(༤) ཨ་ཝ་ནྡ་ནཱི་ཡ་པུ་གྒ་ལཱ་དི་ཝ་ཎྞ་ནཱ
༤༧༧. ཏེ་སནྟི ད་ས་ནྣཾ པུ་གྒ་ལཱ་ནཾ. ‘‘ས་དྡྷི’’ནྟི ཨི་མི་ནཱ སཱ་མཱི་ཙེ་ནཱཏི ཨེ་ཏྠ ས་ཧ་ཏྠེ ཀ་ར་ཎ་ཝ་ཙ་ན་ནྟི ད་སྶེ་ཏི. སཱ་མཱི་ཙེ་ནཱཏི ཙ སཱ་མཱི་ཙི་ནཱ ཀ་ཏྟ་བྦཾ སཱ་མཱི་ཙཾ ཀ་མྨཾ, ཏེ་ན སཱ་མཱི་ཙེ་ན. ད་ས ཙཱི་ཝ་ར་དྷཱ་ར་ཎཱཏི པ་ད་སྶ ས་མཱ་ས་བྷཱ་ཝཾ པ་ཊི་ཀྑི་པ་ནྟོ ཨཱ་ཧ ‘‘ད་ས དི་ཝ་སཱ་ནི ཨ་ཏི་རེ་ཀ་ཙཱི་ཝ་ར་སྶ དྷཱ་ར་ཎཱ’’ཏི.
ཀ་ཏི་ས་ཏནྟི་ཨཱ་དཱི་སུ དྭཱི་སུ གཱ་ཐཱ་པཱ་དེ་སུ ཙ་ཏཱུ་སུ ཝི་བྷ་ཏྱ་ནྟ་པ་དེ་སུ པུ་རི་མཾ པུ་རི་མེ་ན, པ་ཙྪི་མ་ཉྩ པ་ཙྪི་མེ་ན ཡ་ཐཱ་ཀྐ་མཾ ཡོ་ཛེ་ཏ་བྦ་ནྟི ད་སྶེ་ནྟོ ཨཱ་ཧ ‘‘ཀ་ཏི་ས་ཏཾ ཨཱ་པ་ཏྟི་ཡོ ར་ཏྟི་ས་ཏཾ ཚཱ་ད་ཡི་ཏྭཱ་ནཱ’’ཏི. པ་ཙྪི་མ་གཱ་ཐཱ་ཡ པུ་བྦ་ཌྜྷེ་པི ཨེ་སེ་ཝ ན་ཡོ. ཨ་ཡཾ ཧཱིཏི ཨ་ཡཾ ཨེ་ཝ ཝ་ཀྑ་མཱ་ནོ. ཨེ་ཏྠཱཏི གཱ་ཐཱ་ཡཾ. ཡོཏི བྷི་ཀྑུ, པ་ཊི་ཙྪཱ་དེ་ཏཱི་ཏི ས་མྦ་ནྡྷོ. ཨི་ཏཱིཏི ཨ་ཡཾ ས་ངྑེ་པ་ཏྠོ.
ཧེ་ཊྛཱ ཝུ་ཏྟེ་སུ ཙ་ཏཱུ་སུ ཙ་ཏུ་ཀྐེ་སུ དྷ་མྨེ་ན ས་མ་གྒཾ ཨ་པ་ནེ་ཏྭཱ དྭཱ་ད་ས ཀ་མྨ་དོ་སཱ ཝུ་ཏྟཱ་ཏི ད་ཊྛ་བྦཾ. ཨ་དྷ་མྨེ་ན ཝ་གྒ་ཀ་མྨཾ, ཨ་དྷ་མྨེ་ན ས་མ་གྒ་ཀ་མྨ་ནྟི ཡོ་ཛེ་ཏ་བྦཾ.
ཨེ་ཏྠཱཏི ཚ་སུ ཀ་མྨེ་སུ. ཨེ་ཏ་དེ་ཝཱཏི དྷ་མྨེ་ན ས་མ་གྒ་ཀ་མྨ་མེ་ཝ.
ཡཾ དེ་སི་ཏཱཏི ཨེ་ཏྠ ཡཾ་ས་དྡོ ཝ་ཙ་ན་ཝི་པ་ལླཱ་སོ་ཏི ཨཱ་ཧ ‘‘ཡཱ་ནི དེ་སི་ཏཱ་ནཱི’’ཏི. ‘‘དེ་སི་ཏཱ་ནཱི’’ཏི ཨི་མི་ནཱ དེ་སི་ཏཱཏི ཨེ་ཏྠ ནི་ཀཱ་ར་སྶ ཨཱ་ཀཱ་རཱ་དེ་ས་བྷཱ་ཝཾ ད་སྶེ་ཏི. ‘‘པ་རི་ཡ་ནྟ་པ་རི་ཙྪེ་ད་བྷཱ་ཝ་ར་ཧི་ཏ་ཏྟཱ’’ཏི ཨི་མི་ནཱ ན་ཏྠི ཨ་ནྟཾ པ་རི་ཡ་ནྟ་མེ་ཏ་སྶཱ་ཏི ཨ་ན་ནྟནྟི ཝ་ཙ་ན་ཏྠཾ ད་སྶེ་ཏི. ཏནྟི ནི་བྦཱ་ནཾ, ཛི་ཏ་ནྟི ས་མྦ་ནྡྷོ. ཀེ་ན ཀཾ ཀི་ནྟི ཀ་ཏྭཱ ཛི་ཏ་ནྟི ཨཱ་ཧ ‘‘བྷ་ག་ཝ་ཏཱ ཀི་ལེ་ས་ག་ཎཾ ཨ་བྷི་མ་དྡི་ཏྭཱ’’ཏི. ཀེ་ན ཀཾ ཀི་ནྟི ཀ་ཏྭཱ ཀིཾ ཛི་ཏཾ ཝི་ཡཱ་ཏི ཨཱ་ཧ ‘‘ར་ཉྙཱ ས་པ་ཏྟ་ག་ཎཾ ཨ་བྷི་མ་དྡི་ཏྭཱ ར་ཛྫཾ ཝི་ཡཱ’’ཏི. ཏ་ཏྠ ‘‘ར་ཉྙཱ’’ཏི ཨི་མི་ནཱ ‘‘ཀེ་ནཱ’’ཏི པུ་ཙྪཾ ཝི་སྶ་ཛྫེ་སི. ‘‘ས་པ་ཏྟ་ག་ཎ’’ནྟི ཨི་མི་ནཱ ‘‘ཀ’’ནྟི པུ་ཙྪཾ ཝི་སྶ་ཛྫེ་སི. ‘‘ཨ་བྷི་མ་དྡི་ཏྭཱ’’ཏི ཨི་མི་ནཱ ‘‘ཀི་ནྟི ཀ་ཏྭཱ’’ཏི པུ་ཙྪཾ ཝི་སྶ་ཛྫེ་སི. ‘‘ར་ཛྫ’’ནྟི ཨི་མི་ནཱ ‘‘ཀི’’ནྟི པུ་ཙྪཾ ཝི་སྶ་ཛྫེ་སི. ས་པ་ཏྟ་ག་ཎནྟི ཝེ་རི་ག་ཎཾ. ཨ་ཡཾ པ་ནེ་ཏྠ ཡོ་ཛ་ནཱ – ར་ཉྙཱ ས་པ་ཏྟ་ག་ཎཾ ཨ་བྷི་མ་དྡི་ཏྭཱ ར་ཛྫཾ རཱ་ཛ་བྷཱ་ཝཾ ཛི་ཏཾ ཝི་ཡ, བྷ་ག་ཝ་ཏཱ ཀི་ལེ་ས་ག་ཎཾ ཨ་བྷི་མ་དྡི་ཏྭཱ ནི་བྦཱ་ནཾ ཛི་ཏ་ནྟི. སྭེ་ཝཱཏི བྷ་ག་ཝཱ ཨེ་ཝ. ‘‘ནི་བྦི་ཀཱ་ར་ཏཱ་ཡཱ’’ཏི ཨི་མི་ནཱ ཏཱ་དི་ས་དྡོ ནི་བྦི་ཀཱ་ར་ཏྠ་ཝཱ་ཙ་ཀོ ཨ་ནི་པྥ་ནྣ་པཱ་ཊི་པ་དི་ཀོ་ཏི ད་སྶེ་ཏི. ‘‘ཝི་ཝེ་ཀ་པ་ཉྩ་ཀ’’ནྟི ཨི་མི་ནཱ ཀཱ་ཡ་ཙི་ཏྟ་ཨུ་པ་དྷི་ཝ་སེ་ན ཝི་ཝེ་ཀ་ཏྟ་ཡ་མྤི ག་ཧེ་ཏ་བྦཾ ཝི་ཝེ་ཀ་བྷཱ་ཝེ་ན ས་མཱ་ན་ཏྟཱ. ཏེ་ན བྷ་ག་ཝ་ཏཱ་ཏི ས་མྦ་ནྡྷོ. ‘‘ཡཱ་ནི ས་ཏྟ ཨཱ་པ་ཏྟི་ཀྑ་ནྡྷཱ་ནཱི’’ཏི ཨི་མི་ནཱ ཨེ་ཀེ་ཏྠཱཏི ཨེ་ཏྠ ཨེ་ཀ་ས་དྡ་སྶ ཝི་ས་ཡཾ ད་སྶེ་ཏི. ཏ་ཏྠཱཏི ས་ཏྟ་སུ ཨཱ་པ་ཏྟི་ཀྑ་ནྡྷེ་སུ. ཨེ་ཏྠ པ་ནཱཏི ས་མ་ཐེ་སུ པ་ན. ཧཱིཏི ས་ཙྩཾ. ཏ་སྶཱཏི ས་མྨུ་ཁཱ་ཝི་ན་ཡ་སྶ. ཨ་ཊྛ་ཀ་ཐཱ་སཱུཏི ས་བྦ་ཨ་ཊྛ་ཀ་ཐཱ་སུ. མ་ཡཾ པ་ནཱཏི ས་ངྒ་ཧ་ཀཱ་ར་ཀཱ ཨ་མྷེ པ་ན, བུ་དྡྷ་གྷོ་ས་ནཱ་མ་ཀཱ མ་ཡཾ པ་ནཱ་ཏི ཨ་ཏྠོ, རོ་ཙ་ཡཱ་མཱ་ཏི ས་མྦ་ནྡྷོ. ཀ་སྶ ཀི་མ་ཏྠཾ ག་ཧེ་ཏྭཱ རོ་ཙེ་སཱི་ཏི ཨཱ་ཧ ‘‘ཝི་ནཱ་ཏི ནི་པཱ་ཏ་སྶ པ་ཊི་སེ་དྷ་ན་མ་ཏྠ་མ་ཏྟ’’ནྟི. ‘‘ཝི་ནཱ་ཏི ནི་པཱ་ཏ་སྶཱ’’ཏི པ་དཾ ‘‘ཨ་ཏྠ་མ་ཏྟ’’ནྟི པ་དེ ཝཱ་ཙ་ཀ་ས་མྦ་ནྡྷོ. ཨ་ཏྟ་ནོ སཱ་དྷྱ་ཝ་ཙ་ནཾ བུ་དྡྷ་ཝ་ཙ་ན་ས་ངྑཱ་ཏེ་ན སཱ་དྷ་ཀ་ཝ་ཙ་ནེ་ན སཱ་དྷེ་ནྟོ ཨཱ་ཧ ‘‘ཝུ་ཏྟ་མྤི ཙེ་ཏ’’ནྟི་ཨཱ་དི.
ཨ་ཊྛཱ་ར་ས ཨ་ཊྛ་ཀཱ་ནཱིཏི ཨ་དྷ་མྨ་དི་ཊྛི་བྷེ་ད, དྷ་མྨ་དི་ཊྛི་བྷེ་ད, ཝེ་མ་ཏི་ཀ་བྷེ་དེ་སུ ཏཱི་སུ ཨེ་ཀ་མེ་ཀཾ མཱུ་ལཾ ཀ་ཏྭཱ ཏ་ཡོ ཏ་ཡོ མཱུ་ལིཾ ཀ་ཏྭཱ ན་ཝ ཧོ་ནྟི, ཏེ་སུ དྷ་མྨ་དི་ཊྛི་བྷེ་དེ་སུ དྷ་མྨ་དི་ཊྛི་བྷེ་དཾ ཨ་པ་ནེ་ཏྭཱ ཨ་ཊྛ ཧོ་ནྟི, ཏཱ་ནི ཨ་ཊྛཱ་ར་ས བྷེ་ད་ཀ་ར་ཝ་ཏྠཱུ་སུ ཡོ་ཛེ་ཏྭཱ ཨ་ཊྛཱ་ར་ས ཨ་ཊྛ་ཀཱ་ནི ཧོ་ནྟཱི་ཏི ད་ཊྛ་བྦཾ. ཚ་ཨཱུ་ན་དི་ཡ་ཌྜྷ་ས་ཏནྟི ཙ་ཏུ་ཙ་ཏྟཱ་ལཱི་སཱ་དྷི་ཀཾ ས་ཏ་ནྟི ཝུ་ཏྟཾ ཧོ་ཏི.
ཨེ་ཀེ་ཀ་ཝ་ཏྠུ་སྨིནྟི ཨ་ཊྛཱ་ར་ས་སུ བྷེ་ད་ཀ་ར་ཝ་ཏྠཱུ་སུ ཨེ་ཀེ་ཀ་སྨིཾ ཝ་ཏྠུ་སྨིཾ.
ཨི་ཏི གཱ་ཐཱ་ས་ངྒ་ཎི་ཀ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.