༡༠. ད་ས་མ་སི་ཀྑཱ་པ་དཾ
༡༠༦༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི པ་སཱ་ཁེ ཛཱ་ཏཾ ག་ཎྜཾ པུ་རི་སེ་ན ས་དྡྷིཾ ཨེ་ཀེ་ནེ་ཀཱ བྷེ་དཱ་པེ་སི. ཨ་ཐ ཁོ སོ པུ་རི་སོ ཏཾ བྷི་ཀྑུ་ནིཾ དཱུ་སེ་ཏུཾ ཨུ་པ་ཀྐ་མི. སཱ ཝི་སྶ་ར་མ་ཀཱ་སི. བྷི་ཀྑུ་ནི་ཡོ ཨུ་པ་དྷཱ་ཝི་ཏྭཱ ཏཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ཀི་སྶ ཏྭཾ, ཨ་ཡྻེ, ཝི་སྶ་ར་མ་ཀཱ་སཱི’’ཏི? ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི པ་སཱ་ཁེ ཛཱ་ཏཾ ག་ཎྜཾ པུ་རི་སེ་ན ས་དྡྷིཾ ཨེ་ཀེ་ནེ་ཀཱ བྷེ་དཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི པ་སཱ་ཁེ ཛཱ་ཏཾ ག་ཎྜཾ པུ་རི་སེ་ན ས་དྡྷིཾ ཨེ་ཀེ་ནེ་ཀཱ བྷེ་དཱ་པེ་ཏཱི་ཏི [བྷེ་དཱ་པེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི པ་སཱ་ཁེ ཛཱ་ཏཾ ག་ཎྜཾ པུ་རི་སེ་ན ས་དྡྷིཾ ཨེ་ཀེ་ནེ་ཀཱ བྷེ་དཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༡༠༦༣. ‘‘ཡཱ པ་ན བྷི་ཀྑུ་ནཱི པ་སཱ་ཁེ ཛཱ་ཏཾ ག་ཎྜཾ ཝཱ རུ་དྷི་ཏཾ ཝཱ ཨ་ན་པ་ལོ་ཀེ་ཏྭཱ ས་ངྒྷཾ ཝཱ ག་ཎཾ ཝཱ པུ་རི་སེ་ན ས་དྡྷིཾ ཨེ་ཀེ་ནེ་ཀཱ བྷེ་དཱ་པེ་ཡྻ ཝཱ ཕཱ་ལཱ་པེ་ཡྻ ཝཱ དྷོ་ཝཱ་པེ་ཡྻ ཝཱ ཨཱ་ལི་མྤཱ་པེ་ཡྻ ཝཱ བ་ནྡྷཱ་པེ་ཡྻ ཝཱ མོ་ཙཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༡༠༦༤. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
པ་སཱ་ཁཾ ནཱ་མ ཨ་དྷོ་ནཱ་བྷི ཨུ་བྦྷ་ཛཱ་ཎུ་མ་ཎྜ་ལཾ. ཛཱ་ཏནྟི ཏ་ཏྠ ཛཱ་ཏཾ. ག་ཎྜོ ནཱ་མ ཡོ ཀོ་ཙི ག་ཎྜོ. རུ་དྷི་ཏཾ ནཱ་མ ཡཾ ཀི་ཉྩི ཝ་ཎཾ. ཨ་ན་པ་ལོ་ཀེ་ཏྭཱཏི ཨ་ནཱ་པུ་ཙྪཱ. ས་ངྒྷོ ནཱ་མ བྷི་ཀྑུ་ནི་ས་ངྒྷོ ཝུ་ཙྩ་ཏི. ག་ཎོ ནཱ་མ ས་མྦ་ཧུ་ལཱ བྷི་ཀྑུ་ནི་ཡོ ཝུ་ཙྩ་ནྟི. པུ་རི་སོ ནཱ་མ མ་ནུ་སྶ་པུ་རི་སོ, ན ཡ་ཀྑོ, ན པེ་ཏོ, ན ཏི་ར་ཙྪཱ་ན་ག་ཏོ, ཝི་ཉྙཱུ པ་ཊི་བ་ལོ དཱུ་སེ་ཏུཾ. ས་དྡྷིནྟི ཨེ་ཀ་ཏོ. ཨེ་ཀེ་ནེ་ཀཱཏི པུ་རི་སོ ཙེ་ཝ ཧོ་ཏི བྷི་ཀྑུ་ནཱི ཙ.
༡༠༦༥. ‘‘བྷི་ནྡཱ’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. བྷི་ནྣེ ཨཱ་པ་ཏྟི པཱ་ཙི་ཏྟི་ཡ་སྶ. ‘‘ཕཱ་ལེ་ཧཱི’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ཕཱ་ལི་ཏེ ཨཱ་པ་ཏྟི པཱ་ཙི་ཏྟི་ཡ་སྶ. ‘‘དྷོ་ཝཱ’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. དྷོ་ཝི་ཏེ [དྷོ་ཏེ (སྱཱ.)] ཨཱ་པ་ཏྟི པཱ་ཙི་ཏྟི་ཡ་སྶ. ‘‘ཨཱ་ལི་མྤཱ’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ལི་ཏྟེ [ཨཱ་ལི་ཏྟེ (སྱཱ.)] ཨཱ་པ་ཏྟི པཱ་ཙི་ཏྟི་ཡ་སྶ. ‘‘བ་ནྡྷཱ་ཧཱི’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. བ་དྡྷེ ཨཱ་པ་ཏྟི པཱ་ཙི་ཏྟི་ཡ་སྶ. ‘‘མོ་ཙེ་ཧཱི’’ཏི ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. མུ་ཏྟེ ཨཱ་པ་ཏྟི པཱ་ཙི་ཏྟི་ཡ་སྶ.
༡༠༦༦. ཨ་ནཱ་པ་ཏྟི ཨ་པ་ལོ་ཀེ་ཏྭཱ བྷེ་དཱ་པེ་ཏི ཝཱ ཕཱ་ལཱ་པེ་ཏི ཝཱ དྷོ་ཝཱ་པེ་ཏི ཝཱ ཨཱ་ལི་མྤཱ་པེ་ཏི ཝཱ བ་ནྡྷཱ་པེ་ཏི ཝཱ མོ་ཙཱ་པེ་ཏི ཝཱ, ཡཱ ཀཱ་ཙི ཝི་ཉྙཱུ དུ་ཏི་ཡི་ཀཱ [ཡཱ ཀཱ་ཙི ཝི་ཉྙཱུ དུ་ཏི་ཡཱ (སྱཱ.), ཡོ ཀོ་ཙི ཝི་ཉྙཱུ དུ་ཏི་ཡོ (ཀ.)] ཧོ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ད་ས་མ་སི་ཀྑཱ་པ་དཾ ནི་ཊྛི་ཏཾ.
ཨཱ་རཱ་མ་ཝ་གྒོ ཚ་ཊྛོ.