༨. ཨ་ཊྛ་མ་སི་ཀྑཱ་པ་དཾ

༩༡༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ བྷི་ཀྑུ་ནཱི ན་ཊཱ་ན་མྤི ན་ཊ་ཀཱ་ན་མྤི ལ་ངྒྷ་ཀཱ་ན་མྤི སོ་ཀ་ཛ྄ཛྷཱ་ཡི་ཀཱ་ན་མྤི [སོ་ཀ་སཱ་ཡི་ཀཱ་ན་མྤི (སཱི.)] ཀུ་མྦྷ་ཐཱུ་ཎི་ཀཱ་ན་མྤི [ཀུ་མྦྷ་ཐུ་ཎི་ཀཱ་ན་མྤི (ཀ.)] ས་མ་ཎ་ཙཱི་ཝ་རཾ དེ་ཏི – ‘‘མ་ཡ྄ཧཾ པ་རི་ས་ཏི [པ་རི་ས་ཏིཾ (སཱི.)] ཝ་ཎྞཾ བྷཱ་ས་ཐཱ’’ཏི. ན་ཊཱ་པི ན་ཊ་ཀཱ་པི ལ་ངྒྷ་ཀཱ་པི སོ་ཀ་ཛ྄ཛྷཱ་ཡི་ཀཱ་པི ཀུ་མྦྷ་ཐཱུ་ཎི་ཀཱ་པི ཐུ་ལླ་ན་ནྡཱ་ཡ བྷི་ཀྑུ་ནི་ཡཱ པ་རི་ས་ཏི ཝ་ཎྞཾ བྷཱ་ས་ནྟི – ‘‘ཨ་ཡྻཱ ཐུ་ལླ་ན་ནྡཱ བ་ཧུ་སྶུ་ཏཱ བྷཱ་ཎི་ཀཱ ཝི་སཱ་ར་དཱ པ་ཊྚཱ དྷ་མྨིཾ ཀ་ཐཾ ཀཱ་ཏུཾ; དེ་ཐ ཨ་ཡྻཱ་ཡ, ཀ་རོ་ཐ ཨ་ཡྻཱ་ཡཱ’’ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ, ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ཨ་གཱ་རི་ཀ་སྶ ས་མ་ཎ་ཙཱི་ཝ་རཾ ད་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་གཱ་རི་ཀ་སྶ ས་མ་ཎ་ཙཱི་ཝ་རཾ དེ་ཏཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་གཱ་རི་ཀ་སྶ ས་མ་ཎ་ཙཱི་ཝ་རཾ ད་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༩༡༧. ‘‘ཡཱ པ་ན བྷི་ཀྑུ་ནཱི ཨ་གཱ་རི་ཀ་སྶ ཝཱ པ་རི་བྦཱ་ཛ་ཀ་སྶ ཝཱ པ་རི་བྦཱ་ཛི་ཀཱ་ཡ ཝཱ ས་མ་ཎ་ཙཱི་ཝ་རཾ ད་དེ་ཡྻ, པཱ་ཙི་ཏྟི་ཡ’’ནྟི.

༩༡༨. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ཨ་གཱ་རི་ཀོ ནཱ་མ ཡོ ཀོ་ཙི ཨ་གཱ་རཾ ཨ་ཛ྄ཛྷཱ་ཝ་ས་ཏི.

པ་རི་བྦཱ་ཛ་ཀོ ནཱ་མ བྷི་ཀྑུ་ཉྩ སཱ་མ་ཎེ་ར་ཉྩ ཋ་པེ་ཏྭཱ ཡོ ཀོ་ཙི པ་རི་བྦཱ་ཛ་ཀ་ས་མཱ་པ་ནྣོ.

པ་རི་བྦཱ་ཛི་ཀཱ ནཱ་མ བྷི་ཀྑུ་ནི་ཉྩ སི་ཀྑ་མཱ་ན་ཉྩ སཱ་མ་ཎེ་རི་ཉྩ ཋ་པེ་ཏྭཱ ཡཱ ཀཱ་ཙི པ་རི་བྦཱ་ཛི་ཀ་ས་མཱ་པ་ནྣཱ.

ས་མ་ཎ་ཙཱི་ཝ་རཾ ནཱ་མ ཀ་པྤ་ཀ་ཏཾ ཝུ་ཙྩ་ཏི. དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༩༡༩. ཨ་ནཱ་པ་ཏྟི མཱ་ཏཱ་པི་ཏཱུ་ནཾ དེ་ཏི, ཏཱ་ཝ་ཀཱ་ལི་ཀཾ དེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ཨ་ཊྛ་མ་སི་ཀྑཱ་པ་དཾ ནི་ཊྛི་ཏཾ.