ཡཱ་གུ་ཀ་ཐཱ

ཡཱ་གུ་ཀ་ཐཱ་ཡཾ ‘‘ད་ས་ཡི་མེ, བྲཱ་ཧྨ་ཎ, ཨཱ་ནི་སཾ་སཱ ཡཱ་གུ་ཡཱ. ཀ་ཏ་མེ ད་ས, ཡཱ་གུཾ དེ་ནྟོ ཨཱ་ཡུཾ དེ་ཏི, ཝ་ཎྞཾ དེ་ཏི, སུ་ཁཾ དེ་ཏི, བ་ལཾ དེ་ཏི, པ་ཊི་བྷཱ་ནཾ དེ་ཏི, ཡཱ་གུ་པཱི་ཏཱ ཁུ་དཾ པ་ཊི་ཧ་ན་ཏི, པི་པཱ་སཾ ཝི་ནེ་ཏི, ཝཱ་ཏཾ ཨ་ནུ་ལོ་མེ་ཏི, ཝ་ཏྠིཾ སོ་དྷེ་ཏི, ཨཱ་མཱ་ཝ་སེ་སཾ པཱ་ཙེ་ཏི. ཨི་མེ ཁོ, བྲཱ་ཧྨ་ཎ, ད་སཱ་ནི་སཾ་སཱ ཡཱ་གུ་ཡཱ་ཏི.

‘ཡོ ས་ཉྙ་ཏཱ་ནཾ པ་ར་ད་ཏྟ་བྷོ་ཛི་ནཾ;

ཀཱ་ལེ་ན ས་ཀྐ་ཙྩ ད་དཱ་ཏི ཡཱ་གུཾ;

ད་ས་སྶ ཋཱ་ནཱ་ནི ཨ་ནུ་པྤ་ཝེ་ཙྪ་ཏི;

ཨཱ་ཡུ་ཉྩ ཝ་ཎྞ་ཉྩ སུ་ཁཾ བ་ལ་ཉྩ.

‘པ་ཊི་བྷཱ་ན་མ་སྶ ཨུ་པ་ཛཱ་ཡ་ཏེ ཏ་ཏོ;

ཁུ་དྡཾ པི་པཱ་ས་ཉྩ བྱ་པ་ནེ་ཏི ཝཱ་ཏཾ;

སོ་དྷེ་ཏི ཝ་ཏྠིཾ པ་རི་ཎཱ་མེ་ཏི བྷ་ཏྟཾ;

བྷེ་ས་ཛྫ་མེ་ཏཾ སུ་ག་ཏེ་ན ཝ་ཎྞི་ཏཾ.

‘ཏ་སྨཱ ཧི ཡཱ་གུཾ ཨ་ལ་མེ་ཝ དཱ་ཏུཾ;

ནི་ཙྩཾ མ་ནུ་སྶེ་ན སུ་ཁ་ཏྠི་ཀེ་ན;

དི་བྦཱ་ནི ཝཱ པ་ཏྠ་ཡ་ཏཱ སུ་ཁཱ་ནི;

མཱ་ནུ་སྶ་སོ་བྷ་གྱ་ཏ་མི་ཙྪ་ཏཱ ཝཱ’ཏི.

ཨ་ཐ ཁོ བྷ་ག་ཝཱ ཏཾ བྲཱ་ཧྨ་ཎཾ ཨི་མཱ་ཧི གཱ་ཐཱ་ཧི ཨ་ནུ་མོ་དི་ཏྭཱ ཨུ་ཊྛཱ་ཡཱ་ས་ནཱ པ་ཀྐཱ་མི. ཨ་ཐ ཁོ བྷ་ག་ཝཱ ཨེ་ཏ་སྨིཾ ནི་དཱ་ནེ ཨེ་ཏ་སྨིཾ པ་ཀ་ར་ཎེ དྷ་མྨིཾ ཀ་ཐཾ ཀ་ཏྭཱ བྷི་ཀྑཱུ ཨཱ་མ་ནྟེ་སི – ཨ་ནུ་ཛཱ་ནཱ་མི, བྷི་ཀྑ་ཝེ, ཡཱ་གུ་ཉྩ མ་དྷུ་གོ་ལ༹་ཀ་ཉྩཱ’’ཏི (མ་ཧཱ་ཝ. ༢༨༢) ཝ་ཙ་ན་ཏོ ཡཱ་གུ་ཉྩ མ་དྷུ་གོ་ལ༹་ཀ་ཉྩ ས་མྤ་ཊི་ཙྪི་ཏུཾ ཝ་ཊྚ་ཏི. ཨ་ནུ་མོ་ད་ནཱ་གཱ་ཐཱ་ཡ ‘‘པ་ཏྠ་ཡ་ཏཾ ཨི་ཙྪ་ཏ’’ནྟི པ་དཱ་ནཾ ‘‘ཨ་ལ་མེ་ཝ དཱ་ཏུ’’ནྟི ཨི་མི་ནཱ ས་མྦ་ནྡྷོ. ས་ཙེ པ་ན ‘‘པ་ཏྠ་ཡ་ཏཱ ཨི་ཙྪ་ཏཱ’’ཏི པཱ་ཋོ ཨ་ཏྠི, སོ་ཡེ་ཝ ག་ཧེ་ཏ་བྦོ. ‘‘ན, བྷི་ཀྑ་ཝེ, ཨ་ཉྙ་ཏྲ ནི་མ་ནྟི་ཏེ་ན ཨ་ཉྙ་སྶ བྷོ་ཛྫ་ཡཱ་གུ པ་རི་བྷུ་ཉྫི་ཏ་བྦཱ, ཡོ པ་རི་བྷུ་ཉྫེ་ཡྻ, ཡ་ཐཱ་དྷ་མྨོ ཀཱ་རེ་ཏ་བྦོ’’ཏི (མ་ཧཱ་ཝ. ༢༨༣) ཝ་ཙ་ན་ཏོ ཏ་ཐཱ བྷུ་ཉྫ་ནྟ་སྶ པ་ར་མྤ་ར་བྷོ་ཛ་ན་སི་ཀྑཱ་པ་དེ་ན ཨཱ་པ་ཏྟི ཧོ་ཏི. བྷོ་ཛྫ་ཡཱ་གཱུཏི ཡཱ པ་ཝཱ་ར་ཎཾ ཛ་ནེ་ཏི. ཡ་ཐཱ་དྷ་མྨོ ཀཱ་རེ་ཏ་བྦོཏི པ་ར་མྤ་ར་བྷོ་ཛ་ནེ་ན ཀཱ་རེ་ཏ་བྦོ.