ཚ་ཙཱི་ཝ་ར་ཀ་ཐཱ
ཚ་ཙཱི་ཝ་ར་ཀ་ཐཱ་ཡཾ ‘‘ཨ་ནུ་ཛཱ་ནཱ་མི, བྷི་ཀྑ་ཝེ, ཚ ཙཱི་ཝ་རཱ་ནི ཁོ་མཾ ཀ་པྤཱ་སི་ཀཾ ཀོ་སེ་ཡྻཾ ཀ་མྦ་ལཾ སཱ་ཎཾ བྷ་ངྒ’’ནྟི (མ་ཧཱ་ཝ. ༣༣༩) ཝ་ཙ་ན་ཏོ ཁོ་མཱ་དཱི་ནི ཚ ཙཱི་ཝ་རཱ་ནི དུ་ཀཱུ་ལཱ་དཱི་ནི ཚ ཨ་ནུ་ལོ་མ་ཙཱི་ཝ་རཱ་ནི ཙ ཝ་ཊྚ་ནྟི. ཏ་ཏྠ ‘‘ཁོ་མནྟི ཁོ་མ་སུ་ཏྟེ་ཧི ཝཱ་ཡི་ཏཾ ཁོ་མ་པ་ཊྚ་ཙཱི་ཝ་རཾ. ཀ་པྤཱ་སི་ཀནྟི ཀ་པྤཱ་ས་ཏོ ནི་བྦ་ཏྟ་སུ་ཏྟེ་ཧི ཝཱ་ཡི་ཏཾ. ཀོ་སེ་ཡྻནྟི ཀོ་ས་ཀཱ་ར་ཀ་པཱ་ཎ་ཀེ་ཧི ནི་བྦ་ཏྟ་སུ་ཏྟེ་ཧི ཝཱ་ཡི་ཏཾ. ཀ་མྦ་ལནྟི ཨུ་ཎྞཱ་མ་ཡ་ཙཱི་ཝ་རཾ. སཱ་ཎནྟི སཱ་ཎ་སུ་ཏྟེ་ཧི ཀ་ཏ་ཙཱི་ཝ་རཾ. བྷ་ངྒནྟི ཁོ་མ་སུ་ཏྟཱ་དཱི་ནི ས་བྦཱ་ནི, ཨེ་ཀ་ཙྩཱ་ནི ཝཱ མི་སྶེ་ཏྭཱ ཀ་ཏ་ཙཱི་ཝ་རཾ. བྷ་ངྒ་མྤི ཝཱ་ཀ་མ་ཡ་མེ་ཝཱ་ཏི ཀེ་ཙི. དུ་ཀཱུ་ལཾ པ་ཊྚུ་ཎྞཾ སོ་མཱ་ར་པ་ཊཾ ཙཱི་ན་པ་ཊཾ ཨི་དྡྷི་ཛཾ དེ་ཝ་དི་ནྣ་ནྟི ཨི་མཱ་ནི པ་ན ཚ ཙཱི་ཝ་རཱ་ནི ཨེ་ཏེ་སཾ་ཡེ་ཝ ཨ་ནུ་ལོ་མཱ་ནཱི་ཏི ཝི་སུཾ ན ཝུ་ཏྟཱ་ནི. དུ་ཀཱུ་ལཉྷི སཱ་ཎ་སྶ ཨ་ནུ་ལོ་མཾ ཝཱ་ཀ་མ་ཡ་ཏྟཱ. པ་ཊྚུ་ཎྞ་དེ་སེ ས་ཉྫཱ་ཏ་ཝ་ཏྠཾ པ་ཊྚུ་ཎྞཾ. ‘པ་ཊྚུ་ཎྞ་ཀོ་སེ་ཡྻ་ཝི་སེ་སོ’ཏི ཧི ཨ་བྷི་དྷཱ་ན་ཀོ་སེ ཝུ་ཏྟཾ. སོ་མཱ་ར་དེ་སེ ཙཱི་ན་དེ་སེ ཙ ཛཱ་ཏ་ཝ་ཏྠཱ་ནི སོ་མཱ་ར་ཙཱི་ན་པ་ཊཱ་ནི. པ་ཊྚུ་ཎྞཱ་དཱི་ནི ཏཱི་ཎི ཀོ་སེ་ཡྻ་སྶ ཨ་ནུ་ལོ་མཱ་ནི པཱ་ཎ་ཀེ་ཧི ཀ་ཏ་སུ་ཏྟ་མ་ཡ་ཏྟཱ. ཨི་དྡྷི་ཛཾ ཨེ་ཧི་བྷི་ཀྑཱུ་ནཾ པུ་ཉྙི་དྡྷི་ཡཱ ནི་བྦ་ཏྟ་ཙཱི་ཝ་རཾ, ཏཾ ཁོ་མཱ་དཱི་ནཾ ཨ་ཉྙ་ཏ་རཾ ཧོ་ཏཱི་ཏི ཏེ་སཾ ཨེ་ཝ ཨ་ནུ་ལོ་མཾ. དེ་ཝ་ཏཱ་ཧི དི་ནྣཾ ཙཱི་ཝ་རཾ དེ་ཝ་དི་ནྣཾ. ཀ་པྤ་རུ་ཀྑེ ནི་བྦ་ཏྟཾ ཛཱ་ལི་ནི་ཡཱ དེ་ཝ་ཀ་ཉྙཱ་ཡ ཨ་ནུ་རུ་དྡྷ་ཏྠེ་ར་སྶ དི་ནྣ་ཝ་ཏྠ་ས་དི་སཾ, ཏ་མྤི ཁོ་མཱ་དཱི་ནཾ་ཡེ་ཝ ཨ་ནུ་ལོ་མཾ ཧོ་ཏི ཏེ་སུ ཨ་ཉྙ་ཏ་ར་བྷཱ་ཝ་ཏོ’’ཏི སཱ་ར་ཏྠ་དཱི་པ་ནི་ཡཾ (སཱ་ར་ཏྠ. ཊཱི. ༢.༤༦༢-༤༦༣) ཝུ་ཏྟཾ.
ཝི་མ་ཏི་ཝི་ནོ་ད་ནི་ཡཾ (ཝི. ཝི. ཊཱི. ༡.༤༦༣) པ་ན ‘‘ཁོ་མནྟི ཁོ་མ་སུ་ཏྟེ་ཧི ཝཱ་ཡི་ཏཾ ཁོ་མ་པ་ཊ་ཙཱི་ཝ་རཾ, ཏཾ ཝཱ་ཀ་མ་ཡ་ནྟི ཝ་ད་ནྟི. ཀ་པྤཱ་ས་སུ་ཏྟེ་ཧི ཝཱ་ཡི་ཏཾ ཀ་པྤཱ་སི་ཀཾ. ཨེ་ཝཾ སེ་སཱ་ནི་པི. ཀ་མྦ་ལནྟི ཨེ་ལ༹་ཀཱ་དཱི་ནཾ ལོ་མ་མ་ཡ་སུ་ཏྟེ་ན ཝཱ་ཡི་ཏཾ པ་ཊཾ. བྷ་ངྒནྟི ཁོ་མ་སུ་ཏྟཱ་དཱི་ནི ས་བྦཱ་ནི, ཨེ་ཀ་ཙྩཱ་ནི ཝཱ མི་སྶེ་ཏྭཱ ཝཱ་ཡི་ཏཾ ཙཱི་ཝ་རཾ, བྷ་ངྒ་མྤི ཝཱ་ཀ་མ་ཡ་མེ་ཝཱ་ཏི ཀེ་ཙི. དུ་ཀཱུ་ལཾ པ་ཊྚུ་ཎྞཾ སོ་མཱ་ར་པ་ཊཾ ཙཱི་ན་པ་ཊཾ ཨི་དྡྷི་ཛཾ དེ་ཝ་དི་ནྣ་ནྟི ཨི་མཱ་ནི ཚ ཙཱི་ཝ་རཱ་ནི ཨེ་ཏེ་ས་ཉྙེ་ཝ ཨ་ནུ་ལོ་མཱ་ནཱི་ཏི ཝི་སུཾ ན ཝུ་ཏྟཱ་ནི. དུ་ཀཱུ་ལཉྷི སཱ་ཎ་སྶ ཨ་ནུ་ལོ་མཾ ཝཱ་ཀ་མ་ཡ་ཏྟཱ. ‘པ་ཊྚུ་ཎྞཾ ཀོ་སེ་ཡྻ་ཝི་སེ་སོ’ཏི ཨ་བྷི་དྷཱ་ན་ཀོ་སེ ཝུ་ཏྟཾ. སོ་མཱ་ར་དེ་སེ ཙཱི་ན་དེ་སེ ཙ ཛཱ་ཏ་ཝ་ཏྠཱ་ནི སོ་མཱ་ར་ཙཱི་ན་པ་ཊཱ་ནི. པ་ཊྚུ་ཎྞཱ་དཱི་ནི ཏཱི་ཎི ཀོ་སེ་ཡྻ་སྶ ཨ་ནུ་ལོ་མཱ་ནི པཱ་ཎ་ཀེ་ཧི ཀ་ཏ་སུ་ཏྟ་མ་ཡ་ཏྟཱ. ཨི་དྡྷི་ཛནྟི ཨེ་ཧི་བྷི་ཀྑཱུ་ནཾ པུ་ཉྙི་དྡྷི་ཡཱ ནི་བྦ་ཏྟ་ཙཱི་ཝ་རཾ, ཀ་པྤ་རུ་ཀྑེ་ཧི ནི་བྦ་ཏྟཾ, དེ་ཝ་དི་ནྣ་ཉྩ ཁོ་མཱ་དཱི་ནཾ ཨ་ཉྙ་ཏ་རཾ ཧོ་ཏཱི་ཏི ཏེ་སཾ ས་བྦེ་སཾ ཨ་ནུ་ལོ་མཱ་ནཱི’’ཏི ཝུ་ཏྟཾ.