སཱི་ཧ་ཝི་ཀྐཱི་ལི༹་ཏ་ན་ཡ་ཝ་ཎྞ་ནཱ
ཨཱ་གྷཱ་ཏཱ་ན་ནྡཱ་དཱི་ན་མ་ཀ་ར་ཎ-ཝ་ཙ་ནེ་ན ས་ཏི་སི་དྡྷི. མི་ཙྪཱ་ཛཱི་ཝཱ་པ་ཊི་ཝི་ར་ཏི་ཝ་ཙ་ནེ་ན ཝཱི་རི་ཡ་སི་དྡྷི. ཝཱི་རི་ཡེ་ན ཧི ཀཱ་མ་བྱཱ་པཱ་ད་ཝི་ཧིཾ་སཱ་ཝི་ཏ་ཀྐེ ཝི་ནོ་དེ་ཏི, ཝཱི་རི་ཡ་སཱ་དྷ་ན་ཉྩ ཨཱ་ཛཱི་ཝ་པཱ་རི་སུ་དྡྷི་སཱི་ལ་ནྟི. པཱ་ཎཱ་ཏི་པཱ་ཏཱ་དཱི་ཧི པ་ཊི་ཝི་ར་ཏི་ཝ་ཙ་ནེ་ན ས་ཏི་སི་དྡྷི. ས་ཏི་ཡཱ ཧི སཱ་ཝ་ཛྫཱ་ན་ཝ་ཛྫོ དི་ཊྛོ ཧོ་ཏི. ཏ་ཏྠ ཙ ཨཱ་དཱི་ན་ཝཱ་ནི་སཾ་སེ ས་ལླ་ཀྑེ་ཏྭཱ སཱ་ཝ་ཛྫཾ པ་ཧཱ་ཡ ཨ་ན་ཝ་ཛྫཾ ས་མཱ་དཱ་ཡ ཝ་ཏྟ་ཏི. ཏ་ཐཱ ཧི སཱ ‘‘ནི་ཡྻཱ་ཏ་ན་པ་ཙྩུ་པ་ཊྛཱ་ནཱ’’ཏི ཝུ་ཙྩ་ཏི. ‘‘ཏ་ཡི་དཾ བྷི་ཀྑ་ཝེ, ཏ་ཐཱ་ག་ཏོ པ་ཛཱ་ནཱ་ཏཱི’’ཏི་ཨཱ་དི་ནཱ ས་མཱ་དྷི་པ་ཉྙཱ་སི་དྡྷི. པ་ཉྙ་ཝཱ ཧི ཡ་ཐཱ་བྷཱུ་ཏཱ་ཝ་བོ་དྷོ ས་མཱ་ཧི་ཏོ ཙ ཡ་ཐཱ་བྷཱུ་ཏཾ པ་ཛཱ་ནཱ་ཏཱི་ཏི.
ཏ་ཐཱ ‘‘ནི་ཙྩོ དྷུ་ཝོ’’ཏི་ཨཱ་དི་ནཱ ཨ་ནི་ཙྩེ ‘‘ནི་ཙྩ’’ནྟི ཝི་པ་ལླཱ་སོ, ‘‘ཨ་རོ་གོ པ་རཾ མ་ར་ཎཱ, ཨེ་ཀ་ནྟ་སུ་ཁཱི ཨ་ཏྟཱ, དི་ཊྛ་དྷ་མྨ་ནི་བྦཱ་ན་པྤ་ཏྟོ’’ཏི ཙ ཨེ་ཝ་མཱ་དཱི་ཧི ཨ་སུ་ཁེ ‘‘སུ་ཁ’’ནྟི ཝི་པ་ལླཱ་སོ. ‘‘པ་ཉྩ་ཧི ཀཱ་མ་གུ་ཎེ་ཧི ས་མ་པྤི་ཏོ’’ཏི་ཨཱ་དི་ནཱ ཨ་སུ་བྷེ ‘‘སུ་བྷ’’ནྟི ཝི་པ་ལླཱ་སོ. ས་བྦེ་ཧེ་ཝ དི་ཊྛི་པྤ་ཀཱ་ས་ན་པ་དེ་ཧི ཨ་ན་ཏྟ་ནི ‘‘ཨ་ཏྟཱ’’ཏི ཝི་པ་ལླཱ་སོ་ཏི ཨེ་ཝ་མེ་ཏྠ ཙ་ཏྟཱ་རོ ཝི་པ་ལླཱ་སཱ སི་དྡྷཱ ཧོ་ནྟི, ཏེ་སཾ པ་ཊི་པ་ཀྑ་ཏོ ཙ་ཏྟཱ་རི ས་ཏི་པ་ཊྛཱ་ནཱ་ནི སི་དྡྷཱ་ནེ་ཝ. ཏ་ཏྠ ཙ་ཏཱུ་ཧི ཡ་ཐཱ་ཝུ་ཏྟེ་ཧི ཨི་ནྡྲི་ཡེ་ཧི ཙ་ཏྟཱ་རོ པུ་གྒ་ལཱ ནི་དྡི་སི་ཏ་བྦཱ. ཀ་ཐཾ དུ་ཝི་དྷོ ཧི ཏ་ཎྷཱ་ཙ་རི་ཏོ མུ་དི་ནྡྲི་ཡོ ཏི་ཀྑི་ནྡྲི་ཡོ་ཏི, ཏ་ཐཱ དི་ཊྛི་ཙ་རི་ཏོ་པི. ཏེ་སུ པ་ཋ་མོ ཨ་སུ་བྷེ ‘‘སུ་བྷ’’ནྟི ཝི་པ་ལླ་ཏྠ་དི་ཊྛི་ཀོ ས་ཏི་བ་ལེ་ན ཡ་ཐཱ་བྷཱུ་ཏཾ ཀཱ་ཡ་ས་བྷཱ་ཝཾ ས་ལླ་ཀྑེ་ཏྭཱ ས་མྨ་ཏྟ་ནི་ཡཱ་མཾ ཨོ་ཀྐ་མ་ཏི. དུ་ཏི་ཡོ ཨ་སུ་ཁེ ‘‘སུ་ཁ’’ནྟི ཝི་པ་ལླ་ཏྠ་དི་ཊྛི་ཀོ ‘‘ཨུ་པྤ་ནྣཾ ཀཱ་མ་ཝི་ཏ་ཀྐཾ ནཱ་དྷི་ཝཱ་སེ་ཏཱི’’ཏི་ཨཱ་དི་ནཱ (མ. ནི. ༡.༢༦; ཨ. ནི. ༤.༡༤; ༦.༥༨) ཝུ་ཏྟེ་ན ཝཱི་རི་ཡ་སཾ་ཝ་ར་ས་ངྑཱ་ཏེ་ན ཝཱི་རི་ཡ་བ་ལེ་ན ཏཾ ཝི་པ་ལླཱ་སཾ ཝི་དྷ་མ་ཏི. ཏ་ཏི་ཡོ ཨ་ནི་ཙྩེ ‘‘ནི་ཙྩ’’ནྟི ཝི་པ་ལླ་ཏྠ་དི་ཊྛི་ཀོ ས་མཱ་དྷི་བ་ལེ་ན ས་མཱ་ཧི་ཏ་བྷཱ་ཝ་ཏོ ས་ངྑཱ་རཱ་ནཾ ཁ་ཎི་ཀ་བྷཱ་ཝཾ ཡ་ཐཱ་བྷཱུ་ཏཾ པ་ཊི་ཝི་ཛ྄ཛྷ་ཏི. ཙ་ཏུ་ཏྠོ ས་ནྟ་ཏི་ས་མཱུ་ཧ་ཀི་ཙྩཱ་ར་མྨ་ཎ་གྷ་ན་ཝི་ཙི་ཏྟ་ཏྟཱ ཕ་སྶཱ་དི་དྷ་མྨ་པུ་ཉྫ་མ་ཏྟེ ཨ་ན་ཏྟ་ནི ‘‘ཨ་ཏྟཱ’’ཏི ཝི་པ་ལླ་ཏྠ་དི་ཊྛི་ཀོ ཙ་ཏུ་ཀོ་ཊི་ཀ་སུ་ཉྙ་ཏཱ་མ་ན་སི་ཀཱ་རེ་ན ཏཾ མི་ཙྪཱ་བྷི་ནི་ཝེ་སཾ ཝི་དྡྷཾ་སེ་ཏི. ཙ་ཏཱུ་ཧི ཙེ་ཏྠ ཝི་པ་ལླཱ་སེ་ཧི ཙ་ཏུ་རཱ་ས་ཝོ་གྷ་ཡོ་ག་ག་ནྠ་ཨ་ག་ཏི་ཏ་ཎྷུ་པྤཱ་དུ་པཱ་དཱ་ན་ས་ཏྟ་ཝི་ཉྙཱ་ཎ་ཊྛི་ཏི་ཨ་པ་རི་ཉྙཱ་དི་ཝ་སེ་ན ས་བྦོ་པི ཨ་ཀུ་ས་ལ་པ་ཀྑོ ནེ་ཏ་བྦོ. ཏ་ཐཱ ཙ་ཏཱུ་ཧི ས་ཏི་པ་ཊྛཱ་ནེ་ཧི ཙ་ཏུ་བྦི་དྷ་ཛྷཱ་ན་ཝི་ཧཱ་རཱ་དྷི་ཊྛཱ་ན་སུ་ཁ་བྷཱ་གི་ཡ་དྷ་མྨ་ཨ་པྤ་མ་ཉྙཱ་ས་མྨ་པྤ་དྷཱ་ན་ཨི་དྡྷི་པཱ་དཱ་དི་ཝ་སེ་ན ས་བྦོ་པི ཝོ་དཱ་ན་པ་ཀྑོ ནེ་ཏ་བྦོ.
ཨེ་ཏྠ ཙཱ་ཡཾ ས་ཙྩ་ཡོ་ཛ་ནཱ – སུ་བྷ་ས་ཉྙཱ་སུ་ཁ་ས་ཉྙཱ་ཧི, ཙ་ཏཱུ་ཧི་པི ཝཱ ཝི་པ་ལླཱ་སེ་ཧི ས་མུ་ད་ཡ་ས་ཙྩཾ, ཏེ་ས་མ་དྷི་ཊྛཱ་ནཱ་ར་མྨ་ཎ་བྷཱུ་ཏཱ པ་ཉྩུ་པཱ་དཱ་ན་ཀྑ་ནྡྷཱ དུ་ཀྑ་ས་ཙྩཾ, ཏེ་ས་མ་པྤ་ཝ་ཏྟི ནི་རོ་དྷ་ས་ཙྩཾ, ནི་རོ་དྷ་པ་ཛཱ་ན་ནཱ ས་ཏི་པ་ཊྛཱ་ནཱ་དི་ཀཱ མ་གྒ་ས་ཙྩནྟི. ཨ་ཡཾ ཝི་པ་ལླཱ་སེ་ཧི སཾ་ཀི་ལེ་ས་པ་ཀྑཾ, ས་དྡྷི་ནྡྲི་ཡཱ་དཱི་ཧི ཝོ་དཱ་ན་པ་ཀྑཾ ཙ་ཏུ་ས་ཙྩ་ཡོ་ཛ་ན་མུ་ཁེ་ན ན་ཡ་ན་ལ་ཀྑ་ཎ་སྶ སཱི་ཧ་ཝི་ཀྐཱི་ལི༹་ཏ་ན་ཡ་སྶ བྷཱུ་མི, ཡ་ཐཱ་ཧ ‘‘ཡོ ནེ་ཏི ཝི་པ་ལླཱ་སེ་ཧི, ཀི་ལེ་སེ ཨི་ནྡྲི་ཡེ་ཧི ས་དྡྷ་མྨེ’’ཏི་ཨཱ་དི (ནེ་ཏྟི. ༤.༡༩).