དེ་ས་ནཱ་ཧཱ་ར་ཝ་ཎྞ་ནཱ

ཨི་དཱ་ནི ནེ་ཏྟི་ཡཱ, པེ་ཊ་ཀོ་པ་དེ་སེ ཙ ཝུ་ཏྟ་ན་ཡ་ཝ་སེ་ན ཧཱ་རཱ་དཱི་ནཾ ནི་དྡྷཱ་ར་ཎཾ. ཏ་ཏྠ ‘‘ཨ་ཏྟཱ, ལོ་ཀོ’’ཏི ཙ དི་ཊྛི་ཡཱ ཨ་དྷི་ཊྛཱ་ན་བྷཱ་ཝེ་ན, ཝེ་ད་ནཱ་ཕ་སྶཱ་ཡ་ཏ་ནཱ་དི་མུ་ཁེ་ན ཙ ག་ཧི་ཏེ་སུ པ་ཉྩ་སུ ཨུ་པཱ་དཱ་ན་ཀྑ་ནྡྷེ་སུ ཏ་ཎྷཱ་ཝ་ཛྫི་ཏཱ པ་ཉྩུ་པཱ་དཱ་ན་ཀྑ་ནྡྷཱ དུ་ཀྑ་ས་ཙྩཾ. ཏ་ཎྷཱ ས་མུ་ད་ཡ་ས་ཙྩཾ. ཏཾ པ་ན ‘‘པ་རི་ཏ་སྶ་ནཱ་ག་ཧ་ཎེ་ན ཏ་ཎྷཱ་ག་ཏཱ་ན’’ནྟི, ‘‘ཝེ་ད་ནཱ་པ་ཙྩ་ཡཱ ཏ་ཎྷཱ’’ཏི ཙ པ་དེ་ཧི ས་མུ་ད་ཡ་གྒ་ཧ་ཎེ་ན་ཉྩ པཱ་ལི༹་ཡཾ ས་རཱུ་པེ་ན ག་ཧི་ཏ་མེ་ཝ. ཨ་ཡཾ ཏཱ་ཝ སུ་ཏྟ་ནྟ་ན་ཡོ.

ཨ་བྷི་དྷ་མྨེ པ་ན ཝི་བྷ་ངྒ་པྤ་ཀ་ར་ཎེ ཨཱ་ག་ཏ་ན་ཡེ་ན ཨཱ་གྷཱ་ཏཱ་ན་ནྡཱ་དི་ཝ་ཙ་ནེ་ཧི, ‘‘ཨཱ་ཏ་པྤ་མ་ནྭཱ་ཡཱ’’ཏི་ཨཱ་དི་པ་དེ་ཧི, ཙི་ཏྟ་པ་དོ་ས་ཝ་ཙ་ནེ་ན, ས་བྦ་དི་ཊྛི་ག་ཏི་ཀ་པ་དེ་ཧི, ཀུ་ས་ལཱ་ཀུ་ས་ལ་གྒ་ཧ་ཎེ་ན, བྷ་ཝ་གྒ་ཧ་ཎེ་ན, སོ་ཀཱ་དི་གྒ་ཧ་ཎེ་ན, དི་ཊྛི་གྒ་ཧ་ཎེ་ན, ཏ་ཏྠ ཏ་ཏྠ ས་མུ་ད་ཡ་གྒ་ཧ་ཎེ་ན ཙཱ་ཏི ས་ངྑེ་པ་ཏོ ས་བྦ་ལོ་ཀི་ཡ་ཀུ་ས་ལཱ་ཀུ་ས་ལ་དྷ་མྨ་ཝི་བྷཱ་ཝ་ན་པ་དེ་ཧི ག་ཧི་ཏཱ དྷ་མྨ་ཀི་ལེ་སཱ ས་མུ་ད་ཡ་ས་ཙྩཾ. ཏ་དུ་བྷ་ཡེ་ས་མ་པྤ་ཝ་ཏྟི ནི་རོ་དྷ་ས་ཙྩཾ. ཏ་སྶ པ་ན ཏ་ཏྠ ཏ་ཏྠ ཝེ་ད་ནཱ་ནཾ ཨ་ཏྠ་ངྒ་མ་ནི་སྶ་ར་ཎ་པ་རི་ཡཱ་ཡེ་ཧི པ་ཙྩ་ཏྟཾ ནི་བྦུ་ཏི་ཝ་ཙ་ནེ་ན, ཨ་ནུ་པཱ་དཱ་ཝི་མུ་ཏྟི་ཝ་ཙ་ནེ་ན ཙ པཱ་ལི༹་ཡཾ ག་ཧ་ཎཾ ཝེ་དི་ཏ་བྦཾ. ནི་རོ་དྷ་པ་ཛཱ་ན་ནཱ པ་ཊི་པ་དཱ མ་གྒ་ས་ཙྩཾ. ཏ་སྶ་པི ཏ་ཏྠ ཏ་ཏྠ ཝེ་ད་ནཱ་ནཾ ས་མུ་ད་ཡཱ་དཱི་ནི ཡ་ཐཱ་བྷཱུ་ཏ་པ་ཊི་ཝེ་དྷ་ནཱ་པ་དེ་སེ་ན ཚ་ནྣཾ ཕ་སྶཱ་ཡ་ཏ་ནཱ་ནཾ ས་མུ་ད་ཡཱ་དཱི་ནི ཡ་ཐཱ་བྷཱུ་ཏ་པ་ཛཱ་ན་ན་པ་རི་ཡཱ་ཡེ་ན, བྷ་ཝ་ནེ་ཏྟི་ཡཱ ཨུ་ཙྪེ་ད་ཝ་ཙ་ནེ་ན ཙ ག་ཧ་ཎཾ ཝེ་དི་ཏ་བྦཾ.

ཏ་ཏྠ ས་མུ་ད་ཡེ་ན ཨ་སྶཱ་དོ, དུ་ཀྑེ་ན ཨཱ་དཱི་ན་ཝོ, མ་གྒ་ནི་རོ་དྷེ་ཧི ནི་སྶ་ར་ཎནྟི ཨེ་ཝཾ ཙ་ཏུ་ས་ཙྩ་ཝ་སེ་ན, ཡཱ་ནི པཱ་ལི༹་ཡཾ ས་རཱུ་པེ་ནེ་ཝ ཨཱ་ག་ཏཱ་ནི ཨ་སྶཱ་དཱ་དཱི་ན་ཝ་ནི་སྶ་ར་ཎཱ་ནི, ཏེ་ས་ཉྩ ཝ་སེ་ན ཨི་དྷ ཨ་སྶཱ་དཱ་ད་ཡོ ཝེ་དི་ཏ་བྦཱ. ཝེ་ནེ་ཡྻཱ་ནཾ ཏཱ་དི་བྷཱ་ཝཱ་པ་ཏྟི་ཨཱ་དི ཕ་ལཾ. ཡ་ཉྷི དེ་ས་ནཱ་ཡ སཱ་དྷེ་ཏ་བྦཾ ཧེ་ཊྛཱ ཝུ་ཏྟཾ པ་ཡོ་ཛ་ནཾ. ཏ་དེ་ཝ ཕ་ལ་ནྟི ཝུ་ཏྟོ་ཝཱ་ཡ་མ་ཏྠོ. ཏ་ད་ཏྠ་ཉྷི ཨི་དཾ སུ་ཏྟཾ བྷ་ག་ཝ་ཏཱ དེ་སི་ཏཾ. ཨཱ་གྷཱ་ཏཱ་དཱི་ན་མ་ཀ་ར་ཎཱི་ཡ་ཏཱ, ཨཱ་གྷཱ་ཏཱ་དི་ཕ་ལ་སྶ ཙ ཨ་ན་ཉྙ་ས་ནྟཱ་ན་བྷཱ་ཝི་ཏཱ ནི་ནྡཱ་པ་སཾ་སཱ་སུ ཡ་ཐཱ་ས་བྷཱ་ཝཾ པ་ཊི་ཛཱ་ན་ན་ནི་བྦེ་ཋ་ནཱ་ནཱི་ཏི ཨེ་ཝཾ ཏཾ་ཏཾ་པ་ཡོ་ཛ་ནཱ་དྷི་ག་མ་ཧེ་ཏུ ཨུ་པཱ་ཡོ. ཨཱ་གྷཱ་ཏཱ་དཱི་ནཾ ཀ་ར་ཎ་པ་ཊི་སེ་དྷ་ནཱ་དི་ཨ་པ་དེ་སེ་ན ཨ་ཏྠ་ཀཱ་མེ་ཧི ཏ་ཏོ ཙི་ཏྟཾ སཱ་དྷུ་ཀཾ ར་ཀྑི་ཏ་བྦ་ནྟི ཨ་ཡཾ ཨཱ་ཎཱ་ར་ཧ་སྶ དྷ་མྨ་རཱ་ཛ་སྶ ཨཱ་ཎ་ཏྟཱིཏི. ཨ་ཡཾ ཨ་སྶཱ་དཱ་དཱི་ན་ཝ་ནི་སྶ་ར་ཎ་ཕ་ལཱུ་པཱ་ཡཱ་ཎ་ཏྟི་ཝ་སེ་ན ཚ་བྦི་དྷ་དྷ་མྨ་ས་ནྡ་སྶ་ན་ལ་ཀྑ་ཎོ དེ་ས་ནཱ་ཧཱ་རོ ནཱ་མ. ཝུ་ཏྟ་ཉྩ –

‘‘ཨ་སྶཱ་དཱ་དཱི་ན་ཝ་ཏཱ, ནི་སྶ་ར་ཎ་མྤི ཙ ཕ་ལཾ ཨུ་པཱ་ཡོ ཙ;

ཨཱ་ཎ་ཏྟཱི ཙ བྷ་ག་ཝ་ཏོ, ཡོ་གཱི་ནཾ དེ་ས་ནཱ་ཧཱ་རོ’’ཏི.