༡. ལ་སུ་ཎ་ཝ་གྒོ
༡. པ་ཋ་མ་སི་ཀྑཱ་པ་དཾ
ཨི་མེ ཁོ པ་ནཱ་ཡྻཱ་ཡོ ཚ་ས་ཊྛི་ས་ཏཱ པཱ་ཙི་ཏྟི་ཡཱ
དྷ་མྨཱ ཨུ་དྡེ་སཾ ཨཱ་ག་ཙྪ་ནྟི.
༧༩༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རེ་ན ཨུ་པཱ་ས་ཀེ་ན བྷི་ཀྑུ་ནི་ས་ངྒྷོ ལ་སུ་ཎེ་ན པ་ཝཱ་རི་ཏོ ཧོ་ཏི – ‘‘ཡཱ་སཾ ཨ་ཡྻཱ་ནཾ ལ་སུ་ཎེ་ན ཨ་ཏྠོ, ཨ་ཧཾ ལ་སུ་ཎེ་ནཱ’’ཏི. ཁེ་ཏྟ་པཱ་ལོ ཙ ཨཱ་ཎ་ཏྟོ ཧོ་ཏི – ‘‘ས་ཙེ བྷི་ཀྑུ་ནི་ཡོ ཨཱ་ག་ཙྪ་ནྟི, ཨེ་ཀ་མེ་ཀཱ་ཡ བྷི་ཀྑུ་ནི་ཡཱ དྭེ་ཏ་ཡོ བྷ་ཎྜི་ཀེ དེ་ཧཱི’’ཏི. ཏེ་ན ཁོ པ་ན ས་མ་ཡེ་ན སཱ་ཝ་ཏྠི་ཡཾ ཨུ་སྶ་ཝོ ཧོ་ཏི. ཡ་ཐཱ་བྷ་ཏཾ ལ་སུ་ཎཾ པ་རི་ཀྑ་ཡཾ ཨ་ག་མཱ་སི. བྷི་ཀྑུ་ནི་ཡོ ཏཾ ཨུ་པཱ་ས་ཀཾ ཨུ་པ་ས་ངྐ་མི་ཏྭཱ ཨེ་ཏ་ད་ཝོ་ཙུཾ – ‘‘ལ་སུ་ཎེ་ན, ཨཱ་ཝུ་སོ, ཨ་ཏྠོ’’ཏི. ‘‘ན་ཏྠཱ་ཡྻེ. ཡ་ཐཱ་བྷ་ཏཾ ལ་སུ་ཎཾ པ་རི་ཀྑཱི་ཎཾ. ཁེ་ཏྟཾ ག་ཙྪ་ཐཱ’’ཏི. ཐུ་ལླ་ན་ནྡཱ བྷི་ཀྑུ་ནཱི ཁེ་ཏྟཾ ག་ནྟྭཱ ན མ་ཏྟཾ ཛཱ་ནི་ཏྭཱ བ་ཧུཾ ལ་སུ་ཎཾ ཧ་རཱ་པེ་སི. ཁེ་ཏྟ་པཱ་ལོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ན མ་ཏྟཾ ཛཱ་ནི་ཏྭཱ བ་ཧུཾ ལ་སུ་ཎཾ ཧ་རཱ་པེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏ་སྶ ཁེ་ཏྟ་པཱ་ལ་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཨ་ཡྻཱ ཐུ་ལླ་ན་ནྡཱ ན མ་ཏྟཾ ཛཱ་ནི་ཏྭཱ བ་ཧུཾ ལ་སུ་ཎཾ ཧ་རཱ་པེ་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ན མ་ཏྟཾ ཛཱ་ནི་ཏྭཱ བ་ཧུཾ ལ་སུ་ཎཾ ཧ་རཱ་པེ་ཏཱི་ཏི [ཧ་རཱ་པེ་སཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ན མ་ཏྟཾ ཛཱ་ནི་ཏྭཱ བ་ཧུཾ ལ་སུ་ཎཾ ཧ་རཱ་པེ་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི –
‘‘བྷཱུ་ཏ་པུ་བྦཾ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་ཉྙ་ཏ་ར་སྶ བྲཱ་ཧྨ་ཎ་སྶ པ་ཛཱ་པ་ཏི ཨ་ཧོ་སི. ཏི་སྶོ ཙ དྷཱི་ཏ་རོ – ན་ནྡཱ, ན་ནྡ་ཝ་ཏཱི, སུ་ནྡ་རཱི་ན་ནྡཱ. ཨ་ཐ ཁོ, བྷི་ཀྑ་ཝེ, སོ བྲཱ་ཧྨ་ཎོ ཀཱ་ལ་ངྐ་ཏྭཱ ཨ་ཉྙ་ཏ་རཾ ཧཾ་ས་ཡོ་ནིཾ ཨུ་པ་པ་ཛྫི. ཏ་སྶ ས་བྦ་སོ་ཝ་ཎྞ་མ་ཡཱ པ་ཏྟཱ ཨ་ཧེ་སུཾ. སོ ཏཱ་སཾ ཨེ་ཀེ་ཀཾ པ་ཏྟཾ དེ་ཏི. ཨ་ཐ ཁོ, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ‘‘ཨ་ཡཾ ཧཾ་སོ ཨ་མྷཱ་ཀཾ ཨེ་ཀེ་ཀཾ པ་ཏྟཾ དེ་ཏཱི’’ཏི ཏཾ ཧཾ་ས་རཱ་ཛཾ ག་ཧེ་ཏྭཱ ནི་པྤ་ཏྟཾ ཨ་ཀཱ་སི. ཏ་སྶ པུ་ན ཛཱ་ཡ་མཱ་ནཱ པ་ཏྟཱ སེ་ཏཱ ས་མྤ་ཛྫིཾ་སུ. ཏ་དཱ་པི, བྷི་ཀྑ་ཝེ, ཐུ་ལླ་ན་ནྡཱ བྷི་ཀྑུ་ནཱི ཨ་ཏི་ལོ་བྷེ་ན སུ་ཝ་ཎྞཱ པ་རི་ཧཱི་ནཱ. ཨི་དཱ་ནི ལ་སུ་ཎཱ པ་རི་ཧཱ་ཡི་སྶ་ཏཱི’’ཏི.
[ཛཱ. ༡.༡.༡༣༦ སུ་ཝ་ཎྞ་ཧཾ་ས་ཛཱ་ཏ་ཀེ་པི] ‘‘ཡཾ ལ་དྡྷཾ ཏེ་ན ཏུ་ཊྛ་བྦཾ, ཨ་ཏི་ལོ་བྷོ ཧི པཱ་པ་ཀོ;
ཧཾ་ས་རཱ་ཛཾ ག་ཧེ་ཏྭཱ་ན, སུ་ཝ་ཎྞཱ པ་རི་ཧཱ་ཡ་ཐཱ’’ཏི.
ཨ་ཐ ཁོ བྷ་ག་ཝཱ ཐུ་ལླ་ན་ནྡཾ བྷི་ཀྑུ་ནིཾ ཨ་ནེ་ཀ་པ་རི་ཡཱ་ཡེ་ན ཝི་ག་ར་ཧི་ཏྭཱ དུ་བྦྷ་ར་ཏཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༧༩༤. ‘‘ཡཱ པ་ན བྷི་ཀྑུ་ནཱི ལ་སུ་ཎཾ ཁཱ་དེ་ཡྻ པཱ་ཙི་ཏྟི་ཡ’’ནྟི.
༧༩༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ལ་སུ་ཎཾ ནཱ་མ མཱ་ག་དྷ་ཀཾ ཝུ་ཙྩ་ཏི.
‘‘ཁཱ་དི་སྶཱ་མཱི་ཏི པ་ཊི་གྒ་ཎྷཱ’’ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཙི་ཏྟི་ཡ་སྶ.
༧༩༦. ལ་སུ་ཎེ ལ་སུ་ཎ་ས་ཉྙཱ ཁཱ་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ལ་སུ་ཎེ ཝེ་མ་ཏི་ཀཱ ཁཱ་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ལ་སུ་ཎེ ཨ་ལ་སུ་ཎ་ས་ཉྙཱ ཁཱ་ད་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ལ་སུ་ཎེ ལ་སུ་ཎ་ས་ཉྙཱ ཁཱ་ད་ཏི, ཨཱ་པ་ཏྟི དུ་ཀྐ་ཊ་སྶ. ཨ་ལ་སུ་ཎེ ཝེ་མ་ཏི་ཀཱ ཁཱ་ད་ཏི, ཨཱ་པ་ཏྟི དུ་ཀྐ་ཊ་སྶ. ཨ་ལ་སུ་ཎེ ཨ་ལ་སུ་ཎ་ས་ཉྙཱ ཁཱ་ད་ཏི, ཨ་ནཱ་པ་ཏྟི.
༧༩༧. ཨ་ནཱ་པ་ཏྟི པ་ལ་ཎྜུ་ཀེ, བྷ་ཉྫ་ན་ཀེ, ཧ་རཱི་ཏ་ཀེ, ཙཱ་པ་ལ་སུ་ཎེ, སཱུ་པ་ས་མྤཱ་ཀེ, མཾ་ས་ས་མྤཱ་ཀེ, ཏེ་ལ་ས་མྤཱ་ཀེ, སཱ་ལ༹་ཝེ, ཨུ་ཏྟ་རི་བྷ་ངྒེ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཋ་མ་སི་ཀྑཱ་པ་དཾ ནི་ཊྛི་ཏཾ.
༢. དུ་ཏི་ཡ་སི་ཀྑཱ་པ་དཾ
༧༩༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཚ་བྦ་གྒི་ཡཱ བྷི་ཀྑུ་ནི་ཡོ ས་མྦཱ་དྷེ ལོ་མཾ སཾ་ཧ་རཱ་པེ་ཏྭཱ ཨ་ཙི་ར་ཝ་ཏི་ཡཱ ན་དི་ཡཱ ཝེ་སི་ཡཱ་ཧི ས་དྡྷིཾ ན་གྒཱ ཨེ་ཀ་ཏི་ཏྠེ ན་ཧཱ་ཡ་ནྟི. ཝེ་སི་ཡཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ས་མྦཱ་དྷེ ལོ་མཾ སཾ་ཧ་རཱ་པེ་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏཱ་སཾ ཝེ་སི་ཡཱ་ནཾ ཨུ་ཛ྄ཛྷཱ་ཡ་ནྟཱི་ནཾ ཁི་ཡྻ་ནྟཱི་ནཾ ཝི་པཱ་ཙེ་ནྟཱི་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ས་མྦཱ་དྷེ ལོ་མཾ སཾ་ཧ་རཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ས་མྦཱ་དྷེ ལོ་མཾ སཾ་ཧ་རཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ས་མྦཱ་དྷེ ལོ་མཾ སཾ་ཧ་རཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༧༩༩. ‘‘ཡཱ པ་ན བྷི་ཀྑུ་ནཱི ས་མྦཱ་དྷེ ལོ་མཾ སཾ་ཧ་རཱ་པེ་ཡྻ, པཱ་ཙི་ཏྟི་ཡ’’ནྟི.
༨༠༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ས་མྦཱ་དྷོ ནཱ་མ ཨུ་བྷོ ཨུ་པ་ཀ་ཙྪ་ཀཱ, མུ་ཏྟ་ཀ་ར་ཎཾ.
སཾ་ཧ་རཱ་པེ་ཡྻཱཏི ཨེ་ཀ་མྤི ལོ་མཾ སཾ་ཧ་རཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. བ་ཧུ་ཀེ་པི ལོ་མེ སཾ་ཧ་རཱ་པེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༠༡. ཨ་ནཱ་པ་ཏྟི ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
དུ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༣. ཏ་ཏི་ཡ་སི་ཀྑཱ་པ་དཾ
༨༠༢. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན དྭེ བྷི་ཀྑུ་ནི་ཡོ ཨ་ན་བྷི་ར་ཏི་ཡཱ པཱི་ལི༹་ཏཱ ཨོ་ཝ་ར་ཀཾ པ་ཝི་སི་ཏྭཱ ཏ་ལ་གྷཱ་ཏ་ཀཾ ཀ་རོ་ནྟི. བྷི་ཀྑུ་ནི་ཡོ ཏེ་ན ས་དྡེ་ན ཨུ་པ་དྷཱ་ཝི་ཏྭཱ ཏཱ བྷི་ཀྑུ་ནི་ཡོ ཨེ་ཏ་ད་ཝོ་ཙུཾ – ‘‘ཀི་སྶ ཏུ་མྷེ, ཨ་ཡྻེ, པུ་རི་སེ་ན ས་དྡྷིཾ ས་མྤ་དུ་སྶ་ཐཱ’’ཏི? ‘‘ན མ་ཡཾ, ཨ་ཡྻེ, པུ་རི་སེ་ན ས་དྡྷིཾ ས་མྤ་དུ་སྶཱ་མཱ’’ཏི. བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རོ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཏ་ལ་གྷཱ་ཏ་ཀཾ ཀ་རི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༠༣. ‘‘ཏ་ལ་གྷཱ་ཏ་ཀེ པཱ་ཙི་ཏྟི་ཡ’’ནྟི.
༨༠༤. ཏ་ལ་གྷཱ་ཏ་ཀཾ ནཱ་མ ས་མྥ་སྶཾ སཱ་དི་ཡ་ནྟཱི ཨ་ནྟ་མ་སོ ཨུ་པྤ་ལ་པ་ཏྟེ་ན་པི མུ་ཏྟ་ཀ་ར་ཎེ པ་ཧཱ་རཾ དེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༠༥. ཨ་ནཱ་པ་ཏྟི ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཏ་ཏི་ཡ་སི་ཀྑཱ་པ་དཾ ནི་ཊྛི་ཏཾ.
༤. ཙ་ཏུ་ཏྠ་སི་ཀྑཱ་པ་དཾ
༨༠༦. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ པུ་རཱ་ཎ་རཱ་ཛོ་རོ་དྷཱ བྷི་ཀྑུ་ནཱི་སུ པ་བྦ་ཛི་ཏཱ [ཨ་ཉྙ་ཏ་རོ པུ་རཱ་ཎ་རཱ་ཛོ་རོ་དྷོ བྷི་ཀྑུ་ནཱི་སུ པ་བྦ་ཛི་ཏོ (སྱཱ.)] ཧོ་ཏི. ཨ་ཉྙ་ཏ་རཱ བྷི་ཀྑུ་ནཱི ཨ་ན་བྷི་ར་ཏི་ཡཱ པཱི་ལི༹་ཏཱ ཡེ་ན སཱ བྷི་ཀྑུ་ནཱི ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ ཏཾ བྷི་ཀྑུ་ནིཾ ཨེ་ཏ་ད་ཝོ་ཙ – ‘‘རཱ་ཛཱ ཁོ, ཨ་ཡྻེ, ཏུ་མྷེ ཙི་རཱ་ཙི་རཾ ག་ཙྪ་ཏི. ཀ་ཐཾ ཏུ་མྷེ དྷཱ་རེ་ཐཱ’’ཏི? ‘‘ཛ་ཏུ་མ་ཊྛ་ཀེ་ན, ཨ་ཡྻེ’’ཏི. ‘‘ཀིཾ ཨེ་ཏཾ, ཨ་ཡྻེ, ཛ་ཏུ་མ་ཊྛ་ཀ’’ནྟི? ཨ་ཐ ཁོ སཱ བྷི་ཀྑུ་ནཱི ཏ་སྶཱ བྷི་ཀྑུ་ནི་ཡཱ ཛ་ཏུ་མ་ཊྛ་ཀཾ ཨཱ་ཙི་ཀྑི. ཨ་ཐ ཁོ སཱ བྷི་ཀྑུ་ནཱི ཛ་ཏུ་མ་ཊྛ་ཀཾ ཨཱ་དི་ཡི་ཏྭཱ དྷོ་ཝི་ཏུཾ ཝི་སྶ་རི་ཏྭཱ ཨེ་ཀ་མ་ནྟཾ ཚ་ཌྜེ་སི. བྷི་ཀྑུ་ནི་ཡོ མ་ཀྑི་ཀཱ་ཧི ས་མྤ་རི་ཀི་ཎྞཾ པ་སྶི་ཏྭཱ ཨེ་ཝ་མཱ་ཧཾ་སུ – ‘‘ཀ་སྶི་དཾ ཀ་མྨ’’ནྟི? སཱ ཨེ་ཝ་མཱ་ཧ – ‘‘མ་ཡ྄ཧི་དཾ ཀ་མྨ’’ནྟི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི ཛ་ཏུ་མ་ཊྛ་ཀཾ ཨཱ་དི་ཡི་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཛ་ཏུ་མ་ཊྛ་ཀཾ ཨཱ་དི་ཡ་ཏཱི་ཏི [ཨཱ་དི་ཡཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཛ་ཏུ་མ་ཊྛ་ཀཾ ཨཱ་དི་ཡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༠༧. ‘‘ཛ་ཏུ་མ་ཊྛ་ཀེ [ཛ་ཏུ་མ་ཊྚ་ཀེ (སཱི.)] པཱ་ཙི་ཏྟི་ཡ’’ནྟི.
༨༠༨. ཛ་ཏུ་མ་ཊྛ་ཀཾ ནཱ་མ ཛ་ཏུ་མ་ཡཾ ཀ་ཊྛ་མ་ཡཾ པི་ཊྛ་མ་ཡཾ མ་ཏྟི་ཀཱ་མ་ཡཾ.
ཨཱ་དི་ཡེ་ཡྻཱཏི ས་མྥ་སྶཾ སཱ་དི་ཡ་ནྟཱི ཨ་ནྟ་མ་སོ ཨུ་པྤ་ལ་པ་ཏྟ་མྤི མུ་ཏྟ་ཀ་ར་ཎཾ པ་ཝེ་སེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༠༩. ཨ་ནཱ་པ་ཏྟི ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཙ་ཏུ་ཏྠ་སི་ཀྑཱ་པ་དཾ ནི་ཊྛི་ཏཾ.
༥. པ་ཉྩ་མ་སི་ཀྑཱ་པ་དཾ
༨༡༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ ས་ཀྐེ་སུ ཝི་ཧ་ར་ཏི ཀ་པི་ལ་ཝ་ཏྠུ་སྨིཾ ནི་གྲོ་དྷཱ་རཱ་མེ. ཨ་ཐ ཁོ མ་ཧཱ་པ་ཛཱ་པ་ཏི གོ་ཏ་མཱི ཡེ་ན བྷ་ག་ཝཱ ཏེ་ནུ་པ་ས་ངྐ་མི; ཨུ་པ་ས་ངྐ་མི་ཏྭཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ ཨ་དྷོ་ཝཱ་ཏེ ཨ་ཊྛཱ་སི – ‘‘དུ་གྒ་ནྡྷོ, བྷ་ག་ཝཱ, མཱ་ཏུ་གཱ་མོ’’ཏི. ཨ་ཐ ཁོ བྷ་ག་ཝཱ – ‘‘ཨཱ་དི་ཡ་ནྟུ ཁོ བྷི་ཀྑུ་ནི་ཡོ ཨུ་ད་ཀ་སུ་དྡྷི་ཀ’’ནྟི, མ་ཧཱ་པ་ཛཱ་པ་ཏིཾ གོ་ཏ་མིཾ དྷ་མྨི་ཡཱ ཀ་ཐཱ་ཡ ས་ནྡ་སྶེ་སི ས་མཱ་ད་པེ་སི ས་མུ་ཏྟེ་ཛེ་སི ས་མྤ་ཧཾ་སེ་སི. ཨ་ཐ ཁོ མ་ཧཱ་པ་ཛཱ་པ་ཏི གོ་ཏ་མཱི བྷ་ག་ཝ་ཏཱ དྷ་མྨི་ཡཱ ཀ་ཐཱ་ཡ ས་ནྡ་སྶི་ཏཱ ས་མཱ་ད་པི་ཏཱ ས་མུ་ཏྟེ་ཛི་ཏཱ ས་མྤ་ཧཾ་སི་ཏཱ བྷ་ག་ཝ་ནྟཾ ཨ་བྷི་ཝཱ་དེ་ཏྭཱ པ་ད་ཀྑི་ཎཾ ཀ་ཏྭཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ‘‘ཨ་ནུ་ཛཱ་ནཱ་མི, བྷི་ཀྑ་ཝེ, བྷི་ཀྑུ་ནཱི་ནཾ ཨུ་ད་ཀ་སུ་དྡྷི་ཀ’’ནྟི. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རཱ བྷི་ཀྑུ་ནཱི – ‘‘བྷ་ག་ཝ་ཏཱ ཨུ་ད་ཀ་སུ་དྡྷི་ཀཱ ཨ་ནུ་ཉྙཱ་ཏཱ’’ཏི ཨ་ཏི་ག་མྦྷཱི་རཾ ཨུ་ད་ཀ་སུ་དྡྷི་ཀཾ ཨཱ་དི་ཡ་ནྟཱི མུ་ཏྟ་ཀ་ར་ཎེ ཝ་ཎཾ ཨ་ཀཱ་སི. ཨ་ཐ ཁོ སཱ བྷི་ཀྑུ་ནཱི བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་ཏི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ཀ་ཐ་ཉྷི ནཱ་མ བྷི་ཀྑུ་ནཱི ཨ་ཏི་ག་མྦྷཱི་རཾ ཨུ་ད་ཀ་སུ་དྡྷི་ཀཾ ཨཱ་དི་ཡི་སྶ་ཏཱི་ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི ཨ་ཏི་ག་མྦྷཱི་རཾ ཨུ་ད་ཀ་སུ་དྡྷི་ཀཾ ཨཱ་དི་ཡ་ཏཱི’’ཏི [ཨཱ་དི་ཡཱི་ཏི (ཀ.)]? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི ཨ་ཏི་ག་མྦྷཱི་རཾ ཨུ་ད་ཀ་སུ་དྡྷི་ཀཾ ཨཱ་དི་ཡི་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༡༡. ‘‘ཨུ་ད་ཀ་སུ་དྡྷི་ཀཾ པ་ན བྷི་ཀྑུ་ནི་ཡཱ ཨཱ་དི་ཡ་མཱ་ནཱ་ཡ དྭ་ངྒུ་ལ་པ་བྦ་པ་ར་མཾ ཨཱ་དཱ་ཏ་བྦཾ. ཏཾ ཨ་ཏི་ཀྐཱ་མེ་ནྟི་ཡཱ པཱ་ཙི་ཏྟི་ཡ’’ནྟི.
༨༡༢. ཨུ་ད་ཀ་སུ་དྡྷི་ཀཾ ནཱ་མ མུ་ཏྟ་ཀ་ར་ཎ་སྶ དྷོ་ཝ་ནཱ ཝུ་ཙྩ་ཏི.
ཨཱ་དི་ཡ་མཱ་ནཱ་ཡཱཏི དྷོ་ཝ་ནྟི་ཡཱ.
དྭ་ངྒུ་ལ་པ་བྦ་པ་ར་མཾ ཨཱ་དཱ་ཏ་བྦནྟི དྭཱི་སུ ཨ་ངྒུ་ལེ་སུ དྭེ པ་བྦ་པ་ར་མཱ ཨཱ་དཱ་ཏ་བྦཱ.
ཏཾ ཨ་ཏི་ཀྐཱ་མེ་ནྟི་ཡཱཏི ས་མྥ་སྶཾ སཱ་དི་ཡ་ནྟཱི ཨ་ནྟ་མ་སོ ཀེ་ས་གྒ་མ་ཏྟ་མྤི ཨ་ཏི་ཀྐཱ་མེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༡༣. ཨ་ཏི་རེ་ཀ་དྭ་ངྒུ་ལ་པ་བྦེ ཨ་ཏི་རེ་ཀ་ས་ཉྙཱ ཨཱ་དི་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་དྭ་ངྒུ་ལ་པ་བྦེ ཝེ་མ་ཏི་ཀཱ ཨཱ་དི་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨ་ཏི་རེ་ཀ་དྭ་ངྒུ་ལ་པ་བྦེ ཨཱུ་ན་ཀ་ས་ཉྙཱ ཨཱ་དི་ཡ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཨཱུ་ན་ཀ་དྭ་ངྒུ་ལ་པ་བྦེ ཨ་ཏི་རེ་ཀ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་དྭ་ངྒུ་ལ་པ་བྦེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨཱུ་ན་ཀ་དྭ་ངྒུ་ལ་པ་བྦེ ཨཱུ་ན་ཀ་ས་ཉྙཱ, ཨ་ནཱ་པ་ཏྟི.
༨༡༤. ཨ་ནཱ་པ་ཏྟི དྭ་ངྒུ་ལ་པ་བྦ་པ་ར་མཾ ཨཱ་དི་ཡ་ཏི, ཨཱུ་ན་ཀ་དྭ་ངྒུ་ལ་པ་བྦ་པ་ར་མཾ ཨཱ་དི་ཡ་ཏི, ཨཱ་བཱ་དྷ་པ་ཙྩ་ཡཱ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
པ་ཉྩ་མ་སི་ཀྑཱ་པ་དཾ ནི་ཊྛི་ཏཾ.
༦. ཚ་ཊྛ་སི་ཀྑཱ་པ་དཾ
༨༡༥. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨཱ་རོ་ཧ་ནྟོ ནཱ་མ མ་ཧཱ་མ་ཏྟོ བྷི་ཀྑཱུ་སུ པ་བྦ་ཛི་ཏོ ཧོ་ཏི. ཏ་སྶ པུ་རཱ་ཎ་དུ་ཏི་ཡི་ཀཱ བྷི་ཀྑུ་ནཱི་སུ པ་བྦ་ཛི་ཏཱ ཧོ་ཏི. ཏེ་ན ཁོ པ་ན ས་མ་ཡེ་ན སོ བྷི་ཀྑུ ཏ་སྶཱ བྷི་ཀྑུ་ནི་ཡཱ ས་ནྟི་ཀེ བྷ་ཏྟ་ཝི་སྶ་གྒཾ ཀ་རོ་ཏི. ཨ་ཐ ཁོ སཱ བྷི་ཀྑུ་ནཱི ཏ་སྶ བྷི་ཀྑུ་ནོ བྷུ་ཉྫ་ནྟ་སྶ པཱ་ནཱི་ཡེ་ན ཙ ཝི་དྷཱུ་པ་ནེ་ན ཙ ཨུ་པ་ཏི་ཊྛི་ཏྭཱ ཨ་ཙྩཱ་ཝ་ད་ཏི. ཨ་ཐ ཁོ སོ བྷི་ཀྑུ ཏཾ བྷི་ཀྑུ་ནིཾ ཨ་པ་སཱ་དེ་ཏི – ‘‘མཱ, བྷ་གི་ནི, ཨེ་ཝ་རཱུ་པཾ ཨ་ཀཱ་སི. ནེ་ཏཾ ཀ་པྤ་ཏཱི’’ཏི. ‘‘པུ་བྦེ མཾ ཏྭཾ ཨེ་ཝ་ཉྩ ཨེ་ཝ་ཉྩ ཀ་རོ་སི, ཨི་དཱ་ནི ཨེ་ཏྟ་ཀཾ ན ས་ཧ་སཱི’’ཏི – པཱ་ནཱི་ཡ་ཐཱ་ལ་ཀཾ མ་ཏྠ་ཀེ ཨཱ་སུ་མྦྷི་ཏྭཱ ཝི་དྷཱུ་པ་ནེ་ན པ་ཧཱ་རཾ ཨ་དཱ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནཱི བྷི་ཀྑུ་སྶ པ་ཧཱ་རཾ ད་སྶ་ཏཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནཱི བྷི་ཀྑུ་སྶ པ་ཧཱ་རཾ ཨ་དཱ་སཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནཱི བྷི་ཀྑུ་སྶ པ་ཧཱ་རཾ ད་སྶ་ཏི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༡༦. ‘‘ཡཱ པ་ན བྷི་ཀྑུ་ནཱི བྷི་ཀྑུ་སྶ བྷུ་ཉྫ་ནྟ་སྶ པཱ་ནཱི་ཡེ་ན ཝཱ ཝི་དྷཱུ་པ་ནེ་ན ཝཱ ཨུ་པ་ཏི་ཊྛེ་ཡྻ, པཱ་ཙི་ཏྟི་ཡ’’ནྟི.
༨༡༧. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
བྷི་ཀྑུ་སྶཱཏི ཨུ་པ་ས་མྤ་ནྣ་སྶ.
བྷུ་ཉྫ་ནྟ་སྶཱཏི པ་ཉྩ་ནྣཾ བྷོ་ཛ་ནཱ་ནཾ ཨ་ཉྙ་ཏ་རཾ བྷོ་ཛ་ནཾ བྷུ་ཉྫ་ནྟ་སྶ.
པཱ་ནཱི་ཡཾ ནཱ་མ ཡཾ ཀི་ཉྩི པཱ་ནཱི་ཡཾ.
ཝི་དྷཱུ་པ་ནཾ ནཱ་མ ཡཱ ཀཱ་ཙི བཱི་ཛ་ནཱི.
ཨུ་པ་ཏི་ཊྛེ་ཡྻཱཏི ཧ་ཏྠ་པཱ་སེ ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༡༨. ཨུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱ པཱ་ནཱི་ཡེ་ན ཝཱ ཝི་དྷཱུ་པ་ནེ་ན ཝཱ ཨུ་པ་ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཝེ་མ་ཏི་ཀཱ པཱ་ནཱི་ཡེ་ན ཝཱ ཝི་དྷཱུ་པ་ནེ་ན ཝཱ ཨུ་པ་ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ. ཨུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱ པཱ་ནཱི་ཡེ་ན ཝཱ ཝི་དྷཱུ་པ་ནེ་ན ཝཱ ཨུ་པ་ཏི་ཊྛ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཧ་ཏྠ་པཱ་སཾ ཝི་ཛ་ཧི་ཏྭཱ ཨུ་པ་ཏི་ཊྛ་ཏི, ཨཱ་པ་ཏྟི དུ་ཀྐ་ཊ་སྶ. ཁཱ་ད་ནཱི་ཡཾ ཁཱ་ད་ནྟ་སྶ ཨུ་པ་ཏི་ཊྛ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣ་སྶ ཨུ་པ་ཏི་ཊྛ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ནུ་པ་ས་མྤ་ནྣེ ཨ་ནུ་པ་ས་མྤ་ནྣ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ.
༨༡༩. ཨ་ནཱ་པ་ཏྟི དེ་ཏི, དཱ་པེ་ཏི, ཨ་ནུ་པ་ས་མྤ་ནྣཾ ཨཱ་ཎཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཚ་ཊྛ་སི་ཀྑཱ་པ་དཾ ནི་ཊྛི་ཏཾ.
༧. ས་ཏྟ་མ་སི་ཀྑཱ་པ་དཾ
༨༢༠. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན བྷི་ཀྑུ་ནི་ཡོ ས་སྶ་ཀཱ་ལེ ཨཱ་མ་ཀ་དྷ་ཉྙཾ ཝི་ཉྙཱ་པེ་ཏྭཱ ན་ག་རཾ ཨ་ཏི་ཧ་ར་ནྟི དྭཱ་ར་ཊྛཱ་ནེ – ‘‘དེ་ཐཱ་ཡྻེ, བྷཱ་ག’’ནྟི. པ་ལི་བུ་ནྡྷེ་ཏྭཱ མུ་ཉྩིཾ་སུ. ཨ་ཐ ཁོ ཏཱ བྷི་ཀྑུ་ནི་ཡོ ཨུ་པ་སྶ་ཡཾ ག་ནྟྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་སུཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨཱ་མ་ཀ་དྷ་ཉྙཾ ཝི་ཉྙཱ་པེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨཱ་མ་ཀ་དྷ་ཉྙཾ ཝི་ཉྙཱ་པེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨཱ་མ་ཀ་དྷ་ཉྙཾ ཝི་ཉྙཱ་པེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༢༡. ‘‘ཡཱ པ་ན བྷི་ཀྑུ་ནཱི ཨཱ་མ་ཀ་དྷ་ཉྙཾ ཝི་ཉྙ་ཏྭཱ ཝཱ ཝི་ཉྙཱ་པེ་ཏྭཱ ཝཱ བྷ་ཛྫི་ཏྭཱ ཝཱ བྷ་ཛྫཱ་པེ་ཏྭཱ ཝཱ ཀོ་ཊྚེ་ཏྭཱ ཝཱ ཀོ་ཊྚཱ་པེ་ཏྭཱ ཝཱ པ་ཙི་ཏྭཱ ཝཱ པ་ཙཱ་པེ་ཏྭཱ ཝཱ བྷུ་ཉྫེ་ཡྻ, པཱ་ཙི་ཏྟི་ཡ’’ནྟི.
༨༢༢. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨཱ་མ་ཀ་དྷ་ཉྙཾ ནཱ་མ སཱ་ལི ཝཱི་ཧི ཡ་ཝོ གོ་དྷུ་མོ ཀ་ངྒུ ཝ་ར་ཀོ ཀུ་དྲུ་ས་ཀོ.
ཝི་ཉྙ་ཏྭཱཏི ས་ཡཾ ཝི་ཉྙ་ཏྭཱ. ཝི་ཉྙཱ་པེ་ཏྭཱཏི ཨ་ཉྙཾ ཝི་ཉྙཱ་པེ་ཏྭཱ.
བྷ་ཛྫི་ཏྭཱཏི ས་ཡཾ བྷ་ཛྫི་ཏྭཱ. བྷ་ཛྫཱ་པེ་ཏྭཱཏི ཨ་ཉྙཾ བྷ་ཛྫཱ་པེ་ཏྭཱ.
ཀོ་ཊྚེ་ཏྭཱཏི ས་ཡཾ ཀོ་ཊྚེ་ཏྭཱ. ཀོ་ཊྚཱ་པེ་ཏྭཱཏི ཨ་ཉྙཾ ཀོ་ཊྚཱ་པེ་ཏྭཱ.
པ་ཙི་ཏྭཱཏི ས་ཡཾ པ་ཙི་ཏྭཱ. པ་ཙཱ་པེ་ཏྭཱཏི ཨ་ཉྙཾ པ་ཙཱ་པེ་ཏྭཱ.
‘‘བྷུ་ཉྫི་སྶཱ་མཱི’’ཏི པ་ཊི་གྒ་ཎྷཱ་ཏི, ཨཱ་པ་ཏྟི དུ་ཀྐ་ཊ་སྶ. ཨ་ཛ྄ཛྷོ་ཧཱ་རེ ཨ་ཛ྄ཛྷོ་ཧཱ་རེ ཨཱ་པ་ཏྟི པཱ་ཙི་ཏྟི་ཡ་སྶ.
༨༢༣. ཨ་ནཱ་པ་ཏྟི ཨཱ་བཱ་དྷ་པ་ཙྩ་ཡཱ, ཨ་པ་ར་ཎྞཾ ཝི་ཉྙཱ་པེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ས་ཏྟ་མ་སི་ཀྑཱ་པ་དཾ ནི་ཊྛི་ཏཾ.
༨. ཨ་ཊྛ་མ་སི་ཀྑཱ་པ་དཾ
༨༢༤. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་རོ བྲཱ་ཧྨ་ཎོ ནི་བྦི་ཊྛ་རཱ་ཛ་བྷ་ཊོ ‘‘ཏ་ཉྙེ་ཝ བྷ་ཊ་པ་ཐཾ ཡཱ་ཙི་སྶཱ་མཱི’’ཏི སཱི་སཾ ན་ཧཱ་ཡི་ཏྭཱ བྷི་ཀྑུ་ནུ་པ་སྶ་ཡཾ ནི་སྶཱ་ཡ རཱ་ཛ་ཀུ་ལཾ ག་ཙྪ་ཏི. ཨ་ཉྙ་ཏ་རཱ བྷི་ཀྑུ་ནཱི ཀ་ཊཱ་ཧེ ཝ་ཙྩཾ ཀ་ཏྭཱ ཏི་རོ་ཀུ་ཊྚེ ཚ་ཌྜེ་ནྟཱི ཏ་སྶ བྲཱ་ཧྨ་ཎ་སྶ མ་ཏྠ་ཀེ ཨཱ་སུ་མྦྷི. ཨ་ཐ ཁོ སོ བྲཱ་ཧྨ་ཎོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཨ་སྶ་མ་ཎི་ཡོ ཨི་མཱ མུ་ཎྜཱ བ་ནྡྷ་ཀི་ནི་ཡོ. ཀ་ཐ་ཉྷི ནཱ་མ གཱུ་ཐ་ཀ་ཊཱ་ཧཾ མ་ཏྠ་ཀེ ཨཱ་སུ་མྦྷི་སྶ་ནྟི! ཨི་མཱ་སཾ ཨུ་པ་སྶ་ཡཾ ཛྷཱ་པེ་སྶཱ་མཱི’’ཏི! ཨུ་མྨུ་ཀཾ ག་ཧེ་ཏྭཱ ཨུ་པ་སྶ་ཡཾ པ་ཝི་ས་ཏི. ཨ་ཉྙ་ཏ་རོ ཨུ་པཱ་ས་ཀོ ཨུ་པ་སྶ་ཡཱ ནི་ཀྑ་མ་ནྟོ ཨ་དྡ་ས ཏཾ བྲཱ་ཧྨ་ཎཾ ཨུ་མྨུ་ཀཾ ག་ཧེ་ཏྭཱ ཨུ་པ་སྶ་ཡཾ པ་ཝི་ས་ནྟཾ. དི་སྭཱ་ན ཏཾ བྲཱ་ཧྨ་ཎཾ ཨེ་ཏ་ད་ཝོ་ཙ – ‘‘ཀི་སྶ ཏྭཾ, བྷོ, ཨུ་མྨུ་ཀཾ ག་ཧེ་ཏྭཱ ཨུ་པ་སྶ་ཡཾ པ་ཝི་ས་སཱི’’ཏི? ‘‘ཨི་མཱ མཾ, བྷོ, མུ་ཎྜཱ བ་ནྡྷ་ཀི་ནི་ཡོ གཱུ་ཐ་ཀ་ཊཱ་ཧཾ མ་ཏྠ་ཀེ ཨཱ་སུ་མྦྷིཾ་སུ. ཨི་མཱ་སཾ ཨུ་པ་སྶ་ཡཾ ཛྷཱ་པེ་སྶཱ་མཱི’’ཏི. ‘‘ག་ཙྪ, བྷོ བྲཱ་ཧྨ་ཎ, མ་ངྒ་ལཾ ཨེ་ཏཾ. ས་ཧ་སྶཾ ལ་ཙྪ་སི ཏ་ཉྩ བྷ་ཊ་པ་ཐ’’ནྟི. ཨ་ཐ ཁོ སོ བྲཱ་ཧྨ་ཎོ སཱི་སཾ ན་ཧཱ་ཡི་ཏྭཱ རཱ་ཛ་ཀུ་ལཾ ག་ནྟྭཱ ས་ཧ་སྶཾ ཨ་ལ་ཏྠ ཏ་ཉྩ བྷ་ཊ་པ་ཐཾ. ཨ་ཐ ཁོ སོ ཨུ་པཱ་ས་ཀོ ཨུ་པ་སྶ་ཡཾ པ་ཝི་སི་ཏྭཱ བྷི་ཀྑུ་ནཱི་ནཾ ཨེ་ཏ་མ་ཏྠཾ ཨཱ་རོ་ཙེ་ཏྭཱ པ་རི་བྷཱ་སི. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨུ་ཙྩཱ་རཾ ཏི་རོ་ཀུ་ཊྚེ ཚ་ཌྜེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨུ་ཙྩཱ་རཾ ཏི་རོ་ཀུ་ཊྚེ ཚ་ཌྜེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨུ་ཙྩཱ་རཾ ཏི་རོ་ཀུ་ཊྚེ ཚ་ཌྜེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༢༥. ‘‘ཡཱ པ་ན བྷི་ཀྑུ་ནཱི ཨུ་ཙྩཱ་རཾ ཝཱ པ་སྶཱ་ཝཾ ཝཱ ས་ངྐཱ་རཾ ཝཱ ཝི་གྷཱ་སཾ ཝཱ ཏི་རོ་ཀུ་ཊྚེ ཝཱ ཏི་རོ་པཱ་ཀཱ་རེ ཝཱ ཚ་ཌྜེ་ཡྻ ཝཱ ཚ་ཌྜཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༨༢༦. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨུ་ཙྩཱ་རོ ནཱ་མ གཱུ་ཐོ ཝུ་ཙྩ་ཏི. པ་སྶཱ་ཝོ ནཱ་མ མུ་ཏྟཾ ཝུ་ཙྩ་ཏི.
ས་ངྐཱ་རཾ ནཱ་མ ཀ་ཙ་ཝ་རཾ ཝུ་ཙྩ་ཏི.
ཝི་གྷཱ་སཾ ནཱ་མ ཙ་ལ་ཀཱ་ནི ཝཱ ཨ་ཊྛི་ཀཱ་ནི ཝཱ ཨུ་ཙྪི་ཊྛོ་ད་ཀཾ ཝཱ.
ཀུ་ཊྚོ ནཱ་མ ཏ་ཡོ ཀུ་ཊྚཱ – ཨི་ཊྛ་ཀཱ་ཀུ་ཊྚོ, སི་ལཱ་ཀུ་ཊྚོ, དཱ་རུ་ཀུ་ཊྚོ.
པཱ་ཀཱ་རོ ནཱ་མ ཏ་ཡོ པཱ་ཀཱ་རཱ – ཨི་ཊྛ་ཀཱ་པཱ་ཀཱ་རོ, སི་ལཱ་པཱ་ཀཱ་རོ, དཱ་རུ་པཱ་ཀཱ་རོ.
ཏི་རོ་ཀུ་ཊྚེཏི ཀུ་ཊྚ་སྶ པ་ར་ཏོ. ཏི་རོ་པཱ་ཀཱ་རེཏི པཱ་ཀཱ་ར་སྶ པ་ར་ཏོ.
ཚ་ཌྜེ་ཡྻཱཏི ས་ཡཾ ཚ་ཌྜེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཚ་ཌྜཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ས་ཀིཾ ཨཱ་ཎ་ཏྟཱ བ་ཧུ་ཀ་མྤི ཚ་ཌྜེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༢༧. ཨ་ནཱ་པ་ཏྟི ཨོ་ལོ་ཀེ་ཏྭཱ ཚ་ཌྜེ་ཏི, ཨ་ཝ་ལ༹་ཉྫེ ཚ་ཌྜེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ཨ་ཊྛ་མ་སི་ཀྑཱ་པ་དཾ ནི་ཊྛི་ཏཾ.
༩. ན་ཝ་མ་སི་ཀྑཱ་པ་དཾ
༨༢༨. ཏེ་ན ས་མ་ཡེ་ན བུ་དྡྷོ བྷ་ག་ཝཱ སཱ་ཝ་ཏྠི་ཡཾ ཝི་ཧ་ར་ཏི ཛེ་ཏ་ཝ་ནེ ཨ་ནཱ་ཐ་པི་ཎྜི་ཀ་སྶ ཨཱ་རཱ་མེ. ཏེ་ན ཁོ པ་ན ས་མ་ཡེ་ན ཨ་ཉྙ་ཏ་ར་སྶ བྲཱ་ཧྨ་ཎ་སྶ བྷི་ཀྑུ་ནཱུ་པ་སྶ་ཡཾ ནི་སྶཱ་ཡ ཡ་ཝ་ཁེ་ཏྟཾ ཧོ་ཏི. བྷི་ཀྑུ་ནི་ཡོ ཨུ་ཙྩཱ་ར་མྤི པ་སྶཱ་ཝ་མྤི ས་ངྐཱ་ར་མྤི ཝི་གྷཱ་ས་མྤི ཁེ་ཏྟེ ཚ་ཌྜེ་ནྟི. ཨ་ཐ ཁོ སོ བྲཱ་ཧྨ་ཎོ ཨུ་ཛ྄ཛྷཱ་ཡ་ཏི ཁི་ཡྻ་ཏི ཝི་པཱ་ཙེ་ཏི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨ་མྷཱ་ཀཾ ཡ་ཝ་ཁེ་ཏྟཾ དཱུ་སེ་སྶ་ནྟཱི’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏ་སྶ བྲཱ་ཧྨ་ཎ་སྶ ཨུ་ཛ྄ཛྷཱ་ཡ་ནྟ་སྶ ཁི་ཡྻ་ནྟ་སྶ ཝི་པཱ་ཙེ་ནྟ་སྶ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ཨུ་ཙྩཱ་ར་མྤི པ་སྶཱ་ཝ་མྤི ས་ངྐཱ་ར་མྤི ཝི་གྷཱ་ས་མྤི ཧ་རི་ཏེ ཚ་ཌྜེ་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, བྷི་ཀྑུ་ནི་ཡོ ཨུ་ཙྩཱ་ར་མྤི པ་སྶཱ་ཝ་མྤི ས་ངྐཱ་ར་མྤི ཝི་གྷཱ་ས་མྤི ཧ་རི་ཏེ ཚ་ཌྜེ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, བྷི་ཀྑུ་ནི་ཡོ ཨུ་ཙྩཱ་ར་མྤི པ་སྶཱ་ཝ་མྤི ས་ངྐཱ་ར་མྤི ཝི་གྷཱ་ས་མྤི ཧ་རི་ཏེ ཚ་ཌྜེ་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༢༩. ‘‘ཡཱ པ་ན བྷི་ཀྑུ་ནཱི ཨུ་ཙྩཱ་རཾ ཝཱ པ་སྶཱ་ཝཾ ཝཱ ས་ངྐཱ་རཾ ཝཱ ཝི་གྷཱ་སཾ ཝཱ ཧ་རི་ཏེ ཚ་ཌྜེ་ཡྻ ཝཱ ཚ་ཌྜཱ་པེ་ཡྻ ཝཱ, པཱ་ཙི་ཏྟི་ཡ’’ནྟི.
༨༣༠. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ཨུ་ཙྩཱ་རོ ནཱ་མ གཱུ་ཐོ ཝུ་ཙྩ་ཏི. པ་སྶཱ་ཝོ ནཱ་མ མུ་ཏྟཾ ཝུ་ཙྩ་ཏི.
ས་ངྐཱ་རཾ ནཱ་མ ཀ་ཙ་ཝ་རཾ ཝུ་ཙྩ་ཏི.
ཝི་གྷཱ་སཾ ནཱ་མ ཙ་ལ་ཀཱ་ནི ཝཱ ཨ་ཊྛི་ཀཱ་ནི ཝཱ ཨུ་ཙྪི་ཊྛོ་ད་ཀཾ ཝཱ.
ཧ་རི་ཏཾ ནཱ་མ པུ་བྦ་ཎྞཾ ཨ་པ་ར་ཎྞཾ ཡཾ མ་ནུ་སྶཱ་ནཾ ཨུ་པ་བྷོ་ག་པ་རི་བྷོ་གཾ རོ་པི་མཾ.
ཚ་ཌྜེ་ཡྻཱཏི ས་ཡཾ ཚ་ཌྜེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
ཚ་ཌྜཱ་པེ་ཡྻཱཏི ཨ་ཉྙཾ ཨཱ་ཎཱ་པེ་ཏི, ཨཱ་པ་ཏྟི དུ་ཀྐ་ཊ་སྶ. ས་ཀིཾ ཨཱ་ཎ་ཏྟཱ བ་ཧུ་ཀ་མྤི ཚ་ཌྜེ་ཏི, ཨཱ་པ་ཏྟི པཱ་ཙི་ཏྟི་ཡ་སྶ.
༨༣༡. ཧ་རི་ཏེ ཧ་རི་ཏ་ས་ཉྙཱ ཚ་ཌྜེ་ཏི ཝཱ ཚ་ཌྜཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཧ་རི་ཏེ ཝེ་མ་ཏི་ཀཱ ཚ་ཌྜེ་ཏི ཝཱ ཚ་ཌྜཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཧ་རི་ཏེ ཨ་ཧ་རི་ཏ་ས་ཉྙཱ ཚ་ཌྜེ་ཏི ཝཱ ཚ་ཌྜཱ་པེ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
ཨ་ཧ་རི་ཏེ ཧ་རི་ཏ་ས་ཉྙཱ, ཨཱ་པ་ཏྟི དུ་ཀྐ་ཊ་སྶ. ཨ་ཧ་རི་ཏེ ཝེ་མ་ཏི་ཀཱ, ཨཱ་པ་ཏྟི དུ་ཀྐ་ཊ་སྶ. ཨ་ཧ་རི་ཏེ ཨ་ཧ་རི་ཏ་ས་ཉྙཱ, ཨ་ནཱ་པ་ཏྟི.
༨༣༢. ཨ་ནཱ་པ་ཏྟི ཨོ་ལོ་ཀེ་ཏྭཱ ཚ་ཌྜེ་ཏི, ཁེ་ཏྟ་མ་རི་ཡཱ་དེ [ཚ་ཌྜི་ཏ་ཁེ་ཏྟེ (?) ཨ་ཊྛ་ཀ་ཐཱ ཨོ་ལོ་ཀེ་ཏ་བྦཱ] ཚ་ཌྜེ་ཏི སཱ་མི་ཀེ ཨཱ་པུ་ཙྪི་ཏྭཱ ཨ་པ་ལོ་ཀེ་ཏྭཱ ཚ་ཌྜེ་ཏི, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ན་ཝ་མ་སི་ཀྑཱ་པ་དཾ ནི་ཊྛི་ཏཾ.
༡༠. ད་ས་མ་སི་ཀྑཱ་པ་དཾ
༨༣༣. ཏེ་ན ས་མ་ཡེ་ན བུ་དྡྷོ བྷ་ག་ཝཱ རཱ་ཛ་ག་ཧེ ཝི་ཧ་ར་ཏི ཝེ་ལུ༹་ཝ་ནེ ཀ་ལ་ནྡ་ཀ་ནི་ཝཱ་པེ. ཏེ་ན ཁོ པ་ན ས་མ་ཡེ་ན རཱ་ཛ་ག་ཧེ གི་ར་གྒ་ས་མ་ཛྫོ ཧོ་ཏི. ཚ་བྦ་གྒི་ཡཱ བྷི་ཀྑུ་ནི་ཡོ གི་ར་གྒ་ས་མ་ཛྫཾ ད་སྶ་ནཱ་ཡ ཨ་ག་མཾ་སུ. མ་ནུ་སྶཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ བྷི་ཀྑུ་ནི་ཡོ ན་ཙྩ་མྤི གཱི་ཏ་མྤི ཝཱ་དི་ཏ་མྤི ད་སྶ་ནཱ་ཡ ག་ཙྪི་སྶ་ནྟི, སེ་ཡྻ་ཐཱ་པི གི་ཧི་ནི་ཡོ ཀཱ་མ་བྷོ་གི་ནི་ཡོ’’ཏི! ཨ་སྶོ་སུཾ ཁོ བྷི་ཀྑུ་ནི་ཡོ ཏེ་སཾ མ་ནུ་སྶཱ་ནཾ ཨུ་ཛ྄ཛྷཱ་ཡ་ནྟཱ་ནཾ ཁི་ཡྻ་ནྟཱ་ནཾ ཝི་པཱ་ཙེ་ནྟཱ་ནཾ. ཡཱ ཏཱ བྷི་ཀྑུ་ནི་ཡོ ཨ་པྤི་ཙྪཱ…པེ… ཏཱ ཨུ་ཛ྄ཛྷཱ་ཡ་ནྟི ཁི་ཡྻ་ནྟི ཝི་པཱ་ཙེ་ནྟི – ‘‘ཀ་ཐ་ཉྷི ནཱ་མ ཚ་བྦ་གྒི་ཡཱ བྷི་ཀྑུ་ནི་ཡོ ན་ཙྩ་མྤི གཱི་ཏ་མྤི ཝཱ་དི་ཏ་མྤི ད་སྶ་ནཱ་ཡ ག་ཙྪི་སྶ་ནྟཱི’’ཏི…པེ… ས་ཙྩཾ ཀི་ར, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ན་ཙྩ་མྤི གཱི་ཏ་མྤི ཝཱ་དི་ཏ་མྤི ད་སྶ་ནཱ་ཡ ག་ཙྪ་ནྟཱི་ཏི? ‘‘ས་ཙྩཾ, བྷ་ག་ཝཱ’’ཏི. ཝི་ག་ར་ཧི བུ་དྡྷོ བྷ་ག་ཝཱ…པེ… ཀ་ཐ་ཉྷི ནཱ་མ, བྷི་ཀྑ་ཝེ, ཚ་བྦ་གྒི་ཡཱ བྷི་ཀྑུ་ནི་ཡོ ན་ཙྩ་མྤི གཱི་ཏ་མྤི ཝཱ་དི་ཏ་མྤི ད་སྶ་ནཱ་ཡ ག་ཙྪི་སྶ་ནྟི! ནེ་ཏཾ, བྷི་ཀྑ་ཝེ, ཨ་པྤ་ས་ནྣཱ་ནཾ ཝཱ པ་སཱ་དཱ་ཡ…པེ… ཨེ་ཝ་ཉྩ པ་ན, བྷི་ཀྑ་ཝེ, བྷི་ཀྑུ་ནི་ཡོ ཨི་མཾ སི་ཀྑཱ་པ་དཾ ཨུ་དྡི་ས་ནྟུ –
༨༣༤. ‘‘ཡཱ པ་ན བྷི་ཀྑུ་ནཱི ན་ཙྩཾ ཝཱ གཱི་ཏཾ ཝཱ ཝཱ་དི་ཏཾ ཝཱ ད་སྶ་ནཱ་ཡ ག་ཙྪེ་ཡྻ, པཱ་ཙི་ཏྟི་ཡ’’ནྟི.
༨༣༥. ཡཱ པ་ནཱཏི ཡཱ ཡཱ་དི་སཱ…པེ… བྷི་ཀྑུ་ནཱིཏི…པེ… ཨ་ཡཾ ཨི་མ་སྨིཾ ཨ་ཏྠེ ཨ་དྷི་པྤེ་ཏཱ བྷི་ཀྑུ་ནཱི་ཏི.
ན་ཙྩཾ ནཱ་མ ཡཾ ཀི་ཉྩི ན་ཙྩཾ. གཱི་ཏཾ ནཱ་མ ཡཾ ཀི་ཉྩི གཱི་ཏཾ. ཝཱ་དི་ཏཾ ནཱ་མ ཡཾ ཀི་ཉྩི ཝཱ་དི་ཏཾ.
༨༣༦. ད་སྶ་ནཱ་ཡ ག་ཙྪ་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏཱ པ་སྶ་ཏི ཝཱ སུ་ཎཱ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ད་སྶ་ནཱུ་པ་ཙཱ་རཾ ཝི་ཛ་ཧི་ཏྭཱ པུ་ན་པྤུ་ནཾ པ་སྶ་ཏི ཝཱ སུ་ཎཱ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ཨེ་ཀ་མེ་ཀཾ ད་སྶ་ནཱ་ཡ ག་ཙྪ་ཏི, ཨཱ་པ་ཏྟི དུ་ཀྐ་ཊ་སྶ. ཡ་ཏྠ ཋི་ཏཱ པ་སྶ་ཏི ཝཱ སུ་ཎཱ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ. ད་སྶ་ནཱུ་པ་ཙཱ་རཾ ཝི་ཛ་ཧི་ཏྭཱ པུ་ན་པྤུ་ནཾ པ་སྶ་ཏི ཝཱ སུ་ཎཱ་ཏི ཝཱ, ཨཱ་པ་ཏྟི པཱ་ཙི་ཏྟི་ཡ་སྶ.
༨༣༧. ཨ་ནཱ་པ་ཏྟི ཨཱ་རཱ་མེ ཋི་ཏཱ པ་སྶ་ཏི ཝཱ སུ་ཎཱ་ཏི ཝཱ, བྷི་ཀྑུ་ནི་ཡཱ ཋི་ཏོ་ཀཱ་སཾ ཝཱ ནི་སི་ནྣོ་ཀཱ་སཾ ཝཱ ནི་པ་ནྣོ་ཀཱ་སཾ ཝཱ ཨཱ་ག་ནྟྭཱ ན་ཙྩ་ནྟི ཝཱ གཱ་ཡ་ནྟི ཝཱ ཝཱ་དེ་ནྟི ཝཱ, པ་ཊི་པ་ཐཾ ག་ཙྪ་ནྟཱི པ་སྶ་ཏི ཝཱ སུ་ཎཱ་ཏི ཝཱ, ས་ཏི ཀ་ར་ཎཱི་ཡེ ག་ནྟྭཱ པ་སྶ་ཏི ཝཱ སུ་ཎཱ་ཏི ཝཱ, ཨཱ་པ་དཱ་སུ, ཨུ་མྨ་ཏྟི་ཀཱ་ཡ, ཨཱ་དི་ཀ་མྨི་ཀཱ་ཡཱ་ཏི.
ད་ས་མ་སི་ཀྑཱ་པ་དཾ ནི་ཊྛི་ཏཾ.
ལ་སུ་ཎ་ཝ་གྒོ པ་ཋ་མོ.