༢. ཏི་པུ་ཀྑ་ལ་ན་ཡ་ཝ་ཎྞ་ནཱ

ཏ་ཐཱ ཝུ་ཏྟ་ན་ཡེ་ན ས་རཱུ་པ་ཏོ པ་རི་ཡཱ་ཡ་ཏོ ཙ ག་ཧི་ཏེ་སུ ཏ་ཎྷཱ་ཝི་ཛྫཱ་ཏ་པྤ་ཀྑི་ཡ་དྷ་མྨེ་སུ ཏ་ཎྷཱ ལོ་བྷོ, ཨ་ཝི་ཛྫཱ མོ་ཧོ, ཨ་ཝི་ཛྫཱ་ཡ ས་མྤ་ཡུ་ཏྟོ ལོ་ཧི་ཏེ ས་ཏི པུ་བྦོ ཝི་ཡ ཏ་ཎྷཱ་ཡ ས་ཏི སི་ཛ྄ཛྷ་མཱ་ནོ ཨཱ་གྷཱ་ཏོ དོ་སོ, ཨི་ཏི ཏཱི་ཧི ཨ་ཀུ་ས་ལ་མཱུ་ལེ་ཧི ག་ཧི་ཏེ་ཧི, ཏ་པྤ་ཊི་པ་ཀྑ་ཏོ མ་ཉྙ་ནཱ་པ་ཊི་ཀྑེ་པ་པ་རི་ཉྙཱ་ག་ཧ་ཎཱ་དཱི་ཧི ཙ ཀུ་ས་ལ་མཱུ་ལཱ་ནི སི་དྡྷཱ་ནི་ཡེ་ཝ ཧོ་ནྟི. ཨི་དྷཱ་པི ‘‘ལོ་བྷོ ས་བྦཱ་ནི ཝཱ སཱ་ས་ཝ་ཀུ་ས་ལཱ་ཀུ་ས་ལ་མཱུ་ལཱ་ནི ས་མུ་ད་ཡ་ས་ཙྩཾ, ཏེ་ཧི ནི་བྦ་ཏྟཱ, ཏེ་སཾ ཨ་དྷི་ཊྛཱ་ན་གོ་ཙ་ར་བྷཱུ་ཏཱ ཙ ཨུ་པཱ་དཱ་ན་ཀྑ་ནྡྷཱ དུ་ཀྑ་ས་ཙྩ’’ནྟི་ཨཱ་དི་ནཱ ས་ཙྩ་ཡོ་ཛ་ནཱ ཝེ་དི་ཏ་བྦཱ. ཕ་ལཾ པ་ནེ་ཏྠ ཏ་ཡོ ཝི་མོ་ཀྑཱ, ཏཱི་ཧི པ་ན ཨ་ཀུ་ས་ལ་མཱུ་ལེ་ཧི ཏི་ཝི་དྷ་དུ་ཙྩ་རི་ཏ-སཾ་ཀི་ལེ་ས་མ་ལ-ཝི་ས་མ་ཨ་ཀུ་ས་ལ-ས་ཉྙཱ-ཝི་ཏ་ཀྐཱ་དི་ཝ་སེ་ན ཨ་ཀུ་ས་ལ་པ་ཀྑོ ནེ་ཏ་བྦོ. ཏ་ཐཱ ཏཱི་ཧི ཀུ་ས་ལ་མཱུ་ལེ་ཧི ཏི་ཝི་དྷ་སུ་ཙ་རི་ཏ-ས་མ་ཀུ་ས་ལ-ས་ཉྙཱ-ཝི་ཏ་ཀྐ-ས་དྡྷ་མྨ-ས་མཱ་དྷི-ཝི་མོ་ཀྑ་མུ་ཁ-ཝི་མོ་ཀྑཱ-དི་ཝ་སེ་ན ཀུ་ས་ལ་པ་ཀྑོ ནེ་ཏ་བྦོ་ཏི. ཨ་ཡཾ ཏི་པུ་ཀྑ་ལ་སྶ ན་ཡ་སྶ བྷཱུ་མི.