ཏི་པུ་ཀྑ་ལ་ན་ཡ་ཝ་ཎྞ་ནཱ

ཨཱ་གྷཱ་ཏཱ་དཱི་ན་མ་ཀ་ར་ཎ་ཝ་ཙ་ནེ་ན ཨ་དོ་ས་སི་དྡྷི, ཏ་ཐཱ པཱ་ཎཱ་ཏི་པཱ་ཏ་ཕ་རུ་ས་ཝཱ་ཙཱ་ཧི པ་ཊི་ཝི་ར་ཏི་ཝ་ཙ་ནེ་ནཱ་པི. ཨཱ་ན་ནྡཱ་དཱི་ན་མ་ཀ་ར་ཎ་ཝ་ཙ་ནེ་ན པ་ན ཨ་ལོ་བྷ་སི་དྡྷི, ཏ་ཐཱ ཨ་བྲ་ཧྨ་ཙ་རི་ཡ་ཏོ པ་ཊི་ཝི་ར་ཏི་ཝ་ཙ་ནེ་ནཱ་པི. ཨ་དི་ནྣཱ་དཱ་ནཱ་དཱི་ཧི པ་ན པ་ཊི་ཝི་ར་ཏི་ཝ་ཙ་ནེ་ན ཏ་དུ་བྷ་ཡ་སི་དྡྷི. ‘‘ཏ་ཡི་དཾ བྷི་ཀྑ་ཝེ, ཏ་ཐཱ་ག་ཏོ པ་ཛཱ་ནཱ་ཏཱི’’ཏི་ཨཱ་དི་ནཱ ཨ་མོ་ཧ་སི་དྡྷི. ཨི་ཏི ཏཱི་ཧི ཨ་ཀུ་ས་ལ་མཱུ་ལེ་ཧི ག་ཧི་ཏེ་ཧི ཏ་པྤ་ཊི་པ་ཀྑ་ཏོ ཨཱ་གྷཱ་ཏཱ་དཱི་ན་མ་ཀ་ར་ཎ་ཝ་ཙ་ནེ་ན ཙ ཏཱི་ཎི ཀུ་ས་ལ་མཱུ་ལཱ་ནི སི་དྡྷཱ་ནི་ཡེ་ཝ ཧོ་ནྟི. ཏ་ཏྠ ཏཱི་ཧི ཨ་ཀུ་ས་ལ་མཱུ་ལེ་ཧི ཏི་ཝི་དྷ་དུ་ཙྩ་རི་ཏ་སཾ་ཀི་ལེ་ས་མ་ལ་ཝི་ས་མཱ་ཀུ་ས་ལ་ས་ཉྙཱ་ཝི་ཏ་ཀྐ་པ་ཉྩཱ་དི་ཝ་སེ་ན ས་བྦོ་པི ཨ་ཀུ་ས་ལ་པ་ཀྑོ ཝི་ཏྠཱ་རེ་ཏ་བྦོ. ཏ་ཐཱ ཏཱི་ཧི ཀུ་ས་ལ་མཱུ་ལེ་ཧི ཏི་ཝི་དྷ་སུ་ཙ་རི་ཏ་ཝོ་དཱ་ན་ས་མ་ཀུ་ས་ལ་ས་ཉྙཱ་ཝི་ཏ་ཀྐ་པ་ཉྙཱ་ས་དྡྷ་མྨ་ས་མཱ་དྷི- ཝི་མོ་ཀྑ་མུ་ཁ་ཝི་མོ་ཀྑཱ་དི་ཝ་སེ་ན ས་བྦོ་པི ཀུ་ས་ལ་པ་ཀྑོ ཝི་བྷཱ་ཝེ་ཏ་བྦོ.

ཨེ་ཏྠ ཙཱ་ཡཾ ས་ཙྩ་ཡོ་ཛ་ནཱ – ལོ་བྷོ ས་མུ་ད་ཡ་ས་ཙྩཾ, ས་བྦཱ་ནི ཝཱ ཀུ་ས་ལཱ་ཀུ་ས་ལ་མཱུ་ལཱ་ནི, ཏེ་ཧི པ་ན ནི་བྦ་ཏྟཱ ཏེ་ས་མ་དྷི་ཊྛཱ་ན་གོ་ཙ་ར་བྷཱུ་ཏཱ ཨུ་པཱ་དཱ་ན་ཀྑ་ནྡྷཱ དུ་ཀྑ་ས་ཙྩཾ, ཏེ་ས་མ་པྤ་ཝ་ཏྟི ནི་རོ་དྷ་ས་ཙྩཾ, ནི་རོ་དྷ་པ་ཛཱ་ན་ནཱ ཝི་མོ་ཀྑཱ་དི་ཀཱ མ་གྒ་ས་ཙྩནྟི. ཨ་ཡཾ ཨ་ཀུ་ས་ལ་མཱུ་ལེ་ཧི སཾ་ཀི་ལེ་ས་པ་ཀྑཾ, ཀུ་ས་ལ་མཱུ་ལེ་ཧི ཙ ཝོ་དཱ་ན་པ་ཀྑཾ ཙ་ཏུ་ས་ཙྩ་ཡོ་ཛ་ན་མུ་ཁེ་ན ན་ཡ་ན་ལ་ཀྑ་ཎ་སྶ ཏི་པུ་ཀྑ་ལ་ན་ཡ་སྶ བྷཱུ་མི. ཏ་ཐཱ ཧི ཝུ་ཏྟཾ –

‘‘ཡོ ཨ་ཀུ་ས་ལེ ས་མཱུ་ལེ་ཧི,

ནེ་ཏི ཀུ་ས་ལེ ཙ ཀུ་ས་ལ་མཱུ་ལེ་ཧཱི’’ཏི་ཨཱ་དི. (ནེ་ཏྟི. ༤.༡༨);