(༡) ཨ་ཝི་པྤ་ཝཱ་ས་པ་ཉྷཱ་ཝ་ཎྞ་ནཱ
༤༧༩. སེ་ད་མོ་ཙི་ཀ་གཱ་ཐཱ་སཱུཏི ཨ་དྷི་པྤཱ་ཡ་ཏྠ་སྶ ག་མྦྷཱི་ར་ཏྟཱ ཏཾ ཙི་ནྟེ་ནྟཱ་ནཾ ཝི་ན་ཡ་དྷ་རཱ་ནཾ ཀཱ་ཡེ སེ་དཾ མོ་ཙེ་ཏཱི་ཏི སེ་ད་མོ་ཙི་ཀཱ, སཱ་ཡེ་ཝ གཱ་ཐཱ སེ་ད་མོ་ཙི་ཀ་གཱ་ཐཱ, ཏཱ་སུ. ‘‘ཨ་ཀ་པྤི་ཡ་ས་མྦྷོ་གོ ན ལ་བྦྷ་ཏཱི’’ཏི ཨི་མི་ནཱ ཀ་པྤི་ཡ་ས་མྦྷོ་གོ ལ་བྦྷ་ཏཱི་ཏི ད་སྶེ་ཏི. ཀ་པྤི་ཡ་ས་མྦྷོ་གཾ ད་སྶེ་ཏུཾ ‘‘ན་ཧཱ་པ་ན་བྷོ་ཛ་ནཱ་དཱི’’ཏི ཝུ་ཏྟཾ. ཨ་ནཱ་པ་ཏྟཱིཏི མཱ་ཏུ་བྷི་ཀྑུ་ནི་ཡཱ ཨ་ནཱ་པ་ཏྟི. ཨེ་སཱ པ་ཉྷཱཏི ཨེ་ཏྠ པ་ཉྷ་ས་དྡོ ས་བྷཱ་ཝ་ཏི་ལི་ངྒོ་ཏི ས་དྡ་ས་ཏྠེ་སུ (ས་དྡ་ནཱི་ཏི་དྷཱ་ཏུ་མཱ་ལཱ་ཡཾ ༡༦ ཧ་ཀཱ་ར་ནྟ་དྷཱ་ཏུ; ཨ་བྷི་དྷཱ་ན་པྤ་དཱི་པི་ཀཱ་ཡཾ ༡༡༥ གཱ་ཐཱ་ཡཾ) ཝུ་ཏྟོ, ཨི་དྷ ཨི་ཏྠི་ལི་ངྒ་ཝ་སེ་ན ཝུ་ཏྟོ. ‘‘པ་ཎྜི་ཏེ་ཧཱི’’ཏི ཨི་མི་ནཱ ཀུ་ས་ལ་སྶ ཀཱ་ར་ཎཾ ད་སྶེ་ཏི, པ་ཎྜི་ཏ་ཏྟཱ ཀུ་ས་ལོ་ཏི ཨ་དྷི་པྤཱ་ཡོ. ཨ་སྶཱཏི པ་ཉྷཱ་ཡ. ཨེ་ཏནྟི ཝི་སྶ་ཛྫ་ནཾ. ཨ་སྶཱཏི གཱ་ཐཱ་ཡ.
ཨེ་ཀཱ་ད་ས ཝི་ཝ་ཛྫི་ཡཱཏི ཨ་ཝི་བྷ་ཏྟི་ཀ་ནི་དྡེ་སོ, ཨེ་ཀཱ་ད་ས ཝི་ཝ་ཛྫི་ཡེ་ཏི ཨ་ཏྠོ. ཏེ་ན ཝུ་ཏྟཾ ‘‘ཡེ’’ཏི་ཨཱ་དི. ཏེ་པཱིཏི པི་ས་དྡོ གཱ་ཐཱ་ཡཾ ལུ་ཏྟ་ནི་དྡི་ཊྛ་ག་མྱ་མཱ་ན་བྷཱ་ཝཾ ད་སྶེ་ཏི.
ཨ་ཡནྟི ནྷཱ་པི་ཏ་པུ་བྦ་ཀོ བྷི་ཀྑུ. ནི་མྨི་ཏ་བུ་དྡྷནྟི བུ་དྡྷེ་ན ནི་མྨི་ཏཾ བུ་དྡྷ་རཱུ་པཾ.
ཝི་ཝ་ཛྫི་ཡཱཏི ཨེ་ཏྠ ཡ་ཀཱ་རོ ཏྭཱ་པ་ཙྩ་ཡ་སྶ ཀཱ་རི་ཡོ་ཏི ཨཱ་ཧ ‘‘ཝི་ཝ་ཛྫེ་ཏྭཱ’’ཏི. ཨ་སཱི་ས་ཀཾ ཡཾ ཏཾ ཀ་བ་ནྡྷཾ ཨ་ཏྠཱི་ཏི ཡོ་ཛ་ནཱ. ཨ་སཱི་ས་ཀ་ཏྟཱ ཀེ་ན ས་རཱི་རེ་ན ཛཱི་ཝི་ཏཾ བ་ནྡྷ་ཏཱི་ཏི ཀ་བ་ནྡྷོ. ཡ་སྶཱཏི ཀ་བ་ནྡྷ་སྶ.
ཧཱིཏི ས་ཙྩཾ. ཏེཏི ཨ་བྷ་བྦ་པུ་གྒ་ལཱ.
ཝཱ་ཙཱཏི ཨེ་ཏྠ ཡ་ཀཱ་ར་ལོ་པོ་ཏི ཨཱ་ཧ ‘‘ཝཱ་ཙཱ་ཡཱ’’ཏི. ཨི་ཏི མེཏི ཨེ་ཝཾ མ་མ. ཨེ་ཝཾ ཝ་ད་མཱ་ནེ མ་མ ཝ་ཙ་ན་ནྟི ཡོ་ཛ་ནཱ. ཨ་ཐ་ཝཱ ཨི་ཏི་མེཏི ཨེ་ཝཾ ཨི་མེ, ཨེ་ཝཾ ཝ་ད་མཱ་ནེ ཨི་མེ ཛ་ནཱ་ཏི ཡོ་ཛ་ནཱ. ས་དྡ་མྤཱི་ཏི ཨི་མི་ནཱ གི་ར་ས་དྡོ ས་དྡ་པ་རི་ཡཱ་ཡོ་ཏི ད་སྶེ་ཏི. ཧཱིཏི ས་ཙྩཾ. ཏུ་ཎྷཱི་བྷཱུ་ཏ་སྶ ནི་སི་ནྣ་སྶ ཏ་སྶ བྷི་ཀྑུ་ནོ་ཏི ཡོ་ཛ་ནཱ. ཡ་དི མ་ནོ་དྭཱ་རེ ཨཱ་པ་ཏྟི ནཱ་མ ན་ཏྠི, ཨེ་ཝཾ ས་ཏི ཀ་སྨཱ ཨཱ་པ་ཛྫེ་ཡྻ ཝཱ་ཙ་སི་ཀ་ནྟི ཝུ་ཏྟ་ནྟི ཨཱ་ཧ ‘‘ཡ་སྨཱ པ་ནཱ’’ཏི་ཨཱ་དི. ཏེ་ནཱཏི ཏ་སྨཱ. ཨ་སྶཱཏི བྷི་ཀྑུ་སྶ.
སཱཏི བྷི་ཀྑུ་ནཱི, ཨཱ་པ་ཛྫ་ཏཱི་ཏི ས་མྦ་ནྡྷོ. ཝུ་ཏྟ་པྤ་ཀཱ་རནྟི ‘‘གཱ་མ་ནྟ་ར་པ་རི་ཡཱ་པ་ནྣ’’ནྟི ཝུ་ཏྟ་པྤ་ཀཱ་རཾ.
ཏཱ་སཱུཏི དྭཱི་སུ བྷི་ཀྑུ་ནཱི་སུ.
ཙ་ཏུ་རོ ཛ་ནཱཏི ཨེ་ཏྠ ཙ་ཏུ་ནྣཾ ཛ་ནཱ་ནཾ ས་རཱུ་པཾ ད་སྶེ་ནྟོ ཨཱ་ཧ ‘‘ཨཱ་ཙ་རི་ཡོ ཙ ཏ་ཡོ ཙ ཨ་ནྟེ་ཝཱ་སི་ཀཱ’’ཏི. སཱ་ཧ་ཏྠི་ཀཱཏི ས་ཧ་ཏྠཱ ཨ་ཝ་ཧ་རི་ཏཱ. ཨཱ་ཎ་ཏྟི་ཡཱ་པཱིཏི ཨཱ་ཎ་ཏྟེ་ན ཨ་ཝ་ཧ་རི་ཏཱ་པི. ཨི་ཏ་རེ་སནྟི ཨ་ནྟེ་ཝཱ་སི་ཀཱ་ནཾ, ཨེ་ཀེ་ཀོ མཱ་ས་ཀོ་ཏི ས་མྦ་ནྡྷོ. ཨེ་ཏྠཱཏི པ་རི་ཝཱ་རེ སེ་ད་མོ་ཙི་ཀ་གཱ་ཐཱ་ཡཾ.