༦. དྷ་མྨ་ཀ་ཐི་ཀ་སུ་ཏྟ་ཝ་ཎྞ་ནཱ

༡༦. ནི་བྦི་ནྡ་ན་ཏྠཱ་ཡཱཏི ནི་བྦི་དཱ་ནུ་པ་སྶ་ནཱ་པ་ཊི་ལཱ་བྷཱ་ཡ. སཱ ཧི ཛ་རཱ་མ་ར་ཎ་སཱི་སེ་ན ཝུ་ཏྟེ་སུ ས་ངྑ་ཏ་དྷ་མྨེ་སུ ནི་བྦི་ནྡ་ནཱ་ཀཱ་རེ་ན པ་ཝ་ཏྟ་ཏི. ཝི་ར་ཛྫ་ན་ཏྠཱ་ཡཱཏི ཝི་རཱ་གཱ་ནུ་པ་སྶ་ནཱ་པ་ཊི་ལཱ་བྷཱ་ཡ. སཱི་ལ་ཏོ པ་ཊྛཱ་ཡཱཏི ཝི་ཝ་ཊྚ་ས་ནྣི་སྶི་ཏ་སཱི་ལ་ས་མཱ་དཱ་ན་ཏོ པ་ཊྛཱ་ཡ. སོ་ཏཱ་པ་ཏྟི་ཡ་ངྒེ་ཧི ས་མ་ནྣཱ་ག་ཏོ ཝི་ཝ་ཊྚ་ས་ནྣི་སྶི་ཏ་སཱི་ལེ པ་ཏི་ཊྛི་ཏོ ཨུ་པཱ་ས་ཀོ་པི པ་གེ་ཝ ཙ་ཏུ་པཱ་རི་སུ་དྡྷི་སཱི་ལེ པ་ཏི་ཊྛི་ཏོ བྷི་ཀྑུ ས་མྨཱ་པ་ཊི་པ་ནྣོ ནཱ་མ. ཏེ་ནཱ་ཧ ‘‘ཡཱ་ཝ ཨ་ར་ཧ་ཏྟ་མ་གྒཱ པ་ཊི་པ་ནྣོ་ཏི ཝེ་དི་ཏ་བྦོ’’ཏི. ནི་བྦཱ་ན་དྷ་མྨ་སྶཱཏི ནི་བྦཱ་ནཱ་ཝ་ཧ་སྶ ཨ་རི་ཡ་སྶ མ་གྒ་སྶ. ཨ་ནུ་རཱུ་པ་ས་བྷཱ་ཝ་བྷཱུ་ཏནྟི ནི་བྦཱ་ནཱ་དྷི་ག་མ་སྶ ཨ་ནུ་ཙྪ་ཝི་ཀ་ས་བྷཱ་ཝ་བྷཱུ་ཏཾ. ནི་བྦི་དཱཏི ཨི་མི་ནཱ ཝུ་ཊྛཱ་ན་གཱ་མི་ནི་པ་རི་ཡོ་སཱ་ནཾ ཝི་པ་སྶ་ནཾ ཝ་ད་ཏི. ཝི་རཱ་གཱ ནི་རོ་དྷཱཏི པ་ད་དྭ་ཡེ་ན ཨ་རི་ཡ་མ་གྒཾ, ཨི་ཏ་རེ་ན ཕ་ལཾ. ཨེ་ཏྠཱཏི ཨི་མ་སྨིཾ སུ་ཏྟེ. ཨེ་ཀེ་ན ན་ཡེ་ནཱཏི པ་ཋ་མེ་ན ན་ཡེ་ན. ཏ་ཏྠ ཧི བྷ་ག་ཝཱ ཏེ་ན བྷི་ཀྑུ་ནཱ དྷ་མྨ་ཀ་ཐི་ཀ་ལ་ཀྑ་ཎཾ པུ་ཙྪི་ཏོ ཏཾ མ་ཏྠ་ཀཾ པཱ་པེ་ཏྭཱ ཝི་སྶ་ཛྫེ་སི. ཡོ ཧི ཝི་པ་སྶ་ནཾ མ་གྒཾ ཨ་ནུ་པཱ་དཱ་ཝི་མུ་ཏྟིཾ པཱ་པེ་ཏྭཱ ཀ་ཐེ་ཏུཾ ས་ཀྐོ་ཏི, སོ ཨེ་ཀ་ནྟ་དྷ་མྨ་ཀ་ཐི་ཀོ. ཏེ་ནཱ་ཧ ‘‘དྷ་མྨ་ཀ་ཐི་ཀ་སྶ པུ་ཙྪཱ ཀ་ཐི་ཏཱ’’ཏི. དྭཱི་ཧཱིཏི དུ་ཏི་ཡ་ཏ་ཏི་ཡ་ན་ཡེ་ཧི. ཏནྟི པུ་ཙྪཾ. ཝི་སེ་སེ་ཏྭཱཏི ཝི་སི་ཊྛཾ ཀ་ཏྭཱ. ཡ་ཐཱ་པུ་ཙྪི་ཏ་མ་ཏྟ་མེ་ཝ ཨ་ཀ་ཐེ་ཏྭཱ ཨ་པུ་ཙྪི་ཏ་མྤི ཨ་ཏྠཾ ད་སྶེ་ནྟོ དྷ་མྨཱ་ནུ་དྷ་མྨ་པ་ཊི་པ་ཏྟིཾ ཨ་ནུ་པཱ་དཱ་ཡ ཝི་མུ་ཏྟི་ས་ངྑཱ་ཏཾ ཝི་སེ་སཾ པཱ་པེ་ཏྭཱ. བྷ་ག་ཝཱ ཧི ཨ་པྤཾ ཡཱ་ཙི་ཏོ བ་ཧུཾ དེ་ནྟོ ཨུ་ལཱ༹་ར་པུ་རི་སོ ཝི་ཡ དྷ་མྨ་ཀ་ཐི་ཀ་ལ་ཀྑ་ཎཾ པུ་ཙྪི་ཏོ པ་ཊི་ཙྩ་ས་མུ་པྤཱ་ད་མུ་ཁེ་ན ཏ་ཉྩེ་ཝ ཏ་ཏོ ཙ ཨུ་ཏྟ་རིཾ དྷ་མྨཱ་ནུ་དྷ་མྨ་པ་ཊི་པ་ཏྟིཾ ཨ་ནུ་པཱ་དཱ་ཝི་མུ་ཏྟ་ཉྩ ཝི་སྶ་ཛྫེ་སི. ཏ་ཏྠ ‘‘ནི་བྦི་དཱ་ཡ…པེ… དྷ་མྨཾ དེ་སེ་ཏཱི’’ཏི ཨི་མི་ནཱ དྷ་མྨ་དེ་ས་ནཾ ཝཱ་ས་ནཱ་བྷཱ་གི་ཡཾ ཀ་ཏྭཱ ད་སྶེ་སི. ‘‘ནི་རོ་དྷཱ་ཡ པ་ཊི་པ་ནྣོ ཧོ་ཏཱི’’ཏི ཨི་མི་ནཱ ནི་བྦེ་དྷ་བྷཱ་གི་ཡཾ, ‘‘ཨ་ནུ་པཱ་དཱ་ཝི་མུ་ཏྟོ ཧོ་ཏཱི’’ཏི ཨི་མི་ནཱ དེ་ས་ནཾ ཨ་སེ་ཀྑ་བྷཱ་གི་ཡཾ ཀ་ཏྭཱ ད་སྶེ་སི. ཏེ་ནཱ་ཧ ‘‘སེ་ཀྑཱ་སེ་ཀྑ་བྷཱུ་མི་ཡོ ནི་དྡི་ཊྛཱ’’ཏི.

དྷ་མྨ་ཀ་ཐི་ཀ་སུ་ཏྟ་ཝ་ཎྞ་ནཱ ནི་ཊྛི་ཏཱ.