ཨ་དྷི་ཊྛཱ་ན་ཧཱ་ར་ཝ་ཎྞ་ནཱ

‘‘ཨ་ཝ་ཎྞ’’ནྟི སཱ་མ་ཉྙ་ཏོ ཨ་དྷི་ཊྛཱ་ནཾ. ཏ་མ་ཝི་ཀ་པྤེ་ཏྭཱ ཝི་སེ་ས་ཝ་ཙ་ནཾ ‘‘མ་མཾ ཝཱ’’ཏི. དྷ་མྨ་སྶ ཝཱ ས་ངྒྷ་སྶ ཝཱ་ཏི པ་ཀྑེ་པི ཨེ་ས ན་ཡོ. ཏ་ཐཱ ‘‘སཱི་ལ’’ནྟི སཱ་མ་ཉྙ་ཏོ ཨ་དྷི་ཊྛཱ་ནཾ. ཏ་མ་ཝི་ཀ་པྤེ་ཏྭཱ ཝི་སེ་ས་ཝ་ཙ་ནཾ ‘‘པཱ་ཎཱ་ཏི་པཱ་ཏཱ པ་ཊི་ཝི་ར་ཏོ’’ཏི་ཨཱ་དི. ‘‘ཨ་ཉྙེ་ཝ དྷ་མྨཱ’’ཏི་ཨཱ་དི སཱ་མ་ཉྙ་ཏོ ཨ་དྷི་ཊྛཱ་ནཾ, ཏ་མ་ཝི་ཀ་པྤེ་ཏྭཱ ཝི་སེ་ས་ཝ་ཙ་ནཾ ‘‘ཏ་ཡི་དཾ བྷི་ཀྑ་ཝེ, ཏ་ཐཱ་ག་ཏོ པ་ཛཱ་ནཱ་ཏཱི’’ཏི་ཨཱ་དི, ཏ་ཐཱ ‘‘པུ་བྦ་ནྟ་ཀ་པྤི་ཀཱ’’ཏི་ཨཱ་དི སཱ་མ་ཉྙ་ཏོ ཨ་དྷི་ཊྛཱ་ནཾ. ཏ་མ་ཝི་ཀ་པྤེ་ཏྭཱ ཝི་སེ་ས་ཝ་ཙ་ནཾ ‘‘ས་སྶ་ཏ་ཝཱ་དཱ’’ཏི་ཨཱ་དི. ཨི་མི་ནཱ ན་ཡེ་ན ས་བྦ་ཏྠ ཡ་ཐཱ་དེ་སི་ཏ་མེ་ཝ སཱ་མ་ཉྙ་ཝི་སེ་སཱ ནི་དྡྷཱ་རེ་ཏ་བྦཱ. ཨ་ཡཾ སུ་ཏྟཱ་ག་ཏཱ་ནཾ དྷ་མྨཱ་ནཾ ཨ་ཝི་ཀ་པྤ་ནཱ་ཝ་སེ་ན ཡ་ཐཱ་དེ་སི་ཏ་མེ་ཝ སཱ་མ་ཉྙ་ཝི་སེ་ས་ནི་དྡྷཱ་ར་ཎ་ལ་ཀྑ་ཎོ ཨ་དྷི་ཊྛཱ་ན་ཧཱ་རོ ནཱ་མ, ཡ་ཐཱ་ཧ ‘‘ཨེ་ཀ་ཏྟ་ཏཱ་ཡ དྷ་མྨཱ, ཡེ་པི ཙ ཝེ་མ་ཏྟ་ཏཱ་ཡ ནི་དྡི་ཊྛཱ’’ཏི་ཨཱ་དི (ནེ་ཏྟི. ༤.༡༤).