཀུ་ཀྐུ་ཙྩ་ཀཱ སི་ཀྑཱ་ཀཱ་མཱ ཏེ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏཱི’’ཏི!
ཨ་ཐ ཁོ ཏེ བྷི་ཀྑཱུ སུ་ནྡ་རཱི་ན་ནྡཾ བྷི་ཀྑུ་ནིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡ་ཏཱི’’ཏི [སཱ་དི་ཡཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ – ‘‘ཨ་ན་ནུ་ཙྪ་ཝི་ཀཾ, བྷི་ཀྑ་ཝེ, སུ་ནྡ་རཱི་ན་ནྡཱ་ཡ བྷི་ཀྑུ་ནི་ཡཱ ཨ་ན་ནུ་ལོ་མི་ཀཾ ཨ་པྤ་ཏི་རཱུ་པཾ ཨ་སྶཱ་མ་ཎ་ཀཾ ཨ་ཀ་པྤི་ཡཾ ཨ་ཀ་ར་ཎཱི་ཡཾ. ཀ་ཐ་ཉྷི ནཱ་མ, བྷི་ཀྑ་ཝེ, སུ་ནྡ་རཱི་ན་ནྡཱ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཀཱ་ཡ་སཾ་ས་གྒཾ སཱ་དི་ཡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ པ་ས་ནྣཱ་ནཾ ཝཱ བྷི་ཡྻོ་བྷཱ་ཝཱ་ཡ. ཨ་ཐ ཁྭེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ན་ཉྩེ་ཝ ཨ་པྤ་སཱ་དཱ་ཡ པ་ས་ནྣཱ་ན་ཉྩ ཨེ་ཀ་ཙྩཱ་ནཾ ཨ་ཉྙ་ཐ་ཏྟཱ་ཡཱ’’ཏི. ཨ་ཐ ཁོ བྷ་ག་ཝཱ སུ་ནྡ་རཱི་ན་ནྡཾ བྷི་ཀྑུ་ནིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ དུ་པྤོ་ས་ཏཱ་ཡ མ་ཧི་ཙྪ་ཏཱ་ཡ ཨ་ས་ནྟུ་ཊྛི་ཏཱ་ཡ [ཨ་ས་ནྟུ་ཊྛ་ཏཱ་ཡ (སྱཱ.), ཨ་ས་ནྟུ་ཊྛི་ཡཱ (ཀ.)] ས་ངྒ་ཎི་ཀཱ་ཡ ཀོ་ས་ཛྫ་སྶ ཨ་ཝ་ཎྞཾ བྷཱ་སི་ཏྭཱ, ཨ་ནེ་ཀ་པ་རི་ཡཱ་ཡེ་ན སུ་བྷ་ར་ཏཱ་ཡ སུ་པོ་ས་ཏཱ་ཡ ཨ་པྤི་ཙྪ་སྶ ས་ནྟུ་ཊྛ་སྶ [ས་ནྟུ་ཊྛི་ཡཱ (ཀ.)] ས་ལླེ་ཁ་སྶ དྷུ་ཏ་སྶ པཱ་སཱ་དི་ཀ་སྶ ཨ་པ་ཙ་ཡ་སྶ ཝཱི་རི་ཡཱ་ར་མྦྷ་སྶ ཝ་ཎྞཾ བྷཱ་སི་ཏྭཱ, བྷི་ཀྑཱུ་ནཾ ཏ་ད་ནུ་ཙྪ་ཝི་ཀཾ ཏ་ད་ནུ་ལོ་མི་ཀཾ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ, ས་ངྒྷ་ཕཱ་སུ་ཏཱ་ཡ, དུ་མྨ་ངྐཱུ་ནཾ བྷི་ཀྑུ་ནཱི་ནཾ ནི་གྒ་ཧཱ་ཡ, པེ་ས་ལཱ་ནཾ བྷི་ཀྑུ་ནཱི་ནཾ ཕཱ་སུ་ཝི་ཧཱ་རཱ་ཡ, དི་ཊྛ་དྷ་མྨི་ཀཱ་ནཾ ཨཱ་ས་ཝཱ་ནཾ སཾ་ཝ་རཱ་ཡ, ས་མྤ་རཱ་ཡི་ཀཱ་ནཾ ཨཱ་ས་ཝཱ་ནཾ པ་ཊི་གྷཱ་ཏཱ་ཡ, ཨ་པྤ་ས་ནྣཱ་ནཾ པ་སཱ་དཱ་ཡ, པ་ས་ནྣཱ་ནཾ བྷི་ཡྻོ་བྷཱ་ཝཱ་ཡ, ས་དྡྷ་མྨ་ཊྛི་ཏི་ཡཱ ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༥༧. ‘‘ཡཱ པ་ན བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཨཱ་མ་ས་ནཾ ཝཱ པ་རཱ་མ་ས་ནཾ ཝཱ ག་ཧ་ཎཾ ཝཱ ཚུ་པ་ནཾ ཝཱ པ་ཊི་པཱི་ལ༹་ནཾ ཝཱ སཱ་དི་ཡེ་ཡྻ, ཨ་ཡ་མྤི པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ ཨུ་བྦྷ་ཛཱ་ཎུ་མ་ཎྜ་ལི་ཀཱ’’ཏི.
༦༥༨. ཡཱ པ་ནཱཏི ཡཱ ཡཱ་དི་སཱ ཡ་ཐཱ་ཡུ་ཏྟཱ ཡ་ཐཱ་ཛ་ཙྩཱ ཡ་ཐཱ་ནཱ་མཱ ཡ་ཐཱ་གོ་ཏྟཱ ཡ་ཐཱ་སཱི་ལཱ ཡ་ཐཱ་ཝི་ཧཱ་རི་ནཱི ཡ་ཐཱ་གོ་ཙ་རཱ ཐེ་རཱ ཝཱ ན་ཝཱ ཝཱ མ་ཛ྄ཛྷི་མཱ ཝཱ, ཨེ་སཱ ཝུ་ཙྩ་ཏི ཡཱ པ་ནཱ་ཏི.
བྷི་ཀྑུ་ནཱིཏི བྷི་ཀྑི་ཀཱ་ཏི བྷི་ཀྑུ་ནཱི; བྷི་ཀྑཱ་ཙ་རི་ཡཾ ཨ་ཛ྄ཛྷུ་པ་ག་ཏཱ་ཏི བྷི་ཀྑུ་ནཱི; བྷི་ནྣ་པ་ཊ་དྷ་རཱ་ཏི བྷི་ཀྑུ་ནཱི; ས་མ་ཉྙཱ་ཡ བྷི་ཀྑུ་ནཱི; པ་ཊི་ཉྙཱ་ཡ བྷི་ཀྑུ་ནཱི; ཨེ་ཧི བྷི་ཀྑུ་ནཱི་ཏི བྷི་ཀྑུ་ནཱི; ཏཱི་ཧི ས་ར་ཎ་ག་མ་ནེ་ཧི ཨུ་པ་ས་མྤ་ནྣཱ་ཏི བྷི་ཀྑུ་ནཱི; བྷ་དྲཱ བྷི་ཀྑུ་ནཱི; སཱ་རཱ བྷི་ཀྑུ་ནཱི; སེ་ཁཱ བྷི་ཀྑུ་ནཱི; ཨ་སེ་ཁཱ བྷི་ཀྑུ་ནཱི; ས་མ་གྒེ་ན ཨུ་བྷ་ཏོ་ས་ངྒྷེ་ན ཉ་ཏྟི་ཙ་ཏུ་ཏྠེ་ན ཀ་མྨེ་ན ཨ་ཀུ་པྤེ་ན ཋཱ་ནཱ་ར་ཧེ་ན ཨུ་པ་ས་མྤ་ནྣཱ་ཏི བྷི་ཀྑུ་ནཱི. ཏ་ཏྲ ཡཱ་ཡཾ བྷི་ཀྑུ་ནཱི ས་མ་གྒེ་ན ཨུ་བྷ་ཏོ་ས་ངྒྷེ་ན ཉ་ཏྟི་ཙ་ཏུ་ཏྠེ་ན ཀ་མྨེ་ན ཨ་ཀུ་པྤེ་ན ཋཱ་ནཱ་ར་ཧེ་ན ཨུ་པ་ས་མྤ་ནྣཱ, ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ཝ་སྶུ་ཏཱ ནཱ་མ སཱ་ར་ཏྟཱ ཨ་པེ་ཀྑ་ཝ་ཏཱི པ་ཊི་བ་དྡྷ་ཙི་ཏྟཱ.
ཨ་ཝ་སྶུ་ཏོ ནཱ་མ སཱ་ར་ཏྟོ ཨ་པེ་ཀྑ་ཝཱ པ་ཊི་བ་དྡྷ་ཙི་ཏྟོ.
པུ་རི་ས་པུ་གྒ་ལོ ནཱ་མ མ་ནུ་སྶ་པུ་རི་སོ ན ཡ་ཀྑོ ན པེ་ཏོ ན ཏི་ར་ཙྪཱ་ན་ག་ཏོ ཝི་ཉྙཱུ པ་ཊི་བ་ལོ ཀཱ་ཡ་སཾ་ས་གྒཾ ས་མཱ་པ་ཛྫི་ཏུཾ.
ཨ་དྷ་ཀྑ་ཀནྟི ཧེ་ཊྛ་ཀྑ་ཀཾ.
ཨུ་བྦྷ་ཛཱ་ཎུ་མ་ཎྜ་ལནྟི ཨུ་པ་རི་ཛཱ་ཎུ་མ་ཎྜ་ལཾ.
ཨཱ་མ་ས་ནཾ ནཱ་མ ཨཱ་མ་ཊྛ་མ་ཏྟཾ.
པ་རཱ་མ་ས་ནཾ ནཱ་མ ཨི་ཏོ་ཙི་ཏོ ཙ ས་ཉྩོ་པ་ནཾ.
ག་ཧ་ཎཾ ནཱ་མ ག་ཧི་ཏ་མ་ཏྟཾ.
ཚུ་པ་ནཾ ནཱ་མ ཕུ་ཊྛ་མ་ཏྟཾ.
པ་ཊི་པཱི་ལ༹་ནཾ ཝཱ སཱ་དི་ཡེ་ཡྻཱཏི ཨ་ངྒཾ ག་ཧེ་ཏྭཱ ནི་པྤཱི་ལ༹་ནཾ སཱ་དི་ཡ་ཏི.
ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.
པཱ་རཱ་ཛི་ཀཱ ཧོ་ཏཱིཏི སེ་ཡྻ་ཐཱ་པི ནཱ་མ པུ་རི་སོ སཱི་ས་ཙྪི་ནྣོ ཨ་བྷ་བྦོ ཏེ་ན ས་རཱི་ར་བ་ནྡྷ་ནེ་ན ཛཱི་ཝི་ཏུཾ, ཨེ་ཝ་མེ་ཝ བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཨཱ་མ་ས་ནཾ ཝཱ པ་རཱ་མ་ས་ནཾ ཝཱ ག་ཧ་ཎཾ ཝཱ ཚུ་པ་ནཾ ཝཱ པ་ཊི་པཱི་ལ༹་ནཾ ཝཱ སཱ་དི་ཡ་ནྟཱི ཨ་སྶ་མ་ཎཱི ཧོ་ཏི ཨ་ས་ཀྱ་དྷཱི་ཏཱ. ཏེ་ན ཝུ་ཙྩ་ཏི པཱ་རཱ་ཛི་ཀཱ ཧོ་ཏཱི་ཏི.
ཨ་སཾ་ཝཱ་སཱཏི སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ, ཨེ་སོ སཾ་ཝཱ་སོ ནཱ་མ. སོ ཏཱ་ཡ ས་དྡྷིཾ ན་ཏྠི, ཏེ་ན ཝུ་ཙྩ་ཏི ཨ་སཾ་ཝཱ་སཱ་ཏི.
༦༥༩. ཨུ་བྷ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི པཱ་རཱ་ཛི་ཀ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
༦༦༠. ཨེ་ཀ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
༦༦༡. ཨུ་བྷ་ཏོ་ཨ་ཝ་སྶུ་ཏེ ཡ་ཀྑ་སྶ ཝཱ པེ་ཏ་སྶ ཝཱ པ་ཎྜ་ཀ་སྶ ཝཱ ཏི་ར་ཙྪཱ་ན་ག་ཏ་མ་ནུ་སྶ་ཝི་གྒ་ཧ་སྶ ཝཱ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
༦༦༢. ཨེ་ཀ་ཏོ་ཨ་ཝ་སྶུ་ཏེ ཨ་དྷ་ཀྑ་ཀཾ ཨུ་བྦྷ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ཀཱ་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ཀཱ་ཡ་པ་ཊི་བ་དྡྷེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
ནི་སྶ་གྒི་ཡེ་ན ཀཱ་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ཀཱ་ཡ་པ་ཊི་བ་དྡྷཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ. ནི་སྶ་གྒི་ཡེ་ན ནི་སྶ་གྒི་ཡཾ ཨཱ་མ་ས་ཏི, ཨཱ་པ་ཏྟི དུ་ཀྐ་ཊ་སྶ.
༦༦༣. ཨ་ནཱ་པ་ཏྟི ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ, ཨ་སཱ་དི་ཡ་ནྟི་ཡཱ, ཨུ་མྨ་ཏྟི་ཀཱ་ཡ, ཁི་ཏྟ་ཙི་ཏྟཱ་ཡ, ཝེ་ད་ནཱ་ཊྚཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་པཱ་རཱ་ཛི་ཀཾ ས་མ་ཏྟཾ [བྷི་ཀྑུ་ནི་ཝི་བྷ་ངྒེ སི་ཀྑཱ་པ་ད་ག་ཎ་ནཱ བྷི་ཀྑཱུ་ཧི§ཨ་སཱ་དྷཱ་ར་ཎ་ཝ་སེ་ན པ་ཀཱ་སི་ཏཱ་ཏི ཝེ་དི་ཏ་བྦཱ].
༢. དུ་ཏི་ཡ་པཱ་རཱ་ཛི་ཀཾ
༦༦༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན སུ་ནྡ་རཱི་ན་ནྡཱ བྷི་ཀྑུ་ནཱི སཱ་ལ༹ྷེ་ན མི་གཱ་ར་ན་ཏྟུ་ནཱ ག་བྦྷི་ནཱི ཧོ་ཏི. ཡཱ་ཝ ག་བྦྷོ ཏ་རུ་ཎོ ཨ་ཧོ་སི ཏཱ་ཝ ཚཱ་དེ་སི. པ་རི་པ་ཀྐེ ག་བྦྷེ ཝི་བྦྷ་མི་ཏྭཱ ཝི་ཛཱ་ཡི. བྷི་ཀྑུ་ནི་ཡོ ཐུ་ལླ་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘སུ་ནྡ་རཱི་ན་ནྡཱ ཁོ, ཨ་ཡྻེ, ཨ་ཙི་ར་ཝི་བྦྷ་ནྟཱ ཝི་ཛཱ་ཏཱ. ཀ་ཙྩི ནོ སཱ བྷི་ཀྑུ་ནཱི་ཡེ་ཝ ས་མཱ་ནཱ ག་བྦྷི་ནཱི’’ཏི? ‘‘ཨེ་ཝཾ, ཨ་ཡྻེ’’ཏི. ‘‘ཀི་སྶ པ་ན ཏྭཾ, ཨ་ཡྻེ, ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་སི ན ག་ཎ་སྶ ཨཱ་རོ་ཙེ་སཱི’’ཏི? ‘‘ཡོ ཨེ་ཏི་སྶཱ ཨ་ཝ་ཎྞོ མ་ཡ྄ཧེ་སོ ཨ་ཝ་ཎྞོ, ཡཱ ཨེ་ཏི་སྶཱ ཨ་ཀི་ཏྟི མ་ཡ྄ཧེ་སཱ ཨ་ཀི་ཏྟི, ཡོ ཨེ་ཏི་སྶཱ ཨ་ཡ་སོ མ་ཡ྄ཧེ་སོ ཨ་ཡ་སོ, ཡོ ཨེ་ཏི་སྶཱ ཨ་ལཱ་བྷོ མ་ཡ྄ཧེ་སོ ཨ་ལཱ་བྷོ. ཀྱཱ་ཧཾ, ཨ་ཡྻེ, ཨ་ཏྟ་ནོ ཨ་ཝ་ཎྞཾ ཨ་ཏྟ་ནོ ཨ་ཀི་ཏྟིཾ ཨ་ཏྟ་ནོ ཨ་ཡ་སཾ ཨ་ཏྟ་ནོ ཨ་ལཱ་བྷཾ པ་རེ་སཾ ཨཱ་རོ་ཙེ་སྶཱ་མཱི’’ཏི? ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་སྶ་ཏི ན ག་ཎ་སྶ ཨཱ་རོ་ཙེ་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ [ཡེ ཏེ བྷི་ཀྑཱུ…པེ… (?)] བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ བྷི་ཀྑུ་ས་ངྒྷཾ ས་ནྣི་པཱ་ཏཱ་པེ་ཏྭཱ བྷི་ཀྑཱུ པ་ཊི་པུ་ཙྪི – ‘‘ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་ཏི [པ་ཊི་ཙོ་དེ་སི… ཨཱ་རོ་ཙེ་སཱི་ཏི (ཀ.)] ན ག་ཎ་སྶ ཨཱ་རོ་ཙེ་ཏཱི’’ཏི [པ་ཊི་ཙོ་དེ་སི… ཨཱ་རོ་ཙེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་སྶ་ཏི ན ག་ཎ་སྶ ཨཱ་རོ་ཙེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༦༥. ‘‘ཡཱ པ་ན བྷི་ཀྑུ་ནཱི ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་ཡྻ ན ག་ཎ་སྶ ཨཱ་རོ་ཙེ་ཡྻ, ཡ་དཱ ཙ སཱ ཋི་ཏཱ ཝཱ ཨ་སྶ ཙུ་ཏཱ ཝཱ ནཱ་སི་ཏཱ ཝཱ ཨ་ཝ་སྶ་ཊཱ ཝཱ, སཱ པ་ཙྪཱ ཨེ་ཝཾ ཝ་དེ་ཡྻ – ‘པུ་བྦེ་ཝཱ་ཧཾ, ཨ་ཡྻེ, ཨ་ཉྙཱ་སིཾ ཨེ་ཏཾ བྷི་ཀྑུ་ནིཾ ཨེ་ཝ་རཱུ་པཱ ཙ ཨེ་ཝ་རཱུ་པཱ ཙ སཱ བྷ་གི་ནཱི་ཏི, ནོ ཙ ཁོ ཨ་ཏྟ་ནཱ པ་ཊི་ཙོ་དེ་སྶཾ ན ག་ཎ་སྶ ཨཱ་རོ་ཙེ་སྶ’ནྟི, ཨ་ཡ་མྤི པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ ཝ་ཛྫ་པྤ་ཊི་ཙྪཱ་དི་ཀཱ’’ཏི.
༦༦༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི, ཨ་ཉྙེ ཝཱ ཏ་སྶཱ ཨཱ་རོ་ཙེ་ནྟི, སཱ ཝཱ ཨཱ་རོ་ཙེ་ཏི.
པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣནྟི ཨ་ཊྛ་ནྣཾ པཱ་རཱ་ཛི་ཀཱ་ནཾ ཨ་ཉྙ་ཏ་རཾ པཱ་རཱ་ཛི་ཀཾ ཨ་ཛ྄ཛྷཱ་པ་ནྣཾ.
ནེ་ཝ་ཏྟ་ནཱ པ་ཊི་ཙོ་དེ་ཡྻཱཏི ན ས་ཡཾ ཙོ་དེ་ཡྻ.
ན ག་ཎ་སྶ ཨཱ་རོ་ཙེ་ཡྻཱཏི ན ཨ་ཉྙཱ་སཾ བྷི་ཀྑུ་ནཱི་ནཾ ཨཱ་རོ་ཙེ་ཡྻ.
ཡ་དཱ ཙ སཱ ཋི་ཏཱ ཝཱ ཨ་སྶ ཙུ་ཏཱ ཝཱཏི ཋི་ཏཱ ནཱ་མ ས་ལི་ངྒེ ཋི་ཏཱ ཝུ་ཙྩ་ཏི. ཙུ་ཏཱ ནཱ་མ ཀཱ་ལ་ངྐ་ཏཱ ཝུ་ཙྩ་ཏི. ནཱ་སི་ཏཱ ནཱ་མ ས་ཡཾ ཝཱ ཝི་བྦྷ་ནྟཱ ཧོ་ཏི ཨ་ཉྙེ་ཧི ཝཱ ནཱ་སི་ཏཱ. ཨ་ཝ་སྶ་ཊཱ ནཱ་མ ཏི་ཏྠཱ་ཡ་ཏ་ནཾ ས་ངྐ་ནྟཱ ཝུ་ཙྩ་ཏི. སཱ པ་ཙྪཱ ཨེ་ཝཾ ཝ་དེ་ཡྻ – ‘‘པུ་བྦེ་ཝཱ་ཧཾ, ཨ་ཡྻེ, ཨ་ཉྙཱ་སིཾ ཨེ་ཏཾ བྷི་ཀྑུ་ནིཾ ཨེ་ཝ་རཱུ་པཱ ཙ ཨེ་ཝ་རཱུ་པཱ ཙ སཱ བྷ་གི་ནཱི’’ཏི.
ནོ ཙ ཁོ ཨ་ཏྟ་ནཱ པ་ཊི་ཙོ་དེ་སྶནྟི ས་ཡཾ ཝཱ ན ཙོ་དེ་སྶཾ.
ན ག་ཎ་སྶ ཨཱ་རོ་ཙེ་སྶནྟི ན ཨ་ཉྙཱ་སཾ བྷི་ཀྑུ་ནཱི་ནཾ ཨཱ་རོ་ཙེ་སྶཾ.
ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.
པཱ་རཱ་ཛི་ཀཱ ཧོ་ཏཱིཏི སེ་ཡྻ་ཐཱ་པི ནཱ་མ པ་ཎྜུ་པ་ལཱ་སོ བ་ནྡྷ་ནཱ པ་མུ་ཏྟོ ཨ་བྷ་བྦོ ཧ་རི་ཏ་ཏྠཱ་ཡ, ཨེ་ཝ་མེ་ཝ བྷི་ཀྑུ་ནཱི ཛཱ་ནཾ པཱ་རཱ་ཛི་ཀཾ དྷ་མྨཾ ཨ་ཛ྄ཛྷཱ་པ་ནྣཾ བྷི་ཀྑུ་ནིཾ ནེ་ཝ་ཏྟ་ནཱ པ་ཊི་ཙོ་དེ་སྶཱ་མི ན ག་ཎ་སྶ ཨཱ་རོ་ཙེ་སྶཱ་མཱི་ཏི དྷུ་རཾ ནི་ཀྑི་ཏྟ་མ་ཏྟེ ཨ་སྶ་མ་ཎཱི ཧོ་ཏི ཨ་ས་ཀྱ་དྷཱི་ཏཱ. ཏེ་ན ཝུ་ཙྩ་ཏི པཱ་རཱ་ཛི་ཀཱ ཧོ་ཏཱི་ཏི.
ཨ་སཾ་ཝཱ་སཱཏི སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ. ཨེ་སོ སཾ་ཝཱ་སོ ནཱ་མ. སོ ཏཱ་ཡ ས་དྡྷིཾ ན་ཏྠི. ཏེ་ན ཝུ་ཙྩ་ཏི ཨ་སཾ་ཝཱ་སཱ་ཏི.
༦༦༧. ཨ་ནཱ་པ་ཏྟི ‘‘ས་ངྒྷ་སྶ བྷ་ཎྜ་ནཾ ཝཱ ཀ་ལ་ཧོ ཝཱ ཝི་གྒ་ཧོ ཝཱ ཝི་ཝཱ་དོ ཝཱ བྷ་ཝི་སྶ་ཏཱི’’ཏི ནཱ་རོ་ཙེ་ཏི, ‘‘ས་ངྒྷ་བྷེ་དོ ཝཱ ས་ངྒྷ་རཱ་ཛི ཝཱ བྷ་ཝི་སྶ་ཏཱི’’ཏི ནཱ་རོ་ཙེ་ཏི, ‘‘ཨ་ཡཾ ཀ་ཀྑ་ལཱ༹ ཕ་རུ་སཱ ཛཱི་ཝི་ཏ་ནྟ་རཱ་ཡཾ ཝཱ བྲ་ཧྨ་ཙ་རི་ཡ་ནྟ་རཱ་ཡཾ ཝཱ ཀ་རི་སྶ་ཏཱི’’ཏི ནཱ་རོ་ཙེ་ཏི, ཨ་ཉྙཱ པ་ཏི་རཱུ་པཱ བྷི་ཀྑུ་ནི་ཡོ ཨ་པ་སྶ་ནྟཱི ནཱ་རོ་ཙེ་ཏི, ན་ཙྪཱ་དེ་ཏུ་ཀཱ་མཱ ནཱ་རོ་ཙེ་ཏི, པ་ཉྙཱ་ཡི་སྶ་ཏི ས་ཀེ་ན ཀ་མྨེ་ནཱ་ཏི ནཱ་རོ་ཙེ་ཏི, ཨུ་མྨ་ཏྟི་ཀཱ་ཡ…པེ… ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་པཱ་རཱ་ཛི་ཀཾ ས་མ་ཏྟཾ.
༣. ཏ་ཏི་ཡ་པཱ་རཱ་ཛི་ཀཾ
༦༦༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ ཨ་རི་ཊྛཾ བྷི་ཀྑུཾ ག་དྡྷ་བཱ་དྷི་པུ་བྦཾ ཨ་ནུ་ཝ་ཏྟ་ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ ཨ་རི་ཊྛཾ བྷི་ཀྑུཾ ག་དྡྷ་བཱ་དྷི་པུ་བྦཾ ཨ་ནུ་ཝ་ཏྟི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ ཨ་རི་ཊྛཾ བྷི་ཀྑུཾ ག་དྡྷ་བཱ་དྷི་པུ་བྦཾ ཨ་ནུ་ཝ་ཏྟ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ ཨ་རི་ཊྛཾ བྷི་ཀྑུཾ ག་དྡྷ་བཱ་དྷི་པུ་བྦཾ ཨ་ནུ་ཝ་ཏྟི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༦༩. ‘‘ཡཱ པ་ན བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ བྷི་ཀྑུཾ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རཾ ཨ་པྤ་ཊི་ཀཱ་རཾ ཨ་ཀ་ཏ་ས་ཧཱ་ཡཾ ཏ་མ་ནུ་ཝ་ཏྟེ་ཡྻ, སཱ བྷི་ཀྑུ་ནཱི བྷི་ཀྑུ་ནཱི་ཧི ཨེ་ཝ་མ་སྶ ཝ་ཙ་ནཱི་ཡཱ – ‘ཨེ་སོ ཁོ, ཨ་ཡྻེ, བྷི་ཀྑུ ས་མ་གྒེ་ན ས་ངྒྷེ་ན ཨུ་ཀྑི་ཏྟོ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རོ ཨ་པྤ་ཊི་ཀཱ་རོ ཨ་ཀ་ཏ་ས་ཧཱ་ཡོ, མཱ་ཡྻེ, ཨེ་ཏཾ བྷི་ཀྑུཾ ཨ་ནུ་ཝ་ཏྟཱི’ཏི. ཨེ་ཝ་ཉྩ སཱ བྷི་ཀྑུ་ནཱི བྷི་ཀྑུ་ནཱི་ཧི ཝུ་ཙྩ་མཱ་ནཱ ཏ་ཐེ་ཝ པ་གྒ་ཎྷེ་ཡྻ, སཱ བྷི་ཀྑུ་ནཱི བྷི་ཀྑུ་ནཱི་ཧི ཡཱ་ཝ་ཏ་ཏི་ཡཾ ས་མ་ནུ་བྷཱ་སི་ཏ་བྦཱ ཏ་སྶ པ་ཊི་ནི་སྶ་གྒཱ་ཡ. ཡཱ་ཝ་ཏ་ཏི་ཡཾ ཙེ ས་མ་ནུ་བྷཱ་སི་ཡ་མཱ་ནཱ ཏཾ པ་ཊི་ནི་སྶ་ཛྫེ་ཡྻ, ཨི་ཙྩེ་ཏཾ ཀུ་ས་ལཾ. ནོ ཙེ པ་ཊི་ནི་སྶ་ཛྫེ་ཡྻ, ཨ་ཡ་མྤི པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ ཨུ་ཀྑི་ཏྟཱ་ནུ་ཝ་ཏྟི་ཀཱ’’ཏི.
༦༧༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ས་མ་གྒོ ནཱ་མ ས་ངྒྷོ ས་མཱ་ན་སཾ་ཝཱ་ས་ཀོ ས་མཱ་ན་སཱི་མཱ་ཡཾ ཋི་ཏོ.
ཨུ་ཀྑི་ཏྟོ ནཱ་མ ཨཱ་པ་ཏྟི་ཡཱ ཨ་ད་སྶ་ནེ ཝཱ ཨ་པྤ་ཊི་ཀ་མྨེ ཝཱ ཨ་པྤ་ཊི་ནི་སྶ་གྒེ ཝཱ [ཨ་ད་སྶ་ནེ་ན ཝཱ ཨ་པྤ་ཊི་ཀ་མྨེ་ན ཝཱ ཨ་པྤ་ཊི་ནི་སྶ་གྒེ་ན ཝཱ (ཀ.), ཨ་ད་སྶ་ནེ ཝཱ ཨ་པྤ་ཊི་ཀ་མྨེ ཝཱ པཱ་པི་ཀཱ་ཡ དི་ཊྛི་ཡཱ ཨ་པྤ་ཊི་ནི་སྶ་གྒེ ཝཱ (?)] ཨུ་ཀྑི་ཏྟོ.
དྷ་མྨེ་ན ཝི་ན་ཡེ་ནཱཏི ཡེ་ན དྷ་མྨེ་ན ཡེ་ན ཝི་ན་ཡེ་ན.
ས་ཏྠུ་སཱ་ས་ནེ་ནཱཏི ཛི་ན་སཱ་ས་ནེ་ན བུ་དྡྷ་སཱ་ས་ནེ་ན.
ཨ་ནཱ་ད་རོ ནཱ་མ ས་ངྒྷཾ ཝཱ ག་ཎཾ ཝཱ པུ་གྒ་ལཾ ཝཱ ཀ་མྨཾ ཝཱ ནཱ་དི་ཡ་ཏི.
ཨ་པྤ་ཊི་ཀཱ་རོ ནཱ་མ ཨུ་ཀྑི་ཏྟོ ཨ་ནོ་སཱ་རི་ཏོ.
ཨ་ཀ་ཏ་ས་ཧཱ་ཡོ ནཱ་མ ས་མཱ་ན་སཾ་ཝཱ་ས་ཀཱ བྷི་ཀྑཱུ ཝུ་ཙྩ་ནྟི ས་ཧཱ་ཡཱ. སོ ཏེ་ཧི ས་དྡྷིཾ ན་ཏྠི, ཏེ་ན ཝུ་ཙྩ་ཏི ཨ་ཀ་ཏ་ས་ཧཱ་ཡོ་ཏི.
ཏ་མ་ནུ་ཝ་ཏྟེ་ཡྻཱཏི ཡཾ་དི་ཊྛི་ཀོ སོ ཧོ་ཏི ཡཾ་ཁ་ནྟི་ཀོ ཡཾ་རུ་ཙི་ཀོ, སཱ་པི ཏཾ་དི་ཊྛི་ཀཱ ཧོ་ཏི ཏཾ་ཁ་ནྟི་ཀཱ ཏཾ་རུ་ཙི་ཀཱ.
སཱ བྷི་ཀྑུ་ནཱིཏི ཡཱ སཱ ཨུ་ཀྑི་ཏྟཱ་ནུ་ཝ་ཏྟི་ཀཱ བྷི་ཀྑུ་ནཱི.
བྷི་ཀྑུ་ནཱི་ཧཱིཏི ཨ་ཉྙཱ་ཧི བྷི་ཀྑུ་ནཱི་ཧི. ཡཱ པ་སྶ་ནྟི ཡཱ སུ་ཎ་ནྟི ཏཱ་ཧི ཝ་ཏྟ་བྦཱ – ‘‘ཨེ་སོ ཁོ, ཨ་ཡྻེ, བྷི་ཀྑུ ས་མ་གྒེ་ན ས་ངྒྷེ་ན ཨུ་ཀྑི་ཏྟོ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རོ ཨ་པྤ་ཊི་ཀཱ་རོ ཨ་ཀ་ཏ་ས་ཧཱ་ཡོ. མཱ་ཡྻེ, ཨེ་ཏཾ བྷི་ཀྑུཾ ཨ་ནུ་ཝ་ཏྟཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ; ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སུ་ཏྭཱ ན ཝ་ད་ནྟི, ཨཱ་པ་ཏྟི དུ་ཀྐ་ཊ་སྶ. སཱ བྷི་ཀྑུ་ནཱི ས་ངྒྷ་མ་ཛ྄ཛྷ་མྤི ཨཱ་ཀ་ཌྜྷི་ཏྭཱ ཝ་ཏྟ་བྦཱ – ‘‘ཨེ་སོ ཁོ, ཨ་ཡྻེ, བྷི་ཀྑུ ས་མ་གྒེ་ན ས་ངྒྷེ་ན ཨུ་ཀྑི་ཏྟོ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རོ ཨ་པྤ་ཊི་ཀཱ་རོ ཨ་ཀ་ཏ་ས་ཧཱ་ཡོ. མཱ་ཡྻེ, ཨེ་ཏཾ བྷི་ཀྑུཾ ཨ་ནུ་ཝ་ཏྟཱི’’ཏི. དུ་ཏི་ཡ་མྤི ཝ་ཏྟ་བྦཱ. ཏ་ཏི་ཡ་མྤི ཝ་ཏྟ་བྦཱ. ས་ཙེ པ་ཊི་ནི་སྶ་ཛྫ་ཏི, ཨི་ཙྩེ་ཏཾ ཀུ་ས་ལཾ. ནོ ཙེ པ་ཊི་ནི་སྶ་ཛྫ་ཏི, ཨཱ་པ་ཏྟི དུ་ཀྐ་ཊ་སྶ. སཱ བྷི་ཀྑུ་ནཱི ས་མ་ནུ་བྷཱ་སི་ཏ་བྦཱ. ཨེ་ཝ་ཉྩ པ་ན, བྷི་ཀྑ་ཝེ, ས་མ་ནུ་བྷཱ་སི་ཏ་བྦཱ. བྱ་ཏྟཱ་ཡ བྷི་ཀྑུ་ནི་ཡཱ པ་ཊི་བ་ལཱ་ཡ ས་ངྒྷོ ཉཱ་པེ་ཏ་བྦོ –
༦༧༡. ‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ བྷི་ཀྑུཾ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རཾ ཨ་པྤ་ཊི་ཀཱ་རཾ ཨ་ཀ་ཏ་ས་ཧཱ་ཡཾ ཏ་མ་ནུ་ཝ་ཏྟ་ཏི, སཱ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ཡ་དི ས་ངྒྷ་སྶ པ་ཏྟ་ཀ་ལླཾ, ས་ངྒྷོ ཨི་ཏྠ་ནྣཱ་མཾ བྷི་ཀྑུ་ནིཾ ས་མ་ནུ་བྷཱ་སེ་ཡྻ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཨེ་སཱ ཉ་ཏྟི.
‘‘སུ་ཎཱ་ཏུ མེ, ཨ་ཡྻེ, ས་ངྒྷོ. ཨ་ཡཾ ཨི་ཏྠ་ནྣཱ་མཱ བྷི་ཀྑུ་ནཱི ས་མ་གྒེ་ན ས་ངྒྷེ་ན ཨུ་ཀྑི་ཏྟཾ བྷི་ཀྑུཾ དྷ་མྨེ་ན ཝི་ན་ཡེ་ན ས་ཏྠུ་སཱ་ས་ནེ་ན ཨ་ནཱ་ད་རཾ ཨ་པྤ་ཊི་ཀཱ་རཾ ཨ་ཀ་ཏ་ས་ཧཱ་ཡཾ ཏ་མ་ནུ་ཝ་ཏྟ་ཏི. སཱ ཏཾ ཝ་ཏྠུཾ ན པ་ཊི་ནི་སྶ་ཛྫ་ཏི. ས་ངྒྷོ ཨི་ཏྠ་ནྣཱ་མཾ བྷི་ཀྑུ་ནིཾ ས་མ་ནུ་བྷཱ་ས་ཏི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཡ་སྶཱ ཨ་ཡྻཱ་ཡ ཁ་མ་ཏི ཨི་ཏྠ་ནྣཱ་མཱ་ཡ བྷི་ཀྑུ་ནི་ཡཱ ས་མ་ནུ་བྷཱ་ས་ནཱ ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ, སཱ ཏུ་ཎྷ་སྶ; ཡ་སྶཱ ན་ཀྑ་མ་ཏི, སཱ བྷཱ་སེ་ཡྻ.
‘‘དུ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ… ཏ་ཏི་ཡ་མྤི ཨེ་ཏ་མ་ཏྠཾ ཝ་དཱ་མི…པེ….
‘‘ས་མ་ནུ་བྷ་ཊྛཱ ས་ངྒྷེ་ན ཨི་ཏྠ་ནྣཱ་མཱ བྷི་ཀྑུ་ནཱི ཏ་སྶ ཝ་ཏྠུ་སྶ པ་ཊི་ནི་སྶ་གྒཱ་ཡ. ཁ་མ་ཏི ས་ངྒྷ་སྶ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི’’ཏི.
ཉ་ཏྟི་ཡཱ དུ་ཀྐ་ཊཾ, དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ, ཀ་མྨ་ཝཱ་ཙཱ པ་རི་ཡོ་སཱ་ནེ ཨཱ་པ་ཏྟི པཱ་རཱ་ཛི་ཀ་སྶ.
ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.
པཱ་རཱ་ཛི་ཀཱ ཧོ་ཏཱིཏི སེ་ཡྻ་ཐཱ་པི ནཱ་མ པུ་ཐུ་སི་ལཱ དྭེ་དྷཱ བྷི་ནྣཱ ཨ་པྤ་ཊི་ས་ནྡྷི་ཀཱ ཧོ་ཏི, ཨེ་ཝ་མེ་ཝ བྷི་ཀྑུ་ནཱི ཡཱ་ཝ་ཏ་ཏི་ཡཾ ས་མ་ནུ་བྷཱ་ས་ནཱ་ཡ ན པ་ཊི་ནི་སྶ་ཛྫ་ནྟཱི ཨ་སྶ་མ་ཎཱི ཧོ་ཏི ཨ་ས་ཀྱ་དྷཱི་ཏཱ. ཏེ་ན ཝུ་ཙྩ་ཏི པཱ་རཱ་ཛི་ཀཱ ཧོ་ཏཱི་ཏི.
ཨ་སཾ་ཝཱ་སཱཏི སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ. ཨེ་སོ སཾ་ཝཱ་སོ ནཱ་མ. སོ ཏཱ་ཡ ས་དྡྷིཾ ན་ཏྠི. ཏེ་ན ཝུ་ཙྩ་ཏི ཨ་སཾ་ཝཱ་སཱ་ཏི.
༦༧༢. དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་རཱ་ཛི་ཀ་སྶ. དྷ་མྨ་ཀ་མྨེ ཝེ་མ་ཏི་ཀཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་རཱ་ཛི་ཀ་སྶ. དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ ན པ་ཊི་ནི་སྶ་ཛྫ་ཏི, ཨཱ་པ་ཏྟི པཱ་རཱ་ཛི་ཀ་སྶ.
ཨ་དྷ་མྨ་ཀ་མྨེ དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དྷ་མྨ་ཀ་མྨེ ཨ་དྷ་མྨ་ཀ་མྨ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༦༧༣. ཨ་ནཱ་པ་ཏྟི ཨ་ས་མ་ནུ་བྷཱ་ས་ནྟི་ཡཱ, པ་ཊི་ནི་སྶ་ཛྫ་ནྟི་ཡཱ, ཨུ་མྨ་ཏྟི་ཀཱ་ཡ…པེ… ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་པཱ་རཱ་ཛི་ཀཾ ས་མ་ཏྟཾ.
༤. ཙ་ཏུ་ཏྠ་པཱ་རཱ་ཛི་ཀཾ
༦༧༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎ་མྤི སཱ་དི་ཡ་ནྟི, ས་ངྒྷཱ་ཊི་ཀ་ཎྞ་གྒ་ཧ་ཎ་མྤི སཱ་དི་ཡ་ནྟི, ས་ནྟི་ཊྛ་ནྟི་པི, ས་ལླ་པ་ནྟི་པི, ས་ངྐེ་ཏ་མྤི ག་ཙྪ་ནྟི, པུ་རི་ས་སྶ་པི ཨ་བྦྷཱ་ག་མ་ནཾ སཱ་དི་ཡ་ནྟི, ཚ་ནྣ་མྤི ཨ་ནུ་པ་ཝི་ས་ནྟི, ཀཱ་ཡ་མྤི ཏ་ད་ཏྠཱ་ཡ ཨུ་པ་སཾ་ཧ་ར་ནྟི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎ་མྤི སཱ་དི་ཡི་སྶ་ནྟི, ས་ངྒྷཱ་ཊི་ཀ་ཎྞ་གྒ་ཧ་ཎ་མྤི སཱ་དི་ཡི་སྶ་ནྟི, ས་ནྟི་ཊྛི་སྶ་ནྟི་པི, ས་ལླ་པི་སྶ་ནྟི་པི, ས་ངྐེ་ཏ་མྤི ག་ཙྪི་སྶ་ནྟི, པུ་རི་ས་སྶ་པི ཨ་བྦྷཱ་ག་མ་ནཾ སཱ་དི་ཡི་སྶ་ནྟི, ཚ་ནྣ་མྤི ཨ་ནུ་པ་ཝི་སི་སྶ་ནྟི, ཀཱ་ཡ་མྤི ཏ་ད་ཏྠཱ་ཡ ཨུ་པ་སཾ་ཧ་རི་སྶ་ནྟི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡཱ’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎ་མྤི སཱ་དི་ཡ་ནྟི, ས་ངྒྷཱ་ཊི་ཀ་ཎྞ་གྒ་ཧ་ཎ་མྤི སཱ་དི་ཡ་ནྟི, ས་ནྟི་ཊྛ་ནྟི་པི, ས་ལླ་པ་ནྟི་པི, ས་ངྐེ་ཏ་མྤི ག་ཙྪ་ནྟི, པུ་རི་ས་སྶ་པི ཨ་བྦྷཱ་ག་མ་ནཾ སཱ་དི་ཡ་ནྟི, ཚ་ནྣ་མྤི ཨ་ནུ་པ་ཝི་ས་ནྟི, ཀཱ་ཡ་མྤི ཏ་ད་ཏྠཱ་ཡ ཨུ་པ་སཾ་ཧ་ར་ནྟི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡཱ་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎ་མྤི སཱ་དི་ཡི་སྶ་ནྟི, ས་ངྒྷཱ་ཊི་ཀ་ཎྞ་གྒ་ཧ་ཎ་མྤི སཱ་དི་ཡི་སྶ་ནྟི, ས་ནྟི་ཊྛི་སྶ་ནྟི་པི, ས་ལླ་པི་སྶ་ནྟི་པི, ས་ངྐེ་ཏ་མྤི ག་ཙྪི་སྶ་ནྟི, པུ་རི་ས་སྶ་པི ཨ་བྦྷཱ་ག་མ་ནཾ སཱ་དི་ཡི་སྶ་ནྟི, ཚ་ནྣ་མྤི ཨ་ནུ་པ་ཝི་སི་སྶ་ནྟི, ཀཱ་ཡ་མྤི ཏ་ད་ཏྠཱ་ཡ ཨུ་པ་སཾ་ཧ་རི་སྶ་ནྟི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༧༥. ‘‘ཡཱ པ་ན བྷི་ཀྑུ་ནཱི ཨ་ཝ་སྶུ་ཏཱ ཨ་ཝ་སྶུ་ཏ་སྶ པུ་རི་ས་པུ་གྒ་ལ་སྶ ཧ་ཏྠ་གྒ་ཧ་ཎཾ ཝཱ སཱ་དི་ཡེ་ཡྻ, ས་ངྒྷཱ་ཊི་ཀ་ཎྞ་གྒ་ཧ་ཎཾ ཝཱ སཱ་དི་ཡེ་ཡྻ, ས་ནྟི་ཊྛེ་ཡྻ ཝཱ, ས་ལླ་པེ་ཡྻ ཝཱ, ས་ངྐེ་ཏཾ ཝཱ ག་ཙྪེ་ཡྻ, པུ་རི་ས་སྶ ཝཱ ཨ་བྦྷཱ་ག་མ་ནཾ སཱ་དི་ཡེ་ཡྻ, ཚ་ནྣཾ ཝཱ ཨ་ནུ་པ་ཝི་སེ་ཡྻ, ཀཱ་ཡཾ ཝཱ ཏ་ད་ཏྠཱ་ཡ ཨུ་པ་སཾ་ཧ་རེ་ཡྻ ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ, ཨ་ཡ་མྤི པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ ཨ་ཊྛ་ཝ་ཏྠུ་ཀཱ’’ཏི.
༦༧༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨ་ཝ་སྶུ་ཏཱ ནཱ་མ སཱ་ར་ཏྟཱ ཨ་པེ་ཀྑ་ཝ་ཏཱི པ་ཊི་བ་དྡྷ་ཙི་ཏྟཱ.
ཨ་ཝ་སྶུ་ཏོ ནཱ་མ སཱ་ར་ཏྟོ ཨ་པེ་ཀྑ་ཝཱ པ་ཊི་བ་དྡྷ་ཙི་ཏྟོ.
པུ་རི་ས་པུ་གྒ་ལོ ནཱ་མ མ་ནུ་སྶ་པུ་རི་སོ, ན ཡ་ཀྑོ ན པེ་ཏོ ན ཏི་ར་ཙྪཱ་ན་ག་ཏོ ཝི་ཉྙཱུ པ་ཊི་བ་ལོ ཀཱ་ཡ་སཾ་ས་གྒཾ ས་མཱ་པ་ཛྫི་ཏུཾ.
ཧ་ཏྠ་གྒ་ཧ་ཎཾ ཝཱ སཱ་དི་ཡེ་ཡྻཱཏི ཧ་ཏྠོ ནཱ་མ ཀ་པྤ་རཾ ཨུ་པཱ་དཱ་ཡ ཡཱ་ཝ ཨ་གྒ་ན་ཁཱ. ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ ཨུ་བྦྷ་ཀྑ་ཀཾ ཨ་དྷོ་ཛཱ་ཎུ་མ་ཎྜ་ལཾ ག་ཧ་ཎཾ སཱ་དི་ཡ་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
ས་ངྒྷཱ་ཊི་ཀ་ཎྞ་གྒ་ཧ་ཎཾ ཝཱ སཱ་དི་ཡེ་ཡྻཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ ནི་ཝ་ཏྠཾ ཝཱ པཱ་རུ་ཏཾ ཝཱ ག་ཧ་ཎཾ སཱ་དི་ཡ་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
ས་ནྟི་ཊྛེ་ཡྻ ཝཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་ས་སྶ ཧ་ཏྠ་པཱ་སེ ཏི་ཊྛ་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
ས་ལླ་པེ་ཡྻ ཝཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་ས་སྶ ཧ་ཏྠ་པཱ་སེ ཋི་ཏཱ ས་ལླ་པ་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
ས་ངྐེ་ཏཾ ཝཱ ག་ཙྪེ་ཡྻཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་སེ་ན – ‘‘ཨི་ཏྠ་ནྣཱ་མཾ ཨོ་ཀཱ་སཾ [ཨི་དཾ པ་དཾ ཨ་ཊྛ་ཀ་ཐཱ་ཡཾ ན དི་སྶ་ཏི] ཨཱ་ག་ཙྪཱ’’ཏི – ཝུ་ཏྟཱ ག་ཙྪ་ཏི. པ་དེ པ་དེ ཨཱ་པ་ཏྟི དུ་ཀྐ་ཊ་སྶ. པུ་རི་ས་སྶ ཧ་ཏྠ་པཱ་སཾ ཨོ་ཀྐ་ནྟ་མ་ཏྟེ ཨཱ་པ་ཏྟི ཐུ་ལླ་ཙྩ་ཡ་སྶ.
པུ་རི་ས་སྶ ཝཱ ཨ་བྦྷཱ་ག་མ་ནཾ སཱ་དི་ཡེ་ཡྻཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་ས་སྶ ཨ་བྦྷཱ་ག་མ་ནཾ སཱ་དི་ཡ་ཏི, ཨཱ་པ་ཏྟི དུ་ཀྐ་ཊ་སྶ. ཧ་ཏྠ་པཱ་སཾ ཨོ་ཀྐ་ནྟ་མ་ཏྟེ ཨཱ་པ་ཏྟི ཐུ་ལླ་ཙྩ་ཡ་སྶ.
ཚ་ནྣཾ ཝཱ ཨ་ནུ་པ་ཝི་སེ་ཡྻཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ ཡེ་ན ཀེ་ན་ཙི པ་ཊི་ཙྪ་ནྣཾ ཨོ་ཀཱ་སཾ པ་ཝི་ཊྛ་མ་ཏྟེ ཨཱ་པ་ཏྟི ཐུ་ལླ་ཙྩ་ཡ་སྶ.
ཀཱ་ཡཾ ཝཱ ཏ་ད་ཏྠཱ་ཡ ཨུ་པ་སཾ་ཧ་རེ་ཡྻཱཏི ཨེ་ཏ་སྶ ཨ་ས་དྡྷ་མྨ་སྶ པ་ཊི་སེ་ཝ་ན་ཏྠཱ་ཡ པུ་རི་ས་སྶ ཧ་ཏྠ་པཱ་སེ ཋི་ཏཱ ཀཱ་ཡཾ ཨུ་པ་སཾ་ཧ་ར་ཏི, ཨཱ་པ་ཏྟི ཐུ་ལླ་ཙྩ་ཡ་སྶ.
ཨ་ཡ་མྤཱིཏི པུ་རི་མཱ་ཡོ ཨུ་པཱ་དཱ་ཡ ཝུ་ཙྩ་ཏི.
པཱ་རཱ་ཛི་ཀཱ ཧོ་ཏཱིཏི སེ་ཡྻ་ཐཱ་པི ནཱ་མ ཏཱ་ལོ མ་ཏྠ་ཀ་ཙྪི་ནྣོ ཨ་བྷ་བྦོ པུ་ན ཝི་རུ་ལ༹ྷི་ཡཱ ཨེ་ཝ་མེ་ཝ བྷི་ཀྑུ་ནཱི ཨ་ཊྛ་མཾ ཝ་ཏྠུཾ པ་རི་པཱུ་རེ་ནྟཱི ཨ་སྶ་མ་ཎཱི ཧོ་ཏི ཨ་ས་ཀྱ་དྷཱི་ཏཱ. ཏེ་ན ཝུ་ཙྩ་ཏི པཱ་རཱ་ཛི་ཀཱ ཧོ་ཏཱི་ཏི.
ཨ་སཾ་ཝཱ་སཱཏི སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ. ཨེ་སོ སཾ་ཝཱ་སོ ནཱ་མ. སོ ཏཱ་ཡ ས་དྡྷིཾ ན་ཏྠི. ཏེ་ན ཝུ་ཙྩ་ཏི ཨ་སཾ་ཝཱ་སཱ་ཏི.
༦༧༧. ཨ་ནཱ་པ་ཏྟི ཨ་ས་ཉྩི་ཙྩ, ཨ་སྶ་ཏི་ཡཱ, ཨ་ཛཱ་ན་ནྟི་ཡཱ, ཨ་སཱ་དི་ཡ་ནྟི་ཡཱ, ཨུ་མྨ་ཏྟི་ཀཱ་ཡ, ཁི་ཏྟ་ཙི་ཏྟཱ་ཡ, ཝེ་ད་ནཱ་ཊྚཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་པཱ་རཱ་ཛི་ཀཾ ས་མ་ཏྟཾ.
ཨུ་དྡི་ཊྛཱ ཁོ, ཨ་ཡྻཱ་ཡོ, ཨ་ཊྛ པཱ་རཱ་ཛི་ཀཱ དྷ་མྨཱ. ཡེ་སཾ བྷི་ཀྑུ་ནཱི ཨ་ཉྙ་ཏ་རཾ ཝཱ ཨ་ཉྙ་ཏ་རཾ ཝཱ ཨཱ་པ་ཛྫི་ཏྭཱ ན ལ་བྷ་ཏི བྷི་ཀྑུ་ནཱི་ཧི ས་དྡྷིཾ སཾ་ཝཱ་སཾ, ཡ་ཐཱ པུ་རེ ཏ་ཐཱ པ་ཙྪཱ, པཱ་རཱ་ཛི་ཀཱ ཧོ་ཏི ཨ་སཾ་ཝཱ་སཱ. ཏ་ཏྠཱ་ཡྻཱ་ཡོ པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? དུ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? ཏ་ཏི་ཡ་མྤི པུ་ཙྪཱ་མི – ‘‘ཀ་ཙྩི་ཏྠ པ་རི་སུ་དྡྷཱ’’? པ་རི་སུ་དྡྷེ་ཏྠཱ་ཡྻཱ་ཡོ, ཏ་སྨཱ ཏུ་ཎྷཱི, ཨེ་ཝ་མེ་ཏཾ དྷཱ་ར་ཡཱ་མཱི་ཏི.
བྷི་ཀྑུ་ནི་ཝི་བྷ་ངྒེ པཱ་རཱ་ཛི་ཀ་ཀ་ཎྜཾ ནི་ཊྛི་ཏཾ.
༢. ས་ངྒྷཱ་དི་སེ་ས་ཀ་ཎྜཾ (བྷི་ཀྑུ་ནཱི་ཝི་བྷ་ངྒོ)
༡. པ་ཋ་མ་ས་ངྒྷཱ་དི་སེ་ས་སི་ཀྑཱ་པ་དཾ
ཨི་མེ ཁོ པ་ནཱ་ཡྻཱ་ཡོ ས་ཏྟ་ར་ས ས་ངྒྷཱ་དི་སེ་སཱ
དྷ་མྨཱ ཨུ་དྡེ་སཾ ཨཱ་ག་ཙྪ་ནྟི.
༦༧༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ ཨུ་པཱ་ས་ཀོ བྷི་ཀྑུ་ནི་ས་ངྒྷ་སྶ ཨུ་དོ་སི་ཏཾ [ཨུ་དྡོ་སི་ཏཾ (སཱི. སྱཱ.)] ད་ཏྭཱ ཀཱ་ལ་ངྐ་ཏོ ཧོ་ཏི. ཏ་སྶ དྭེ པུ་ཏྟཱ ཧོ་ནྟི – ཨེ་ཀོ ཨ་སྶ་དྡྷོ ཨ་པྤ་ས་ནྣོ, ཨེ་ཀོ ས་དྡྷོ པ་ས་ནྣོ. ཏེ པེ་ཏྟི་ཀཾ སཱ་པ་ཏེ་ཡྻཾ ཝི་བྷ་ཛིཾ་སུ. ཨ་ཐ ཁོ སོ ཨ་སྶ་དྡྷོ ཨ་པྤ་ས་ནྣོ ཏཾ ས་དྡྷཾ པ་ས་ནྣཾ ཨེ་ཏ་ད་ཝོ་ཙ – ‘‘ཨ་མྷཱ་ཀཾ ཨུ་དོ་སི་ཏོ, ཏཾ བྷཱ་ཛེ་མཱ’’ཏི. ཨེ་ཝཾ ཝུ་ཏྟེ སོ ས་དྡྷོ པ་ས་ནྣོ ཏཾ ཨ་སྶ་དྡྷཾ ཨ་པྤ་ས་ནྣཾ ཨེ་ཏ་ད་ཝོ་ཙ – ‘‘མཱ་ཡྻོ, ཨེ་ཝཾ ཨ་ཝ་ཙ. ཨ་མྷཱ་ཀཾ པི་ཏུ་ནཱ བྷི་ཀྑུ་ནི་ས་ངྒྷ་སྶ དི་ནྣོ’’ཏི. དུ་ཏི་ཡ་མྤི ཁོ སོ ཨ་སྶ་དྡྷོ ཨ་པྤ་ས་ནྣོ ཏཾ ས་དྡྷཾ པ་ས་ནྣཾ ཨེ་ཏ་ད་ཝོ་ཙ – ‘‘ཨ་མྷཱ་ཀཾ ཨུ་དོ་སི་ཏོ, ཏཾ བྷཱ་ཛེ་མཱ’’ཏི. ཨ་ཐ ཁོ སོ ས་དྡྷོ པ་ས་ནྣོ ཏཾ ཨ་སྶ་དྡྷཾ ཨ་པྤ་ས་ནྣཾ ཨེ་ཏ་ད་ཝོ་ཙ – ‘‘མཱ་ཡྻོ, ཨེ་ཝཾ ཨ་ཝ་ཙ. ཨ་མྷཱ་ཀཾ པི་ཏུ་ནཱ བྷི་ཀྑུ་ནི་ས་ངྒྷ་སྶ དི་ནྣོ’’ཏི. ཏ་ཏི་ཡ་མྤི ཁོ སོ ཨ་སྶ་དྡྷོ ཨ་པྤ་ས་ནྣོ ཏཾ ས་དྡྷཾ པ་ས་ནྣཾ ཨེ་ཏ་ད་ཝོ་ཙ – ‘‘ཨ་མྷཱ་ཀཾ ཨུ་དོ་སི་ཏོ, ཏཾ བྷཱ་ཛེ་མཱ’’ཏི. ཨ་ཐ ཁོ སོ ས་དྡྷོ པ་ས་ནྣོ – ‘‘ས་ཙེ མ་ཡ྄ཧཾ བྷ་ཝི་སྶ་ཏི, ཨ་ཧ་མྤི བྷི་ཀྑུ་ནི་ས་ངྒྷ་སྶ ད་སྶཱ་མཱི’’ཏི – ཏཾ ཨ་སྶ་དྡྷཾ ཨ་པྤ་ས་ནྣཾ ཨེ་ཏ་ད་ཝོ་ཙ – ‘‘བྷཱ་ཛེ་མཱ’’ཏི. ཨ་ཐ ཁོ སོ ཨུ་དོ་སི་ཏོ ཏེ་ཧི བྷཱ་ཛཱི་ཡ་མཱ་ནོ ཏ་སྶ ཨ་སྶ་དྡྷ་སྶ ཨ་པྤ་ས་ནྣ་སྶ པཱ་པུ་ཎཱ་ཏི [པཱ་པུ་ཎི (སྱཱ.)]. ཨ་ཐ ཁོ སོ ཨ་སྶ་དྡྷོ ཨ་པྤ་ས་ནྣོ བྷི་ཀྑུ་ནི་ཡོ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙ – ‘‘ནི་ཀྑ་མ་ཐཱ་ཡྻེ, ཨ་མྷཱ་ཀཾ ཨུ་དོ་སི་ཏོ’’ཏི.
ཨེ་ཝཾ ཝུ་ཏྟེ ཐུ་ལླ་ན་ནྡཱ བྷི་ཀྑུ་ནཱི ཏཾ པུ་རི་སཾ ཨེ་ཏ་ད་ཝོ་ཙ – ‘‘མཱ་ཡྻོ, ཨེ་ཝཾ ཨ་ཝ་ཙ, ཏུ་མྷཱ་ཀཾ པི་ཏུ་ནཱ བྷི་ཀྑུ་ནི་ས་ངྒྷ་སྶ དི་ནྣོ’’ཏི. ‘‘དི་ནྣོ ན དི་ནྣོ’’ཏི ཝོ་ཧཱ་རི་ཀེ མ་ཧཱ་མ་ཏྟེ པུ་ཙྪིཾ་སུ. མ་ཧཱ་མ་ཏྟཱ ཨེ་ཝ་མཱ་ཧཾ་སུ – ‘‘ཀོ, ཨ་ཡྻེ, ཛཱ་ནཱ་ཏི བྷི་ཀྑུ་ནི་ས་ངྒྷ་སྶ དི་ནྣོ’’ཏི? ཨེ་ཝཾ ཝུ་ཏྟེ ཐུ་ལླ་ན་ནྡཱ བྷི་ཀྑུ་ནཱི ཏེ མ་ཧཱ་མ་ཏྟེ ཨེ་ཏ་ད་ཝོ་ཙ – ‘‘ཨ་པི ནཱ་ཡྻོ [ཨ་པི ནྭ་ཡྻཱ (སྱཱ.), ཨ་པི ནཱ་ཡྻོ (ཀ.)] ཏུ་མྷེ་ཧི དི་ཊྛཾ ཝཱ སུ་ཏཾ ཝཱ ས་ཀྑིཾ ཋ་པ་ཡི་ཏྭཱ དཱ་ནཾ དི་ཡྻ་མཱ་ན’’ནྟི? ཨ་ཐ ཁོ ཏེ མ་ཧཱ་མ་ཏྟཱ – ‘‘ས་ཙྩཾ ཁོ ཨ་ཡྻཱ ཨཱ་ཧཱ’’ཏི ཏཾ ཨུ་དོ་སི་ཏཾ བྷི་ཀྑུ་ནི་ས་ངྒྷ་སྶ ཨ་ཀཾ་སུ. ཨ་ཐ ཁོ སོ པུ་རི་སོ པ་རཱ་ཛི་ཏོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཨ་སྶ་མ་ཎི་ཡོ ཨི་མཱ མུ་ཎྜཱ བ་ནྡྷ་ཀི་ནི་ཡོ. ཀ་ཐ་ཉྷི ནཱ་མ ཨ་མྷཱ་ཀཾ ཨུ་དོ་སི་ཏཾ ཨ་ཙྪི་ནྡཱ་པེ་སྶ་ནྟཱི’’ཏི! ཐུ་ལླ་ན་ནྡཱ བྷི་ཀྑུ་ནཱི མ་ཧཱ་མ་ཏྟཱ་ནཾ ཨེ་ཏ་མ་ཏྠཾ ཨཱ་རོ་ཙེ་སི. མ་ཧཱ་མ་ཏྟཱ ཏཾ པུ་རི་སཾ ད་ཎྜཱ་པེ་སུཾ. ཨ་ཐ ཁོ སོ པུ་རི་སོ ད་ཎྜི་ཏོ བྷི་ཀྑུ་ནཱུ་པ་སྶ་ཡ་སྶ ཨ་ཝི་དཱུ་རེ ཨཱ་ཛཱི་ཝ་ཀ་སེ་ཡྻཾ ཀཱ་རཱ་པེ་ཏྭཱ ཨཱ་ཛཱི་ཝ་ཀེ ཨུ་ཡྻོ་ཛེ་སི – ‘‘ཨེ་ཏཱ བྷི་ཀྑུ་ནི་ཡོ ཨ་ཙྩཱ་ཝ་ད་ཐཱ’’ཏི.
ཐུ་ལླ་ན་ནྡཱ བྷི་ཀྑུ་ནཱི མ་ཧཱ་མ་ཏྟཱ་ནཾ ཨེ་ཏ་མ་ཏྠཾ ཨཱ་རོ་ཙེ་སི. མ་ཧཱ་མ་ཏྟཱ ཏཾ པུ་རི་སཾ བ་ནྡྷཱ་པེ་སུཾ. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘པ་ཋ་མཾ བྷི་ཀྑུ་ནི་ཡོ ཨུ་དོ་སི་ཏཾ ཨ་ཙྪི་ནྡཱ་པེ་སུཾ, དུ་ཏི་ཡཾ ད་ཎྜཱ་པེ་སུཾ, ཏ་ཏི་ཡཾ བ་ནྡྷཱ་པེ་སུཾ. ཨི་དཱ་ནི གྷཱ་ཏཱ་པེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨུ་སྶ་ཡ་ཝཱ་དི་ཀཱ ཝི་ཧ་རི་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨུ་སྶ་ཡ་ཝཱ་དི་ཀཱ ཝི་ཧ་ར་ཏཱི་ཏི. ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨུ་སྶ་ཡ་ཝཱ་དི་ཀཱ ཝི་ཧ་རི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༧༩. ‘‘ཡཱ པ་ན བྷི་ཀྑུ་ནཱི ཨུ་སྶ་ཡ་ཝཱ་དི་ཀཱ ཝི་ཧ་རེ་ཡྻ ག་ཧ་པ་ཏི་ནཱ ཝཱ ག་ཧ་པ་ཏི་པུ་ཏྟེ་ན ཝཱ དཱ་སེ་ན ཝཱ ཀ་མྨ་ཀཱ་རེ་ན [ཀ་མྨ་ཀ་རེ་ན (སཱི. སྱཱ.)] ཝཱ ཨ་ནྟ་མ་སོ ས་མ་ཎ་པ་རི་བྦཱ་ཛ་ཀེ་ནཱ་པི, ཨ་ཡཾ བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
༦༨༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨུ་སྶ་ཡ་ཝཱ་དི་ཀཱ ནཱ་མ ཨ་ཌྜ་ཀཱ་རི་ཀཱ ཝུ་ཙྩ་ཏི.
ག་ཧ་པ་ཏི ནཱ་མ ཡོ ཀོ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.
ག་ཧ་པ་ཏི་པུ་ཏྟོ ནཱ་མ ཡེ ཀེ་ཙི པུ་ཏྟ་བྷཱ་ཏ་རོ.
དཱ་སོ ནཱ་མ ཨ་ནྟོ་ཛཱ་ཏོ དྷ་ན་ཀྐཱི་ཏོ ཀ་ར་མ་རཱ་ནཱི་ཏོ.
ཀ་མྨ་ཀཱ་རོ ནཱ་མ བྷ་ཊ་ཀོ ཨཱ་ཧ་ཏ་ཀོ.
ས་མ་ཎ་པ་རི་བྦཱ་ཛ་ཀོ ནཱ་མ བྷི་ཀྑུ་ཉྩ བྷི་ཀྑུ་ནི་ཉྩ སི་ཀྑ་མཱ་ན་ཉྩ སཱ་མ་ཎེ་ར་ཉྩ སཱ་མ་ཎེ་རི་ཉྩ ཋ་པེ་ཏྭཱ ཡོ ཀོ་ཙི པ་རི་བྦཱ་ཛ་ཀ་ས་མཱ་པ་ནྣོ.
ཨ་ཌྜཾ ཀ་རི་སྶཱ་མཱི་ཏི དུ་ཏི་ཡཾ ཝཱ པ་རི་ཡེ་ས་ཏི ག་ཙྪ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨེ་ཀ་སྶ ཨཱ་རོ་ཙེ་ཏི, ཨཱ་པ་ཏྟི དུ་ཀྐ་ཊ་སྶ. དུ་ཏི་ཡ་སྶ ཨཱ་རོ་ཙེ་ཏི, ཨཱ་པ་ཏྟི ཐུ་ལླ་ཙྩ་ཡ་སྶ. ཨ་ཌྜ་པ་རི་ཡོ་སཱ་ནེ ཨཱ་པ་ཏྟི ས་ངྒྷཱ་དི་སེ་ས་སྶ.
པ་ཋ་མཱ་པ་ཏྟི་ཀནྟི ས་ཧ ཝ་ཏྠུ་ཛ྄ཛྷཱ་ཙཱ་རཱ ཨཱ་པ་ཛྫ་ཏི ཨ་ས་མ་ནུ་བྷཱ་ས་ནཱ་ཡ.
ནི་སྶཱ་ར་ཎཱི་ཡནྟི ས་ངྒྷ་མྷཱ ནི་སྶཱ་རཱི་ཡ་ཏི.
ས་ངྒྷཱ་དི་སེ་སནྟི ས་ངྒྷོ་ཝ ཏ་སྶཱ ཨཱ་པ་ཏྟི་ཡཱ མཱ་ན་ཏྟཾ དེ་ཏི མཱུ་ལཱ་ཡ པ་ཊི་ཀ་སྶ་ཏི ཨ་བྦྷེ་ཏི, ན ས་མྦ་ཧུ་ལཱ ན ཨེ་ཀཱ བྷི་ཀྑུ་ནཱི. ཏེ་ན ཝུ་ཙྩ་ཏི ‘‘ས་ངྒྷཱ་དི་སེ་སོ’’ཏི. ཏ་སྶེ་ཝ ཨཱ་པ་ཏྟི་ནི་ཀཱ་ཡ་སྶ ནཱ་མ་ཀ་མྨཾ ཨ་དྷི་ཝ་ཙ་ནཾ. ཏེ་ན་པི ཝུ་ཙྩ་ཏི ‘‘ས་ངྒྷཱ་དི་སེ་སོ’’ཏི.
༦༨༡. ཨ་ནཱ་པ་ཏྟི མ་ནུ་སྶེ་ཧི ཨཱ་ཀ་ཌྜྷཱི་ཡ་མཱ་ནཱ ག་ཙྪ་ཏི, ཨཱ་ར་ཀྑཾ ཡཱ་ཙ་ཏི, ཨ་ནོ་དི་སྶ ཨཱ་ཙི་ཀྑ་ཏི, ཨུ་མྨ་ཏྟི་ཀཱ་ཡ…པེ… ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་ས་ངྒྷཱ་དི་སེ་ས་སི་ཀྑཱ་པ་དཾ ནི་ཊྛི་ཏཾ.
༢. དུ་ཏི་ཡ་ས་ངྒྷཱ་དི་སེ་ས་སི་ཀྑཱ་པ་དཾ
༦༨༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཝེ་སཱ་ལི་ཡཾ ཨ་ཉྙ་ཏ་ར་སྶ ལི་ཙྪ་ཝི་སྶ པ་ཛཱ་པ་ཏི ཨ་ཏི་ཙཱ་རི་ནཱི ཧོ་ཏི. ཨ་ཐ ཁོ སོ ལི་ཙྪ་ཝི ཏཾ ཨི་ཏྠིཾ ཨེ་ཏ་ད་ཝོ་ཙ – ‘‘སཱ་དྷུ ཝི་ར་མཱ་ཧི, ཨ་ན་ཏྠཾ ཁོ ཏེ ཀ་རི་སྶཱ་མཱི’’ཏི. ཨེ་ཝ་མྤི སཱ ཝུ་ཙྩ་མཱ་ནཱ ནཱ་དི་ཡི. ཏེ་ན ཁོ པ་ན ས་མ་ཡེ་ན ཝེ་སཱ་ལི་ཡཾ ལི་ཙྪ་ཝི་ག་ཎོ ས་ནྣི་པ་ཏི་ཏོ ཧོ་ཏི ཀེ་ན་ཙི་དེ་ཝ ཀ་ར་ཎཱི་ཡེ་ན. ཨ་ཐ ཁོ སོ ལི་ཙྪ་ཝི ཏེ ལི་ཙྪ་ཝ་ཡོ ཨེ་ཏ་ད་ཝོ་ཙ – ‘‘ཨེ་ཀཾ མེ, ཨ་ཡྻོ, ཨི་ཏྠིཾ ཨ་ནུ་ཛཱ་ནཱ་ཐཱ’’ཏི. ‘‘ཀཱ ནཱ་མ སཱ’’ཏི? ‘‘མ་ཡ྄ཧཾ པ་ཛཱ་པ་ཏི ཨ་ཏི་ཙ་ར་ཏི, ཏཾ གྷཱ་ཏེ་སྶཱ་མཱི’’ཏི. ‘‘ཛཱ་ནཱ་ཧཱི’’ཏི. ཨ་སྶོ་སི ཁོ སཱ ཨི་ཏྠཱི – ‘‘སཱ་མི་ཀོ ཀི་ར མཾ གྷཱ་ཏེ་ཏུ་ཀཱ་མོ’’ཏི. ཝ་ར་བྷ་ཎྜཾ ཨཱ་དཱ་ཡ སཱ་ཝ་ཏྠིཾ ག་ནྟྭཱ ཏི་ཏྠི་ཡེ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. ཏི་ཏྠི་ཡཱ ན ཨི་ཙྪིཾ་སུ པ་བྦཱ་ཛེ་ཏུཾ. བྷི་ཀྑུ་ནི་ཡོ ཨུ་པ་ས་ངྐ་མི་ཏྭཱ པ་བྦ་ཛྫཾ ཡཱ་ཙི. བྷི་ཀྑུ་ནི་ཡོ་པི ན ཨི་ཙྪིཾ་སུ པ་བྦཱ་ཛེ་ཏུཾ. ཐུ་ལླ་ན་ནྡཾ བྷི་ཀྑུ་ནིཾ ཨུ་པ་ས་ངྐ་མི་ཏྭཱ བྷ་ཎྜ་ཀཾ ད་སྶེ་ཏྭཱ པ་བྦ་ཛྫཾ ཡཱ་ཙི. ཐུ་ལླ་ན་ནྡཱ བྷི་ཀྑུ་ནཱི བྷ་ཎྜ་ཀཾ ག་ཧེ་ཏྭཱ པ་བྦཱ་ཛེ་སི.
ཨ་ཐ ཁོ སོ ལི་ཙྪ་ཝི ཏཾ ཨི་ཏྠིཾ ག་ཝེ་ས་ནྟོ སཱ་ཝ་ཏྠིཾ ག་ནྟྭཱ བྷི་ཀྑུ་ནཱི་སུ པ་བྦ་ཛི་ཏཾ དི་སྭཱ་ན ཡེ་ན རཱ་ཛཱ པ་སེ་ན་དི ཀོ་ས་ལོ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ རཱ་ཛཱ་ནཾ པ་སེ་ན་དིཾ ཀོ་ས་ལཾ ཨེ་ཏ་ད་ཝོ་ཙ – ‘‘པ་ཛཱ་པ་ཏི མེ, དེ་ཝ, ཝ་ར་བྷ་ཎྜཾ ཨཱ་དཱ་ཡ སཱ་ཝ་ཏྠིཾ ཨ་ནུ་པྤ་ཏྟཱ. ཏཾ དེ་ཝོ ཨ་ནུ་ཛཱ་ནཱ་ཏཱུ’’ཏི. ‘‘ཏེ་ན ཧི, བྷ་ཎེ, ཝི་ཙི་ནི་ཏྭཱ ཨཱ་ཙི་ཀྑཱ’’ཏི. ‘‘དི་ཊྛཱ, དེ་ཝ, བྷི་ཀྑུ་ནཱི་སུ པ་བྦ་ཛི་ཏཱ’’ཏི. ‘‘ས་ཙེ, བྷ་ཎེ, བྷི་ཀྑུ་ནཱི་སུ པ་བྦ་ཛི་ཏཱ, ན སཱ ལ་བྦྷཱ ཀི་ཉྩི ཀཱ་ཏུཾ. སྭཱ་ཀྑཱ་ཏོ བྷ་ག་ཝ་ཏཱ དྷ་མྨོ, ཙ་ར་ཏུ བྲ་ཧྨ་ཙ་རི་ཡཾ ས་མྨཱ དུ་ཀྑ་སྶ ཨ་ནྟ་ཀི་རི་ཡཱ་ཡཱ’’ཏི. ཨ་ཐ ཁོ སོ ལི་ཙྪ་ཝི ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཙོ་རིཾ པ་བྦཱ་ཛེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏ་སྶ ལི་ཙྪ་ཝི་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཙོ་རིཾ པ་བྦཱ་ཛེ་སྶ་ཏཱི’’ཏི! ཨ་ཐ ཁོ ཏཱ བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཙོ་རིཾ པ་བྦཱ་ཛེ་ཏཱི་ཏི [པ་བྦཱ་ཛེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཙོ་རིཾ པ་བྦཱ་ཛེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༦༨༣. ‘‘ཡཱ པ་ན བྷི་ཀྑུ་ནཱི ཛཱ་ནཾ ཙོ་རིཾ ཝ་ཛ྄ཛྷཾ ཝི་དི་ཏཾ ཨ་ན་པ་ལོ་ཀེ་ཏྭཱ རཱ་ཛཱ་ནཾ ཝཱ ས་ངྒྷཾ ཝཱ ག་ཎཾ ཝཱ པཱུ་གཾ ཝཱ སེ་ཎིཾ ཝཱ ཨ་ཉྙ་ཏྲ ཀ་པྤཱ ཝུ་ཊྛཱ་པེ་ཡྻ, ཨ་ཡ་མྤི བྷི་ཀྑུ་ནཱི པ་ཋ་མཱ་པ་ཏྟི་ཀཾ དྷ་མྨཾ ཨཱ་པ་ནྣཱ ནི་སྶཱ་ར་ཎཱི་ཡཾ ས་ངྒྷཱ་དི་སེ་ས’’ནྟི.
༦༨༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཛཱ་ནཱ་ཏི ནཱ་མ སཱ་མཾ ཝཱ ཛཱ་ནཱ་ཏི ཨ་ཉྙེ ཝཱ ཏ་སྶཱ ཨཱ་རོ་ཙེ་ནྟི, སཱ ཝཱ ཨཱ་རོ་ཙེ་ཏི.
ཙོ་རཱི ནཱ་མ ཡཱ པ་ཉྩ་མཱ་ས་ཀཾ ཝཱ ཨ་ཏི་རེ་ཀ་པ་ཉྩ་མཱ་ས་ཀཾ ཝཱ ཨ་གྒྷ་ན་ཀཾ ཨ་དི་ནྣཾ ཐེ་ཡྻ་ས་ངྑཱ་ཏཾ ཨཱ་དི་ཡ་ཏི, ཨེ་སཱ ཙོ་རཱི ནཱ་མ.
ཝ་ཛ྄ཛྷཱ ནཱ་མ ཡཾ ཀ་ཏྭཱ ཝ་ཛ྄ཛྷ་པྤ་ཏྟཱ ཧོ་ཏི.
ཝི་དི་ཏཱ ནཱ་མ ཨ་ཉྙེ་ཧི མ་ནུ་སྶེ་ཧི ཉཱ་ཏཱ ཧོ་ཏི ‘‘ཝ་ཛ྄ཛྷཱ ཨེ་སཱ’’ཏི.
ཨ་ན་པ་ལོ་ཀེ་ཏྭཱཏི ཨ་ནཱ་པུ་ཙྪཱ.
རཱ་ཛཱ ནཱ་མ ཡ་ཏྠ རཱ་ཛཱ ཨ་ནུ་སཱ་ས་ཏི, རཱ་ཛཱ ཨ་པ་ལོ་ཀེ་ཏ་བྦོ.
ས་ངྒྷོ ནཱ་མ བྷི་ཀྑུ་ནི་ས་ངྒྷོ ཝུ་ཙྩ་ཏི, བྷི་ཀྑུ་ནི་ས་ངྒྷོ ཨ་པ་ལོ་ཀེ་ཏ་བྦོ.
ག་ཎོ ནཱ་མ ཡ་ཏྠ ག་ཎོ ཨ་ནུ་སཱ་ས་ཏི, ག་ཎོ ཨ་པ་ལོ་ཀེ་ཏ་བྦོ.
པཱུ་གོ ནཱ་མ ཡ་ཏྠ པཱུ་གོ ཨ་ནུ་སཱ་ས་ཏི, པཱུ་གོ ཨ་པ་ལོ་ཀེ་ཏ་བྦོ.
སེ་ཎི ནཱ་མ ཡ་ཏྠ སེ་ཎི ཨ་ནུ་སཱ་ས་ཏི, སེ་ཎི ཨ་པ་ལོ་ཀེ་ཏ་བྦོ.
ཨ་ཉྙ་ཏྲ ཀ་པྤཱཏི ཋ་པེ་ཏྭཱ ཀ་པྤཾ. ཀ་པྤཾ ནཱ་མ དྭེ ཀ་པྤཱ་ནི – ཏི་ཏྠི་ཡེ་སུ ཝཱ པ་བྦ་ཛི་ཏཱ ཧོ་ཏི ཨ་ཉྙཱ་སུ ཝཱ བྷི་ཀྑུ་ནཱི་སུ པ་བྦ་ཛི་ཏཱ. ཨ་ཉྙ་ཏྲ ཀ་པྤཱ ‘‘ཝུ་ཊྛཱ་པེ་སྶཱ་མཱི’’ཏི ག་ཎཾ ཝཱ ཨཱ་ཙ་རི་ནིཾ ཝཱ པ་ཏྟཾ ཝཱ ཙཱི་ཝ་རཾ ཝཱ པ་རི་ཡེ་ས་ཏི, སཱི་མཾ ཝཱ ས་མྨ་ནྣ་ཏི, ཨཱ་པ་ཏྟི དུ་ཀྐ་ཊ་སྶ. ཉ་ཏྟི་ཡཱ དུ་ཀྐ་ཊཾ. དྭཱི་ཧི ཀ་མྨ་ཝཱ་ཙཱ་ཧི ཐུ་ལླ་ཙྩ་ཡཱ. ཀ་མྨ་ཝཱ་ཙཱ་པ་རི་ཡོ་སཱ་ནེ ཨུ་པ་ཛ྄ཛྷཱ་ཡཱ་ཡ ཨཱ་པ་ཏྟི ས་ངྒྷཱ་དི་སེ་ས་སྶ. ག་ཎ་སྶ ཙ ཨཱ་ཙ་རི་ནི་ཡཱ ཙ ཨཱ་པ་ཏྟི དུ་ཀྐ་ཊ་སྶ.
ཨ་ཡ་མྤཱིཏི པུ་རི་མཾ ཨུ་པཱ་དཱ་ཡ ཝུ་ཙྩ་ཏི.
པ་ཋ་མཱ་པ་ཏྟི་ཀནྟི ས་ཧ ཝ་ཏྠུ་ཛ྄ཛྷཱ་ཙཱ་རཱ ཨཱ་པ་ཛྫ་ཏི ཨ་ས་མ་ནུ་བྷཱ་ས་ནཱ་ཡ.
ནི་སྶཱ་ར་ཎཱི་ཡནྟི ས་ངྒྷ་མྷཱ ནི་སྶཱ་རཱི་ཡ་ཏི.
ས་ངྒྷཱ་དི་སེ་སནྟི…པེ… ཏེ་ན་པི ཝུ་ཙྩ་ཏི ས་ངྒྷཱ་དི་སེ་སོ་ཏི.
༦༨༥. ཙོ་རི་ཡཱ ཙོ་རི་ས་ཉྙཱ ཨ་ཉྙ་ཏྲ ཀ་པྤཱ ཝུ་ཊྛཱ་པེ་ཏི, ཨཱ་པ་ཏྟི ས་ངྒྷཱ་དི་སེ་ས་སྶ. ཙོ་རི་ཡཱ ཝེ་མ་ཏི་ཀཱ ཨ་ཉྙ་ཏྲ ཀ་པྤཱ ཝུ་ཊྛཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ཙོ་རི་ཡཱ ཨ་ཙོ་རི་ས་ཉྙཱ ཨ་ཉྙ་ཏྲ ཀ་པྤཱ ཝུ་ཊྛཱ་པེ་ཏི, ཨ་ནཱ་པ་ཏྟི. ཨ་ཙོ་རི་ཡཱ ཙོ་རི་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ཙོ་རི་ཡཱ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ཙོ་རི་ཡཱ ཨ་ཙོ་རི་ས་ཉྙཱ, ཨ་ནཱ་པ་ཏྟི.
༦༨༦. ཨ་ནཱ་པ་ཏྟི ཨ་ཛཱ་ན་ནྟཱི ཝུ་ཊྛཱ་པེ་ཏི, ཨ་པ་ལོ་ཀེ་ཏྭཱ ཝུ་ཊྛཱ་པེ་ཏི, ཀ་པྤ་ཀ་ཏཾ ཝུ་ཊྛཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་ས་ངྒྷཱ་དི་སེ་ས་སི་ཀྑཱ་པ་དཾ ནི་ཊྛི་ཏཾ.