༣. ཏ་ཏི་ཡ་སི་ཀྑཱ་པ་དཾ
༡༠༣༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཙ་ཎྜ་ཀཱ་ལཱི༹ བྷི་ཀྑུ་ནཱི བྷ་ཎྜ་ན་ཀཱ་རི་ཀཱ ཧོ་ཏི ཀ་ལ་ཧ་ཀཱ་རི་ཀཱ ཝི་ཝཱ་ད་ཀཱ་རི་ཀཱ བྷ་སྶ་ཀཱ་རི་ཀཱ ས་ངྒྷེ ཨ་དྷི་ཀ་ར་ཎ་ཀཱ་རི་ཀཱ. ཐུ་ལླ་ན་ནྡཱ བྷི་ཀྑུ་ནཱི ཏ་སྶཱ ཀ་མྨེ ཀ་རཱི་ཡ་མཱ་ནེ པ་ཊི་ཀྐོ་ས་ཏི. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི གཱ་མ་ཀཾ ཨ་ག་མཱ་སི ཀེ་ན་ཙི་དེ་ཝ ཀ་ར་ཎཱི་ཡེ་ན. ཨ་ཐ ཁོ བྷི་ཀྑུ་ནི་ས་ངྒྷོ – ‘‘ཐུ་ལླ་ན་ནྡཱ བྷི་ཀྑུ་ནཱི པ་ཀྐ་ནྟཱ’’ཏི ཙ་ཎྜ་ཀཱ་ལི༹ཾ བྷི་ཀྑུ་ནིཾ ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པི. ཐུ་ལླ་ན་ནྡཱ བྷི་ཀྑུ་ནཱི གཱ་མ་ཀེ ཏཾ ཀ་ར་ཎཱི་ཡཾ ཏཱི་རེ་ཏྭཱ པུ་ན་དེ་ཝ སཱ་ཝ་ཏྠིཾ པ་ཙྩཱ་ག་ཙྪི. ཙ་ཎྜ་ཀཱ་ལཱི༹ བྷི་ཀྑུ་ནཱི ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ཨཱ་ག་ཙྪ་ནྟི་ཡཱ ནེ་ཝ ཨཱ་ས་ནཾ པ་ཉྙ་པེ་སི ན པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཋ་ལི་ཀཾ ཨུ་པ་ནི་ཀྑི་པི; ན པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་སི ན པཱ་ནཱི་ཡེ་ན ཨཱ་པུ་ཙྪི. ཐུ་ལླ་ན་ནྡཱ བྷི་ཀྑུ་ནཱི ཙ་ཎྜ་ཀཱ་ལི༹ཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ཀི་སྶ ཏྭཾ, ཨ་ཡྻེ, མ་ཡི ཨཱ་ག་ཙྪ་ནྟི་ཡཱ ནེ་ཝ ཨཱ་ས་ནཾ པ་ཉྙ་པེ་སི ན པཱ་དོ་ད་ཀཾ པཱ་ད་པཱི་ཋཾ པཱ་ད་ཀ་ཋ་ལི་ཀཾ ཨུ་པ་ནི་ཀྑི་པི; ན པ་ཙྩུ་གྒ་ནྟྭཱ པ་ཏྟ་ཙཱི་ཝ་རཾ པ་ཊི་གྒ་ཧེ་སི ན པཱ་ནཱི་ཡེ་ན ཨཱ་པུ་ཙྪཱི’’ཏི? ‘‘ཨེ་ཝ་ཉྷེ་ཏཾ, ཨ་ཡྻེ, ཧོ་ཏི ཡ་ཐཱ ཏཾ ཨ་ནཱ་ཐཱ་ཡཱ’’ཏི. ‘‘ཀི་སྶ པ་ན ཏྭཾ, ཨ་ཡྻེ, ཨ་ནཱ་ཐཱ’’ཏི? ‘‘ཨི་མཱ མཾ, ཨ་ཡྻེ, བྷི་ཀྑུ་ནི་ཡོ – ‘‘ཨ་ཡཾ ཨ་ནཱ་ཐཱ ཨ་པྤ་ཉྙཱ་ཏཱ, ན་ཏྠི ཨི་མི་སྶཱ ཀཱ་ཙི པ་ཏི་ཝ་ཏྟཱ’’ཏི, ཨཱ་པ་ཏྟི་ཡཱ ཨ་ད་སྶ་ནེ ཨུ་ཀྑི་པིཾ་སཱུ’’ཏི. ཐུ་ལླ་ན་ནྡཱ བྷི་ཀྑུ་ནཱི – ‘‘བཱ་ལཱ ཨེ་ཏཱ ཨ་བྱ་ཏྟཱ ཨེ་ཏཱ ནེ་ཏཱ ཛཱ་ན་ནྟི ཀ་མྨཾ ཝཱ ཀ་མྨ་དོ་སཾ ཝཱ ཀ་མྨ་ཝི་པ་ཏྟིཾ ཝཱ ཀ་མྨ་ས་མྤ་ཏྟིཾ ཝཱ’’ཏི, ཙ་ཎྜཱི་ཀ་ཏཱ ག་ཎཾ པ་རི་བྷཱ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཙ་ཎྜཱི་ཀ་ཏཱ ག་ཎཾ པ་རི་བྷཱ་སི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཙ་ཎྜཱི་ཀ་ཏཱ ག་ཎཾ པ་རི་བྷཱ་ས་ཏཱི་ཏི [པ་རི་བྷཱ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ …པེ…ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཙ་ཎྜཱི་ཀ་ཏཱ ག་ཎཾ པ་རི་བྷཱ་སི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༠༣༤. ‘‘ཡཱ པ་ན བྷི་ཀྑུ་ནཱི ཙ་ཎྜཱི་ཀ་ཏཱ ག་ཎཾ པ་རི་བྷཱ་སེ་ཡྻ, པཱ་ཙི་ཏྟི་ཡ’’ནྟི.
༡༠༣༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཙ་ཎྜཱི་ཀ་ཏཱ ནཱ་མ ཀོ་དྷ་ནཱ ཝུ་ཙྩ་ཏི.
ག་ཎོ ནཱ་མ བྷི་ཀྑུ་ནི་ས་ངྒྷོ ཝུ་ཙྩ་ཏི.
པ་རི་བྷཱ་སེ་ཡྻཱཏི ‘‘བཱ་ལཱ ཨེ་ཏཱ ཨ་བྱ་ཏྟཱ ཨེ་ཏཱ ནེ་ཏཱ ཛཱ་ན་ནྟི ཀ་མྨཾ ཝཱ ཀ་མྨ་དོ་སཾ ཝཱ ཀ་མྨ་ཝི་པ་ཏྟིཾ ཝཱ ཀ་མྨ་ས་མྤ་ཏྟིཾ ཝཱ’’ཏི པ་རི་བྷཱ་ས་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ས་མྦ་ཧུ་ལཱ བྷི་ཀྑུ་ནི་ཡོ ཝཱ ཨེ་ཀཾ བྷི་ཀྑུ་ནིཾ ཝཱ ཨ་ནུ་པ་ས་མྤ་ནྣཾ ཝཱ པ་རི་བྷཱ་ས་ཏི, ཨཱ་པ་ཏྟི དུ་ཀྐ་ཊ་སྶ.
༡༠༣༦. ཨ་ནཱ་པ་ཏྟི ཨ་ཏྠ་པུ་རེ་ཀྑཱ་རཱ་ཡ, དྷ་མྨ་པུ་རེ་ཀྑཱ་རཱ་ཡ, ཨ་ནུ་སཱ་ས་ནི་པུ་རེ་ཀྑཱ་རཱ་ཡ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.