༨༨. ཚ་ནྡ་དཱ་ན་ཀ་ཐཱ

༡༦༥. ཚ་ནྡ་དཱ་ནེ་པི ཝི་ནི་ཙྪ་ཡོ ཝེ་དི་ཏ་བྦོ་ཏི ཡོ་ཛ་ནཱ. ཨུ་པོ་ས་ཐོ ཀ་ཏོ ཧོ་ཏཱིཏི པཱ་རི་སུ་དྡྷི་དཱ་ཡ་ཀ་སྶ ཙ ས་ངྒྷ་སྶ ཙ ཨུ་པོ་ས་ཐོ ཀ་ཏོ ཧོ་ཏི. ཨ་ཉྙནྟི ཨུ་པོ་ས་ཐ་ཀ་མྨ་ཏོ ཨ་ཉྙཾ. ཡཾ པ་ན ཀ་མྨ་ནྟི ས་མྦ་ནྡྷོ. ཀ་མྨ་མྤཱིཏི ཨུ་པོ་ས་ཐ་ཀ་མྨ་ཏོ ཨ་ཉྙཾ ཀ་མྨ་མྤི. ཨེ་ཏྠ ཙ ཏ་ད་ཧུ་པོ་ས་ཐེ ཨ་ཏྟ་ནོ ཙ ས་ངྒྷ་སྶ ཙ ས་ཙེ ཨུ་པོ་ས་ཐ་ཀ་མྨཾ ཧོ་ཏི, པཱ་རི་སུ་དྡྷི་ཡེ་ཝ དཱ་ཏ་བྦཱ. ཨ་ཐ ཨ་ཉྙཾ ཀ་མྨཾ ཧོ་ཏི, ཚ་ནྡོ་ཡེ་ཝ དཱ་ཏ་བྦོ. ཡ་དི ཨུ་པོ་ས་ཐ་ཀ་མྨ་ཉྩ ཨ་ཉྙ་ཀ་མྨ་ཉྩ ཧོ་ཏི, པཱ་རི་སུ་དྡྷི ཙ ཚ་ནྡོ ཙ དཱ་ཏ་བྦོ. ཏཾ ས་ནྡྷཱ་ཡ ཝུ་ཏྟཾ ‘‘ཏ་ད་ཧུ་པོ་ས་ཐེ པཱ་རི་སུ་དྡྷིཾ དེ་ནྟེ་ན ཚ་ནྡ་མྤི དཱ་ཏུ’’ནྟི. སཱི་མཱ་ཡ ཝཱཏི བ་དྡྷ་སཱི་མཱ་ཡ ཝཱ. ཨ་ཙྪི་ཏུནྟི ཨུ་པ་ཝེ་སི་ཏུཾ. ‘‘ཨཱ་ས ཨུ་པ་ཝེ་ས་ནེ’’ཏི ཧི དྷཱ་ཏུ་པཱ་ཋེ་སུ (ས་དྡ་ནཱི་ཏི་དྷཱ་ཏུ་མཱ་ལཱ་ཡཾ ༡༦ ས་ཀཱ་ར་ནྟ་དྷཱ་ཏུ) ཝུ་ཏྟཾ. སཱ་མ་གྒཱི ཝཱཏི ཀཱ་ཡ་སཱ་མ་གྒཱི ཝཱ.

༡༦༧. ས་ར་ཏི་པི ཨུ་པོ་ས་ཐཾ, ན་པི ས་ར་ཏཱིཏི ཨེ་ཏྠ པི་ས་དྡ་སྶ ཨ་ནི་ཡ་མ་ཝི་ཀ་པྤ་ཏྠཾ ད་སྶེ་ཏུཾ ཝུ་ཏྟཾ ‘‘ཨེ་ཀ་དཱ ས་ར་ཏི, ཨེ་ཀ་དཱ ན ས་ར་ཏཱི’’ཏི. ‘‘ཨེ་ཀ་ནྟ’’ནྟི ཨི་མི་ནཱ ནེ་ཝ ས་ར་ཏཱིཏི ཨེ་ཏྠ ཨེ་ཝ་ས་དྡ་སྶ ས་ནྣི་ཊྛཱ་ན་ཏྠཾ ད་སྶེ་ཏི. ཀ་མྨཾ ན ཀོ་པེ་ཏཱིཏི ས་མྨུ་ཏི་ལ་དྡྷོ་པི ཨ་ལ་དྡྷོ་པི ཨུ་མྨ་ཏྟ་ཀོ ཀ་མྨཾ ན ཀོ་པེ་ཏི.