༣. ཏ་ཏི་ཡ་སི་ཀྑཱ་པ་དཾ

༨༠༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན དྭེ བྷི་ཀྑུ་ནི་ཡོ ཨ་ན་བྷི་ར་ཏི་ཡཱ པཱི་ལི༹་ཏཱ ཨོ་ཝ་ར་ཀཾ པ་ཝི་སི་ཏྭཱ ཏ་ལ་གྷཱ་ཏ་ཀཾ ཀ་རོ་ནྟི. བྷི་ཀྑུ་ནི་ཡོ ཏེ་ན ས་དྡེ་ན ཨུ་པ་དྷཱ་ཝི་ཏྭཱ ཏཱ བྷི་ཀྑུ་ནི་ཡོ ཨེ་ཏ་ད་ཝོ་ཙུཾ – ‘‘ཀི་སྶ ཏུ་མྷེ, ཨ་ཡྻེ, པུ་རི་སེ་ན ས་དྡྷིཾ ས་མྤ་དུ་སྶ་ཐཱ’’ཏི? ‘‘ན མ་ཡཾ, ཨ་ཡྻེ, པུ་རི་སེ་ན ས་དྡྷིཾ ས་མྤ་དུ་སྶཱ་མཱ’’ཏི. བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རོ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –

༨༠༣. ‘‘ཏ་ལ་གྷཱ་ཏ་ཀེ པཱ་ཙི་ཏྟི་ཡ’’ནྟི.

༨༠༤. ཏ་ལ་གྷཱ་ཏ་ཀཾ ནཱ་མ ས་མྥ་སྶཾ སཱ་དི་ཡ་ནྟཱི ཨ་ནྟ་མ་སོ ཨུ་པྤ་ལ་པ་ཏྟེ་ན་པི མུ་ཏྟ་ཀ་ར་ཎེ པ་ཧཱ་རཾ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.

༨༠༥. ཨ་ནཱ་པ་ཏྟི ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.

ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.