༡༠. ཙོ་ད་ཀ་ཙུ་དི་ཏ་ཀ་པ་ཊི་སཾ་ཡུ་ཏྟ་ཀ་ཐཱ

༤༠༡. ཨ་ཛ྄ཛྷ་ཏྟནྟི ཨེ་ཏྠ ཨ་ཏྟ་ས་དྡ་སྶ ཙི་ཏྟ་ཝཱ་ཙ་ཀ་བྷཱ་ཝ་ཉྩ ས་ཏྟ་མཱི་ཝི་བྷ་ཏྟི་ཡཱ་པི ཨ་མཱ་དེ་ས་བྷཱ་ཝ་ཉྩ ད་སྶེ་ནྟོ ཨཱ་ཧ ‘‘ཨ་ཏྟ་ནོ ཙི་ཏྟེ’’ཏི. ཨུ་པྤཱ་དེ་ཏྭཱཏི ཨི་མི་ནཱ ‘‘མ་ན་སི་ཀ་རི་ཏྭཱ’’ཏི པ་ད་སྶ ཨ་དྷི་པྤཱ་ཡ་ཏྠཾ ད་སྶེ་ཏི. ཀཱ་རུ་ཉྙ་ཏཱཏི ཨེ་ཏྠ དྭཱི་སུ ཎྱ་པ་ཙྩ་ཡ་ཏཱ་པ་ཙྩ་ཡེ་སུ ཨེ་ཀ་སྶེ་ཝ བྷཱ་ཝ་ཝཱ་ཙ་ཀ་ཏྟཱ ཨེ་ཀོ སྭ་ཏྠོ་ཏི ད་སྶེ་ནྟོ ཨཱ་ཧ ‘‘ཀ་རུ་ཎ་བྷཱ་ཝོ’’ཏི. ཏ་ཏྠ ཀ་རུ་ཎ་སྶ པུ་གྒ་ལ་སྶ བྷཱ་ཝོ ཀཱ་རུ་ཉྙཾ, ཏ་དེ་ཝ ཀཱ་རུ་ཉྙ་ཏཱ. ཨ་ཐ ཝཱ ཀ་རུ་ཎོ ཨེ་ཝ པུ་གྒ་ལོ ཀཱ་རུ་ཉྙཾ, ཏ་སྶ བྷཱ་ཝོ ཀཱ་རུ་ཉྙ་ཏཱ་ཏི ཝ་ཙ་ན་ཏྠོ ཀཱ་ཏ་བྦོ. ཨི་མི་ནཱཏི ‘‘ཀཱ་རུ་ཉྙ་ཏཱ’’ཏི པ་དེ་ན. ཀ་རུ་ཎ་ཉྩཱཏི ཨ་པྤ་ནཱ་པ་ཏྟཾ ཀ་རུ་ཎ་ཉྩ. ཀ་རུ་ཎཱ་པུ་བྦ་བྷཱ་ག་ཉྩཱཏི ཨ་པྤ་ནཱ་པ་ཏྟཱ་ཡ ཀ་རུ་ཎཱ་ཡ པུ་བྦ་བྷཱ་གེ པ་རི་ཀ་མྨཱུ་པ་ཙཱ་ར་ཝ་སེ་ན པ་ཝ་ཏྟཾ ཀཱ་མཱ་ཝ་ཙ་ར་ཀ་རུ་ཎ་ཉྩ. དྭཱི་ཧི་པཱིཏི ‘‘ཧི་ཏེ་སི་ཏཱ, ཨ་ནུ་ཀ་མྤི་ཏཱ’’ཏི དྭཱི་ཧི་པི པ་དེ་ཧི. མེ་ཏྟ་ཉྩཱཏི ཨ་པྤ་ནཱ་པ་ཏྟ་མེ་ཏྟ་ཉྩ. མེ་ཏྟཱ་པུ་བྦ་བྷཱ་ག་ཉྩཱཏི ཨ་པྤ་ནཱ་པ་ཏྟཱ་ཡ མེ་ཏྟཱ་ཡ པུ་བྦ་བྷཱ་གེ པ་རི་ཀ་མྨཱུ་པ་ཙཱ་ར་ཝ་སེ་ན པ་ཝ་ཏྟཾ ཀཱ་མཱ་ཝ་ཙ་ར་མེ་ཏྟ་ཉྩ. སུ་དྡྷ་ནྟེཏི སུ་དྡྷེ ཀོ་ཊྛཱ་སེ. པ་ཊི་ཉྙཾ ཨཱ་རོ་པེ་ཏྭཱཏི ཙུ་དི་ཏ་ཀཾ པ་ཊི་ཉྙཾ ཨཱ་རོ་པེ་ཏྭཱ. ཡེ ཨེ་ཏེཏི ‘‘ཀཱ་རུ་ཉྙ་ཏཱ’’ཏི་ཨཱ་དི་ནཱ ན་ཡེ་ན ཡེ ཨེ་ཏེ པ་ཉྩ དྷ་མྨཱ ཝུ་ཏྟཱ་ཏི ཡོ་ཛ་ནཱ. ཨི་མི་ནཱ ཨི་མེ པ་ཉྩ དྷ་མྨེཏི ཨེ་ཏྠ ཨི་མ་ས་དྡ་སྶ ཨ་ནི་ཡ་མ་ནི་དྡེ་ས་བྷཱ་ཝཾ ད་སྶེ་ཏི.

ས་ཙྩེ ཙ ཨ་ཀུ་པྤེ ཙཱཏི ཨེ་ཏྠ ས་ཙྩ་ས་དྡ་སྶ ཝི་ར་ཏི་ས་ཙྩ་པ་ར་མ་ཏྠ་ས་ཙྩཱ་ནི པ་ཊི་ཀྑི་པ་ནྟོ ཨཱ་ཧ ‘‘ཝ་ཙཱི་ས་ཙྩེ ཙཱ’’ཏི. ‘‘ཨ་ཀུ་པྤ་ན་ཏཱ་ཡཱ’’ཏི ཨི་མི་ནཱ ན་ཀུ་པ་སྶ བྷཱ་ཝོ ཨ་ཀུ་པྤནྟི ཀ་ཏྭཱ ཎྱ་པ་ཙྩ་ཡ་སྶ བྷཱ་ཝ་ཏྠཾ ད་སྶེ་ཏི. ཧཱིཏི ས་ཙྩཾ, ཝི་ཏྠཱ་རོ ཝཱ. ན པ་རོ གྷ་ཊྚེ་ཏ་བྦོཏི ན པ་རོ ཀུ་ཛ྄ཛྷཱ་པེ་ཏ་བྦོ. ས་བྦ་ཏྠཱཏི ས་བྦ་སྨིཾ པཱ་ཏི་མོ་ཀྑ་ཊྛ་པ་ན་ཀྑ་ནྡྷ་ཀེ.

ཨི་ཏི པཱ་ཏི་མོ་ཀྑ་ཊྛ་པ་ན་ཀྑ་ནྡྷ་ཀ་ཝ་ཎྞ་ནཱ་ཡ ཡོ་ཛ་ནཱ ས་མ་ཏྟཱ.