༩. ན་ཝ་མ་སི་ཀྑཱ་པ་དཾ
༩༢༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཐུ་ལླ་ན་ནྡཱ་ཡ བྷི་ཀྑུ་ནི་ཡཱ ཨུ་པ་ཊྛཱ་ཀ་ཀུ་ལཾ ཐུ་ལླ་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘ས་ཙེ མ་ཡཾ, ཨ་ཡྻེ, ས་ཀྐོ་མ, བྷི་ཀྑུ་ནི་ས་ངྒྷ་སྶ ཙཱི་ཝ་རཾ ད་སྶཱ་མཱ’’ཏི. ཏེ་ན ཁོ པ་ན ས་མ་ཡེ་ན ཝ་སྶཾ་ཝུ་ཊྛཱ བྷི་ཀྑུ་ནི་ཡོ ཙཱི་ཝ་རཾ བྷཱ་ཛེ་ཏུ་ཀཱ་མཱ ས་ནྣི་པ་ཏིཾ་སུ. ཐུ་ལླ་ན་ནྡཱ བྷི་ཀྑུ་ནཱི ཏཱ བྷི་ཀྑུ་ནི་ཡོ ཨེ་ཏ་ད་ཝོ་ཙ – ‘‘ཨཱ་ག་མེ་ཐ, ཨ་ཡྻེ, ཨ་ཏྠི བྷི་ཀྑུ་ནི་ས་ངྒྷ་སྶ ཙཱི་ཝ་ར་པ་ཙྩཱ་སཱ’’ཏི. བྷི་ཀྑུ་ནི་ཡོ ཐུ་ལླ་ན་ནྡཾ བྷི་ཀྑུ་ནིཾ ཨེ་ཏ་ད་ཝོ་ཙུཾ – ‘‘ག་ཙྪཱ་ཡྻེ, ཏཾ ཙཱི་ཝ་རཾ ཛཱ་ནཱ་ཧཱི’’ཏི. ཐུ་ལླ་ན་ནྡཱ བྷི་ཀྑུ་ནཱི ཡེ་ན ཏཾ ཀུ་ལཾ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏེ མ་ནུ་སྶེ ཨེ་ཏ་ད་ཝོ་ཙ – ‘‘དེ་ཐཱ་ཝུ་སོ, བྷི་ཀྑུ་ནི་ས་ངྒྷ་སྶ ཙཱི་ཝ་ར’’ནྟི. ‘‘ན མ་ཡཾ, ཨ་ཡྻེ, ས་ཀྐོ་མ བྷི་ཀྑུ་ནི་ས་ངྒྷ་སྶ ཙཱི་ཝ་རཾ དཱ་ཏུ’’ནྟི. ཐུ་ལླ་ན་ནྡཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏཱི་ཏི [ཨ་ཏི་ཀྐཱ་མེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༩༢༡. ‘‘ཡཱ པ་ན བྷི་ཀྑུ་ནཱི དུ་བྦ་ལ་ཙཱི་ཝ་ར་པ་ཙྩཱ་སཱ་ཡ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཡྻ, པཱ་ཙི་ཏྟི་ཡ’’ནྟི.
༩༢༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
དུ་བྦ་ལ་ཙཱི་ཝ་ར་པ་ཙྩཱ་སཱ ནཱ་མ ‘‘ས་ཙེ མ་ཡཾ ས་ཀྐོ་མ, ད་སྶཱ་མ ཀ་རི་སྶཱ་མཱ’’ཏི ཝཱ་ཙཱ བྷི་ནྣཱ ཧོ་ཏི.
ཙཱི་ཝ་ར་ཀཱ་ལ་ས་མ་ཡོ ནཱ་མ ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མོ མཱ་སོ, ཨ་ཏྠ་ཏེ ཀ་ཐི་ནེ པ་ཉྩ མཱ་སཱ.
ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཡྻཱཏི ཨ་ན་ཏྠ་ཏེ ཀ་ཐི་ནེ ཝ་སྶཱ་ན་སྶ པ་ཙྪི་མཾ དི་ཝ་སཾ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏྠ་ཏེ ཀ་ཐི་ནེ ཀ་ཐི་ནུ་དྡྷཱ་ར་དི་ཝ་སཾ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༩༢༣. དུ་བྦ་ལ་ཙཱི་ཝ་རེ དུ་བྦ་ལ་ཙཱི་ཝ་ར་ས་ཉྙཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. དུ་བྦ་ལ་ཙཱི་ཝ་རེ ཝེ་མ་ཏི་ཀཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ཨཱ་པ་ཏྟི དུ་ཀྐ་ཊ་སྶ. དུ་བྦ་ལ་ཙཱི་ཝ་རེ ཨ་དུ་བྦ་ལ་ཙཱི་ཝ་ར་ས་ཉྙཱ ཙཱི་ཝ་ར་ཀཱ་ལ་ས་མ་ཡཾ ཨ་ཏི་ཀྐཱ་མེ་ཏི, ཨ་ནཱ་པ་ཏྟི.
ཨ་དུ་བྦ་ལ་ཙཱི་ཝ་རེ དུ་བྦ་ལ་ཙཱི་ཝ་ར་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་དུ་བྦ་ལ་ཙཱི་ཝ་རེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་དུ་བྦ་ལ་ཙཱི་ཝ་རེ ཨ་དུ་བྦ་ལ་ཙཱི་ཝ་ར་ས་ཉྙཱ, ཨ་ནཱ་པ་ཏྟི.
༩༢༤. ཨ་ནཱ་པ་ཏྟི ཨཱ་ནི་སཾ་སཾ ད་སྶེ་ཏྭཱ ནི་ཝཱ་རེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ན་ཝ་མ་སི་ཀྑཱ་པ་དཾ ནི་ཊྛི་ཏཾ.