༤. ཙ་ཏུ་ཏྠ་སི་ཀྑཱ་པ་དཾ
༡༠༣༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྲཱ་ཧྨ་ཎོ བྷི་ཀྑུ་ནི་ཡོ ནི་མ་ནྟེ་ཏྭཱ བྷོ་ཛེ་སི. བྷི་ཀྑུ་ནི་ཡོ བྷུ་ཏྟཱ་ཝཱི [བྷུ་ཏྟཱ་ཝི་ནཱི (ཀ.)] པ་ཝཱ་རི་ཏཱ ཉཱ་ཏི་ཀུ་ལཱ་ནི ག་ནྟྭཱ ཨེ་ཀ་ཙྩཱ བྷུ་ཉྫིཾ་སུ ཨེ་ཀ་ཙྩཱ པི་ཎྜ་པཱ་ཏཾ ཨཱ་དཱ་ཡ ཨ་ག་མཾ་སུ. ཨ་ཐ ཁོ སོ བྲཱ་ཧྨ་ཎོ པ་ཊི་ཝི་སྶ་ཀེ ཨེ་ཏ་ད་ཝོ་ཙ – ‘‘བྷི་ཀྑུ་ནི་ཡོ མ་ཡཱ ཨ་ཡྻཱ ས་ནྟ་པྤི་ཏཱ, ཨེ་ཐ ཏུ་མྷེ་པི ས་ནྟ་པྤེ་སྶཱ་མཱི’’ཏི. ཏེ ཨེ་ཝ་མཱ་ཧཾ་སུ – ‘‘ཀིཾ ཏྭཾ, ཨ་ཡྻོ, ཨ་མྷེ ས་ནྟ་པྤེ་སྶ་སི! ཡཱ་པི ཏ་ཡཱ ནི་མ་ནྟི་ཏཱ ཏཱ་པི ཨ་མྷཱ་ཀཾ གྷ་རཱ་ནི ཨཱ་ག་ནྟྭཱ ཨེ་ཀ་ཙྩཱ བྷུ་ཉྫིཾ་སུ ཨེ་ཀ་ཙྩཱ པི་ཎྜ་པཱ་ཏཾ ཨཱ་དཱ་ཡ ཨ་ག་མཾ་སཱུ’’ཏི. ཨ་ཐ ཁོ སོ བྲཱ་ཧྨ་ཎོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་མྷཱ་ཀཾ གྷ་རེ བྷུ་ཉྫི་ཏྭཱ ཨ་ཉྙ་ཏྲ བྷུ་ཉྫི་སྶ་ནྟི, ན ཙཱ་ཧཾ པ་ཊི་བ་ལོ ཡཱ་ཝ་ད་ཏྠཾ དཱ་ཏུ’’ནྟི! ཨ་སྶོ་སུཾ ཁོ བྷི་ཀྑུ་ནི་ཡོ ཏ་སྶ བྲཱ་ཧྨ་ཎ་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ བྷུ་ཏྟཱ་ཝཱི [བྷུ་ཏྟཱ་ཝི་ནཱི (ཀ.)] པ་ཝཱ་རི་ཏཱ ཨ་ཉྙ་ཏྲ བྷུ་ཉྫི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ བྷུ་ཏྟཱ་ཝཱི པ་ཝཱ་རི་ཏཱ ཨ་ཉྙ་ཏྲ བྷུ་ཉྫ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ བྷུ་ཏྟཱ་ཝཱི པ་ཝཱ་རི་ཏཱ ཨ་ཉྙ་ཏྲ བྷུ་ཉྫི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༠༣༨. ‘‘ཡཱ པ་ན བྷི་ཀྑུ་ནཱི ནི་མ་ནྟི་ཏཱ ཝཱ པ་ཝཱ་རི་ཏཱ ཝཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་དེ་ཡྻ ཝཱ བྷུ་ཉྫེ་ཡྻ ཝཱ, པཱ་ཙི་ཏྟི་ཡ’’ནྟི.
༡༠༣༩. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ནི་མ་ནྟི་ཏཱ ནཱ་མ པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རེ་ན བྷོ་ཛ་ནེ་ན ནི་མ་ནྟི་ཏཱ.
པ་ཝཱ་རི་ཏཱ ནཱ་མ ཨ་ས་ནཾ པ་ཉྙཱ་ཡ་ཏི, བྷོ་ཛ་ནཾ པ་ཉྙཱ་ཡ་ཏི, ཧ་ཏྠ་པཱ་སེ ཋི་ཏཱ ཨ་བྷི་ཧ་ར་ཏི, པ་ཊི་ཀྑེ་པོ པ་ཉྙཱ་ཡ་ཏི.
ཁཱ་ད་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཡཱ་གུཾ ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཋ་པེ་ཏྭཱ ཨ་ཝ་སེ་སཾ ཁཱ་ད་ནཱི་ཡཾ ནཱ་མ.
བྷོ་ཛ་ནཱི་ཡཾ ནཱ་མ པ་ཉྩ བྷོ་ཛ་ནཱ་ནི – ཨོ་ད་ནོ, ཀུ་མྨཱ་སོ, ས་ཏྟུ, མ་ཙྪོ, མཾ་སཾ.
‘‘ཁཱ་དི་སྶཱ་མི བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཙི་ཏྟི་ཡ་སྶ.
༡༠༤༠. ནི་མ་ནྟི་ཏེ ནི་མ་ནྟི་ཏ་ས་ཉྙཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ནི་མ་ནྟི་ཏེ ཝེ་མ་ཏི་ཀཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ནི་མ་ནྟི་ཏེ ཨ་ནི་མ་ནྟི་ཏ་ས་ཉྙཱ ཁཱ་ད་ནཱི་ཡཾ ཝཱ བྷོ་ཛ་ནཱི་ཡཾ ཝཱ ཁཱ་ད་ཏི ཝཱ བྷུ་ཉྫ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ཨཱ་ཧཱ་ར་ཏྠཱ་ཡ པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི དུ་ཀྐ་ཊ་སྶ…པེ….
༡༠༤༡. ཨ་ནཱ་པ་ཏྟི ནི་མ་ནྟི་ཏཱ ཨ་པྤ་ཝཱ་རི་ཏཱ, ཡཱ་གུཾ པི་ཝ་ཏི, སཱ་མི་ཀེ ཨ་པ་ལོ་ཀེ་ཏྭཱ བྷུ་ཉྫ་ཏི, ཡཱ་མ་ཀཱ་ལི་ཀཾ ས་ཏྟཱ་ཧ་ཀཱ་ལི་ཀཾ ཡཱ་ཝ་ཛཱི་ཝི་ཀཾ ས་ཏི པ་ཙྩ་ཡེ པ་རི་བྷུ་ཉྫ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་སི་ཀྑཱ་པ་དཾ ནི་ཊྛི་ཏཾ.