༡. པ་ཋ་མ་སི་ཀྑཱ་པ་དཾ

༨༨༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ས་མྦ་ཧུ་ལཱ [མ་ཧཱ་ཝ. ༣༥༠] བྷི་ཀྑུ་ནི་ཡོ ཨ་ཙི་ར་ཝ་ཏི་ཡཱ ན་དི་ཡཱ ཝེ་སི་ཡཱ་ཧི ས་དྡྷིཾ ན་གྒཱ ཨེ་ཀ་ཏི་ཏྠེ ན་ཧཱ་ཡ་ནྟི. ཝེ་སི་ཡཱ ཏཱ བྷི་ཀྑུ་ནི་ཡོ ཨུ་པྤ་ཎྜེ་སུཾ – ‘‘ཀིཾ ནུ ཁོ ནཱ་མ ཏུ་མྷཱ་ཀཾ, ཨ་ཡྻེ, ད་ཧ་རཱ་ནཾ [ད་ཧ་རཱ་ནཾ ད་ཧ་རཱ་ནཾ (སཱི.)] བྲ་ཧྨ་ཙ་རི་ཡཾ ཙི་ཎྞེ་ན, ན་ནུ ནཱ་མ ཀཱ་མཱ པ་རི་བྷུ་ཉྫི་ཏ་བྦཱ! ཡ་དཱ ཛི་ཎྞཱ བྷ་ཝི་སྶ་ཐ ཏ་དཱ བྲ་ཧྨ་ཙ་རི་ཡཾ ཙ་རི་སྶ་ཐ. ཨེ་ཝཾ ཏུ་མྷཱ་ཀཾ ཨུ་བྷོ ཨ་ཏྠཱ པ་རི་གྒ་ཧི་ཏཱ བྷ་ཝི་སྶ་ནྟཱི’’ཏི. བྷི་ཀྑུ་ནི་ཡོ ཝེ་སི་ཡཱ་ཧི ཨུ་པྤ་ཎྜི་ཡ་མཱ་ནཱ མ་ངྐཱུ ཨ་ཧེ་སུཾ. ཨ་ཐ ཁོ ཏཱ བྷི་ཀྑུ་ནི་ཡོ ཨུ་པ་སྶ་ཡཾ ག་ནྟྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑུ་ནི་ཡོ བྷི་ཀྑཱུ་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. བྷི་ཀྑཱུ བྷ་ག་ཝ་ཏོ ཨེ་ཏ་མ་ཏྠཾ ཨཱ་རོ་ཙེ་སུཾ. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཏེ་ན ཧི, བྷི་ཀྑ་ཝེ, བྷི་ཀྑུ་ནཱི་ནཾ སི་ཀྑཱ་པ་དཾ པ་ཉྙ་པེ་སྶཱ་མི ད་ས ཨ་ཏྠ་ཝ་སེ པ་ཊི་ཙྩ – ས་ངྒྷ་སུ་ཊྛུ་ཏཱ་ཡ…པེ… ཝི་ན་ཡཱ་ནུ་གྒ་ཧཱ་ཡ. ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༨༨༤. ‘‘ཡཱ པ་ན བྷི་ཀྑུ་ནཱི ན་གྒཱ ན་ཧཱ་ཡེ་ཡྻ, པཱ་ཙི་ཏྟི་ཡ’’ནྟི.

༨༨༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.

ན་གྒཱ ན་ཧཱ་ཡེ་ཡྻཱཏི ཨ་ནི་ཝ་ཏྠཱ ཝཱ ཨ་པཱ་རུ་ཏཱ ཝཱ ན་ཧཱ་ཡ་ཏི, པ་ཡོ་གེ དུ་ཀྐ་ཊཾ. ན་ཧཱ་ན་པ་རི་ཡོ་སཱ་ནེ ཨཱ་པ་ཏྟི པཱ་ཙི་ཏྟི་ཡ་སྶ.

༨༨༦. ཨ་ནཱ་པ་ཏྟི ཨ་ཙྪི་ནྣ་ཙཱི་ཝ་རི་ཀཱ་ཡ ཝཱ ན་ཊྛ་ཙཱི་ཝ་རི་ཀཱ་ཡ ཝཱ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

པ་ཋ་མ་སི་ཀྑཱ་པ་དཾ ནི་ཊྛི་ཏཾ.