༨༧. པཱ་རི་སུ་དྡྷི་དཱ་ན་ཀ་ཐཱ

༡༦༤. ཡེ་ན ཀེ་ན་ཙི ཨ་ངྒ་པ་ཙྩ་ངྒེ་ན ཝི་ཉྙཱ་པེ་ཏཱིཏི པ་ཊི་ཝ་ཙ་ནཾ ནི་ཙྪཱ་རེ་ཏུ་མ་ས་ཀྐོ་ནྟོ ཡེ་ན ཀེ་ན་ཙི ཨ་ངྒ་པ་ཙྩ་ངྒེ་ན ཝི་ཉྙཱ་པེ་ཏི. ཨུ་བྷ་ཡ་ཐཱཏི ཨུ་བྷ་ཡེ་ཧི ཀཱ་ཡ་ཝཱ་ཙཱ་ས་ངྑཱ་ཏེ་ཧི ཨཱ་ཀཱ་རེ་ཧི. ཀཱ་ཡ་ཝཱ་ཙཱ་ཧི ཝི་ཉྙཱ་པེ་ཏཱི་ཏི ས་མྦ་ནྡྷོ. ས་བྦེཏི ཨ་ཁི་ལཱ གི་ལཱ་ནཱ. ཧ་ཏྠ་པཱ་སེཏི ས་ངྒྷ་སྶ ཧ་ཏྠ་པཱ་ས་མྷི. ས་ཙེ དཱུ་རེ ཧོ་ནྟཱིཏི ས་ཙེ བ་ཧཱུ གི་ལཱ་ནཱ ཨ་ཉྙ་མ་ཉྙཾ དཱུ་རེ ཧོ་ནྟི. ཏཾ དི་ཝ་སནྟི ཏ་སྨིཾ ས་ངྒྷ་ཨ་པྤ་ཧོ་ན་ཀ་དི་ཝ་སེ.

ཏ་ཏྠེ་ཝ པ་ཀྐ་མ་ཏཱིཏི ཨེ་ཏྠ ནི་སྶ་ཀྐ་ཏྠེ ཐ་པ་ཙྩ་ཡོ་ཏི ཨཱ་ཧ ‘‘ཏ་ཏོ་ཝཱ’’ཏི, པཱ་རི་སུ་དྡྷི་ཧཱ་ར་ཊྛཱ་ན་ཏོ ཨེ་ཝཱ་ཏི ཨ་ཏྠོ. ‘‘ག་ཙྪ་ཏཱི’’ཏི ཨི་མི་ནཱ ཀ་མུ་དྷཱ་ཏུ་ཡཱ པ་ད་ཝི་ཀྑེ་པ་ཏྠཾ ད་སྶེ་ཏི, ‘‘ཀ་ཏྠ་ཙཱི’’ཏི ཨི་མི་ནཱ ཏ་སྶ ཀ་མྨཾ. སཱ་མ་ཎེ་རོ པ་ཊི་ཛཱ་ནཱ་ཏཱིཏི་ཨཱ་དཱི་སུ པ་ཊི་ཛཱ་ན་ནཱ་ཀཱ་ར་ཏྠ་སྶ ཨི་ཏི་ས་དྡ་སྶ ལོ་པ་བྷཱ་ཝཾ ད་སྶེ་ནྟོ ཨཱ་ཧ ‘‘སཱ་མ་ཎེ་རོ ཨ་ཧ’’ནྟི ཨེ་ཝཾ པ་ཊི་ཛཱ་ནཱ་ཏཱི’’ཏི་ཨཱ་དི. བྷཱུ་ཏཾ་ཡེ་ཝཱཏི ཝི་ཛྫ་མཱ་ནཾ་ཡེ་ཝ. ས་བྦ་ཏྠཱཏི ས་བྦེ་སུ ‘‘སི་ཀྑཾ པ་ཙྩ་ཀྑཱ་ཏ་ཀོ པ་ཊི་ཛཱ་ནཱ་ཏཱི’’ཏི་ཨཱ་དཱི་སུ.

ས་བྦ་ནྟི་མེ་ན པ་རི་ཙྪེ་དེ་ན ཙ་ཏུ་ནྣཾ བྷི་ཀྑཱུ་ན་ནྟི ས་མྦ་ནྡྷོ. ས་བྦ་ཏྠཱཏི ས་བྦེ་སུ ‘‘ས་ངྒྷ་པྤ་ཏྟོ ཝི་བྦྷ་མ་ཏཱི’’ཏི་ཨཱ་དཱི་སུ. ཨེ་ཏྠཱཏི པཱ་རི་སུ་དྡྷི་ཧ་ར་ཎེ. བ་ཧཱུ་ན་མྤཱིཏི ཨེ་ཏྠ པི་ས་དྡེ་ན ཨེ་ཀེ་ན ཨེ་ཀ་སྶཱ་པི, བ་ཧཱུ་ཧི ཨེ་ཀ་སྶཱ་པི, བ་ཧཱུ་ཧི བ་ཧཱུ་ན་མྤི ཨཱ་ཧ་ཊཱ པཱ་རི་སུ་དྡྷི ཨཱ་ཧ་ཊཱ་ཝ ཧོ་ཏཱི་ཏི ད་སྶེ་ཏི. སོཏི པཱ་རི་སུ་དྡྷི་ཧཱ་ར་ཀོ བྷི་ཀྑུ. ཡེ་སནྟི བྷི་ཀྑཱུ་ནཾ. ཏ་སྶེ་ཝཱཏི པཱ་རི་སུ་དྡྷི་ཧཱ་ར་ཀ་སྶེ་ཝ. ཨི་ཏ་རཱ པ་ནཱཏི ཨི་ཏ་རེ་སཾ པཱ་རི་སུ་དྡྷི པ་ན. བི་ལཱ༹་ལ་ས་ངྑ་ལི་ཀཱཏི ཨེ་ཏྠ བི་ལཱ༹་ལོཏི ཨཱ་ཁུ་བྷུ་ཛོ. སོ ཧི བི་ལཱ༹་ས་ཡཾ ཨཱ་ཁུཾ ག་ཎྷི་ཏུཾ ཨ་ལ་ཏི ས་མ་ཏྠེ་ཏཱི་ཏི བི་ལཱ༹་ལོ་ཏི ཝུ་ཙྩ་ཏི. ས་ངྑ་ལི་ཀཱཏི ཨེ་ཏཾ ས་ཏྟཱ་ནཾ བ་ནྡྷ་ནཱུ་པ་ཀ་ར་ཎ་ཝི་སེ་ས་སྶ ནཱ་མཾ. བི་ལཱ༹་ལ་སྶ ས་ངྑ་ལི་ཀཱ ཏེ་ན ས་མྦ་ནྡྷ་ས་མྦ་ནྡྷི་བྷཱ་ཝེ་ན ས་མྦ་ནྡྷ་ཏྟཱ་ཏི བི་ལཱ༹་ལ་ས་ངྑ་ལི་ཀཱ. ཨི་དཾ ཨུ་པ་ལ་ཀྑ་ཎ་མ་ཏྟཾ ཡེ་སཾ ཀེ་ས་ཉྩི ས་ངྑ་ལི་ཀཱ་ཡ ག་ཧེ་ཏ་བྦ་ཏྟཱ. ཏཱ་ཡ ས་དི་སཱ བི་ལཱ༹་ལ་ས་ངྑ་ལི་ཀཱ པཱ་རི་སུ་དྡྷཱི་ཏི ཨ་ཏྠོ. ཨི་དཾ པ་ནེ་ཏྠ ཨོ་པ་མྨ་སཾ་ས་ནྡ་ནཾ – ཡ་ཐཱ ས་ངྑ་ལི་ཀཱ་ཡ པ་ཋ་མཾ ཝ་ལ་ཡཾ དུ་ཏི་ཡཾ་ཡེ་ཝ ཝ་ལ་ཡཾ པཱ་པུ་ཎཱ་ཏི, ན ཏ་ཏི་ཡཾ, ཨེ་ཝ་མེ་ཝ པ་ཋ་མཾ དི་ནྣཱ པཱ་རི་སུ་དྡྷི དུ་ཏི་ཡ་མེ་ཝ པཱ་པུ་ཎཱ་ཏི, ན ཏ་ཏི་ཡ་ནྟི.

ཨཱ་ག་ནྟྭཱཏི ས་ངྒྷ་སྶ ཧ་ཏྠ་པཱ་སཾ ཨཱ་ག་ནྟྭཱ. པཱ་ལི༹་ཡཾ སུ་ཏྟོ ན ཨཱ་རོ་ཙེ་ཏཱིཏི་ཨཱ་དཱི་སུ ཧེ་ཏྭ་ཏྠེ པ་ཙྩ་ཏྟ་ཝ་ཙ་ནཾ. སུ་ཏྟེ་ན ནཱ་རོ་ཙེ་ཏཱི་ཏི ཧི ཨ་ཏྠོ. པཱ་རི་སུ་དྡྷི་ཧཱ་ར་ཀ་སྶ ཨ་ནཱ་པ་ཏྟཱིཏི ཨེ་ཏྠ ཨཱ་པ་ཏྟཱི་ཏི ཨ་ནྭ་ཡ་ཏྠཾ ཨ་ཏྠཱ་པ་ཏྟི་ཏོ ད་སྶེ་ནྟོ ཨཱ་ཧ ‘‘ས་ཙེ…པེ… ཨཱ་པ་ཛྫ་ཏཱི’’ཏི. ཨ་སྶཱཏི བྷི་ཀྑུ་སྶ. ཨུ་བྷི་ནྣ་མྤཱིཏི པཱ་རི་སུ་དྡྷི་དཱ་ཡ་ཀ་སྶ, ཏཾ་ཧཱ་ར་ཀ་སྶ ཙཱ་ཏི ཨུ་བྷི་ནྣ་མྤི.