༢. དུ་ཏི་ཡ་སི་ཀྑཱ་པ་དཾ
༨༨༧. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷ་ག་ཝ་ཏཱ བྷི་ཀྑུ་ནཱི་ནཾ [མ་ཧཱ་ཝ. ༣༥༡] ཨུ་ད་ཀ་སཱ་ཊི་ཀཱ ཨ་ནུ་ཉྙཱ་ཏཱ ཧོ་ཏི. ཚ་བྦ་གྒི་ཡཱ བྷི་ཀྑུ་ནི་ཡོ – ‘‘བྷ་ག་ཝ་ཏཱ ཨུ་ད་ཀ་སཱ་ཊི་ཀཱ ཨ་ནུ་ཉྙཱ་ཏཱ’’ཏི ཨ་པྤ་མཱ་ཎི་ཀཱ་ཡོ ཨུ་ད་ཀ་སཱ་ཊི་ཀཱ་ཡོ དྷཱ་རེ་སུཾ [དྷཱ་རེ་ནྟི (པཱ་ཙི. ༥༣༡-༥༤༥)]. པུ་ར་ཏོ་པི པ་ཙྪ་ཏོ་པི ཨཱ་ཀ་ཌྜྷ་ནྟཱ ཨཱ་ཧི་ཎྜ་ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ཨ་པྤ་མཱ་ཎི་ཀཱ་ཡོ ཨུ་ད་ཀ་སཱ་ཊི་ཀཱ་ཡོ དྷཱ་རེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨ་པྤ་མཱ་ཎི་ཀཱ་ཡོ ཨུ་ད་ཀ་སཱ་ཊི་ཀཱ་ཡོ དྷཱ་རེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ཨ་པྤ་མཱ་ཎི་ཀཱ་ཡོ ཨུ་ད་ཀ་སཱ་ཊི་ཀཱ་ཡོ དྷཱ་རེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༨༨. ‘‘ཨུ་ད་ཀ་སཱ་ཊི་ཀཾ པ་ན བྷི་ཀྑུ་ནི་ཡཱ ཀཱ་ར་ཡ་མཱ་ནཱ་ཡ པ་མཱ་ཎི་ཀཱ ཀཱ་རེ་ཏ་བྦཱ. ཏ་ཏྲི་དཾ པ་མཱ་ཎཾ – དཱི་གྷ་སོ ཙ་ཏ་སྶོ ཝི་ད་ཏྠི་ཡོ, སུ་ག་ཏ་ཝི་ད་ཏྠི་ཡཱ; ཏི་རི་ཡཾ དྭེ ཝི་ད་ཏྠི་ཡོ. ཏཾ ཨ་ཏི་ཀྐཱ་མེ་ནྟི་ཡཱ ཚེ་ད་ན་ཀཾ པཱ་ཙི་ཏྟི་ཡ’’ནྟི.
༨༨༩. ཨུ་ད་ཀ་སཱ་ཊི་ཀཱ ནཱ་མ ཡཱ་ཡ ནི་ཝ་ཏྠཱ [ནི་ཝ་ཏྠཱ་ཡ (སྱཱ.)] ན་ཧཱ་ཡ་ཏི.
ཀཱ་ར་ཡ་མཱ་ནཱ་ཡཱཏི ཀ་རོ་ནྟི་ཡཱ ཝཱ ཀཱ་རཱ་པེ་ནྟི་ཡཱ ཝཱ.
པ་མཱ་ཎི་ཀཱ ཀཱ་རེ་ཏ་བྦཱ. ཏ་ཏྲི་དཾ པ་མཱ་ཎཾ – དཱི་གྷ་སོ ཙ་ཏ་སྶོ ཝི་ད་ཏྠི་ཡོ, སུ་ག་ཏ་ཝི་ད་ཏྠི་ཡཱ; ཏི་རི་ཡཾ དྭེ ཝི་ད་ཏྠི་ཡོ. ཏཾ ཨ་ཏི་ཀྐཱ་མེ་ཏྭཱ ཀ་རོ་ཏི ཝཱ ཀཱ་རཱ་པེ་ཏི ཝཱ, པ་ཡོ་གེ དུ་ཀྐ་ཊཾ. པ་ཊི་ལཱ་བྷེ་ན ཚི་ནྡི་ཏྭཱ པཱ་ཙི་ཏྟི་ཡཾ དེ་སེ་ཏ་བྦཾ.
༨༩༠. ཨ་ཏྟ་ནཱ ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏྟ་ནཱ ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པ་རེ་ཧི ཝི་པྤ་ཀ་ཏཾ ཨ་ཏྟ་ནཱ པ་རི་ཡོ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. པ་རེ་ཧི ཝི་པྤ་ཀ་ཏཾ པ་རེ་ཧི པ་རི་ཡོ་སཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཉྙ་སྶ་ཏྠཱ་ཡ ཀ་རོ་ཏི ཝཱ ཀཱ་རཱ་པེ་ཏི ཝཱ, ཨཱ་པ་ཏྟི དུ་ཀྐ་ཊ་སྶ. ཨ་ཉྙེ་ན ཀ་ཏཾ པ་ཊི་ལ་བྷི་ཏྭཱ པ་རི་བྷུ་ཉྫ་ཏི, ཨཱ་པ་ཏྟི དུ་ཀྐ་ཊ་སྶ.
༨༩༡. ཨ་ནཱ་པ་ཏྟི པ་མཱ་ཎི་ཀཾ ཀ་རོ་ཏི, ཨཱུ་ན་ཀཾ ཀ་རོ་ཏི, ཨ་ཉྙེ་ན ཀ་ཏཾ པ་མཱ་ཎཱ་ཏི་ཀྐ་ནྟཾ པ་ཊི་ལ་བྷི་ཏྭཱ ཚི་ནྡི་ཏྭཱ པ་རི་བྷུ་ཉྫ་ཏི, ཝི་ཏཱ་ནཾ ཝཱ བྷཱུ་མ་ཏྠ་ར་ཎཾ ཝཱ སཱ་ཎི་པཱ་ཀཱ་རཾ ཝཱ བྷི་སིཾ ཝཱ བི་བྦོ་ཧ་ནཾ ཝཱ ཀ་རོ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.