པ་རི་ཝ་ཏྟ་ན་ཧཱ་ར་ཝ་ཎྞ་ནཱ
ཨཱ་གྷཱ་ཏཱ་དཱི་ན་མ་ཀ་ར་ཎཾ ཁ་ནྟི་སོ་ར་ཙྩཱ་ནི ཨ་ནུ་བྲཱུ་ཧེ་ཏྭཱ པ་ཊི་ས་ངྑཱ་ན་བྷཱ་ཝ་ནཱ་བ་ལ་སི་དྡྷི་ཡཱ ཨུ་བྷ་ཡ་ཧི་ཏ་པ་ཊི་པ་ཏྟི་མཱ་ཝ་ཧ་ཏི. ཨཱ་གྷཱ་ཏཱ་ད་ཡོ པ་ན པ་ཝ་ཏྟི་ཡ་མཱ་ནཱ དུ་བྦ་ཎྞ་ཏཾ, དུ་ཀྑ་སེ་ཡྻཾ, བྷོ་ག་ཧཱ་ནིཾ, ཨ་ཀི་ཏྟིཾ, པ་རེ་ཧི དུ་རུ་པ་ས་ངྐ་མ་ན་ཏ་ཉྩ ནི་པྥཱ་དེ་ནྟཱ ནི་ར་ཡཱ་དཱི་སུ མ་ཧཱ་དུ་ཀྑ་མཱ་ཝ་ཧ་ནྟི. པཱ་ཎཱ་ཏི་པཱ་ཏཱ་དི་པ་ཊི་ཝི་ར་ཏི ཨ་ཝི་པྤ་ཊི་སཱ་རཱ་དི་ཀ་ལྱཱ་ཎཾ པ་ར་མྤ་ར་མཱ་ཝ་ཧ་ཏི. པཱ་ཎཱ་ཏི་པཱ་ཏཱ་དི པ་ན ཝི་པྤ་ཊི་སཱ་རཱ་དི་ཨ་ཀ་ལྱཱ་ཎཾ པ་ར་མྤ་ར་མཱ་ཝ་ཧ་ཏི. ག་མྦྷཱི་ར་ཏཱ་དི་ཝི་སེ་ས་ཡུ་ཏྟཾ ཉཱ་ཎཾ ཝེ་ནེ་ཡྻཱ་ནཾ ཡ་ཐཱ་ར་ཧཾ ཝི་ཛྫཱ་བྷི་ཉྙཱ་དི་གུ་ཎ་ཝི་སེ་ས་མཱ་ཝ་ཧ་ཏི ས་བྦ་ཉྙེ་ཡྻ་སྶ ཡ་ཐཱ་ས་བྷཱ་ཝཱ་ཝ་བོ་དྷ་ཏོ. ཏ་ཐཱ ག་མྦྷཱི་ར་ཏཱ་དི་ཝི་སེ་ས་ར་ཧི་ཏཾ པ་ན ཉཱ་ཎཾ ཉེ་ཡྻེ་སུ སཱ་དྷཱ་ར་ཎ་བྷཱ་ཝ་ཏོ ཡ་ཐཱ་ཝུ་ཏྟ་གུ་ཎ་ཝི་སེ་སཾ ནཱ་ཝ་ཧ་ཏི. ས་བྦཱ་པི ཙེ་ཏཱ དི་ཊྛི་ཡོ ཡ་ཐཱ་ར་ཧཾ ས་སྶ་ཏུ་ཙྪེ་ད་བྷཱ་ཝ་ཏོ ཨ་ནྟ་དྭ་ཡ་བྷཱུ་ཏཱ ས་ཀྐཱ་ཡ་ཏཱི་རཾ ནཱ་ཏི་ཝ་ཏྟ་ནྟི ཨ་ནི་ཡྻཱ་ནི་ཀ་ས་བྷཱ་ཝ་ཏྟཱ. ས་མྨཱ་དི་ཊྛི པ་ན ས་པ་རི་ཀྑཱ་རཱ མ་ཛ྄ཛྷི་མ་པ་ཊི་པ་དཱ་བྷཱུ་ཏཱ ས་ཀྐཱ་ཡ་ཏཱི་ར་མ་ཏི་ཀྐ་མྨ པཱ་རཾ ག་ཙྪ་ཏི ནི་ཡྻཱ་ནི་ཀ་ས་བྷཱ་ཝ་ཏྟཱ. ཝེ་ད་ནཱ་ནཾ ཡ་ཐཱ་བྷཱུ་ཏཾ ས་མུ་ད་ཡཱ་དི་པ་ཊི་ཝེ་དྷ་ནཱ ཨ་ནུ་པཱ་དཱ་ཝི་མུ་ཏྟི་མཱ་ཝ་ཧ་ཏི མ་གྒ་བྷཱ་ཝ་ཏོ. ཝེ་ད་ནཱ་ནཾ ཡ་ཐཱ་བྷཱུ་ཏཾ ས་མུ་ད་ཡཱ་དི་ཨ་ས་མྤ་ཊི་ཝེ་དྷོ སཾ་སཱ་ར་ཙཱ་ར་ཀཱ་ཝ་རོ་དྷ་མཱ་ཝ་ཧ་ཏི ས་ངྑཱ་རཱ་ནཾ པ་ཙྩ་ཡ་བྷཱ་ཝ་ཏོ. ཝེ་ད་ཡི་ཏ་ས་བྷཱ་ཝ་པ་ཊི་ཙྪཱ་ད་ཀོ ས་མྨོ་ཧོ ཏ་ད་བྷི་ན་ནྡ་ན་མཱ་ཝ་ཧ་ཏི, ཡ་ཐཱ་བྷཱུ་ཏཱ་ཝ་བོ་དྷོ པ་ན ཏ་ཏྠ ནི་བྦེ་དྷཾ, ཝི་རཱ་ག་ཉྩ ཨཱ་ཝ་ཧ་ཏི. མི་ཙྪཱ་བྷི་ནི་ཝེ་སེ ཨ་ཡོ་ནི་སོ་མ་ན་སི་ཀཱ་ར་ས་ཧི་ཏཱ ཏ་ཎྷཱ ཨ་ནེ་ཀ་ཝི་ཧི་ཏཾ དི་ཊྛི་ཛཱ་ལཾ པ་སཱ་རེ་ཏི. ཡ་ཐཱ་ཝུ་ཏྟ་ཏ་ཎྷཱ་ས་མུ་ཙྪེ་དོ པ་ཋ་མ་མ་གྒོ ཏཾ དི་ཊྛི་ཛཱ་ལཾ ས་ངྐོ་ཙེ་ཏི. ས་སྶ་ཏ་ཝཱ་དཱ་དི་པ་ཉྙཱ་པ་ན་སྶ ཕ་སྶོ པ་ཙྩ་ཡོ ཨ་ས་ཏི ཕ་སྶེ ཏ་ད་བྷཱ་ཝ་ཏོ. དི་ཊྛི་བ་ནྡྷ་ན་བ་དྡྷཱ་ནཾ ཕ་སྶཱ་ཡ་ཏ་ནཱ་དཱི་ན་མ་ནི་རོ་དྷ་ནེ་ན ཕ་སྶཱ་དི་ཨ་ནི་རོ་དྷོ སཾ་སཱ་ར་དུ་ཀྑ་སྶ ཨ་ནི་ཝ་ཏྟི་ཡེ་ཝ ཡཱ་ཐཱ་ཝ་ཏོ ཕ་སྶཱ་ཡ་ཏ་ནཱ་དི་པ་རི་ཉྙཱ ས་བྦ་དི་ཊྛི་ད་སྶ་ནཱ་ནི ཨ་ཏི་ཝ་ཏྟ་ཏི, ཏེ་སཾ པ་ན ཏ་ཐཱ ཨ་པ་རི་ཉྙཱ དི་ཊྛི་ད་སྶ་ནཾ ནཱ་ཏི་ཝ་ཏྟ་ཏི. བྷ་ཝ་ནེ་ཏྟི་ས་མུ་ཙྪེ་དོ ཨཱ་ཡ་ཏིཾ ཨ་ཏྟ་བྷཱ་ཝ་སྶ ཨ་ནི་བྦ་ཏྟི་ཡཱ སཾ་ཝ་ཏྟ་ཏི, ཨ་ས་མུ་ཙྪི་ནྣཱ་ཡ བྷ་ཝ་ནེ་ཏྟི་ཡཱ ཨ་ནཱ་ག་ཏེ བྷ་ཝ་པྤ་བ་ནྡྷོ པ་རི་ཝ་ཏྟ་ཏི་ཡེ་ཝཱ་ཏི ཨ་ཡཾ སུ་ཏྟེ ནི་དྡི་ཊྛཱ་ནཾ དྷ་མྨཱ་ནཾ པ་ཊི་པ་ཀྑ་ཏོ པ་རི་ཝ་ཏྟ་ན་ལ་ཀྑ་ཎོ པ་རི་ཝ་ཏྟ་ན་ཧཱ་རོ ནཱ་མ. ཀི་མཱ་ཧ ‘‘ཀུ་ས་ལཱ་ཀུ་ས་ལེ དྷ་མྨེ, ནི་དྡི་ཊྛེ བྷཱ་ཝི་ཏེ པ་ཧཱི་ནེ ཙཱ’’ཏི་ཨཱ་དི.