ཕ་སྶ་པ་ཙྩ་ཡ་ཝཱ་ར་ཝ་ཎྞ་ནཱ

༡༡༨. པ་ར་མྤ་ར་པ་ཙྩ་ཡ་ད་སྶ་ན་ཏྠནྟི ཡཾ དི་ཊྛི་ཡཱ མཱུ་ལ་ཀཱ་ར་ཎཾ, ཏ་སྶཱ་པི ཀཱ་ར་ཎཾ, པུ་ན ཏ་སྶ་པི ཀཱ་ར་ཎ་ནྟི ཨེ་ཝཾ པ་ཙྩ་ཡ་པ་ར་མྤ་ར་ད་སྶ་ན་ཏྠཾ. ཡེ་ན ཧི ཏ་ཎྷཱ་པ་རི་ཏ་སྶི་ཏེ་ན ཨེ་ཏཱ་ནི དི་ཊྛི་ག་ཏཱ་ནི པ་ཝ་ཏྟ་ནྟི, ཏ་སྶ ཝེ་ད་ཡི་ཏཾ པ་ཙྩ་ཡོ, ཝེ་ད་ཡི་ཏ་སྶཱ་པི ཕ་སྶོ པ་ཙྩ་ཡོ་ཏི ཨེ་ཝཾ པ་ཙྩ་ཡ་པ་ར་མྤ་ར་ཝི་བྷཱ་ཝི་ནཱི ཨ་ཡཾ དེ་ས་ནཱ. ཀི་མ་ཏྠི་ཡཾ པ་ན པ་ཙྩ་ཡ་པ་ར་མྤ་ར་ད་སྶ་ན་ནྟི ཙེ? ཨ་ཏྠ་ནྟ་ར་ཝི་ཉྙཱ་པ་ན་ཏྠཾ. ཏེ་ན ཧི ཡ་ཐཱ དི་ཊྛི་ས་ངྑཱ་ཏོ པ་ཉྙཱ་པ་ན་དྷ་མྨོ, ཏ་པྤ་ཙྩ་ཡ་དྷ་མྨཱ ཙ ཡ་ཐཱ་ས་ཀཾ པ་ཙྩ་ཡ་ཝ་སེ་ནེ་ཝ ཨུ་པྤ་ཛྫ་ནྟི, ན པ་ཙྩ་ཡེ་ཧི ཝི་ནཱ, ཨེ་ཝཾ པ་ཉྙ་པེ་ཏ་བྦ་དྷ་མྨཱ་པི རཱུ་པ་ཝེ་ད་ནཱ་ད་ཡོ, ན ཨེ་ཏྠ ཀོ་ཙི ས་སྶ་ཏོ ཨ་ཏྟཱ ཝཱ ལོ་ཀོ ཝཱ་ཏི ཨེ་ཝ་མ་ཏྠ་ནྟ་རཾ ཝི་ཉྙཱ་པི་ཏཾ ཧོ་ཏི. ཏ་ཎྷཱ་དི་ཊྛི་པ་རི་ཕ་ནྡི་ཏཾ ཏ་ད་པི ཝེ་ད་ཡི་ཏཾ དི་ཊྛི་ཀཱ་ར་ཎ་བྷཱུ་ཏཱ་ཡ ཏ་ཎྷཱ་ཡ པ་ཙྩ་ཡ་བྷཱུ་ཏཾ ཕ་སྶ་པ་ཙྩ་ཡཱ ཧོ་ཏཱི་ཏི ཨ་ཏྠོ.

༡༣༡. ཏ་སྶ པ་ཙྩ་ཡ་སྶཱཏི ཏ་སྶ ཕ་སྶ་ས་ངྑཱ་ཏ་སྶ པ་ཙྩ་ཡ་སྶ. དི་ཊྛི་ཝེ་ད་ཡི་ཏེ དི་ཊྛི་ཡཱ པ་ཙྩ་ཡ་བྷཱུ་ཏེ ཝེ་ད་ཡི་ཏེ, ཕ་སྶ་པ་དྷཱ་ནེ་ཧི ཨ་ཏྟ་ནོ པ་ཙྩ་ཡེ་ཧི ནི་པྥཱ་དེ་ཏ་བྦེ. སཱ་དྷེ་ཏ་བྦེ ཙེ་ཏཾ བྷུ་མྨཾ. བ་ལ་ཝ་བྷཱ་ཝ་ད་སྶ་ན་ཏྠནྟི བ་ལ་ཝ་ཀཱ་ར་ཎ་བྷཱ་ཝ་ད་སྶ་ན་ཏྠཾ. ཏ་ཐཱ ཧི ཝི་ནཱ་པི ཙ་ཀྑཱ་དི་ཝ་ཏྠཱུ་ཧི, ས་མྤ་ཡུ་ཏྟ་དྷ་མྨེ་ཧི ཙ ཀེ་ཧི་ཙི ཝེ་ད་ནཱ ཨུ་པྤ་ཛྫ་ཏི, ན པ་ན ཀ་དཱ་ཙི་པི ཕ་སྶེ་ན ཝི་ནཱ, ཏ་སྨཱ ཕ་སྶོ ཝེ་ད་ནཱ་ཡ བ་ལ་ཝ་ཀཱ་ར་ཎཾ. ན ཀེ་ཝ་ལཾ ཝེ་ད་ནཱ་ཡ ཨེ་ཝ, ཨ་ཐ ཁོ སེ་ས་ས་མྤ་ཡུ་ཏྟ་དྷ་མྨཱ་ན་མྤི. ས་ནྣི་ཧི་ཏོ་པི ཧི ཝི་ས་ཡོ ས་ཙེ ཙི་ཏྟུ་པྤཱ་དོ ཕུ་ས་ནཱ་ཀཱ་ར་ཝི་ར་ཧི་ཏོ ཧོ་ཏི, ན ཏ་སྶ ཨཱ་ར་མྨ་ཎ་པ་ཙྩ་ཡོ བྷ་ཝ་ཏཱི་ཏི ཕ་སྶོ ས་བྦེ་ས་མྤི ས་མྤ་ཡུ་ཏྟ་དྷ་མྨཱ་ནཾ ཝི་སེ་ས་པ་ཙྩ་ཡོ. ཏ་ཐཱ ཧི བྷ་ག་ཝ་ཏཱ དྷ་མྨ་ས་ངྒ་ཎཱི་པ་ཀ་ར་ཎེ ཙི་ཏྟུ་པྤཱ་དཾ ཝི་བྷ་ཛ་ནྟེ་ན ‘‘ཕ་སྶོ ཧོ་ཏཱི’’ཏི ཕ་སྶ་སྶེ་ཝ པ་ཋ་མ་མུ་དྡྷ་ར་ཎཾ ཀ་ཏཾ, ཝེ་ད་ནཱ་ཡ པ་ན སཱ་ཏི་ས་ཡ་མ་དྷི་ཊྛཱ་ན་པ་ཙྩ་ཡོ ཨེ་ཝ. ‘‘པ་ཊི་སཾ་ཝེ་དི་སྶ་ནྟཱི’’ཏི ཝུ་ཏྟ་ཏྟཱ ‘‘ཏ་ད་པཱི’’ཏི ཨེ་ཏྠཱ་དྷི་ཀཱ་རོ་ཏི ཨཱ་ཧ ‘‘ཏཾ ཝེ་ད་ཡི་ཏ’’ནྟི. ག་མྱ་མཱ་ན་ཏྠ་སྶ ཝཱ-ས་དྡ་སྶ པ་ཡོ་གཾ པ་ཏི ཀཱ་མ་ཙཱ་ར་ཏྟཱ, ལོ་པ་ཏྟཱ, སེ་ས་ཏྟཱ་པི ཙ ཨེ་ས ན པ་ཡུ་ཏྟོ. ཨེ་ཝ་མཱི་དི་སེ་སུ. ཧོ་ཏི ཙེ་ཏྠ –

‘‘ག་མྱ་མཱ་ནཱ་དྷི་ཀཱ་ར་ཏོ, ལོ་པ་ཏོ སེ་ས་ཏོ ཙཱ་ཏི;

ཀཱ་ར་ཎེ་ཧི ཙ་ཏཱུ་ཧི་པི, ན ཀ་ཏྠ་ཙི ར་ཝོ ཡུ་ཏྟོ’’ཏི.

‘‘ཡ་ཐཱ ཧཱི’’ཏི་ཨཱ་དི་ནཱ ཕ་སྶ་སྶ བ་ལ་ཝ་ཀཱ་ར་ཎ་ཏཱ་ད་སྶ་ནེ་ན ཏ་ད་ཏྠཾ ས་མ་ཏྠེ་ཏི. ཏ་ཏྠ པ་ཏ་ཏོཏི པ་ཏ་ནྟ་སྶ. ཐཱུ་ཎཱཏི ཨུ་པ་ཏྠ་མྦྷ་ཀ་དཱ་རུ་སྶེ་ཏཾ ཨ་དྷི་ཝ་ཙ་ནཾ.