༡༠༡. ལི་ངྒཱ་དི་ད་སྶ་ན་ཀ་ཐཱ
༡༧༩. ‘‘ཨཱ་ཝཱ་སི་ཀཱ་ནཾ ཨཱ་ཀཱ་ར’’ནྟི ཨི་མི་ནཱ ཨཱ་ཝཱ་སི་ཀཱ་ཀཱ་རནྟི པ་ད་སྶ ཚ་ཊྛཱི་ས་མཱ་སཾ ད་སྶེ་ཏི. ས་བྦ་ཏྠཱཏི ས་བྦེ་སུ ‘‘ཨཱ་ཝཱ་སི་ཀ་ལི་ངྒ’’ནྟི་ཨཱ་དཱི་སུ. ཡེ་ནཱཏི སུ་པ་ཉྙ་ཏྟ་མ་ཉྩ་པཱི་ཋཱ་དི་ནཱ, ག་ཎྷ་ཏཱི་ཏི ས་མྦ་ནྡྷོ. ཏེ་སནྟི ཨཱ་ཝཱ་སི་ཀཱ་ནཾ. ཨཱ་ཙཱ་ར་ས་ཎྛཱ་ནནྟི ཨཱ་ཙཱ་ར་ས་ཎྛི་ཏིཾ. སོ སུ་པ་ཉྙ་ཏྟ་མ་ཉྩ་པཱི་ཋཱ་དི་ཀོ ཨཱ་ཀཱ་རོ ནཱ་མཱ་ཏི ཡོ་ཛ་ནཱ. ཡནྟི སུ་པ་ཉྙ་ཏྟ་མ་ཉྩ་པཱི་ཋཱ་དིཾ, ག་མ་ཡ་ཏཱི་ཏི ས་མྦ་ནྡྷོ. ཏ་ཏྠ ཏ་ཏྠཱཏི ཏ་སྨིཾ ཏ་སྨིཾ ཋཱ་ནེ. ལཱི་ནེ ཨཱ་ཝཱ་སི་ཀེ་ཏི ས་མྦ་ནྡྷོ. ཏཾ སུ་པ་ཉྙ་ཏྟ་མ་ཉྩ་པཱི་ཋཱ་དི ལི་ངྒཾ ནཱ་མཱ་ཏི ཡོ་ཛ་ནཱ. ‘‘ཨ་དི་སྶ་མཱ་ནེ’’ཏི ཨི་མི་ནཱ ལཱི་ནེ་ཏི པ་ད་སྶ ཨ་ཏྠཾ ད་སྶེ་ཏི. ‘‘ཛཱ་ནཱ་པེ་ཏཱི’’ཏི ཨི་མི་ནཱ ག་མ་ཡ་ཏཱིཏི པ་ད་སྶ ཉཱ་ཎ་ཏྠཾ ད་སྶེ་ཏི. ཡནྟི སུ་པ་ཉྙ་ཏྟ་མ་ཉྩ་པཱི་ཋཱ་དིཾ. ཏེཏི ཨཱ་ཝཱ་སི་ཀཱ. ཏཾ སུ་པ་ཉྙ་ཏྟ་མ་ཉྩ་པཱི་ཋཱ་དི ནི་མི་ཏྟཾ ནཱ་མཱ་ཏི ཡོ་ཛ་ནཱ. ཡེ་ནཱཏི སུ་པ་ཉྙ་ཏྟ་མ་ཉྩ་པཱི་ཋཱ་དི་ནཱ. ཏེཏི ཨཱ་ཝཱ་སི་ཀཱ ཨུ་དྡི་སི་ཡ་ནྟི, སོ སུ་པ་ཉྙ་ཏྟ་མ་ཉྩ་པཱི་ཋཱ་དི་ཀོ ཨུ་དྡེ་སོ ནཱ་མཱ་ཏི ཡོ་ཛ་ནཱ. ཨི་མེ་ཧི པ་དེ་ཧི ཨཱ་ཀི་རི་ཡ་ནྟི པ་ཀཱ་སི་ཡ་ནྟི ཨེ་ཏེ་ནཱ་ཏི ཨཱ་ཀཱ་རོ, ལཱི་ནེ ག་མ་ཡ་ཏི བོ་དྷེ་ཏཱི་ཏི ལི་ངྒཾ. ནི་མི་ཡ་ནྟི པ་རི་ཙྪི་ཛྫ ཉཱ་ཡ་ནྟི ཨེ་ཏེ་ནཱ་ཏི ནི་མི་ཏྟཾ, ཨུ་དྡི་སི་ཡ་ནྟི ཨ་པ་དི་སི་ཡ་ནྟི ཨེ་ཏེ་ནཱ་ཏི ཨུ་དྡེ་སོཏི ཝ་ཙ་ན་ཏྠཾ ད་སྶེ་ཏི. ས་བྦ་མེ་ཏནྟི ‘‘ཨཱ་ཝཱ་སི་ཀཱ་ཀཱ་ར’’ནྟི་ཨཱ་དི ཨེ་ཏཾ ས་བྦཾ. ཡ་ཐཱ་ཡོ་གནྟི པཱ་ལི༹་ཡཾ ཡོ་གཱ་ནུ་རཱུ་པཾ. ཏ་ཏྠཱཏི ཨཱ་ག་ནྟུ་ཀཱ་ཀཱ་རཱ་དཱི་སུ. ‘‘ཨ་མྷཱ་ཀཾ ཨི་ད’’ནྟི ན ཉཱ་ཏ་བྦ་ནྟི ཨ་ཉྙཱ་ཏཾ, ཏ་དེ་ཝ ཨ་ཉྙཱ་ཏ་ཀཾ, ནི་སཱི་ད་ནཱ་དི. ‘‘ཨ་མྷཱ་ཀཾ ཨི་ད’’ནྟི ཨ་ཛཱ་ན་ནཾ ནཱ་མ ཨ་ཏྟ་ནོ ཨ་ས་ནྟ་ཀ་ཏྟཱ, ཨ་ཉྙེ་ས་མེ་ཝ ས་ནྟ་ཀ་ཏྟཱ ཧོ་ཏཱི་ཏི ཨཱ་ཧ ‘‘ཨ་ཉྙེ་སཾ ས་ནྟ་ཀ’’ནྟི. ཨུ་ད་ཀ་ནི་སྶེ་ཀནྟི སི་ཉྩ་ན་ཝི་ར་ཧི་ཏཾ ཨུ་ད་ཀཾ. བ་ཧུ་ཝ་ཙ་ན་སྶཱཏི ‘‘དྷོ་ཏཱ་ན’’ནྟི ཨེ་ཏྠ ཚ་ཊྛཱི་བ་ཧུ་ཝ་ཙ་ན་སྶ. ཨེ་ཀ་ཝ་ཙ་ནནྟི ‘‘དྷོ་ཏ་སྶཱ’’ཏི ཨེ་ཀ་ཝ་ཙ་ནཾ. པ་ཙྪི་མ་པཱ་ཋེ མ་ལཾ དྷུ་ནཱ་ཏི ཨ་ནེ་ནཱ་ཏི དྷོ་ཏཾ, དྷོ་ཏ་ཉྩ ཏཾ ཨུ་ད་ཀ་ཉྩེ་ཏི དྷོ་ཏ་ཨུ་ད་ཀཾ, ཏ་མེ་ཝ ནི་སྶེ་ཀཾ དྷོ་ཏ་ཨུ་ད་ཀ་ནི་སྶེ་ཀཾ.
༡༨༠. ས་མཱ་ན་སཾ་ཝཱ་ས་ཀ་དི་ཊྛིནྟི པ་ད་སྶ ཨི་ཏི་ལོ་པ་ས་མཱ་སཾ ད་སྶེ་ནྟོ ཨཱ་ཧ ‘‘ས་མཱ་ན་སཾ་ཝཱ་ས་ཀཱ ཨེ་ཏེ་ཏི དི་ཊྛི’’ནྟི. ཨེ་ཏེཏི ཨཱ་ཝཱ་སི་ཀཱ བྷི་ཀྑཱུ. ‘‘ལ་དྡྷི’’ནྟི ཨི་མི་ནཱ ན པུ་ཙྪ་ནྟཱིཏི པ་ད་སྶ ཀ་མྨཾ ད་སྶེ་ཏི. ནཱ་ནཱ་སཾ་ཝཱ་ས་ཀ་བྷཱ་ཝནྟི ཏེ་སཾ ལ་དྡྷི་ནཱ་ནཱ་སཾ་ཝཱ་ས་ཀ་བྷཱ་ཝཾ. ‘‘མ་དྡི་ཏུ’’ནྟི ཨི་མི་ནཱ ནཱ་བྷི་ཝི་ཏ་ར་ནྟཱིཏི ཨེ་ཏྠ ཨ་བྷི་ས་དྡ་སྶ་ཏྠཾ ད་སྶེ་ཏི. ‘‘ཨ་བྷི་བྷ་ཝི་ཏུ’’ནྟི ཨི་མི་ནཱ ཙ ཏ་དེ་ཝ་ཏྠཾ ད་སྶེ་ཏི. ནཱ་ནཱ་སཾ་ཝཱ་ས་ཀ་བྷཱ་ཝ་སྶ མ་དྡ་ནཾ ནཱ་མ ལ་དྡྷི་ནི་སྶ་ཛྫཱ་པ་ན་ནྟི ཨཱ་ཧ ‘‘ཏཾ དི་ཊྛིཾ ན ནི་སྶ་ཛྫཱ་པེ་ནྟཱི’’ཏི.