༢. དུ་ཏི་ཡ་སི་ཀྑཱ་པ་དཾ
༡༠༢༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ ཝེ་སཱ་ལི་ཡཾ ཝི་ཧ་ར་ཏི མ་ཧཱ་ཝ་ནེ ཀཱུ་ཊཱ་གཱ་ར་སཱ་ལཱ་ཡཾ. ཏེ་ན ཁོ པ་ན ས་མ་ཡེ་ན ཨཱ་ཡ་སྨ་ཏོ ཨུ་པཱ་ལི་སྶ ཨུ་པ་ཛ྄ཛྷཱ་ཡོ ཨཱ་ཡ་སྨཱ ཀ་པྤི་ཏ་ཀོ སུ་སཱ་ནེ ཝི་ཧ་ར་ཏི. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ་ནཾ བྷི་ཀྑུ་ནཱི་ནཾ མ་ཧ་ཏྟ་རཱ [མ་ཧ་ནྟ་ཏ་རཱ (སཱི.)] བྷི་ཀྑུ་ནཱི ཀཱ་ལ་ངྐ་ཏཱ ཧོ་ཏི. ཚ་བྦ་གྒི་ཡཱ བྷི་ཀྑུ་ནི་ཡོ ཏཾ བྷི་ཀྑུ་ནིཾ ནཱི་ཧ་རི་ཏྭཱ ཨཱ་ཡ་སྨ་ཏོ ཀ་པྤི་ཏ་ཀ་སྶ ཝི་ཧཱ་ར་སྶ ཨ་ཝི་དཱུ་རེ ཛྷཱ་པེ་ཏྭཱ ཐཱུ་པཾ ཀ་ཏྭཱ ག་ནྟྭཱ ཏ་སྨིཾ ཐཱུ་པེ རོ་ད་ནྟི. ཨ་ཐ ཁོ ཨཱ་ཡ་སྨཱ ཀ་པྤི་ཏ་ཀོ ཏེ་ན ས་དྡེ་ན ཨུ་བྦཱ་ལ༹ྷོ ཏཾ ཐཱུ་པཾ བྷི་ནྡི་ཏྭཱ པ་ཀི་རེ་སི. ཚ་བྦ་གྒི་ཡཱ བྷི་ཀྑུ་ནི་ཡོ – ‘‘ཨི་མི་ནཱ ཀ་པྤི་ཏ་ཀེ་ན ཨ་མྷཱ་ཀཾ ཨ་ཡྻཱ་ཡ ཐཱུ་པོ བྷི་ནྣོ, ཧ་ནྡ ནཾ གྷཱ་ཏེ་མཱ’’ཏི, མ་ནྟེ་སུཾ. ཨ་ཉྙ་ཏ་རཱ བྷི་ཀྑུ་ནཱི ཨཱ་ཡ་སྨ་ཏོ ཨུ་པཱ་ལི་སྶ ཨེ་ཏ་མ་ཏྠཾ ཨཱ་རོ་ཙེ་སི. ཨཱ་ཡ་སྨཱ ཨུ་པཱ་ལི ཨཱ་ཡ་སྨ་ཏོ ཀ་པྤི་ཏ་ཀ་སྶ ཨེ་ཏ་མ་ཏྠཾ ཨཱ་རོ་ཙེ་སི. ཨ་ཐ ཁོ ཨཱ་ཡ་སྨཱ ཀ་པྤི་ཏ་ཀོ ཝི་ཧཱ་རཱ ནི་ཀྑ་མི་ཏྭཱ ནི་ལཱི་ནོ ཨ་ཙྪི. ཨ་ཐ ཁོ ཚ་བྦ་གྒི་ཡཱ བྷི་ཀྑུ་ནི་ཡོ ཡེ་ནཱ་ཡ་སྨ་ཏོ ཀ་པྤི་ཏ་ཀ་སྶ ཝི་ཧཱ་རོ ཏེ་ནུ་པ་ས་ངྐ་མིཾ་སུ; ཨུ་པ་ས་ངྐ་མི་ཏྭཱ ཨཱ་ཡ་སྨ་ཏོ ཀ་པྤི་ཏ་ཀ་སྶ ཝི་ཧཱ་རཾ པཱ་སཱ་ཎེ་ཧི ཙ ལེ་ཌྜཱུ་ཧི ཙ ཨོ་ཏྠ་རཱ་པེ་ཏྭཱ, ‘‘མ་ཏོ ཀ་པྤི་ཏ་ཀོ’’ཏི པ་ཀྐ་མིཾ་སུ.
ཨ་ཐ ཁོ ཨཱ་ཡ་སྨཱ ཀ་པྤི་ཏ་ཀོ ཏ་སྶཱ ར་ཏྟི་ཡཱ ཨ་ཙྩ་ཡེ་ན པུ་བྦ་ཎྷ་ས་མ་ཡཾ ནི་ཝཱ་སེ་ཏྭཱ པ་ཏྟ་ཙཱི་ཝ་ར་མཱ་དཱ་ཡ ཝེ་སཱ་ལིཾ པི་ཎྜཱ་ཡ པཱ་ཝི་སི. ཨ་དྡ་སཾ་སུ ཁོ ཚ་བྦ་གྒི་ཡཱ བྷི་ཀྑུ་ནི་ཡོ ཨཱ་ཡ་སྨ་ནྟཾ ཀ་པྤི་ཏ་ཀཾ པི་ཎྜཱ་ཡ ཙ་ར་ནྟཾ. དི་སྭཱ་ན ཨེ་ཝ་མཱ་ཧཾ་སུ – ‘‘ཨ་ཡཾ ཀ་པྤི་ཏ་ཀོ ཛཱི་ཝ་ཏི, ཀོ ནུ ཁོ ཨ་མྷཱ་ཀཾ མ་ནྟཾ སཾ་ཧ་རཱི’’ཏི? ཨ་སྶོ་སུཾ ཁོ ཚ་བྦ་གྒི་ཡཱ བྷི་ཀྑུ་ནི་ཡོ – ‘‘ཨ་ཡྻེ་ན ཀི་ར ཨུ་པཱ་ལི་ནཱ ཨ་མྷཱ་ཀཾ མ་ནྟོ སཾ་ཧ་ཊོ’’ཏི. ཏཱ ཨཱ་ཡ་སྨ་ནྟཾ ཨུ་པཱ་ལིཾ ཨ་ཀྐོ་སིཾ་སུ – ‘‘ཀ་ཐ་ཉྷི ནཱ་མ ཨ་ཡཾ ཀཱ་སཱ་ཝ་ཊོ མ་ལ་མ་ཛྫ་ནོ ནི་ཧཱི་ན་ཛ་ཙྩོ ཨ་མྷཱ་ཀཾ མ་ནྟཾ སཾ་ཧ་རི་སྶ་ཏཱི’’ཏི! ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཨ་ཡྻཾ ཨུ་པཱ་ལིཾ ཨ་ཀྐོ་སི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨུ་པཱ་ལིཾ ཨ་ཀྐོ་ས་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨུ་པཱ་ལིཾ ཨ་ཀྐོ་སི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༠༢༩. ‘‘ཡཱ པ་ན བྷི་ཀྑུ་ནཱི བྷི་ཀྑུཾ ཨ་ཀྐོ་སེ་ཡྻ ཝཱ པ་རི་བྷཱ་སེ་ཡྻ ཝཱ, པཱ་ཙི་ཏྟི་ཡ’’ནྟི.
༡༠༣༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
བྷི་ཀྑུནྟི ཨུ་པ་ས་མྤ་ནྣཾ. ཨ་ཀྐོ་སེ་ཡྻ ཝཱཏི ད་ས་ཧི ཝཱ ཨ་ཀྐོ་ས་ཝ་ཏྠཱུ་ཧི ཨ་ཀྐོ་ས་ཏི ཨེ་ཏེ་སཾ ཝཱ ཨ་ཉྙ་ཏ་རེ་ན, ཨཱ་པ་ཏྟི པཱ་ཙི་ཏྟི་ཡ་སྶ.
པ་རི་བྷཱ་སེ་ཡྻ ཝཱཏི བྷ་ཡཾ ཨུ་པ་དཾ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༡༠༣༡. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱ ཨ་ཀྐོ་ས་ཏི ཝཱ པ་རི་བྷཱ་ས་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀཱ ཨ་ཀྐོ་ས་ཏི ཝཱ པ་རི་བྷཱ་ས་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱ ཨ་ཀྐོ་ས་ཏི ཝཱ པ་རི་བྷཱ་ས་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ནུ་པ་ས་མྤ་ནྣཾ ཨ་ཀྐོ་ས་ཏི ཝཱ པ་རི་བྷཱ་ས་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༡༠༣༢. ཨ་ནཱ་པ་ཏྟི ཨ་ཏྠ་པུ་རེ་ཀྑཱ་རཱ་ཡ, དྷ་མྨ་པུ་རེ་ཀྑཱ་རཱ་ཡ, ཨ་ནུ་སཱ་ས་ནི་པུ་རེ་ཀྑཱ་རཱ་ཡ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.