༨. ཨ་ཊྛ་མ་སི་ཀྑཱ་པ་དཾ

༡༠༥༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑཱུ བྷི་ཀྑུ་ནུ་པ་སྶ་ཡཾ ཨུ་པ་ས་ངྐ་མི་ཏྭཱ ཚ་བྦ་གྒི་ཡཱ བྷི་ཀྑུ་ནི་ཡོ ཨོ་ཝ་ད་ནྟི. བྷི་ཀྑུ་ནི་ཡོ ཚ་བྦ་གྒི་ཡཱ བྷི་ཀྑུ་ནི་ཡོ ཨེ་ཏ་ད་ཝོ་ཙུཾ – ‘‘ཨེ་ཐཱ་ཡྻེ ཨོ་ཝཱ་དཾ ག་མི་སྶཱ་མཱ’’ཏི. ‘‘ཡ་མྤི མ་ཡཾ, ཨ་ཡྻེ, ག་ཙྪེ་ཡྻཱ་མ ཨོ་ཝཱ་ད་སྶ ཀཱ་ར་ཎཱ, ཨ་ཡྻཱ ཚ་བྦ་གྒི་ཡཱ ཨི་དྷེ་ཝ ཨཱ་ག་ནྟྭཱ ཨ་མྷེ ཨོ་ཝ་ད་ནྟཱི’’ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཨོ་ཝཱ་དཾ ན ག་ཙྪི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨོ་ཝཱ་དཾ ན ག་ཙྪ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨོ་ཝཱ་དཾ ན ག་ཙྪི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༡༠༥༥. ‘‘ཡཱ པ་ན བྷི་ཀྑུ་ནཱི ཨོ་ཝཱ་དཱ་ཡ ཝཱ སཾ་ཝཱ་སཱ་ཡ ཝཱ ན ག་ཙྪེ་ཡྻ, པཱ་ཙི་ཏྟི་ཡ’’ནྟི.

༡༠༥༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཨོ་ཝཱ་དོ ནཱ་མ ཨ་ཊྛ ག་རུ་དྷ་མྨཱ.

སཾ་ཝཱ་སོ ནཱ་མ ཨེ་ཀ་ཀ་མྨཾ ཨེ་ཀུ་དྡེ་སོ ས་མ་སི་ཀྑ་ཏཱ. ཨོ་ཝཱ་དཱ་ཡ ཝཱ སཾ་ཝཱ་སཱ་ཡ ཝཱ ན ག་ཙྪི་སྶཱ་མཱི་ཏི དྷུ་རཾ ནི་ཀྑི་ཏྟ་མ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.

༡༠༥༧. ཨ་ནཱ་པ་ཏྟི ས་ཏི ཨ་ནྟ་རཱ་ཡེ, པ་རི་ཡེ་སི་ཏྭཱ དུ་ཏི་ཡི་ཀཾ བྷི་ཀྑུ་ནིཾ ན ལ་བྷ་ཏི, གི་ལཱ་ནཱ་ཡ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ཨ་ཊྛ་མ་སི་ཀྑཱ་པ་དཾ ནི་ཊྛི་ཏཾ.