༡༠. ཙཱུ་ལ༹་སཱ་རོ་པ་མ་སུ་ཏྟ་ཝ་ཎྞ་ནཱ

༣༡༢. པི་ངྒ་ལ་དྷཱ་ཏུ་ཀོཏི པི་ངྒ་ལ་ས་བྷཱ་ཝོ པི་ངྒ་ལ་ཙྪ་ཝི་ཀོ, པི་ངྒ་ལ་ཀྑོ་ཏི ཝཱ ཨ་ཏྠོ. པ་བྦ་ཛི་ཏ་ས་མཱུ་ཧ་ས་ངྑཱ་ཏོ ས་ངྒྷོ, ན སཱི་ལཱ་དི་གུ་ཎེ་ཧི ས་ངྒ་ཧི་ཏ་བྦ་བྷཱ་ཝེ་ན. ས་ངྒྷོ ཨེ་ཏེ་སཾ ཨ་ཏྠི པ་རི་ཝཱ་ར་བྷཱུ་ཏོ་ཏི ས་ངྒྷི་ནོ. སྭེ་ཝཱཏི སོ ཨེ་ཝ པ་བྦ་ཛི་ཏ་ས་མཱུ་ཧ་ས་ངྑཱ་ཏོ. ཨཱ་ཙཱ་ར་སི་ཀྑཱ་པ་ན་ཝ་སེ་ནཱཏི ཨ་ཏྟ་ནཱ པ་རི་ཀ་པྤི་ཏ་ཨ་ཙེ་ལ་ཝ་ཏཱ་དི་ཨཱ་ཙཱ་ར་སི་ཀྑཱ་པ་ན་ཝ་སེ་ན. པ་ཉྙཱ་ཏཱཏི ཡ་ཐཱ་ས་ཀཾ ས་མཱ་དི་ནྣ་ཝ་ཏ་ཝ་སེ་ན ཙེ་ཝ ཝི་ཉྙཱ་ཏ་ལ་དྡྷི་ཝ་སེ་ན ཙ པ་ཉྙཱ་ཏཱ. ལ་དྡྷི་ཀ་རཱཏི ཏ་སྶཱ མི་ཙྪཱ་དི་ཊྛི་ཡཱ ཨུ་པྤཱ་ད་ཀཱ. བ་ཧུ་ཛ་ན་སྶཱཏི པུ་ཐུ་ཛ་ན་སྶ. ཏ་སྶ པ་ན ཨཱ་ག་མ་ས་མྤ་དཱ་པི ནཱ་མ ན་ཏྠི, ཀུ་ཏོ ཨ་དྷི་ག་མོ་ཏི ཨེ་ཀཾ་ས་ཏོ ཨ་ནྡྷ་པུ་ཐུ་ཛྫ་ནོ ཨེ་ཝཱ་ཏི ཨཱ་ཧ ‘‘ཨ་སྶུ་ཏ་ཝ་ཏོ ཨ་ནྡྷ་བཱ་ལ་པུ་ཐུ་ཛྫ་ན་སྶཱ’’ཏི. ན ཧི ཝི་ཉྙཱུ ཨ་པྤ་སཱ་ད་ནཱི་ཡེ པ་སཱི་ད་ནྟི. མ་ངྒ་ལེ་སུ ཀཱ་ཏ་བྦ་དཱ་ས་ཀི་ཙྩ་ཀ་རོ དཱ་སོ མ་ངྒ་ལ་དཱ་སོ.

ཏ་ནྟཱ་ཝུ་ཏཱ་ནནྟི ཏ་ནྟེ པ་སཱ་རེ་ཏྭཱ ཝཱི་ཏཱ་ནཾ. ག་ཎྛ་ན་ཀི་ལེ་སོཏི སཾ་སཱ་རེ བ་ནྡྷ་ན་ཀི་ལེ་སོ. ཨེ་ཝཾ ཝཱ་དི་ཏཱ་ཡཱཏི ཨེ་ཝཾ པ་ཊི་ཉྙ་ཏཱ་ཡ, ཨེ་ཝཾ དི་ཊྛི་ཏཱ་ཡ ཝཱ. ནི་ཡྻཱ་ནི་ཀཱཏི ནི་ཡྻཱ་ན་ག་ཏི་ས་པྤཱ་ཊི་ཧཱི་ར་ཀཱ ཨ་ནུ་པཱ་ར་མྦྷ་བྷཱུ་ཏ་ཏྟཱ་ཏི ཨ་དྷི་པྤཱ་ཡོ. ནོ ཙེ ནི་ཡྻཱ་ནི་ཀཱ་ཏི ཨཱ་ནེ་ཏྭཱ ཡོ་ཛ་ནཱ. ཏེ་སཾ ས་བྦ་ཉྙུ་པ་ཊི་ཉྙཱ་ཡ ཨ་བྷཱུ་ཏ་ཏྟཱ ཏ་སྶཱ ཨ་བྷཱུ་ཏ་བྷཱ་ཝ་ཀ་ཐ་ནེ་ན ཏ་སྶ བྲཱ་ཧྨ་ཎ་སྶ ན ཀཱ་ཙི ཨ་ཏྠ་སི་དྡྷཱི་ཏི ཨཱ་ཧ ‘‘ནེ་སཾ ཨ་ནི་ཡྻཱ་ནི་ཀ་བྷཱ་ཝ་ཀ་ཐ་ནེ་ན ཨ་ཏྠཱ་བྷཱ་ཝ་ཏོ’’ཏི.

༣༡༨. ནི་ཧཱི་ན་ལོ་ཀཱ་མི་སེ ལཱི་ནོ ཨ་ཛ྄ཛྷཱ་ས་ཡོ ཨེ་ཏ་སྶ, ན པ་ན ནི་བྦཱ་ནེ་ཏི. ལཱི་ན་ཛ྄ཛྷཱ་ས་ཡོ. སཱ་ས་ནཾ སི་ཐི་ལཾ ཀ་ཏྭཱ ག་ཎྷཱ་ཏི སི་ཀྑཱ་ཡ ན ཏི་བྦ་གཱ་ར་ཝ་ཏྟཱ.

༣༢༣. ཧེ་ཊྛཱཏི ཨ་ན་ནྟ་རཱ་ཏཱི་ཏ་སུ་ཏྟེ མ་ཧཱ་སཱ་རོ་པ་མེ. པ་ཋ་མ་ཛ྄ཛྷཱ་ནཱ་དི་དྷ་མྨཱ ཝི་པ་སྶ་ནཱ་པཱ་ད་ཀཱཏི ཝི་པ་སྶ་ནཱ་ཡ པ་ད་ཊྛཱ་ན་བྷཱུ་ཏཱ. ཨི་དྷཱཏི ཨི་མ་སྨིཾ ཙཱུ་ལ༹་སཱ་རོ་པ་མེ ཨཱ་ག་ཏཱ. ནི་རོ་དྷ་པཱ་ད་ཀཱཏི ཨ་ནཱ་གཱ་མི་ནོ, ཨ་ར་ཧ་ནྟོ ཝཱ ནི་རོ་དྷ་ས་མཱ་པ་ཏྟིཾ ས་མཱ་པ་ཛྫི་ཏུཾ ས་མ་ཏྠཱ. ཏ་སྨཱཏི ནི་རོ་དྷ་པཱ་ད་ཀ་ཏྟཱ. པ་ཋ་མ་ཛ྄ཛྷཱ་ནཱ་དི་དྷ་མྨཱ ཉཱ་ཎ་ད་སྶ་ན་ཏོ ཨུ་ཏྟ་རི་ཏ་རཱཏི ཝེ་དི་ཏ་བྦཱ.

ཙཱུ་ལ༹་སཱ་རོ་པ་མ་སུ་ཏྟ་ཝ་ཎྞ་ནཱ་ཡ ལཱི་ན་ཏྠ་པྤ་ཀཱ་ས་ནཱ ས་མ་ཏྟཱ.

ནི་ཊྛི་ཏཱ ཙ ཨོ་པ་མྨ་ཝ་གྒ་ཝ་ཎྞ་ནཱ.