༤. ཙཱུ་ལ༹་གོ་པཱ་ལ་ཀ་སུ་ཏྟ་ཝ་ཎྞ་ནཱ

༣༥༠. ཙེ་ལུ་ཀྐཱ་ཧཱིཏི ཙེ་ལ་མ་ཡཱ་ཧི ཨུ་ཀྐཱ་ཧི. ཨུ་ཀྐ་བྷཱུ་ཏཱ་ནི ཙེ་ལཱ་ནི ཨེ་ཏྠཱ་ཏི ཨུ་ཀྐ་ཙེ་ལཱ, ན་ག་རཾ. ས་བྦཱ ག་ངྒཱ པཱ་ཀ་ཊཱ ཧུ་ཏྭཱ པ་ཉྙཱ་ཡ་ཏཱིཏི པ་ཀ་ཏི་ཙ་ཀྑུ་སྶ པཱ་ཀ་ཊཱ ཧུ་ཏྭཱ ཨུ་པ་ཊྛཱ་ཏི, དི་བྦ་ཙ་ཀྑུ་སྶ པ་ན ས་མ་ནྟ་ཙ་ཀྑུ་སྶ ཝཱ ཡ་ཏྠ ཀ་ཏྠ་ཙི ནི་སི་ནྣ་སྶ་པི བྷ་ག་ཝ་ཏོ པཱ་ཀ་ཊཱ ཧུ་ཏྭཱ པ་ཉྙཱ་ཡ་ཏེ་ཝ. སོ་ཏྠཱིཏི ཨ་ནུ་པ་དྡ་ཝོ. ཝ་ཌྜྷཱིཏི ཨ་པ་རི་ཧཱ་ནི. ཨཱ་རོ་གྱནྟི ཨ་རོ་ག་ཏཱ ཨཱ་བཱ་དྷཱ་བྷཱ་ཝོ.

མ་ག་དྷོ ཛ་ན་པ་དོ ནི་ཝཱ་སོ ཨེ་ཏ་སྶཱ་ཏི མཱ་ག་དྷོ, མཱ་ག་དྷོ་ཝ མཱ་ག་དྷི་ཀོ. པ་ཉྙཱ་ཡ ནཱ་མ དུ་ཊྛུ་བྷཱ་ཝོ ན་ཏྠི ཨེ་ཀ་ནྟཱ་ན་ཝ་ཛྫ་ཏཱ་ཡ, ཏ་སྨཱ དུ-ས་དྡོ ཨ་བྷཱ་ཝ་ཝཱ་ཙཱི ‘‘དུ་སྶཱི་ལོ’’ཏི་ཨཱ་དཱི་སུ ཝི་ཡ, ཛཱ་ཏི-ས་དྡོ ཙ ས་བྷཱ་ཝ་ཏྠོ་ཏི ཨཱ་ཧ ‘‘ནི་པྤ་ཉྙ་ས་བྷཱ་ཝོ’’ཏི. -ས་དྡོ ཨཱ་ར་མྦྷ་ཏྠོ་ཏི ཨཱ་ཧ ‘‘པ་ཏཱ་རེ་སཱི་ཏི ཏཱ་རེ་ཏུཾ ཨཱ་ར་བྷཱི’’ཏི པ་ར་ཏཱི་རཾ གཱ་ཝཱི་ནཾ ཨ་པྤ་ཏྟ་ཏྟཱ. སུ་ཝི་དེ་ཧཱ་ནནྟི སུ་ནྡ་ར་ཝི་དེ་ཧཱ་ནཾ. ཝི་དེ་ཧ་ར་ཊྛཾ ཀི་ར བྷཱུ་མི་བྷཱ་ག་ད་སྶ་ན་ས་མྤ་ཏྟི་ཡཱ ཙ ཝ་ན་རཱ་མ་ཎེ་ཡྻ་ཀཱ་དི་ནཱ ཙ སུ་ནྡ་རཾ. ཨཱ་མ་ཎྜ་ལི་ཀཾ ཀ་རི་ཏྭཱཏི ཨཱ་ཝ་ཏྟེ པ་ཏི་ཏཱ ཏེ་མ་ཎྜ་ལཱ་ཀཱ་རེ་ན པ་རི་བྦྷ་མི་ཏྭཱ. ཀ་ཏི་པ་ཡཱ་པི གཱ་ཝི་ཡོ ཨ་སེ་སེ་ཏྭཱ ན་དཱི་སོ་ཏེ་ན ཝཱུ་ལ༹ྷ་ཏྟཱ ཝུ་ཏྟཾ ‘‘ཨ་ཝ་ཌྜྷིཾ ཝི་ནཱ་སཾ པཱ་པུ་ཎིཾ་སཱུ’’ཏི. ཀ་ཏི་པ་ཡཱ་སུ་པི ཧི ཨ་ཝ་སི་ཊྛཱ་སུ གཱ་ཝཱི་སུ ཨ་ནུ་ཀྐ་མེ་ན་པི སི་ཡཱ གོ་ག་ཎ་སྶ ཝ་ཌྜྷཱི་ཏི. ཝི་སྶ་མ་ཊྛཱ་ནནྟི པ་རི་སྶ་མ་ཝི་ནོ་ད་ན་ཊྛཱ་ནཾ. ཏི་ཏྠཱ བྷ་ཊྛཱཏི ག་ཧེ་ཏུཾ ཨ་ས་མ་ཏྠ་ཏཱ་ཡ ཏི་ཏྠཾ ཨ་པྤ་ཏྟཱ. ཨ་རོ་གོ ནཱ་མ ནཱ་ཧོ་སཱིཏི ལོ་མ་མ་ཏྟ་མྤི ཨ་སེ་སེ་ཏྭཱ ས་བྦཱ གཱ་ཝི་ཡོ ན་དཱི་སོ་ཏེ ཝི་ན་ཊྛཱ་ཏི ཨ་ཏྠོ.

ཡེ་སུ ཁ་ནྡྷཱ་ཡ་ཏ་ན་དྷཱ་ཏཱུ་སུ ཨི་དྷ ལོ་ཀ་ས་མ་ཉྙཱ, ཏེ ཨ་ཛཱ་ན་ནྟཱ ‘‘ཨ་ཀུ་ས་ལཱ ཨི་མ་སྶ ལོ་ཀ་སྶཱ’’ཏི ཝུ་ཏྟཱ་ཏི ཨཱ་ཧ ‘‘ཨི་དྷ་ལོ་ཀེ ཁ་ནྡྷ་དྷཱ་ཏཱ་ཡ་ཏ་ནེ་སུ ཨ་ཀུ་ས་ལཱ ཨ་ཚེ་ཀཱ’’ཏི. ཨ་ཡ་མེ་ཝ ན་ཡོ ‘‘ཨ་ཀུ་ས་ལཱ པ་ར་སྶ ལོ་ཀ་སྶཱ’’ཏི ཨེ་ཏྠཱ་པཱི་ཏི ཨཱ་ཧ ‘‘པ་ར་ལོ་ཀེ་པི ཨེ་སེ་ཝ ན་ཡོ’’ཏི. མཱ་རོ ཨེ་ཏྠ དྷཱི་ཡ་ཏཱི་ཏི མཱ་ར་དྷེ་ཡྻཾ. མཱ་རོཏི ཙེ་ཏྠ ཀི་ལེ་ས་མཱ་རོ ཝེ་དི་ཏ་བྦོ. ཁ་ནྡྷཱ་བྷི་ས་ངྑཱ་རཱ ཧི ཏ་སྶ པ་ཝ་ཏྟ་ན་བྷཱ་ཝེ་ན ག་ཧི་ཏཱ, མ་ཙྩུ་མཱ་རོ ཝི་སུཾ ག་ཧི་ཏོ ཨེ་ཝ, ཀི་ལེ་ས་མཱ་ར་ཝ་སེ་ནེ་ཝ ཙ དེ་ཝ་པུ་ཏྟ་མཱ་ར་སྶ ཀཱ་མ་བྷ་ཝེ ཨཱ་དྷི་པ་ཙྩ་ནྟི. ཏེ་སནྟི ཡེ ཨི་དྷ་ལོ་ཀཱ་དཱི་སུ ཨ་ཚེ་ཀཱ, ཏེ་སཾ. ཏེ པ་ན ཨུ་ཀྐ་ཊྛ་ནི་དྡེ་སེ་ན ད་སྶེ་ནྟོ ཨཱ་ཧ ‘‘ཨི་མི་ནཱ ཚ ས་ཏྠཱ་རོ ད་སྶི་ཏཱ’’ཏི.

༣༥༡. བ་ལ་ཝ་གཱ་ཝོཏི བ་ལ་ཝ་ནྟེ གོ་རཱུ་པེ. ཏེ པ་ན ད་མྨ་ཏཾ ཨུ་པ་ག་ཏ་གོ་ཎཱ ཙེ་ཝ དྷེ་ནུ་ཡོ ཙཱ་ཏི ཨཱ་ཧ ‘‘ད་ནྟ་གོ་ཎེ ཙེ་ཝ དྷེ་ནུ་ཡོ ཙཱ’’ཏི. ཨ་ཝི་ཛཱ་ཏ་གཱ་ཝོ་ཏི ན ཝི་ཛཱ་ཏ་གཱ་ཝི་ཡོ. ཝ་ཙྪ་ཀེཏི ཁུ་དྡ་ཀ་ཝ་ཙྪེ. ཨ་པྤ་ཏྠོ ཧི ཨ་ཡཾ ཀ-ས་དྡོ. ཏེ་ནཱ་ཧ ‘‘ཏ་རུ་ཎ་ཝ་ཙྪ་ཀེ’’ཏི. ཀི་སཱ་བ་ལ་ཀེཏི དུ་བྦ་ལེ.

༣༥༢. མཱ་ར་སྶ ཏ་ཎྷཱ་སོ་ཏཾ ཚེ་ཏྭཱཏི ཁ་ནྡྷ་མཱ་ར་ས་མྦ་ནྡྷཱི་ཏ་ཎྷཱ་ས་ངྑཱ་ཏཾ སོ་ཏཾ ས་མུ་ཙྪི་ནྡི་ཏྭཱ. ཏ་ཡོ ཀོ་ཊྛཱ་སེ ཁེ་པེ་ཏྭཱ ཋི་ཏཱཏི ཨ་ནཱ་གཱ་མི་ནོ ས་ནྡྷཱ་ཡཱ་ཧ. ས་བྦ་ཝཱ་རེ་སཱུཏི ས་ཀ་དཱ་གཱ་མི་སོ་ཏཱ་པ་ནྣ་ཨ་ཊྛ་མ་ཀ་ཝཱ་རེ་སུ. ཏ་ཏྠ པ་ན ཡ་ཐཱ་ཀྐ་མཾ ཙ་ཏུ་མ་གྒ་ཝ་ཛ྄ཛྷཱ་ནཾ ཀི་ལེ་སཱ་ནཾ དྭེ ཀོ་ཊྛཱ་སེ ཁེ་པེ་ཏྭཱ ཋི་ཏཱ, ཨེ་ཀ་ཀོ་ཊྛཱ་སཾ ཁེ་པེ་ཏྭཱ ཋི་ཏཱ, པ་ཋ་མཾ ཀོ་ཊྛཱ་སཾ ཁེ་པེ་ནྟོ་ཏི ཝ་ཏྟ་བྦཾ. དྷ་མྨཾ ཨ་ནུ་སྶ་ར་ནྟི, དྷ་མྨ་སྶ ཝཱ ཨ་ནུ་སྶ་ར་ཎ་སཱི་ལཱ་ཏི དྷ་མྨཱ་ནུ་སཱ་རི་ནོ. དྷ་མྨོཏི ཙེ་ཏྠ པ་ཉྙཱ ཨ་དྷི་པྤེ་ཏཱ. ས་དྡྷཾ ཨ་ནུ་སྶ་ར་ནྟི, ས་དྡྷཱ་ཡ ཝཱ ཨ་ནུ་སྶ་ར་ཎ་སཱི་ལཱ་ཏི ས་དྡྷཱ་ནུ་སཱ་རི་ནོ.

ཛཱ་ན་ཏཱཏི ཨེ་ཏྠ ཛཱ་ན་ན་ཀི་རི་ཡཱ་ཝི་ས་ཡ་སྶ ཨ་ཝི་སེ་སི་ཏ་ཏྟཱ ཨ་དྷི་ཀཱ་ར་ཝ་སེ་ན ཨ་ན་ཝ་སེ་ས་ཉེ་ཡྻ་ཝི་སེ་སཱ ཨ་དྷི་པྤེ་ཏཱ་ཏི ཨཱ་ཧ ‘‘ས་བྦ་དྷ་མྨེ ཛཱ་ན་ནྟེ་ནཱ’’ཏི. ཨ་ནྟོ་སཱ་ར་ཝི་ར་ཧ་ཏོ ཨ་བྦྷུ་གྒ་ཏ་ཊྛེ་ན ཙ ན་ལོ༹ ཝི་ཡཱ་ཏི ན་ལོ༹, མཱ་ནོ་ཏི ཨཱ་ཧ ‘‘ཝི་ག་ཏ་མཱ་ན་ན་ལ༹ཾ ཀ་ཏ’’ནྟི. ཁེ་མཾ པ་ཏྠེ་ཐཱཏི ཨེ་ཏྠ ཙ་ཏཱུ་ཧི ཡོ་གེ་ཧི ཨ་ནུ་པ་དྡ་ཝ་ཏྟཱ ‘‘ཁེ་མ’’ནྟི ཨ་ར་ཧ་ཏྟཾ ཨ་དྷི་པྤེ་ཏཾ. པ་ཏྠ་ནཱ ཙ ཚ་ནྡ་པ་ཏྠ་ནཱ, ན ཏ་ཎྷཱ་པ་ཏྠ་ནཱ་ཏི ཨཱ་ཧ ‘‘ཀ་ཏྟུ་ཀ་མྱ་ཏཱ་ཚ་ནྡེ་ན ཨ་ར་ཧ་ཏྟཾ པ་ཏྠེ་ཐཱ’’ཏི. པ་ཏྟཱ་ཡེ་ཝ ནཱ་མ ཏ་སྶ པ་ཏྟི་ཡཱ ན ཀོ་ཙི ཨ་ནྟ་རཱ་ཡོ. སོ་ཏྠི་ནཱ པཱ་ར་ག་མ་ནཾ ཨུ་དྡི་སྶ དེ་ས་ནཾ ཨཱ་ར་བྷི་ཏྭཱ ཁེ་མ་པྤ་ཏྟི་ཡཱ དེ་ས་ནཱ་ཡ པ་རི་ཡོ་སཱ་པི་ཏ་ཏྟཱ ཡ་ཐཱ་ནུ་ས་ནྡྷི་ནཱ་ཝ དེ་ས་ནཾ ནི་ཊྛཱ་པེ་སཱིཏི.

ཙཱུ་ལ༹་གོ་པཱ་ལ་ཀ་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ ས་མ་ཏྟཱ.