༣. པ་ཙྩ་ཡ་ཝཱ་ར་ཝ་ཎྞ་ནཱ
༢༤༣. པ་ཏི-ས་དྡོ པ་ཏི་ཊྛ་ཏྠཾ དཱི་པེ་ཏི ‘‘སཱ་རེ པ་ཏི་ཊྛི་ཏོ’’ཏི་ཨཱ་དཱི་སུ, ཨ་ཡ-ས་དྡོ ག་ཏིཾ དཱི་པེ་ཏི ‘‘ཨེ་ཏི ཨེ་ཏྠཱ་ཏི ཨ་ཡོ’’ཏི.
བྷཱུ་ཏུ་པཱ་དཱ་རཱུ་པཱ་ནི ས་ཧ ས་ངྒ་ཎྷི་ཏྭཱ ཝུ་ཏྟཾ ཨུ་པཱ་དཱ་རཱུ་པཱ་ནཾ ཝི་ཡ བྷཱུ་ཏ་རཱུ་པཱ་ནི ནི་སྶ་ཡོ ཧོ་ཏཱི་ཏི ཀ་ཏྭཱ. ཡ་དི ཨེ་ཝཾ ཀ་སྨཱ ཨ་ཊྛ་ཀ་ཐཱ་ཡཾ ‘‘མ་ཧཱ་བྷཱུ་ཏེ ནི་སྶཱ་ཡ ཙི་ཏྟ་ས་མུ་ཊྛཱ་ནཾ ཨུ་པཱ་དཱ་རཱུ་པ’’ནྟི ཨུ་པཱ་དཱ་རཱུ་པཾ་ཡེ་ཝ ད་སྶི་ཏ་ནྟི ཨཱ་ཧ ‘‘ཨ་ཊྛ་ཀ་ཐཱ་ཡཾ པ་ནཱ’’ཏི་ཨཱ་དི.
༢༥༥. པ་ཊི་ཙྩ་ཝཱ་རེ ས་ཧ་ཛཱ་ཏེཏི པ་ཊི་ཙྩ་ཝཱ་རེ ས་ཧ་ཛཱ་ཏ་པ་ཙྩ་ཡ་ཝ་ཎྞ་ནཱ་ཡཾ, ཀ་མྨ་ཨུ་ཏུ་ཛཱ་ནནྟི ཀ་མྨ་ཛཱ་ནཾ ཨུ་ཏུ་ཛཱ་ན་ཉྩ ཝ་སེ་ན ཨ་ཏྠོ ཝུ་ཏྟོ་ཏི ཡོ་ཛ་ནཱ. ཏ་ཐཱ ཧི ཏ་ཏྠ ཝུ་ཏྟཾ ‘‘དྭི་ས་ནྟ་ཏི་ས་མུ་ཊྛཱ་ན་བྷཱུ་ཏ་ཝ་སེ་ན ཝུ་ཏྟ’’ནྟི (པ་ཊྛཱ. ཨ་ཊྛ. ༡.༥༧). ཀ་མྨེ ཙཱཏི ཀ་མྨེ ཛ་ན་ཀ་ཀ་མྨ་པ་ཙྩ་ཡེ ག་ཧི་ཏེ. ཨེ་ཀ་ནྟཱ་ནེ་ཀ་ནྟ་ཀ་མྨ་ཛཱ་ནནྟི ཨེ་ཀ་ནྟེ་ན ཀ་མྨ་ཛཱ་ནཾ ན ཨེ་ཀ་ནྟ་ཀ་མྨ་ཛཱ་ན་ཉྩ. ཏ་ཏྠ ཨ་ས་ཉྙ་བྷ་ཝེ ཨེ་ཀ་ནྟ་ཀ་མྨ་ཛཾ ནཱ་མ ཛཱི་ཝི་ཏི་ནྡྲི་ཡཾ, ཨི་ཏ་རཾ ཨུ་པཱ་དཱ་རཱུ་པཾ བྷཱུ་ཏ་རཱུ་པ་ཉྩ ན ཨེ་ཀ་ནྟ་ཀ་མྨ་ཛཾ, ཏ་དུ་བྷ་ཡ་མྤི ཏ་ཏྠ ཨེ་ཀ་ཛ྄ཛྷཾ ཀ་ཏྭཱ ཝུ་ཏྟཾ, ‘‘མ་ཧཱ་བྷཱུ་ཏེ པ་ཊི་ཙྩ ཀ་ཊ་ཏྟཱ་རཱུ་པ’’ནྟི ཨི་དཾ པ་ན ཀ་མྨ་ས་མུ་ཊྛཱ་ན་ཝ་སེ་ནེ་ཝ ཝུ་ཏྟ་ནྟི. སོ ནཱ་དྷི་པྤེ་ཏོཏི ཡོ ཡ་ཐཱ་ད་སྶི་ཏོ པ་ཊི་ཙྩ་ཝཱ་རེ ས་ཧ་ཛཱ་ཏ་པ་ཙྩ་ཡེ ཨ་ཏྠོ ཝུ་ཏྟོ, སོ ཨི་དྷ ན ཨ་དྷི་པྤེ་ཏོ. ཀ་སྨཱ་ཏི ཙེ, ཨཱ་ཧ ‘‘ཀ་ཊ་ཏྟཱ…པེ… ག་ཧི་ཏ་ཏྟཱ’’ཏི. ཏཾ པ་ཧཱ་ཡཱཏི ཏཾ པ་ཊི་ཙྩ་ཝཱ་རེ ཝུ་ཏྟ་མ་ཏྠཾ པ་ཧཱ་ཡ ཨ་གྒ་ཧེ་ཏྭཱ. ཡ་ཐཱ་ག་ཧི་ཏ་སྶཱཏི ‘‘ཨ་ས་ཉྙ…པེ… ཀ་ཊ་ཏྟཱ་རཱུ་པཾ ཨུ་པཱ་དཱ་རཱུ་པ’’ནྟི པཱ་ལི༹་ཡཾ ཨེ་ཝ ག་ཧི་ཏ་སྶ. པ་ཊི་ཙྩ པ་ཙྩ་ཡཱཏི ཨི་དཾ དྭི་ནྣཾ ཝཱ་རཱ་ནཾ ཨུ་པ་ལ་ཀྑ་ཎཾ. པ་ཊི་ཙྩ་ཝཱ་རེ ཨཱ་ག་ཏ་ན་ཡེ་ན མ་ཧཱ་བྷཱུ་ཏེ པ་ཊི་ཙྩ, པ་ཙྩ་ཡ་ཝཱ་རེ ཨཱ་ག་ཏ་ན་ཡེ་ན མ་ཧཱ་བྷཱུ་ཏེ པ་ཙྩ་ཡཱ མ་ཧཱ་བྷཱུ་ཏཱ་ནཾ ཨུ་པྤ་ཏྟི ན ནི་ཝཱ་རེ་ཏ་བྦཱ, ཏ་སྨཱ ‘‘ཨུ་པཱ་དཱ་རཱུ་པ་ས་ངྑཱ་ཏཾ ཀ་ཊ་ཏྟཱ་རཱུ་པ’’ནྟི ཨེ་ཝཾ ཨུ་པཱ་དཱ་རཱུ་པ་གྒ་ཧ་ཎེ་ན ཀ་ཊ་ཏྟཱ་རཱུ་པཾ ཨ་ཝི་སེ་སེ་ཏྭཱ ཨུ་པཱ་དཱ་རཱུ་པཱ་ནཾ ནི་ཝ་ཏྟེ་ཏ་བྦཱ་ནཾ ཨུ་ཏུ་ཙི་ཏྟཱ་ཧཱ་ར་ས་མུ་ཊྛཱ་ནཱ་ནཾ ཨ་ཏྠི་ཏཱ་ཡ ཀ་ཊ་ཏྟཱ…པེ… ཝི་སེ་ས་ནཾ ད་ཊྛ་བྦ་ནྟི ཨེ་ཝ་མེ་ཏྠ ཡོ་ཛ་ནཱ ཝེ་དི་ཏ་བྦཱ.
༢༨༦-༢༨༧. ཨེ་ཀ་ཙྩ་སྶ རཱུ་པ་སྶཱཏི ཨ་ཧེ་ཏུ་ཀ་ཙི་ཏྟ་ས་མུ་ཊྛཱ་ན་སྶ. ཨི་ཏོ པ་རེ་སུ་པི ཨེ་ཀ་ཙྩ་རཱུ་པ་གྒ་ཧ་ཎེ ཨེ་སེ་ཝ ན་ཡོ. ཙ་ཀྑཱ་དི་དྷ་མྨ་ཝ་སེ་ནཱཏི ཙ་ཀྑཱ་ཡ་ཏ་ནཱ་དི་རཱུ་པ་དྷ་མྨ་ཝ་སེ་ན. ཙི་ཏྟ་ས་མུ་ཊྛཱ་ནཱ་དི་ཀོ་ཊྛཱ་ས་ཝ་སེ་ནཱཏི ཙི་ཏྟ་ཛཱ་དི་རཱུ་པ་དྷ་མྨ་བྷཱ་ག་ཝ་སེ་ན. ས་བྦཾ ལ་བྦྷ་ཏཱིཏི ས་ཏི་པི ཨི་མ་སྶ ན་ཡ་སྶ ན་ཧེ་ཏུ་མཱུ་ལ་ཀ་ཏྟེ ནོ་ན་ཏྠི་ནོ་ཝི་ག་ཏེ་སུ ཨེ་ཀ་ནྟི ག་ཎ་ནཾ ས་བྦཾ རཱུ་པཾ ས་བྦ་སྶ རཱུ་པ་སྶ ཝ་སེ་ན ག་ཎ་ནཱ ལ་བྦྷ་ཏི ཙ་ཏུ་ས་ནྟ་ཏི་ཝ་སེ་ན ཝ་ཏྟ་མཱ་ནེ་སུ པ་ཉྩ་ཝཱི་ས་ཏི་ཡཱ རཱུ་པ་དྷ་མྨེ་སུ ཝ་ཛྫི་ཏ་བྦ་སྶ ཨ་བྷཱ་ཝཱ.
པ་ཙྩ་ཡ་ཝཱ་ར་ཝ་ཎྞ་ནཱ ནི་ཊྛི་ཏཱ.