པ་རི་ཀྑཱ་ར་ཧཱ་ར་ཝ་ཎྞ་ནཱ

ཨཱ་གྷཱ་ཏཱ་དཱི་ནཾ ‘‘ཨ་ན་ཏྠཾ མེ ཨ་ཙ་རཱི’’ཏི་ཨཱ་དཱི་ནི (དྷ. ས. ༡༢༣༧; ཝི་བྷ. ༩༠༩) ཨེ་ཀཱུ་ན་ཝཱི་ས་ཏི ཨཱ་གྷཱ་ཏ་ཝ་ཏྠཱུ་ནི ཧེ་ཏུ. ཨཱ་ན་ནྡཱ་དཱི་ནཾ ཨཱ་ར་མྨ་ཎཱ་བྷི་སི་ནེ་ཧོ ཧེ་ཏུ. སཱི་ལ་སྶ ཧི་རི་ཨོ་ཏྟ་པྤཾ, ཨ་པྤི་ཙྪ་ཏཱ་ད་ཡོ ཙ ཧེ་ཏུ. ‘‘ག་མྦྷཱི་རཱ’’ཏི་ཨཱ་དི་ནཱ ཝུ་ཏྟ་དྷ་མྨ་སྶ ས་བྦཱ་པི པཱ་ར་མི་ཡོ ཧེ་ཏུ. ཝི་སེ་སེ་ན པ་ཉྙཱ་པཱ་ར་མཱི. དི་ཊྛཱི་ནཾ ཨ་ས་པྤུ་རི་སཱུ་པ་ནི་སྶ་ཡོ, ཨ་ས་དྡྷ་མྨ་སྶ་ཝ་ནཾ མི་ཙྪཱ་བྷི་ནི་ཝེ་སེ་ན ཨ་ཡོ་ནི་སོ་མ་ན་སི་ཀཱ་རོ ཙ ཨ་ཝི་སེ་སེ་ན ཧེ་ཏུ. ཝི་སེ་སེ་ན པ་ན ས་སྶ་ཏ་ཝཱ་དཱ་དཱི་ནཾ ཨ་ཏཱི་ཏ་ཛཱ་ཏི་ཨ་ནུ་སྶ་ར་ཎཱ་དི ཧེ་ཏུ. ཝེ་ད་ནཱ་ནཾ ཨ་ཝི་ཛྫཱ, ཏ་ཎྷཱ, ཀ་མྨཱ་དི་ཕ་སྶོ ཙ ཧེ་ཏུ. ཨ་ནུ་པཱ་དཱ་ཝི་མུ་ཏྟི་ཡཱ ཨ་རི་ཡ་མ་གྒོ ཧེ་ཏུ. ཨ་ཉྙཱ་ཎ་སྶ ཨ་ཡོ་ནི་སོ་མ་ན་སི་ཀཱ་རོ ཧེ་ཏུ. ཏ་ཎྷཱ་ཡ སཾ་ཡོ་ཛ་ནི་ཡེ་སུ ཨ་སྶཱ་དཱ་ནུ་པ་སྶ་ནཱ ཧེ་ཏུ. ཕ་སྶ་སྶ ས་ལཱ༹་ཡ་ཏ་ནཱ་ནི ཧེ་ཏུ. ས་ལཱ༹་ཡ་ཏ་ན་སྶ ནཱ་མ་རཱུ་པཾ ཧེ་ཏུ. བྷ་ཝ་ནེ་ཏྟི་ས་མུ་ཙྪེ་ད་སྶ ཝི་སུ་དྡྷི་བྷཱ་ཝ་ནཱ ཧེ་ཏཱུ་ཏི ཨ་ཡཾ པ་རི་ཀྑཱ་ར་ས་ངྑཱ་ཏེ ཧེ་ཏུ་པ་ཙྩ་ཡེ ནི་དྡྷཱ་རེ་ཏྭཱ སཾ་ཝ་ཎྞ་ནཱ་ལ་ཀྑ་ཎོ པ་རི་ཀྑཱ་ར་ཧཱ་རོ ནཱ་མ, ཏེ་ན ཝུ་ཏྟཾ ‘‘ཡེ དྷ་མྨཱ ཡཾ དྷ་མྨཾ, ཛ་ན་ཡ་ནྟི་པྤ་ཙྩ་ཡཱ པ་ར་མྤ་ར་ཏོ’’ཏི་ཨཱ་དི.